Penya Barcelonista Bizerte - رابطة مشجعي برشلونة ببنزرت, Bizerte (2026)

13/02/2026

صباح الخير

بعد ماتش البارح قاعد نشوف في إنتقاد لهانزي فليك و تحميل كبير ليه بالمسؤولية و خطة الدفاع المتقدم كأنو هي السبب الأوحد و الرئيسي في النتائج السلبية و كل ماتش كبير خسرناه

كرأي شخصي و نشوف أنو الأقرب للواقع

مشجعي برشلونة عامة و الصحافة غير مقتنعين أن الرصيد البشري فيه برشا لاعبين ماهمش في حجم التطلعات و المستوى متاعهم ميخولهمش يلعبو في برشلونة و المستوى العالي

فليك كيف جاء وجد هذي الجودة ماللاعبين المتواضعة و مشاكل اقتصادية تقف ضد أنو يقوم بتغييرات جذرية في الفريق ياخي قام بتطبيق نظام لعب الدفاع المتقدم بش يغطي على عيوب لاعبيه إلي مفروض عليه يلعبهم خاتر معندهمش بديل جاهز كان بعض الشباب من اللاماسيا إلي مستحيل تدفع بيهم في الفريق الأول حتى كان وجدت عندهم الجودة يبقاو غير مستعدين و لازم يصير الإندماج في الفريق خطوة بخطوة

الدفاع المتقدم ماهوش فكرة غبية يطبق فيها فليك من راسو و مكبش فيها كيما قاعد نشوف في أغلب الناس لي تحكي هي فكرة تتطلب مجموعة من التصرفات إلي لازم الحداش جوار يلتزم بيهم بش يقرب الخطوط (الدفاع و الوسط و الهجوم) و تنقص المساحة على الخصم و تسهل المهمة على الفريق كسرعة إستعادة الكرة و إيجاد حلول سهلة لتمرير و الضغط العالي في مناطق الخصم و غيرها ...

جورات كيما جيرارد مارتين و كاسادو و كوبارسي و إيريك غارسيا إلي هما يمثلو خط دفاعك الأول جورات ضعاف في وظيفتهم الأولى و هي الأداء الدفاعي ، جورات ضعاف دفاعيا و كان موش نظام فليك و في أنظمة لعب أخرى ميلقاوش رواحهم و سهل مراوغتهم خاتر معندهمش الجودة الدفاعية اللازمة لكن بالطبيعة تجميل صحافة برشلونة ليهم أنهم لاعبين يعرفو يلعبو بالكرة و يبنيو اللعب و و و لكن هذي أمور ثانوية و وظيفتهم تصبح دون معنى كان ميقوموش بدورهم الرئيسي (الدفاع)

الدفاع المتقدم و نظام فليك حتى و إن كان عندو عيوبو دفاعيا إلا أنو يجعل الفريق يخلق العديد من الفرص الخطيرة حتى فريق في العالم ماني نشوف فيه يخلق في فرص سانحة للتسجيل قد برشلونة و هذا يخلينا حتى كان نقبلو زوز نمركيو أربعة و صارت برشا مرات لهذا في ظل الإنتصارات هذي تغطي على العيوب

لكن في حالة غياب أهم اللاعبين هجوميا كبيدري و رافينها فعالية خلق الفرص السانحة تنقص بشكل كبير و مع إنعدام اللاعبين المهاريين إلي يقدرو يفسخولك مدافعين و يخلقو مساحات في دفاع الخصم هذا يجيبني لحاجة كنت معارضها مالأول و هي شراء لاعبين كيما فيران توريس و داني أولمو الزوز تكلفو علينا ب 120 مليون يورو منغير منجيبو جوار بالخصال لي حكيتلكم عليها يهز الحمل شوية على لامين لكن أحنا مشينا جبنا مهاجم ب 60 مليون ميجمش يتجاوز مدافع و يعرف كان يشوط و هذي حاجة ثانوية و لا تنفع في حالات كيف يكون الفريق في وضع سيئ ولا يلعب ضد فرق ذات جودة عالية .

لهذا نشوف أنو لوم المدرب على تفاصيل العناد في أسلوب اللعب ماهوش في محلو بالعكس لازم ندافعو عليه و ندعموه بلاعبين يخدمو الأسلوب هذا موش نبيعو أحسن مدافع الموسم الماضي و منعوضوهش

23/01/2026

إبريما تونكارا تذكرو هذا الإسم 🔴🔵

اليوم وقع عقد إحترافي في عمر ال15 الأسبوع الماضي لعب مع الفريق الرديف و إن شاء الله في قادم الأيام يعمل بدايتو في الفريق الأول .

اللاعب يشغل خطة لاعب وسط هجومي 10 و جناح أيسر و أيمن نظرا لقدرته على اللعب بالقدمين بنفس الجودة إن شاء الله نحن على موعد موهبة كبيرة في كرة القدم و اللاماسيا ديما ولادة ❤️💙