BT_24 Sports

ကာဆီမီရို :

“မန်ချက်စတာ ယူနိုက်တက်ကနေ အလွတ်ပြောင်းရွှေ့လာခဲ့တာကို လူတိုင်းသိပါတယ်။ကျွန်တော့်မှာ ရွေးချယ်စရာတွေ အများကြီးရှိခဲ့ပါတယ်။အီတလီက အသင်းတွေအပါအဝင် ကျွန်တော့်ကို ခေါ်ယူချင်တဲ့ အသင်းတွေ အများကြီးရှိခဲ့ပါတယ်။

ဒါပေမယ့်…
ကျွန်တော် ရှိချင်တဲ့နေရာမှာပဲ ရှိနေပါတယ်။
အကောင်းဆုံး ကစားသမားနဲ့အတူ ကစားချင်လို့ပါ။
ဒါကိုပဲ ကျွန်တော် ပျော်ရွှင်စွာ ခံစားချင်ပါတယ်။
သူနဲ့အတူ ရှိချင်ပါတယ်။

သူ့ကို နောက်ထပ် အနိုင်ရအောင် ကူညီချင်ပါတယ်။
သူ အခုထက်တောင် ပိုပြီး ကြီးကျယ်လာအောင် ကူညီချင်ပါတယ်။သူက ဘောလုံးလောကရဲ့ နတ်ဘုရားတွေထဲက တစ်ယောက်ပါ။ ဒါမှမဟုတ်… ဘောလုံးလောကရဲ့ နတ်ဘုရားတစ်ပါးဆိုရင်လည်း မမှားပါဘူး။

သူနဲ့အတူ ပျော်ရွှင်ချင်တယ်။ သူနဲ့အတူ ဆက်ပြီး ဆုဖလားတွေအနိုင်ရချင်ပါတယ်။”အင်တာ မိုင်ယာမီနဲ့ မိတ်ဆက်ပွဲမှာ ကာဆီမီရိုက ဒီလိုပွင့်ပွင့်လင်းလင်း ပြောဆိုခဲ့တာဟာ လူအများကို အံ့အားသင့်စေခဲ့ပါတယ်။
အီတလီအသင်းကြီးတွေ အပါအဝင် ရွေးချယ်စရာတွေ အများကြီးရှိခဲ့ပေမယ့်…လီယွန်နယ် မက်ဆီနဲ့အတူ ကစားရမယ့် အခွင့်အရေးတစ်ခုတည်းကပဲ သူ့ရဲ့ ဆုံးဖြတ်ချက်ကို ပြောင်းလဲသွားစေခဲ့တာ ဖြစ်ပါတယ်။

ဘောလုံးသမိုင်းရဲ့ အကြီးကျယ်ဆုံး ကစားသမားတစ်ယောက်နဲ့အတူ ကွင်းထဲမှာ တိုက်ပွဲဝင်ခွင့်ရတာဟာ…
ဘယ်လိုကမ်းလှမ်းမှုမျိုးထက်မဆို ပိုတန်ဖိုးရှိတဲ့ အခွင့်အရေးတစ်ခု မဟုတ်လား။ 🐐🏆

နေမာအတွက် ရုပ်တုတည်ဆောက်ပေးခဲ့တဲ့ ဆန်းတို့စ်အသင်းရဲ့ လုပ်ရပ်ကို ချီးကျူးလိုက်တဲ့ ကာဖူး

ကာဖူး :

“ဒီလုပ်ရပ်က နေမာဟာ ဆန်းတို့စ်အသင်းအတွက်သာမက ဘရာဇီးဘောလုံးသမိုင်းတစ်ခုလုံးအတွက် ဘယ်လောက်အရေးပါတဲ့ ကစားသမားလဲဆိုတာကို ဖော်ပြနေပါတယ်။

ပီလီ၊ ရော်နယ်ဒို နာဇာရီယို၊ ရီဗယ်လ်ဒိုတို့လို ဂန္ထဝင်တွေကို ကျော်ပြီး ဘရာဇီးလက်ရွေးစင်အသင်းရဲ့ သမိုင်းတစ်လျှောက် ဂိုးသွင်းအများဆုံး ကစားသမားဖြစ်လာတာက မယုံနိုင်လောက်တဲ့ အောင်မြင်မှုတစ်ခုပါ။

