Republic of Somaliland

𝐖𝐀𝐑 𝐒𝐀𝐗𝐀𝐀𝐅𝐀𝐃𝐄𝐄𝐃

Fadhigii 59-aad ee Shirka Golaha Wasiirrada Jammhuuriyadda Somaliland oo uu Shir-gudoominayey Madaxweynaha Jamhuuriyadda Somaliland Mudane Cabdiraxmaan Maxamed Cabdillaahi (Cirro), ayaa maanta ka qabsoomay Qasriga Madaxtooyada Somaliland.

Fadhigii 59-aad ee Shirka Golaha Wasiirrada JSL waxa lagaga wada hadlay qodobo muhiim ah oo ay ka mid ahaayeen:

𝟏) 𝐒𝐨𝐨 𝐝𝐡𝐚𝐰𝐞𝐲𝐧𝐭𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐞𝐞 𝐖𝐚𝐬𝐢𝐢𝐫𝐫𝐚𝐝𝐚 𝐂𝐮𝐬𝐮𝐛:

Madaxweynaha Jamhuuriyadda Somaliland Mudane Cabdiraxmaan Maxamed Cabdilaahi (Cirro) ayaa si rasmi ah Golaha Wasiirrada ugu soo dhaweeyey Wasiirrada cusub ee uu dhawaan u magacaabay xilalka, kuwaasi oo kala ah:

1. Mudane Aadan Geeddi Qayaad, Wasiirka W. Horumarinta Beeraha JSL,

2. Mudane Maxamed Cabdimaalik Axmed, Wasiirka W. Horumarinta Biyaha JSL,

3. Mudane Dr. Cabdisalaan Xuseen Cawaale, Wasiirka W. Isgaadhsiinta iyo Teknoolajiyadda JSL,

4. Mudane Barkhad Jaamac Xirsi Batuun, Wasiirka W. Warfaafinta, Dhaqanka iyo Wacyigelinta JSL.

Xubnaha cusub ee Wasiirrada ayaa hadallo kooban ka jeediyey fadhigii maanta, iyaga oo Madaxweynaha uga mahad celiyey kalsoonida uu xilka ugu igmaday, Madaxweynahana ka
codsaday in uu u duceeyo in Alle SWT ku asturo xilalka Qaranka.

Dhinaca kale, Wasiirrada cusubi waxa ay ballan-qaadeen in ay xilalkooda u gudan doonaan si daacadnimo, hufnaan iyo masuuliyad Qaran leh, iyaga oo mudnaanta koowaad siin doona danaha guud ee dalka iyo dadka Jamhuuriyadda Somaliland.

𝟐) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐀𝐦𝐧𝐢𝐠𝐚 𝐃𝐚𝐥𝐤𝐚:

Waxa ka war bixiyey Wasiiru-Dawlaha Wasaaradda Arrimaha Gudaha iyo Amniga Qaranka Mudane Cabdirashiid Maxamed Axmed (Magaalo), isaga oo sheegay in guud ahaanba Amniga dalku uu sugan yahay isla markaana aanay jirin wax amni darro ah ama qalalaase nooc kasta oo uu yahayba.

Wasiirku waxa uu sheegay in dedaallada nabadaynta shaqaaqooyinka Gobollada Awdal iyo Selel ay meel wacan marayaan, bulshada walaalaha ahina ay diyaar u yihiin qaadashada nabadda.

𝟑) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐃𝐡𝐚𝐪𝐚𝐚𝐥𝐚𝐡𝐚 𝐃𝐚𝐥𝐤𝐚:

Wasiirka Wasaaradda Maaliyadda iyo Horumarinta Dhaqaalaha Jamhuuriyadda Somaliland, Mudane Cabdillaahi Xasan Aadan ayaa Golaha Wasiirrada uga xog-warramay saamaynta dhaqaale, ganacsi iyo nololeed ee ay dagaallada Bariga Dhexe ku yeesheen dalka.

Wasiirku waxa uu tilmaamay in korodhka qiimaha shidaalka, kharashaadka soo dejinta iyo Caymiska Gaadiidka Badda ay si toos ah u saameeyeen ganacsiga iyo nolosha bulshada dalkeenna taasi oo keentay culays dhaqaale oo soo foodsaaray guud ahaanba muwaadiniinta.

Sida oo kale, Wasiirku waxa uu xusay in xaaladdani muujinayso baahida loo qabo in Qaran ahaan la isku tashado, lana xoojiyo ilaha dhaqaale ee gudaha, si loo yareeyo ku tiirsanaanta suuqyada dibedda.

