Goals- ဂိုး

ကာတာအသင်းနဲ့ ကစားတဲ့ ကမ္ဘာ့ဖလားပွဲစဉ်မှာ ကနေဒါကွင်းလယ်လူ အစ္စမေးလ် ကွန်နေးတစ်‌ေယာက် အကြီးအကျယ် ဒဏ်ရာရရှိသွားခဲ့ပါတယ်။ ဒုတိယပိုင်းမှာ ကနေဒါအသင်းက ၃ ဂိုးပြတ်ဦဆောင်နေချိန်မှာ ကာတာကစားသမားဖြစ်တဲ့ အဆင်မာဒီဘိုရဲ့ အန္တရာယ်ရှိတဲ့ ဝင်ရောက်တားဆီးမှုကြောင့် ကွန်နေးရဲ့ ခြေထောက် ကျိုးသွားခဲ့တာဖြစ်ပြီး ဆေးအဖွဲ့တွေက ချက်ချင်းဆိုသလို ကွင်းထဲကို ဝင်ရောက်ကုသပေးခဲ့ရပါတယ်။ ဒီဒဏ်ရာရဲ့ ပြင်းထန်မှုကို မြင်လိုက်ရချိန်မှာ ကွန်နေးရဲ့ အသင်းဖော်တွေသာမက ပြိုင်ဘက်ကစားသမားတွေပါ စိတ်မကောင်းဖြစ်ခဲ့ကြရပါတယ်။

ကနေဒါအသင်းဟာ ကမ္ဘာ့ဖလားသမိုင်းတစ်လျှောက် အကောင်းဆုံးရလဒ်တစ်ခုဖြစ်တဲ့ ၆-၀ ဂိုးနဲ့ အနိုင်ရခဲ့သလို အသင်းရဲ့ တိုက်စစ်မှူး ဂျိုနသန် ဒေးဗစ်က ဟက်ထရစ်ရခဲ့တာကြောင့် အပျော်တွေနဲ့ အောင်ပွဲခံရမယ့်အစား ကွန်နေးရဲ့ စိတ်မကောင်းစရာ ဒဏ်ရာကြောင့် ဝမ်းနည်းကြေကွဲနေခဲ့ရပါတယ်။ အသင်းက နောက်တစ်ဆင့်တက်ဖို့ အခြေအနေကောင်းနေချိန်မှာ ကစားသမားတစ်ယောက် ဆိုးရွားတဲ့ ဒဏ်ရာရသွားတာက ကနေဒါအတွက်တော့ စိတ်မကောင်းစရာပါပဲ။ အစ္စမေးလ် ကွန်နေး အမြန်သက်သာ လာပါစေလို့ ဆု‌တောင်းပေးပါတယ်။

' တိုက်ဆိုင်မှုများနဲ့ နော်ဝေရဲ့ ကမ္ဘာ့ဖလားခရီးလမ်း '

၁၉၉၄ ကမ္ဘာ့ဖလားတုန်းက အယ်ဖိုင်း ဟာလန်း၊ ဂိုရမ် ဆိုလော့တ် နဲ့ အဲရစ် သောစ်ဗက် တို့ ပါဝင်တဲ့ နော်ဝေအသင်းဟာ အမေရိကန်မှာ ကျင်းပတဲ့ ကမ္ဘာ့ဖလားပြိုင်ပွဲမှာ အတူတကွ ပါဝင်ဆင်နွှူဲခဲ့ကြပါတယ်။ နှစ်ပေါင်း ၃၂ နှစ်အကြာ၊ ၂၀၂၆ ကမ္ဘာ့ဖလားမှာတော့ သူတို့ရဲ့ သားဖြစ်ကြတဲ့ အယ်လင် ဟာလန်း၊ အလန်ဇမ်းဒါး ဆိုလော့တ်နဲ့ ခရစ်စီယန် သောစ်ဗက်တို့ဟာ နော်ဝေအသင်းအတွက် အတူတကွ အသင်းဖော်တွေအဖြစ်နဲ့ ကမ္ဘာ့ဖလားစင်မြင့်ထက်မှာ ကစားနေကြပြီဖြစ်ပါတယ်။ နော်ဝေအတွက်တော့ ထူးခြားတဲ့ တိုက်ဆိုင်မှု တစ်ခုပါပဲ။