ဒါ့အပြင် ဘရာဇီးရဲ့ ပထမဆုံး အိုလံပစ်ရွှေတံဆိပ်ကို ဘောလုံးအားကစားမှာ ရယူပေးနိုင်ခဲ့တာကလည်း သူ့ရဲ့ အမွေအနှစ်ကို ပိုပြီး ကြီးမားစေပါတယ်။

နေမာရဲ့ ကစားသမားဘဝက ပြီးပြည့်စုံခဲ့တာတော့ မဟုတ်ပါဘူး။အငြင်းပွားမှုတွေ၊ ခက်ခဲတဲ့ အချိန်တွေ အများကြီး ရှိခဲ့ပါတယ်။ပြီးခဲ့တဲ့ အပတ်ကတောင် ဆန်းတို့စ်အသင်းနဲ့ ပြဿနာရှိနေတယ်၊ အသင်းကနေတောင် ထွက်ခွာနိုင်တယ်ဆိုတဲ့ သတင်းတွေ ထွက်ခဲ့ပါတယ်။

ဒါပေမယ့်…ဒီနေ့မှာတော့ ဆန်းတို့စ်က သူ့အတွက် ဂုဏ်ပြုရုပ်တုကို ဖွင့်လှစ်ပေးခဲ့ပါတယ်။ဒါက အရာအားလုံးကို ပြောပြနေပါတယ်။ကလပ်အသင်းတစ်သင်းက ကစားသမားတစ်ယောက်ကို ရုပ်တုတည်ပေးတယ်ဆိုတာ…မမေ့နိုင်တဲ့ အမှတ်တရတစ်ခု ချန်ထားခဲ့တဲ့သူ ဖြစ်မှသာ ဖြစ်နိုင်ပါတယ်။

ဘယ်လို သဘောထားကွဲလွဲမှုတွေ ရှိနေပါစေ…
ဆန်းတို့စ်အသင်းမှာ နေမာထားခဲ့တဲ့ အမွေအနှစ်ကတော့ ဘယ်သူမှ မဖျက်နိုင်ပါဘူး။

ဒီရုပ်တုဟာ ဆန်းတို့စ်သမိုင်းရဲ့ အကောင်းဆုံးကစားသမားတွေထဲက တစ်ယောက်အတွက် ထိုက်တန်တဲ့ ဂုဏ်ပြုမှုတစ်ခု ဖြစ်ပါတယ်။သူ့ရဲ့ ကစားသမားဘဝက ဘယ်နေရာကိုပဲ ရောက်သွားပါစေ…အဲဒီဇာတ်လမ်းရဲ့ အစကတော့ ဆန်းတို့စ်မှာပဲ ဖြစ်ခဲ့ပြီး…ဆန်းတို့စ်ဟာလည်း သူ့ရဲ့ အမွေအနှစ်ရဲ့ တစ်စိတ်တစ်ပိုင်းအဖြစ် အမြဲရှိနေမှာပါ။”

ကစားသမားတစ်ယောက်ရဲ့ တကယ့်အောင်မြင်မှုဆိုတာ ဖလားအရေအတွက်တစ်ခုတည်းနဲ့ မဆုံးဖြတ်နိုင်ပါဘူး။
သူ ထွက်ခွာသွားတဲ့နောက်…ကလပ်အသင်း၊ ပရိသတ်တွေနဲ့ ဘောလုံးသမိုင်းထဲမှာ ဘယ်လောက်အထိ အမှတ်ရနေသလဲဆိုတာကပဲ…အကြီးမားဆုံး အမွေအနှစ်ဖြစ်ပါတယ်။ 🇧🇷💛🗿

#ဘောလုံး

ရီးရဲလ် မက်ဒရစ်မှာ ကစားရတဲ့ ဖိအားနဲ့ ပရီးမီးယားလိဂ်က ဖိအားတို့ရဲ့ ကွာခြားချက်ကို ဂါရတ် ဘေးလ် ဖွင့်ဟ

ဂါရတ် ဘေးလ် :

“ဟုတ်ပါတယ်… ရီးရဲလ် မက်ဒရစ်ကို ရောက်တဲ့ ပထမဆုံးနေ့ကတည်းက အရာအားလုံး ဘယ်လောက်ပြင်းထန်တယ်ဆိုတာ ကျွန်တော် သိခဲ့ပါတယ်။ပွဲမတိုင်ခင် လေ့ကျင့်ရေးကွင်းမှာတောင် သတင်းထောက်တွေနဲ့ ပြည့်နေပြီး လေ့ကျင့်ခန်းတိုင်းကို စောင့်ကြည့်နေကြပါတယ်။