Wasiirku waxa uu sheegay in Wasaaraddu ay dedaallo weyn ugu jirto sidii kor loogu qaadi lahaa Dakhliga gudaha, loo xakamayn sicir-bararka iyo qiimdhaca Shilinka Somaliland. Wasiirku waxa uu ku baaqay in la qaadaayo tallaabooyin mideysan oo lagu xakameynayo saamaynta dhaqaale ee jira, isla markaana la kobciyo wax-soo-saarka gudaha iyo iskaashiga Hay’adaha Qaranka.

𝟒) 𝐖𝐚𝐫𝐛𝐢𝐱𝐢𝐧𝐭𝐚 𝐖𝐚𝐬𝐚𝐚𝐫𝐚𝐝𝐝𝐚 𝐀𝐫𝐫𝐢𝐦𝐚𝐡𝐚 𝐃𝐢𝐛𝐞𝐝𝐝𝐚 𝐢𝐲𝐨 𝐈𝐬𝐤𝐚𝐚𝐬𝐡𝐢𝐠𝐚 𝐂𝐚𝐚𝐥𝐚𝐦𝐢𝐠𝐚 𝐚𝐡:

Wasiirka Wasaaradda Arrimaha Dibedda iyo Iskaashiga Caalamiga ah ee JSL, Mudane Cabdiraxmaan Daahir Aadan Bakaal ayaa Golaha Wasiirrada la wadaagay warbixin guud oo ku saabsan muhiimadda iyo faa’iidada istaraatiijiyadeed ee ay Qaranka Somaliland u leedahay Madax-bannaanida Dijitalka (Digital Sovereignty), gaar ahaan xilligan casriga ah. Wasiirku waxa uu Golaha u sheegay aqoonsigii Israa’iil kaddib in Cadowga Somaliland uu aad u batay, kuwaasi oo ku dedaalaya in Somaliland loola dagaalamo si kasta oo suurto gal ah.

Wasiirku waxa uu sheegay in xoojinta Madax-bannaanida Dijitalka ahi ay muhiim u tahay ilaalinta xogta Qaranka, Xidhiidhka iyo Muuqaalka Caalamiga ah, kobcinta adeegyada Dawliga ah, iyo horumarinta Diblomaasiyadda ku salaysan Tiknoolajiyadda. Waxa uu xusay in arrintani ay door weyn ka qaadan karto kor u qaadidda sumcadda iyo joogitaanka Somaliland ee heer caalami.

Sidoo kale, Wasiirku waxa uu shaaciyey in uu magacaabay guddi khubaro ah (Task Force) oo si aqoon, xirfad iyo xeeladba leh uga shaqayn doona hirgelinta qorshahan, isla markaana diyaarin doona istaraatiijiyad Qaran oo ku wajahan hirgelinta iyo ilaalinta Somaliland Digital Sovereignty.

Ugu dambayn, Wasiirku waxa uu Golaha Wasiirrada ugu baaqay in si wadajir ah loo xoojiyo arrintan, loona arko mudnaan qaran oo muhiim u ah mustaqbalka Jamhuuriyadda Somaliland.

𝟓) 𝐖𝐚𝐫𝐛𝐢𝐱𝐢𝐧𝐭𝐚 𝐖𝐚𝐬𝐚𝐚𝐫𝐚𝐝𝐝𝐚 𝐃𝐢𝐛-𝐮-𝐃𝐞𝐣𝐢𝐧𝐭𝐚 𝐢𝐲𝐨 𝐀𝐫𝐫𝐢𝐦𝐚𝐡𝐚 𝐁𝐢𝐧𝐢’𝐚𝐚𝐝𝐚𝐧𝐧𝐢𝐦𝐚𝐝𝐚:

Wasiirka Wasaaradda Dib-u-Dejinta iyo Arrimaha Bini’aadannimada JSL, Mudane Saleebaan Ducaale Xaaji Jaamac ayaa Golaha Wasiirrada uga xog-warramay hab-sami-u-socodka hawlaha Wasaaradda, isaga oo xusay in ay si joogto ah u socoto fulinta barnaamijyada dib-u-dejinta iyo taageerada bulshada nugul.

Wasiirku waxa uu sheegay in Wasaaraddu muddo 8 cisho ah ay qaybisay gargaar raashin ah oo loo fidiyey goobaha ay ku sugan yihiin dadka ay abaaruhu saameeyeen ee Gobollada Bariga Dalka.