နောက်ထပ် တိုက်ဆိုင်မှုတစ်ခုကတော့ ၁၉၉၄ ကမ္ဘာ့ဖလားတုန်းကလည်း နော်ဝေအသင်းဟာ အဖွင့်ပွဲစဉ်မှာ အနိုင်ရရှိခဲ့ပါတယ်။ နောက်ပွဲစဉ်တွေမှာတော့ တစ်ပွဲရှုံး၊ တစ်ပွဲသရေကျခဲ့ပြီး စုစုပေါင်းရလဒ် ၄ မှတ် စုဆောင်းနိုင်ခဲ့ပေမဲ့ အုပ်စုအတွင်း ကျန်အသင်းများဖြစ်တဲ့ အီတလီ၊ အိုင်ယာလန်၊ မက္ကစီကို အသင်းတို့ကလည်း ရမှတ် ၄ မှတ်စီ ရခဲ့ကြသလို ဂိုးကွာဟချက်ကလည်း တူညီနေပြန်ပါတယ်။ ဒါ့ကြောင့် ဂိုးသွင်းနှုန်းနဲ့ ချိန်ညှိချိန်မှာ ၃ ပွဲကစားပြီး တစ်ဂိုးသာ ရခဲ့တဲ့ နော်ဝေအနေနဲ့ အုပ်စုပြုတ်ခဲ့ရပါတယ်။

ဒီကနေ့ ဒီအချိန်မှာတော့ ဟာလန်းဦးဆောင်တဲ့ နော်ဝေအသင်းဟာ အဖွင့်ပွဲမှာ ဂိုးပြတ်အနိုင်ရထားကာ အုပ်စုတက်ဖို့ အခြေအနေ ကောင်းနေပြီလည်း ဖြစ်ပါတယ်။ လာမည့်ပွဲစဉ်တွေမှာ ဘယ်လို အမှတ်ယူပြီး အုပ်စုက လွတ်ကာ သမိုင်းသစ် ရေးထိုးနိုင်မလား စောင့်ကြည့်ရပါတော့မယ်။

' ဖီဖာကို တစ်ကွက်ပြလိုက်တဲ့ Levi '

လက်ရှိ ၂၀၂၆ ကမ္ဘာ့ဖလား မှာ FIFA ရဲ့ တင်းကျပ်တဲ့ စပွန်ဆာမူဝါဒအရ မြောက်အမေရိကရဲ့ နာမည်ကျော် အားကစားကွင်းတချို့ဟာ ၂၀၂၆ ကမ္ဘာ့ဖလားပြိုင်ပွဲကာလအတွင်းမှာ သူတို့ရဲ့ နာမည်ရင်းတွေကို ခေတ္တစွန့်လွှတ်လိုက်ခဲ့ရပါတယ်။ စွန့်လွတ်ခဲ့ရတဲ့ ကွင်းတွေကတော့ -

• Levi's Stadium ➜ San Francisco Bay Area Stadium
• Mercedes-Benz Stadium ➜ Atlanta Stadium
• Gillette Stadium ➜ Boston Stadium