သတင်းစာတချို့ဆိုရင် ရီးရဲလ် မက်ဒရစ်အကြောင်းကိုပဲ အဓိက ရေးသားကြတာကြောင့်…ကိုယ့်ရဲ့ စွမ်းဆောင်ရည်တိုင်းကို အသေးစိတ် သုံးသပ်ခံရပါတယ်။ပရီးမီးယားလိဂ်မှာလည်း အာရုံစိုက်မှုက ကြီးမားပါတယ်။

ဒါပေမယ့်…ရီးရဲလ် မက်ဒရစ်မှာတော့ အဲဒီထက်တောင် အများကြီး မြင့်မားပါတယ်။ ခြေစွမ်းနည်းနည်းလေး ကျသွားတာနဲ့…ဝေဖန်သံတွေ ချက်ချင်း စတင်လာတာကို သိနေပါတယ်။”

ရီးရဲလ် မက်ဒရစ်ဟာ ကမ္ဘာ့အကြီးမားဆုံး ဘောလုံးအသင်းတွေထဲက တစ်သင်းဖြစ်တာကြောင့်…
ကစားသမားတစ်ယောက်ရဲ့ အောင်မြင်မှုကိုသာမက ကျရှုံးမှုကိုပါ ကမ္ဘာတစ်ဝန်းလုံးက စောင့်ကြည့်နေတဲ့ အသင်းတစ်သင်း ဖြစ်ပါတယ်။

ဒါကြောင့် အဲဒီလိုအသင်းမှာ အောင်မြင်ဖို့ဆိုတာ အရည်အချင်းတစ်ခုတည်းနဲ့ မလုံလောက်ဘဲ…
စိတ်ပိုင်းဆိုင်ရာ ကြံ့ခိုင်မှုနဲ့ ဖိအားကို ခံနိုင်ရည်ရှိဖို့လည်း အလွန်အရေးကြီးပါတယ်။

ရီးရဲလ် မက်ဒရစ်လို အသင်းမှာ ကစားရတဲ့ ဖိအားက တချို့ကစားသမားတွေကို ပြိုလဲသွားစေပေမယ့်…
တချို့ကစားသမားတွေကိုတော့ ဂန္တဝင်ကြီးတွေ ဖြစ်လာအောင် ဖန်တီးပေးနိုင်ပါတယ်။အဲဒီဖိအားကို ကျော်ဖြတ်နိုင်တဲ့သူတွေသာ…ဘာနေဗျူးရဲ့ တကယ့်သူရဲကောင်းတွေအဖြစ် မှတ်တမ်းဝင်နိုင်တာပါ။ 🏆

“အိမ်ကွင်းအားသာချက်ကို နောက်တစ်ဆင့်မြှင့်လိုက်တဲ့ အက်သလက်တီမီ‌နေးရိုး ” 🏟️

ဘောလုံးမှာ ပရိသတ်အားပေးမှုဟာ အသင်းတစ်သင်းရဲ့ လက်နက်တစ်ခုလိုပါပဲ။ အခုတော့ ဘရာဇီးလ်ကလပ် အက်သလက်တီကို မီနေးရိုးဟာ အဲဒီလက်နက်ကို နည်းပညာနဲ့ ပိုမိုအားကောင်းအောင် ပြုလုပ်လိုက်ပါတယ်။
အသင်းဟာ သူတို့ရဲ့ ကွင်းအတွင်း အသံစနစ်ကို အဆင့်မြှင့်တင်ပြီး ပရိသတ်တွေရဲ့ အော်ဟစ်အားပေးသံတွေကို နေရာတိုင်းမှာ ပိုမိုကျယ်လောင်စွာ ကြားနိုင်အောင် ပြန်လည်ဖြန့်ဝေပေးတဲ့ စနစ်တစ်ခု တပ်ဆင်လိုက်ပါတယ်။

ရည်ရွယ်ချက်က ရှင်းပါတယ်။ အိမ်ကွင်းမှာ ကစားတဲ့အခါ ပြိုင်ဘက်အသင်းတွေကို ပိုမိုဖိအားပေးနိုင်ဖို့၊ ကွင်းအတွင်း ပတ်ဝန်းကျင်ကို ပိုမိုကြောက်စရာကောင်းအောင် ဖန်တီးဖို့ ဖြစ်ပါတယ်။

