31/08/2026
عمرك لا تستعجل نهار و تحكم على ملاعبي والا مدرب من ماتش والا اثنين ..
مثلا اغبولي في التحضيرات كان بعيد على مستواه , وحتى لقاء الملعب التونسي ما وجعش القدام ..
ضد جرجيس كان أحسن لاعب في المباراة و قدم 2 أسيست لأهداف الساياساس ..
ان شاء الله يخدم أكثر ويكون من أفضل اللاعبين هذا الموسم ..
على فكرة في الكاف نشوف لولاندو 9 صحيح و يكون هو وراه 9.5 و يكون هجوم نار ...
🔵⚪ إيمانيال أوغبولي.. نحكموا عليه بالموسم الكل موش بماتش واحد
الموسم الفارط إيمانيال أوغبولي سجل عدة أهداف بطرق مختلفة ومتنوعة.. باليمنى، باليسرى، بالرأس، على الطاير، وحتى في وضعيات صعيبة.. وكان ديما حربي، يتحرك برشا ويقلق المدافعين، خاصة كي كان يلعب مع عمر بن علي.
أما البارح، بصراحة، بان عليه التعب برشا بعد تحضيرات بداية الموسم. ما كانش بنفس الحدة المعتادة، تحركاته كانت أثقل، وما قدرش يوجع المدافعين كيف العادة.. وحتى الكرة اللي جاتو على 6 أمتار والشباك شبه فارغة ما نجّمش يحطها.
لكن ما يلزمش نكبّروا الموضوع. هذا ماتش ودي، وفي بداية الموسم، والهدف الأساسي من المقابلات هاذي هو التصليح، اكتشاف النقائص، وزيادة العمل البدني والتكتيكي قبل الرسميات.
إيمانيال عندو رصيد الموسم الفارط، واللي شفناه البارح ما يكفيش باش نحكموا عليه.
لكن في نفس الوقت، مع تدعيم الخط الأمامي بالمهاجم الأجنبي الجديد، نتصور الفريق مازال محتاج مهاجم تونسي آخر.
موش خاطر إيمانيال ما ينجمش، بالعكس، أما خاطر الموسم طويل وبرشا مقابلات: البطولة، الكأس، ومسابقات الكاف.. ومع تعدد المسابقات، الإصابات والإرهاق واردين، وما تنجمش تدخل موسم كامل بمهاجمين فقط.
لازم تكون عندك حلول أكثر في الدكة، ومهاجم تونسي آخر ينجم يدخل ينافس، يعاون، ويعطيك حلول وقت الحاجة.
الموسم طويل.. واللي يحب ينافس على أكثر من جبهة، لازم يكون عندو أفكتيف متوازن وعندو البدائل. 🔵⚪