ဆိုပြီး အမေရိကန်က ကွင်းတချို့ဟာ နာမည်ချိန်းခဲ့ရပါတယ်။

ဒါ့အပြင် အားကစားကွင်းပတ်လည်က Levi's ရဲ့ အမှတ်အသားတွေကိုတောင် ပြိုင်ပွဲကာလအတွင်းမှာ ဖုံးအုပ်ထားရပါတယ်။ Levi's ကတော့ ဒါကို အခွင့်ကောင်းယူပြီး ဟာသပြန်လုပ်ကာ အတန်းရှင်းပြန်ရှာနိုင်လိုက်ပါတယ်။ FIFA က ကွင်းထဲက သူတို့ရဲ့ လိုဂိုကို ဖုံးအုပ်လိုက်တဲ့အခါ၊ Levi's က သူတို့ရဲ့ လူမှုကွန်ရက် ပရိုဖိုင်ပုံမှာလည်း ကိုယ့်လိုဂိုကို အဖြူရောင်အကန့်လေးနဲ့ ပြန်ဖုံးအုပ်လိုက်ပြီး FIFA ရဲ့ လုပ်ရပ်ကို ပြောင်လှောင်သလိုမျိုး တုံ့ပြန်ခဲ့ပါတယ်။

FIFA ဟာ ကမ္ဘာ့ဖလားပြိုင်ပွဲအတွင်းနဲ့ အနီးတဝိုက်မှာ တရားဝင်ပူးပေါင်းထားတဲ့ စပွန်ဆာတွေကိုသာ ကူးသန်းရောင်းဝယ်ရေးဆိုင်ရာ ကြော်ငြာခွင့်ပြုပါတယ်။ FIFA ရဲ့ ဘီလီယံနဲ့ချီတန်တဲ့ စပွန်ဆာသဘောတူညီချက်တွေကို ကာကွယ်ဖို့အတွက် တခြားကုမ္ပဏီတွေရဲ့ အမှတ်အသားမှန်သမျှကို ဖုံးအုပ်တာ ဒါမှမဟုတ် ဖယ်ရှားတာမျိုး လုပ်ရတာဖြစ်ပါတယ်။ ရလဒ်အနေနဲ့ကတော့ ကမ္ဘာ့အားကစားလောကမှာ နာမည်အကြီးဆုံး အားကစားကွင်းအချို့ဟာ ကမ္ဘာ့ဖလားပြိုင်ပွဲကာလအတွင်းမှာ မြို့နာမည်ကိုပဲ အခြေခံတဲ့ သာမန်နာမည်တွေနဲ့ ခေတ္တပြောင်းလဲသွားရပါတယ်။

မင်းတို့အတွက် လှောင်ရယ်နေစရာဖြစ်လည်း

ငါတို့ လူကို ငါတို့အမြဲယုံကြည်တယ် ၊ချစ်တယ် ။

' Last Dance ကို အကောင်းဆုံးဖျော်ဖြေနေတဲ့ မက်ဆီ '

' ဆင်ပိန်ကျွဲလောက် ' ဆိုတဲ့ စကားပုံအတိုင်း ဟာလန်းတို့ အမ်ဘာပေတို့ ဂိုးသွင်းကောင်းတာလောက်တော့ မက်ဆီအိပ်နေသလောက်ပဲရှိပါတယ်။ ၂၀၂၆ ကမ္ဘာ့ဖလားမှာ ဟာလန်း၊ အမ်ဘာပေတို့ ၂ ဂိုးစီ သွင်းသွားကြတော့ မက်ဆီက ယခုနှစ် ကမ္ဘာ့ဖလားရဲ့ ပထမဆုံး ဟက်ထရစ်ကို သွင်းပြရင်း ကမ္ဘာ့ဖလား ချန်ပီယံ ကာကွယ်ပွဲ စစ်မျက်နှာကို အလှပဆုံး ဖွင့်လိုက်ပါတယ်။ @@

သွင်းဂိုးအားလုံးကလည်း ပါးနပ်လွန်း၊ သေသပ်လွန်းလို့ အသက် ၃၈ နှစ်အရွယ်မှ ဟုတ်ရဲ့လားတောင် ထင်ရက်စရာပါ။ ယခုနှစ် ကမ္ဘာ့ဖလားမှာ ဥရောပအသင်းတွေ၊ တောင်အမေရိကအသင်းတွေ တိုင်ပတ်နေချိန်မှာ မက်ဆီရဲ့ ဦးဆောင်မှုအောက်က အာဂျင်တီးနားကတော့ နိုင်ပွဲတစ်ပွဲကို သက်တောင့်သက်သာနဲ့ ယူပြသွားပါတယ်။