ဘောလုံးပရိသတ်တွေအတွက်တော့ ဒီအရာက နည်းပညာအသုံးချမှုအသစ်တစ်ခု ဖြစ်ပေမယ့်… တချို့ကတော့ ပုံမှန်အိမ်ကွင်းအားသာချက်ထက် ကျော်လွန်ပြီး မျှတမှုအပေါ် သက်ရောက်နိုင်မလားဆိုတာ မေးခွန်းထုတ်နေကြပါတယ်။

ဘောလုံးမှာ အသင်း ၁၁ ယောက်ပဲ ကွင်းထဲဝင်ကစားပေမယ့်… တခါတလေ ပရိသတ် ၅ သောင်းရဲ့ အသံကလည်း ၁၂ ယောက်မြောက် ကစားသမားတစ်ယောက်လို ဖြစ်လာနိုင်ပါတယ်။ ⚽

“ကမ္ဘာ့ဖလားအိပ်မက်ရဲ့ အမှတ်တရတစ်ခု… အခုတော့ လေလံတင်ရောင်းချခံခဲ့ရပြီ” 🏆🇫🇷

ပြင်သစ်အသင်းနဲ့အတူ ၂၀၁၈ ကမ္ဘာ့ဖလားချန်ပီယံဖြစ်ခဲ့တဲ့ ဘင်ဂျမင် မန်ဒီဟာ သူ့ရဲ့ တရားဝင် ပုံတူကမ္ဘာ့ဖလားဆိုတံဆိပ်ကြီးကို လေလံတင်ရောင်းချခဲ့ပြီး ယူရို ၅၄,၀၀၀ အထိ ရရှိခဲ့ပါတယ်။

ဒီဆုဖလားပုံတူဟာ မန်ဒီအတွက် ရိုးရိုးအမှတ်တရပစ္စည်းတစ်ခု မဟုတ်ပါဘူး။ ၂၀၁၈ ရုရှားကမ္ဘာ့ဖလားမှာ ပြင်သစ်အသင်းနဲ့အတူ ကမ္ဘာ့ချန်ပီယံဖြစ်ခဲ့တဲ့ အချိန်ကာလကို ကိုယ်စားပြုတဲ့ အမှတ်တရတစ်ခု ဖြစ်ပါတယ်။

ဘောလုံးသမားတွေအတွက် ကမ္ဘာ့ဖလားဆိုတာ အမြင့်ဆုံးအိပ်မက်တစ်ခုပါ။ ကစားသမားဘဝတစ်လျှောက် တစ်ကြိမ်သာ ရရှိနိုင်တဲ့ အခွင့်အရေးဖြစ်တာကြောင့် ဒီလိုအမှတ်တရပစ္စည်းတစ်ခုကို ပရိသတ်တစ်ယောက်က ယူရို ၅၄,၀၀၀ ပေးပြီး ဝယ်ယူခဲ့တာကလည်း အဲဒီအောင်မြင်မှုရဲ့ တန်ဖိုးကို ပြသနေပါတယ်။

တစ်ချိန်က ကမ္ဘာ့ဘောလုံးရဲ့ အမြင့်ဆုံးစင်မြင့်ပေါ်မှာ ရပ်ခဲ့တဲ့ မန်ဒီအတွက်တော့… ဒီဆုဖလားပုံတူဟာ ရောင်းချလိုက်တဲ့ ပစ္စည်းတစ်ခုထက်ပိုပြီး သူ့ဘဝရဲ့ အကြီးမားဆုံးအောင်မြင်မှုတစ်ခုကို အမြဲသတိရစေမယ့် သင်္ကေတတစ်ခု ဖြစ်နေမှာပါ။ အမှန်တရားတွေပြည့်နေမယ်ဆိုဖလာကြီးကိုဘာကြောင့်ရောင်းလိုက်ရသလဲဆိုတာကိုတော့ လူသိရှင်ကြားဖော်ပြထားခဲ့ခြင်းမရှိပါဘူး။