Wasiirku waxa uu carrabka ku adkeeyey muhiimadda ay leedahay xoojinta adeegyada iyo ka jawaabidda baahiyaha degdegga ah ee bulshada nugul, isaga oo talo ahaan soo jeediyey:

1. In gargaar degdeg ah la gaadhsiiyo Gobollada Bariga Dalka,

2. In la dardar-geliyo wada shaqaynta Hay’adaha Caalamiga ah iyo kuwa Maxalliga ah,

3. In la dejiyo qorshe Qaran oo lagaga gaashaamanayo Abaaraha soo noqnoqday,

4. In si joogto ah loo qiimeeyo xaaladaha nololeed ee dadka ay abaaruhu saameeyeen.

𝟔) 𝐖𝐚𝐫𝐛𝐢𝐱𝐢𝐧𝐭𝐚 𝐇𝐚𝐛𝐫𝐚𝐚𝐜𝐚 𝐌𝐚𝐚𝐦𝐮𝐥 𝐃𝐚𝐚𝐝𝐞𝐣𝐢𝐧𝐭𝐚 𝐖𝐚𝐱𝐛𝐚𝐫𝐚𝐬𝐡𝐚𝐝𝐚 𝐀𝐚𝐬𝐚𝐚𝐬𝐢𝐠𝐚 𝐚𝐡:

Wasiirka Wasaaradda Waxbarashada, Barbaarinta iyo Sayniska Jamhuuriyadda Somaliland, Mudane Professor Ismaaciil Ducaale Yuusuf ayaa Golaha siiyey warbixin ku saabsan Habraaca Maamul daadejinta Waxbarashada Aasaasiga ah, isaga oo faahfaahiyey qorshaha lagu xoojinayo ka qaybgalka heerarka hoose ee maamulka Waxbarashada.

Wasiirku waxa uu sheegay in Habraaca Maamul Daadejinta Waxbarashada Aasaasiga ay ujeeddadiisu tahay in la dejiyo Hannaan Maamul-daadejineed oo si cad u qeexaya qaabka wada shaqaynta iyo masuuliyadaha ay kala yeelanayaan Wasaaradda Waxbarashada, Wasaaradda Dawladaha Hoose, Goleyaasha Degaanka iyo Xafiiska Waxbarashada ee heer Degmo, gaar ahaan Degmooyinka loo daadejiyey Waxbarashada Aasaasiga ah.

Sidoo kale, Wasiirku waxa uu tilmaamay in hirgelinta nidaamkan ay kor u qaadi doonto tayada Waxbarashada Aasaasiga ah, isla markaana ay fududayn doonto gaadhsiinta adeegyo waxbarasho oo loo siman yahay dhammaan ardayda dalka.

Waxa uu xusay in habraacani uu dhiirrigelinayo wada-shaqayn dhow oo u dhexaysa Wasaaradda, maamullada hoose iyo bulshada, taas oo ka qayb qaadanaysa horumarinta Waxbarashada iyo daboolidda baahiyaha gaarka ah ee deegaannada.

𝟕) 𝐖𝐚𝐫𝐛𝐢𝐱𝐢𝐧𝐭𝐚 𝐖𝐚𝐬𝐚𝐚𝐫𝐚𝐝𝐝𝐚 𝐃𝐞𝐞𝐠𝐚𝐚𝐧𝐤𝐚 𝐢𝐲𝐨 𝐈𝐬𝐛𝐞𝐝𝐝𝐞𝐥𝐤𝐚 𝐂𝐢𝐦𝐢𝐥𝐚𝐝𝐚 𝐉𝐒𝐋

Wasiirka Wasaaradda Deegaanka iyo Isbeddelka Cimilada, Mudane Cabdilaahi Cismaan (Geeljire )ayaa Golaha Wasiirrada siiyey warbixin la xidhiidha heerka u diyaar-garowga Xuska Maalinta Qaran ee Dhir-Beerista JSL15.04.2026, isaga oo sheegay in Xukuumaddu qorshaynayso in la beero 13 milyan oo geed, si loo xoojiyo ilaalinta deegaanka loona yareeyo saamaynta Isbeddelka Cimilada.

Sidoo kale, Wasiirku waxa uu si adag ugu boorriyey Xubnaha Golaha Wasiirrada iyo dhammaan Hay’adaha Qaranka in ay qaataan masuuliyad muuqata oo ku aaddan beerista iyo daryeelka dhirta, gaar ahaan xarumaha ay gacanta ku hayaan, si ay tusaale wanaagsan ugu noqdaan bulshada inteeda kale.