မက်ဆီအနေနဲ့ ၂၀၂၆ ကမ္ဘာ့ဖလားမှာ ဘယ်မှလုပ်ပြစရာတောင် မလိုပေမဲ့ သူရဲ့ Last Dance ကို အမှတ်တရတွေနဲ့ ချန့်ခဲချင်ပုံ ရပါတယ်။ ဒီလူသားကို ထိုင်ကြည့်နေရရင်တောင် အဆင်ပြေမဲ့ ပရိသတ်တွေကို သွင်းဂိုးတွေနဲ့ပါ မလွမ်းလွမ်းအောင် နှိပ်စက်နေသလိုပါပဲ။

' ဂုတ်တစ်ပါးရဲ့ ကနဦးအစ ခြေလှမ်း '

၂၀၀၆ ခုနှစ်၊ ဇွန်လ ၁၆ ရက်၊ လွန်ခဲ့တဲ့ အနှစ် ၂၀ တုန်းက ဒီလိုနေ့မျိုးမှာ အသက် ၁၈ နှစ်သာရှိသေးတဲ့ လီယွန်နယ် မက်ဆီဟာ ကမ္ဘာ့ဖလားပွဲဦးထွက်အဖြစ် ပွဲချိန် ၇၄ မိနစ်မှာ လူစားလဲဝင်ရောက်လာခဲ့ပါတယ်။ ဝင်ရောက်လာပြီး ၁၄ မိနစ်အကြာမှာပဲ သူဟာ ကမ္ဘာ့ဖလားပြိုင်ပွဲရဲ့ ပထမဆုံးဂိုးကို သွင်းယူနိုင်ခဲ့ပါတယ်။ အဲဒီပွဲမှာ အာဂျင်တီးနားအသင်းက ဒေသကွဲမဖြစ်သေးတဲ့ ဆားဘီးယားနှင့် မွန်တီနီဂရိုးအသင်းကို ၆-၀ ဂိုးဖြင့် အနိုင်ရရှိခဲ့တာဖြစ်ပါတယ်။

အဆိုပါ ၂၀၀၆ ကမ္ဘာ့ဖလားပွဲမှာ မက်ဆီဟာ အာဂျင်တီးနားအသင်းသမိုင်းတစ်လျှောက် ကမ္ဘာ့ဖလားမှာ ပါဝင်ကစားတဲ့ အသက်အငယ်ဆုံးကစားသမားအဖြစ်လည်း မှတ်တမ်းဝင်ခဲ့သူပါ။ တိုက်ဆိုင်စွာပဲ မနက်ဖြန်မှာ ဆိုရင်လည်း အာဂျင်တီးနားအသင်းရဲ့ ပွဲရှိနေပြီး အယ်ဂျီးရီးယားအသင်းနဲ့ ကစားရမှာဖြစ်ပါတယ်။ အစောပိုင်းမှာ မက်ဆီမပါနိုင်ဘူးလို့ သတင်းထွက်ခဲ့ပေမဲ့ နောက်ဆုံးရသတင်းတွေအရ မက်ဆီလည်း ကြံခိုင်မှုပြည့်ဝနေတာကြောင့် ပါဝင်လာမယ်လို့ သိရပါတယ်။ ဒီပွဲမှာရော မက်ဆီအနေနဲ့ ဂိုးသွင်းနိုင်မလား စောင့်ကြည့်ရပါမယ်။

' အပျော်တမ်းကစားသူရဲ့ အိမ်မက်ဆန်သော ညတစ်ည '