ခရစ္စတီယာနိုရော်နယ်ဒို ဟာ သားဖြစ်သူနဲ့အတူ ရိုက်ထားတဲ့ ဓာတ်ပုံတစ်ပုံကို မျှဝေခဲ့ပါတယ်…အဲဒီဓာတ်ပုံနဲ့ပတ်သက်ပြီး လူတိုင်းရဲ့ အာရုံကို ဖမ်းစားခဲ့တာကတော့ ရော်နယ်ဒို ဂျူနီယာ ပါ။ ဂျူနီယာရဲ့ ကြံ့ခိုင်မှုနဲ့ အားကစားသမားဆန်တဲ့ ကိုယ်ခန္ဓာပုံစံ ဟာ ပရိသတ်တွေကြားမှာ ပြောစရာတစ်ခုအဖြစ်နေခဲ့ပါတယ်။

လွန်ခဲ့တဲ့ လအနည်းငယ်ကလည်း အယ်လ်နာဆာအသင်းဟာ ဂျူနီယာ ကို တဖြည်းဖြည်း ပထမအသင်းနဲ့ ပေါင်းစပ်သွားဖို့ အစီအစဉ်ရှိတယ်လို့ သတင်းတွေ ထွက်ပေါ်ခဲ့ပါတယ်။

ရော်နယ်ဒိုအတွက်ကျန်ရှိနေသေးတဲ့အိပ်မက်ကြီးတစ်ခုကတော့ သားဖြစ်သူနဲ့အတူဘောလုံးကစားရမယ်ဆိုတဲ့အခြေနေပါ။ အယ်နာဆာဘက်က ထုတ်ပြန်ထားတဲ့အခြေအနေတွေအရဆိုရင် ရော်နယ်ဒို နဲ့ သူ့ရဲ့သား ဂျူနီယာ ဟာ ရာသီသစ်မှာ အတူတကွကစားသွားရနိုင်ခြေရှိပါတယ်။

အဲဒီအတွေးကို ပိုပြီး အိပ်မက်ဆန်စေတာကတော့… ခရစ္စတီယာနို ရော်နယ်ဒို အတွက် ဂိုး ၁၀၀၀ ပြည့်သွင်းဂိုးကိုဖန်တီးပေးခဲ့တဲ့သူက ဂျူနီယာဖြစ်နေမယ်ဆိုတာပါပဲ။ အိပ်မက်ဆန်တဲ့ အဲဒီအတွေးအခေါ်သာ တကယ်ဖြစ်လာခဲ့မယ်ဆိုရင် ဘယ်လောက်အထိ လှပလိုက်မလဲဗျာ🤩

#‌ရော်နယ်ဒို

လာမင်း ယာမယ်လ် :

“ ကျနော့်ကောင်မလေးက အရမ်းလှပါတယ်။ သူ့ထက် ပိုလှပြီး ပိုချောတဲ့ မိန်းကလေးတစ်ယောက်ကို ခင်ဗျားတို့ ရှာပြ ၊ ရှာတွေ့ခဲ့ရင်…ကျွန်တော့် မျက်ခုံးမွှေးကို ရိတ်ပစ်လိုက်ပါ့မယ်။” (ရယ်လျက်)

လာမင်း ယာမယ်လ်ရဲ့ ဒီစကားကတော့ သူ့ချစ်သူအပေါ် ဘယ်လောက်အထိ ယုံကြည်ပြီး တန်ဖိုးထားလဲဆိုတာကို ဟာသဆန်ဆန် ဖော်ပြလိုက်တာ ဖြစ်ပါတယ်။ဘောလုံးကွင်းထဲမှာ ဖိအားတွေအများကြီး ရင်ဆိုင်နေရတဲ့ ကစားသမားတွေဟာ တစ်ခါတစ်ရံမှာ ဒီလိုပေါ့ပေါ့ပါးပါး အင်တာဗျူးတွေကနေ သူတို့ရဲ့ ရိုးသားတဲ့ ပုံစံကို ပရိသတ်တွေဆီ ပြသတတ်ကြပါတယ်။

ကျနော်မြင်တာကတော့…တကယ်ချစ်တဲ့သူတစ်ယောက်အတွက်တော့ ကမ္ဘာပေါ်မှာ သူ့ထက် ပိုလှတဲ့သူ မရှိဘူးလို့ ထင်တာက သဘာဝကျတဲ့ အရာတစ်ခုပါပဲ။ ❤️😄