Wasiirka Degaanka iyo Isbeddelka Cimilada JSL waxa uu carrabka ku adkeeyey in isbeddelka cimiladu si weyn u saameeyey nolosha bulshada Somaliland, miyi iyo magaalaba, taas oo ka dhigaysa mid lama huraan ah in dalka loo jiheeyo dhaqaalaha cagaaran, iyada oo dhir-beeristu tahay laf-dhabarta dadaallada lagula tacaalayo Isbeddelka Cimilada.

𝟖) 𝐇𝐚𝐝𝐚𝐥𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐞𝐞 𝐆𝐮𝐧𝐚𝐚𝐧𝐚𝐝𝐤𝐚 𝐅𝐚𝐝𝐡𝐢𝐠𝐚 𝟓𝟗-𝐚𝐚𝐝 𝐞𝐞 𝐒𝐡𝐢𝐫𝐤𝐚 𝐆𝐨𝐥𝐚𝐡𝐚 𝐖𝐚𝐬𝐢𝐢𝐫𝐫𝐚𝐝𝐚:

Gunaanadkii Fadhigii 59-aad ee Shirka Golaha Wasiirrada, Madaxweynaha Jamhuuriyadda Somaliland ayaa Golaha la wadaagay in dedaallada nabadaynta ee Gobollada Awdal iyo Selel ay si habsami leh u socdaan, iyada oo ay halkaas ku sugan yihiin wefti ballaadhan oo uu hoggaaminayo Madaxweyne ku-xigeenka JSL.

Madaxweynuhu waxa uu si gaar ah hoosta uga xarriiqay doorka weyn ee ay hoggaannada dhaqanka Gobollada Awdal iyo Selel ku leeyihiin xoojinta nabadda iyo wadajirka bulshada walaalaha ah ee ku wada nool deegaannadaasi, isaga oo uga mahad naqay dedaalkooda joogtada ah ee lagu xaqiijinayo xasillooni waarta.

𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇

𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝

Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro) iyo weftigii uu hoggaaminayey oo welli ku guda jira safarkiisii shaqo ee Dalka Isu-tagga Imaaraadka Carabta, ayaa ka qayb-galay Casho Sharaf rasmi ah oo ka qabsoontay magaalada Dubai, oo ay ka soo wada-qaybgaleen Prince Edward, Duke of Edinburgh, oo ah Boqorka UK, King Charles III walaalkii.

Cashadan rasmiga ah ayaa muujisay heerka sare ee is-dhexgalka diblomaasiyadeed, ixtiraamka caalamiga ah, iyo wada-shaqeynta saaxiibtinimo ee u dhaxaysa Jamhuuriyadda Somaliland iyo Boqortooyada Midowday Ingiriiska (United Kingdom). Sida oo kale, waxa ay iftiimisay xidhiidhka taariikhiga ah ee soo jireenka ah ee ka dhexeeya labada dhinac, kaas oo saldhig u ah iskaashi ku dhisan kalsooni iyo is-ixtiraam.

Kulanka Casho Sharafta ah waxa kale oo isaguna ka soo qayb galay Sir Gavin Williamson MP oo ah Mudane ka tirsan Aqalka Hoose ee Baarlamaanka Dalka Ingiriiska isla markaana ah saaxiib dhow oo ay Somaliland leedahay oo ku mayal-adag qaddiyadda madaxbannaanida Somaliland, isla markaana door weyn kaga jira taageerada aqoonsi-raadinta iyo gooni-isu-taagga Jamhuuriyadda Somaliland.

Madaxweynaha Jamhuuriyadda Somaliland ayaa si gaar ah oo milgo iyo qaddarinba leh ugu mahad naqay Sir Gavin Williamson garab-istaaggiisa joogtada ah ee uu siiyo dalka iyo dadka Somaliland, isaga oo had iyo jeer qaddiyadda Somaliland ka dhex muujiya Fagaarayaasha Siyaasadeed ee Caalamiga ah.

Kulankan ayaa lagu adkeeyay muhiimadda ay leedahay sii xoojinta iskaashiga dhinacyada kala ah dawladnimada, horumarinta, amniga, iyo xidhiidh bulsho ee u dhexeeya shacabka labada dal, iyada oo la muujiyay rabitaanka wadajirka ah ee lagu hormarinayo dano-wadaag ah iyo mustaqbal waara.

Madaxweynuhu waxa uu hoosta ka xarriiqay in Jamhuuriyadda Somaliland ay tahay dal ay ka go’an tahay mabda’a nabad-ku-wada noolaansho, wada-hadal, is-ixtiraam iyo iskaashi caalami ah.