မနေ့ညက ကိတ်ဗာဒီအသင်းရဲ့ သမိုင်းဝင်ညမှာ ပါဝင်ခဲ့သူ နောက်ခံလူ Roberto Lopes ဟာ နိုင်ငံတကာ ဘောလုံးလောကနဲ့ ဝေးကွာနေခဲ့သူပါ။ သူ့ကို ကိတ်ဗာဒီ လက်ရွေးစင်အသင်းက လက်ရွေးစင်အသင်းမှာ ရွေးချယ်လိုက်တဲ့အတွက် LinkedIn ကတစ်ဆင့် ဖိတ်ခေါ်စာပို့ခဲ့ပေမဲ့ သူက အတုထင်ပြီးတောင် လျစ်လျူရှုခဲ့မိပါတယ်။ သူ့ကို လက်ရွေးစင်အသင်းက ခေါ်ယူဖို့ ဆက်သွယ်တဲ့အချိန်မှာ သူဟာ အချိန်ပိုင်း ဘောလုံးကစားသူတစ်ယောက်အနေနဲ့ အိမ်ခြံမြေအကျိုးဆောင် အလုပ်ကိုပါ တွဲဖက်ရင်း လုပ်ကိုင်နေရသူပါ။

နောက်ဆုံးမှာတော့ သူဟာ အသင်းရဲ့ ဖိတ်ခေါ်စာကို ပြန်လည်ဖြေကြားခဲ့ပြီး၊ အခုဆိုရင်တော့ ကမ္ဘာ့အကောင်းဆုံးအသင်းလို့ သတ်မှတ်ခံထားရတဲ့ စပိန်အသင်းနဲ့ သရေကျခဲ့တဲ့ သမိုင်းဝင်အခိုက်အတန့်ကို ပိုင်ဆိုင်ခဲ့ပါပြီ။ စပိန်အသင်းရဲ့ တိုက်စစ်ကို မိနစ် ၉၀ လုံးတောင့်ခံရင်း နိုင်ငံအတွက် သမိုင်းဝင်ညကို ဖန်တီးနိုင်ခဲ့တဲ့ ကိတ်ဗာဒီရဲ့ နောက်တန်းမှာ သူပါဝင်ခဲ့တယ်ဆိုတဲ့ အမှတ်တရဟာ သူ့အတွက် တသက်တာမေ့နိုင်ဖွယ်ရာ မရှိတော့ပါဘူး။ နောင်တစ်ချိန် သူ့‌ခလေးတွေကို ပြောပြလို့ရမယ့် အိပ်ယာဝင်ပုံပြင်ကောင်း တစ်ပုဒ်ပါပဲ။

' ကိတ်ဗာဒီရဲ့ သမိုင်းဝင်ညကို ဖန်တီးခဲသူ '

လက်ရှိကစားသွားတဲ့ စပိန်အသင်းနဲ့ ကိတ်ဗာဒီတို့ ကမ္ဘာ့ဖလားအုပ်စုပွဲစဉ်ကတော့ ဂိုးမရှိ သရေရလဒ်နဲ့သာ အဆုံးသတ်ခဲ့ပါပြီ။ ချန်ပီယံဖြစ်ဖို့ ရေပန်းအစားဆုံး အသင်းဖြစ်တဲ့ စပိန်အနေနဲ့ ကမ္ဘာ့ဖလားကို ပထမဆုံးစကန်မဲ့ အသင်းကို ဂိုးမသွင်းနိုင်ခဲ့တာက စိတ်ပျက်စရာပါပဲ။ ယာမဲလ်နဲ့ ဝီလီယံ မပါတဲ့ စပိန်တိုက်စစ်က အသက်မဲ့နေခဲ့သလို ဘောလုံးပိုင်ဆိုင်မှုကလွဲလို့ ကျေနပ်စရာ ဘာမှမရှိခဲ့ဘူး။ စပိန်အနေနဲ့ အုပ်စုတက်ဖို့ သေချာပေမဲ့ ချန်ပီယံဖြစ်ဖို့ဆိုတာကတော့ မေးခွန်းထုတ်ရတော့မဲ့ ခြေစွမ်မျိုးပါ။