ဘောလုံးလောကမှာ နာမည်တစ်လုံးကြားလိုက်တာနဲ့ လူတိုင်း လေးစားသွားရတဲ့သူတွေ သိပ်မများပါဘူး။ ဒါပေမယ့် အဲဒီအနည်းစုထဲမှာ ပြင်သစ်ဂန္ထဝင် ကစားသမားကြီး ဇီဒန်း ပါဝင်နေတယ်ဆိုတာကိုတော့ ဘယ်သူမှ ငြင်းလို့မရပါဘူး။ ပြင်သစ်အမျိုးသားအသင်းရဲ့ နည်းပြရာထူးနဲ့ ပတ်သက်ပြီး သတင်းတွေထွက်ပေါ်နေချိန်မှာပဲ ဇီဒန်းနဲ့အတူ ၁၉၉၈ ကမ္ဘာ့ဖလားကို အတူတူ ဆွတ်ခူးခဲ့ဖူးတဲ့ ကွင်းလယ်လူဟောင်းကြီး အီမန်နျူရယ်ပီတစ်ကတော့ သူ့ရဲ့ လုပ်ဖော်ကိုင်ဖက်ဟောင်း ပြင်သစ်အသင်းကို ကိုင်တွယ်တာကို အရမ်းမြင်ချင်နေပါပြီ။ ဇီဒန်းရဲ့ ကြီးမားလှတဲ့ ဩဇာလွှမ်းမိုးမှုနဲ့ ပတ်သက်ပြီး ပီတစ်က အခုလိုပဲ စိတ်လှုပ်ရှားစွာ ဖွင့်ဟပြောဆိုလာပါတယ်။

အီမန်နျူရယ်ပီတစ် :

"အခန်းတစ်ခန်းထဲကို ဇီဒန်း ဝင်လာပြီဆိုတာနဲ့ သူ ဘာစကားမှ မပြောရသေးရင်တောင် လူတိုင်းက ငြိမ်ကျသွားတတ်ကြပါတယ်။ သူ့ဆီမှာရှိနေတဲ့ အရှိန်အဝါနဲ့ ဆွဲဆောင်မှုတွေကြောင့် ကစားသမားတွေရဲ့ စိတ်နှလုံးကို သိမ်းပိုက်ဖို့ သူ စကားတွေအများကြီး ပြောနေစရာ မလိုပါဘူး။ ကစားသမားတချို့ဆိုရင် ဇီဒန်းရဲ့ လက်အောက်မှာ ကစားချင်လွန်းလို့ ဆန္ဒတွေစောနေကြမယ်ဆိုတာ ကျနော် တွေးကြည့်လို့ရပါတယ်။

သူက လူတွေကို ဦးဆောင်နိုင်တဲ့ ခေါင်းဆောင်ကောင်းတစ်ယောက်ဖြစ်ပြီး သူ့ရဲ့ စွမ်းဆောင်ရည်တွေကို ကျနော် အရမ်းမြင်ချင်နေပါပြီ။ ဇီဒန်းအကြောင်း ပြောကြပြီဆိုတာနဲ့ ကျနော်တို့တွေဟာ ယုတ္တိဆန်တာတွေထက် ကျော်လွန်တဲ့ မှော်ဆန်မှုတွေအကြောင်းကိုပါ ထည့်ပြောရတော့တာပါပဲ။ သူ ကိုင်တွယ်လိုက်တဲ့ အရာတိုင်းက ရွှေဖြစ်သွားတတ်ပါတယ်။ ရီးရဲလ်မက်ဒရစ်အသင်းမှာ သုံးနှစ်တာ ကိုင်တွယ်ခဲ့ပြီး ဥရောပချန်ပီယံဆုကို သုံးကြိမ်တိုင်တိုင် ရယူပေးနိုင်ခဲ့တာက သက်သေပါပဲ။ အခု သူသာ ပြင်သစ်အမျိုးသားအသင်းရဲ့ နည်းပြဖြစ်လာခဲ့ရင်ကော ပြင်သစ်အသင်းရဲ့ ရည်မှန်းချက်တွေကို ရွှေအဖြစ် ပြောင်းလဲပေးနိုင်မလား။ ကျနော်ကတော့ အဲဒီလိုပဲ ယုံကြည်ချင်မိပါတယ်။"

မန်ချက်စတာယူနိုက်တက်သမိုင်းတစ်လျှောက် အတန်ဆုံးနဲ့ အကောင်းဆုံးသော ပေါင်တစ်သန်းခွဲတန် ရင်းနှီးမြှုပ်နှံမှု