Jamhuuriyadda Somaliland waxa ay mar kale caddaysay doorkeeda firfircoon ee ay kaga jirto Saaxadda Diblomaasiyadda Caalamiga ah, iyada oo sii xoojinaysa xidhiidhada ay la leedahay saaxiibada caalamka, gaar ahaan Boqortooyada Midowday Ingiriiska ee UK.

𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇

𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝

🇮🇱 FM Gideon Sa'ar: "It's a great privilege to conduct the first official diplomatic visit to Somaliland, at the invitation of President Abdirahman Mohamed Abdullahi.

The visit is also a message: We are determined to vigorously advance relations between Israel and Somaliland.

Today, we held substantive discussions with the President and senior members of his government on the full range of our relations.

The mutual recognition and establishment of diplomatic relations between the two countries are not directed against anyone. Our shared objective is to promote the mutual benefit of both nations and countries.

In Hargeisa, I made it clear:
Only Israel will decide whom it recognizes and with whom it maintains diplomatic relations.

The President of Somaliland informed me that he has accepted PM Netanyahu’s invitation and will pay an official visit to Israel."

𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝 𝐨𝐨 𝐤𝐮𝐥𝐚𝐧 𝐦𝐢𝐢𝐬𝐚𝐚𝐧 𝐥𝐞𝐡 𝐥𝐚 𝐲𝐞𝐞𝐬𝐡𝐚𝐲 𝐇𝐚𝐥𝐝𝐨𝐨𝐫𝐤𝐚, 𝐖𝐚𝐚𝐲𝐞𝐞𝐥𝐤𝐚, 𝐀𝐪𝐨𝐨𝐧𝐲𝐚𝐡𝐚𝐧𝐤𝐚 𝐢𝐲𝐨 𝐇𝐨𝐠𝐠𝐚𝐚𝐧𝐤𝐚 𝐃𝐡𝐚𝐪𝐚𝐧𝐤𝐚 𝐁𝐞𝐞𝐥𝐚𝐡𝐚 𝐖𝐚𝐫𝐬𝐚𝐧𝐠𝐞𝐥𝐢

Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa caawa magaalada Ceerigaabo kulan mihiim ah la yeeshay Haldoorka, Waayeelka, Aqoonyahanka iyo Hoggaanka Dhaqanka Beelaha Warsangeli, oo uu hoggaaminayey Suldanka Guud ee Beelaha Warsangeli, Suldaan Siciid Suldaan Suldaan Cabdisalaan Suldaan Maxamuud Cali Shire.

Kulankaasi ayaa ahaa mid ku dhisanaa kalsooni, is-qaddarin iyo Wadatashi Qaran, waxaana lagaga hadlay arrimo waaweyn oo dalka khuseeya, oo ay ka mid yihiin xoojinta nabadda, midnimada ummadda, wada-noolaanshaha bulshada ku wada nool magaalada Ceerigaabo, iyo doorka beesha Warsangeli ee dhismaha iyo horumarka Jamhuuriyadda Somaliland.

Madaxweynuhu waxa uu uga mahadnaqay Suldaanka Guud iyo Madax-dhaqameedka kale kaalintooda Taariikhiga ah ee ay ku leeyihiin ilaalinta nabadda iyo wadajirka bulshada Gobolka Sanaag, isaga oo carrabka ku adkeeyey in nabadda iyo wadajirka ummadda Somaliland ay yihiin hantida ugu qaalisan ee ay bulshadu wada leedahay.

Madaxweynuhu waxa uu sidoo kale xusay in Xukuumaddiisu ay si dhab ah u qadarinayso doorka ay beesha Warsangeli ku leedahay dhismaha Qaranka, isla markaana ay muhiimad gaar ah siinayso in talada iyo masiirka ummadda lagu dhiso wadatashi, cadaalad iyo kalsooni.

Guud ahaanba labeenta iyo haldoorkii Warsangeli ee kulanka ka qaybgalay ayaa si diiran u soo dhaweeyey Madaxweynaha, iyaga oo bogaadiyey hoggaamintiisa daahfuran, dedaallada uu ku doonayo in lagu xoojiyo nabadda iyo midnimada bulshada Gobolka Sanaag.

Sida oo kale, Beel-weynta Warsangeli ayaa muujiyey taageero buuxda oo ay u hayaan qadiyadda iyo jiritaanka Qarannimada Somaliland, kuna ballan qaaday in ay door muuqda ka qaadan doonaan xoojinta nabadda iyo horumarka dalka.

𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇

𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫)
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