တစ်ခုရှိတာက စပိန်အ‌သင်းအနေနဲ့ ဂိုးမရခဲ့တာကလည်း ပြိုင်ဘက်ရဲ့ ခံစစ်နဲ့ ‌ဂိုးသမား ဗိုဇင်ညာရဲ့ လက်စွမ်းကြောင့်လည်းပါမယ်။ အထူးသဖြင့် ဒီပွဲမှာ MOTM ရခဲ့တဲ့ ဗိုဇင်ညာအနေနဲ့ ယခုလက်ရှိ ကမ္ဘာ့ဖလားမှာ အသက်အကြီးဆုံး ဂိုးသမားအဖြစ် မှတ်တမ်းဝင်ထားသလို သူရဲ့ ပထမဆုံး ကမ္ဘာ့ဖလားမှာ clean sheet ရလိုက်တဲ့ အတွက် မမေ့နိုင်စရာ ညတစ်ည ဖြစ်နေမယ်ဆိုတာ သေချာပါတယ်။ နိုင်ငံအတွက် သူ့အတွက် ပထမဆုံးသော ကမ္ဘာ့ဖလားမှာ အဖိုးတန်တစ်မှတ်ဟာ သူ့အတွက်ရော နိုင်ငံအတွက်ပါ တစ်သက်တာ မမေ့နိုင်စရာပါပဲ။

ဒါကို ပွဲအပြီး သူ့မျက်ရည်တွေက သက်သေထူနေပါတယ်။ ကမ္ဘာ့မှာ ဒုတိယမြောက် အသေးဆုံးနိုင်ငံငယ်လေးအတွက် ဗိုဇင်ညာဟာ သူရဲကောင်းတစ်‌‌ေယာက်ဖြစ်ခဲ့ပါပြီ။ ကိတ်ဗာဒီအတွက် နောက်တစ်ဆင့်တက်ဖို့ မသေချာပေမဲ့ ဗိုဇင်ညာ ယူပေးခဲ့တဲ့ တစ်မှတ်ဟာ သူတို့အတွက် အားဖြစ်စေမှာတော့ အမှန်ပါပဲ။

' ဂိုးသွင်းသော်လည်း အောင်ပွဲမခံခဲ့ပါ...... '

ဒီမနက် ကစားသွားတဲ့ ဆွီဒင်နဲ့ တူနီးရှားတို့ပွဲမှာ ဆွီဒင်က ၅-၁ ဂိုးနဲ့ အပြတ်အသက် အနိုင်ရခဲ့ပါတယ်။ ဒီပွဲမှာ ဆွီဒင်အတွက် ဦးဆောင်ဂိုးနဲ့ နောက်ဆုံးဂိုးကို သွင်းယူခဲ့တဲ့ ကွင်းလယ်ဘူ Yasin Ayari အနေနဲ့ ‌၂ ဂိုးသွင်းယူနိုင်ခဲ့ပေမဲ့ အောင်ပွဲခံခြင်း မရှိခဲ့ပါဘူး။ ပုံမှန် ကစားသမားတစ်ယောက်ဟာ ကမ္ဘာ့ဖလားလို ပြိုင်ပွဲမှာ ဂိုးသွင်းယူနိုင်တယ်ဆိုတာ အကြီးအကျယ် အောင်ပွဲခံနေရမှာ ဖြစ်ပေမဲ့ သူက ၂ ဂိုးစလုံးကို အောင်ပွဲခံဖို့ ငြင်းဆန်ခဲ့ပါတယ်။