ဘောလုံးလောကမှာ ကစားသမားတစ်ယောက်ကို ခေါ်ယူဖို့ ငွေကြေးအမြောက်အမြား သုံးစွဲကြပေမယ့် တန်ကြေးနည်းနည်းနဲ့ သမိုင်းဝင်သွားတဲ့ ကစားသမားတွေလည်း ရှိပါတယ်။ လွန်ခဲ့တဲ့ နှစ်ပေါင်းများစွာက မန်ချက်စတာယူနိုက်တက်အသင်းဟာ နော်ဝေကနေ လူသိပ်မသိသေးတဲ့ တိုက်စစ်မှူးတစ်ယောက်ကို ပေါင် တစ်သန်းခွဲဆိုတဲ့ ပမာဏလေးနဲ့ပဲ ခေါ်ယူခဲ့ပါတယ်။

အဲ့ဒီအချိန်က ဘယ်သူမှ သိပ်မမျှော်လင့်ခဲ့ကြပေမယ့် သုံးနှစ်အကြာမှာတော့ သူဟာ အသင်းအတွက် မယုံနိုင်စရာ အခိုက်အတန့်ကို ဖန်တီးပေးခဲ့ပြီး ကလပ်အသင်းသမိုင်းမှာ မေ့မရနိုင်တဲ့ သူရဲကောင်းတစ်ဦး ဖြစ်လာခဲ့ပါတယ်။

အဲဒီကစားသမားကတော့ ၁၉၉၆ ခုနှစ်က မန်ချက်စတာယူနိုက်တက်အသင်းဆီ ရောက်ရှိလာခဲ့တဲ့ နော်ဝေတိုက်စစ်မှူး အိုလီဂန်နာဆိုးရှား ပဲ ဖြစ်ပါတယ်။ ဆိုးရှားဟာ မန်ချက်စတာယူနိုက်တက်ဆီရောက်လာပြီး သုံးနှစ်အကြာ ၁၉၉၉ ခုနှစ်မှာပဲ ချန်ပီယံလိဂ်ဗိုလ်လုပွဲမှာ ဘိုင်ယန်မြူးနစ်အသင်းကို နောက်ကျသွင်းဂိုးနဲ့ အနိုင်ယူကာ ချန်ပီယံအဖြစ် သမိုင်းရေးထိုးနိုင်ပါတယ်။

ဆိုးရှားဟာ အသင်းအတွက် အရေးပါဆုံး အချိန်တွေမှာ အမြဲတမ်း ကယ်တင်ရှင်အဖြစ် ပေါ်လာတတ်တဲ့ တိုက်စစ်မှူးမျိုးဖြစ်ပြီး ၊ သူအတွက် ပေးချေခဲ့ရတဲ့ ပေါင် တစ်သန်းခွဲဆိုတဲ့ ပမာဏဟာ အခုနောက်ပိုင်းခေတ်တွေနဲ့ ယှဉ်ကြည့်ရင် တကယ့်ကို အသေးအမွှားလေးလို ဖြစ်သွားခဲ့ရပါတယ်။

#ဘောလုံး

ယူရိုသန်းနှစ်ဆယ်တည်းနဲ့ ရီးယဲလ်မက်ဒရစ်အသင်းဆီ ရောက်လာတဲ့ နယ်သာလန်ရထားကြီး ဒန်ဇယ်ဒမ်းဖရီးစ်

အီတလီမြေမှာ ရနိုင်သမျှ ဆုဖလားတွေအကုန်လုံးကို သိမ်းပိုက်နိုင်ခဲ့တယ်။ ဥရောပရဲ့ အမြင့်ဆုံးစင်မြင့်ဖြစ်တဲ့ ချန်ပီယံလိဂ်ဗိုလ်လုပွဲတွေကိုလည်း ဝင်ရောက်ကစားနိုင်ခဲ့တယ်။ အခုတော့ ဒီကစားသမားဟာ ကမ္ဘာ့အကြီးကျယ်ဆုံး ကလပ်အသင်းကြီးဆီကို ခြေချလာခဲ့ပါပြီ။ ခံစစ်နဲ့ တိုက်စစ်ကို မမောမပန်း လိုက်ပါကစားနိုင်စွမ်းရှိတဲ့ သူကတော့ ညာတောင်ပံမှာ တဟုန်ထိုးပြေးလွှားတတ်တဲ့ ဒန်ဇယ်ဒမ်းဖရီးစ်ပဲ ဖြစ်ပါတယ်။ ဒီအပြောင်းအရွှေ့ဟာ ဘောလုံးလောကတစ်ခုလုံးကို အံ့အားသင့်စေခဲ့ပြီး ဥရောပမီဒီယာတွေရဲ့ မျက်နှာဖုံးစာမျက်နှာတွေမှာ နေရာယူလာခဲ့ပါတယ်။

ဒမ်းဖရီးစ် ကို ခေါ်ယူနိုင်ခဲ့တာဟာ ရီးယဲလ်မက်ဒရစ်ရဲ့ အပြောင်းအရွှေ့ ဈေးကွက်လှုပ်ရှားမှုတွေကို တကယ်ကို ချီးကျူးပေးရပါမယ်။ အင်တာမီလန်အသင်းမှာ ညာတောင်ပံခံစစ်နဲ့ တောင်ပံတိုက်စစ် နေရာတွေမှာ မရှိမဖြစ် ကစားသမားတစ်ယောက်အဖြစ် နှစ်ပေါင်းများစွာ ခြေစွမ်းပြခဲ့တဲ့ ဒမ်းဖရီးစ်ကို ဒီလောက်သက်သာတဲ့ ဈေးနှုန်းနဲ့ ခေါ်ယူနိုင်ခဲ့တာဟာ အသင်းရဲ့ အနာဂတ်အတွက် အများကြီး အထောက်အကူဖြစ်စေမှာပါ။

သူ့ရဲ့ ကြံ့ခိုင်မှု၊ လျင်မြန်မှုနဲ့ ဖြတ်တင်ဘောပေးပို့မှုတွေက ရီးယဲလ်မက်ဒရစ်အသင်းရဲ့ တိုက်စစ်ကစားဟန်နဲ့ အံဝင်ခွင်ကျဖြစ်နေမှာ အသေအချာပါပဲ။ အသက်အရွယ်အရ အတွေ့အကြုံရင့်ကျက်နေပြီဖြစ်သလို အောင်ပွဲတွေနဲ့ ယဉ်ပါးနေတဲ့ ကစားသမားတစ်ယောက်ကို အခုလိုမျိုး ခေါ်ယူနိုင်ခဲ့တာဟာ အသင်းရဲ့ ညာခြမ်းကို အရင်ကထက် ပိုမိုအားကောင်းလာစေမှာ ဖြစ်ပါတယ်။

ရီးယဲလ်မက်ဒရစ်အသင်းဟာ ငွေကြေးသုံးစွဲမှုအပိုင်းမှာ တခြားအသင်းတွေထက် အများကြီး ပိုပြီးပါးနပ်လာတာကို တွေ့ရပါတယ်။ ကစားသမားတစ်ယောက်ရဲ့ တကယ့်တန်ဖိုးနဲ့ အသင်းအတွက် ဘယ်လောက်အထိ အသုံးဝင်နိုင်မလဲဆိုတာကို သေချာတွက်ချက်ပြီးမှ ခေါ်ယူလေ့ရှိတာဟာ ကြီးမြတ်တဲ့ ကလပ်အသင်းတွေရဲ့ လျှို့ဝှက်ချက်ပါပဲ။ ဒမ်းဖရီးစ်လို ချန်ပီယံလိဂ်အတွေ့အကြုံအပြည့်ရှိတဲ့ ကစားသမားတစ်ယောက်ကို ယူရိုသန်းနှစ်ဆယ်တည်းနဲ့ ရလိုက်တာဟာ ဈေးကွက်ထဲမှာ အလွန်ရှားပါးတဲ့ အခွင့်အရေးတစ်ခုကို အမိအရဆုပ်ကိုင်နိုင်ခဲ့တာပါ။ ပရိသတ်တွေအနေနဲ့လည်း ဆန်တီယာဂိုဘာနေဗျူးကွင်းကြီးထဲမှာ ပြေးလွှားကစားမယ့် နယ်သာလန်ရထားကြီးရဲ့ ခြေစွမ်းကို ရင်ခုန်စွာနဲ့ စောင့်ကြည့်ရတော့မှာ ဖြစ်ပါတယ်။

#ဘောလုံး