ဒီလိုဖြစ်ရတဲ့ အကြောင်းကတော့ Yasin Ayari ဟာ ဆွီဒင်နိုင်ငံတွင် မွေးဖွားခဲ့ပေမဲ့ သူ့ဖခင်မှာ တူနီးရှားလူမျိုးဖြစ်ပြီး မိခင်မှာ မော်ရိုကိုလူမျိုး ဖြစ်တာကြောင့်ပါ။ ဒါ့အပြင် သူဟာ ဆွီဒင်လက်ရွေးစင်အသင်းကို ရွေးချယ်ခဲ့ပေမဲ့ ယင်းမတိုင်မီက တူနီးရှားအသင်းက သူ့ကို လက်ရွေးစင်အဖြစ် ပါဝင်ကစားစေရန် အပြင်းအထန် ကြိုးပမ်းခဲ့ပါသေးတယ်။ ဒီလို အကြောင်းအရာတွေကြောင့်ပဲ သူဟာ အောင်ပွဲခံရမဲ့အစား လက်နှစ်ဖက်ကို မြှောက်ကာ ခွင့်လွှတ်မှုတောင်းခံတဲ့ အမူအရာကိုသာ ပြသခဲ့ပါတယ်။

ဒါဟာ Yasin Ayari အနေနဲ့ မိမိရဲ့ မူလဇစ်မြစ်နှင့် ဖခင်ရဲ့ နိုင်ငံအပေါ် ပြသခဲ့သော လှပသည့် လေးစားမှုတစ်ခုပဲဖြစ်ပါတယ်။

မက္ကဆီကိုနိုင်ငံသား ပရိသတ်တစ်ဦးဖြစ်သူ Ulises Bernal ဟာ ကမ္ဘာ့ဖလားပွဲစဉ်အတွင်း တောင်ကိုရီးယား Influencer တစ်ဦးဖြစ်သူ Ino Cat ရဲ့ live လွင့်နေချိန်မှာ အနောက်ကနေပြီး လူမျိုးရေးခွဲခြားတဲ့ လက်ဟန်အမူအရာများ ပြုလုပ်ခဲ့ပါတယ်။ ဒါကို သိရှိခဲ့တဲ့ ပရိသတ်တွေက သူရဲ့အလုပ်မှ နုတ်ထွက်ပေးရန် ဖိအားပေးခြင်းခံခဲ့ကြတာကြောင့် အများပြည်သူရှေ့တွင် တောင်းပန်ချက် ထုတ်ပြန်ခဲ့ရပါတယ်။ Bernal က Ino Cat ရဲ့ အရှေ့အာရှလူမျိုးတို့ရဲ့ မျက်နှာသွင်ပြင်ကို လှောင်ပြောင်ခဲ့ပြီး ကိုရီးယားဘာသာစကားကိုလည်း အတုခိုးစနောက်ခဲ့ကာ ထိုဖြစ်ရပ်ကို Ino Cat ရဲ့ တိုက်ရိုက်ထုတ်လွှင့်မှုတွင် ဖမ်းမိခဲ့တာပါ။

ထိုဖြစ်ရပ်အပေါ် လူအများက သူမအား ထောက်ခံအားပေးမှုများနှင့် ပတ်သက်ပြီး Ino Cat က “ကမ္ဘာပေါ်မှာ လူဆန်းတွေ ရှိနေတတ်ပေမဲ့ ကမ္ဘာ့ဖလားပွဲမှာ ကောင်းမွန်တဲ့စိတ်ထားရှိသူတွေ ပိုပြီးများပြားတယ်ဆိုတာကို ကျွန်မ ထပ်ပြီးသဘောပေါက်လိုက်ရပါတယ်။ ” လို့ ပြောကြားခဲ့ပါတယ်။ လူမျိုးခွဲခြားမှုကို ချက်ချင်းလက်ငင်း တာဝန်ယူဖြေရှင်းပေးဖို့ တောင်းဆိုခဲ့ကြတဲ့ ဘောလုံးပရိသတ်တွေကတော့ လေးစားစရာပါပဲ။