04/08/2026
Badmintonveisla á Sauðárkróki!
Það var líf og fjör á Sauðárkróki um Verslunarmannahelgina þegar Unglingalandsmót UMFÍ fór þar fram. Yfir 1100 ungmenni mættu til leiks, kepptu í íþróttum á daginn og skemmtu sér á tónleikum á kvöldin.
Keppni í badminton fór fram á föstudeginum með metþátttöku, en rúmlega 200 keppendur tóku þátt! Keppt var í 11–12 ára, 13–14 ára og 15–18 ára flokkum hjá bæði stúlkum og drengjum.
Til að koma öllum að var spilað á tíma og notast við Monrad-kerfið. Það fyrirkomulag tryggir að allir fá jafnmarga leiki; spilaðar voru s*x umferðir og spennan var í hámarki undir lokin þegar getustig keppenda hafði jafnast út.
Áhugi ungmennanna á badminton var gífurlegur og því þurfti að halda uppi miklum hraða. Leikirnir voru aðeins 4–5 mínútur með engu hléi á milli og var keyrt stanslaust frá klukkan 8:30 um morguninn til 19:30 um kvöldið. Alls voru spilaðir um 630 leikir á 11 klukkustundum!
En dagskránni var ekki lokið þar. Frá kl. 21:00 til 23:00 var boðið upp á LED-partý-badminton þar sem ljósin voru slökkt, kveikt á partíljósum, netin skreytt með ljósaseríum og LED-kúlur flugu um salinn. Þetta sló rækilega í gegn hjá bæði börnum og fullorðnum og komust færri að en vildu, en biðröð hafði myndast frammi á gangi og út á götu um 15 mínútum áður en opnað var í salinn – sannkölluð badmintonveisla frá morgni til kvölds!
Það var Badmintondeild Tindastóls sem sá um skipulag badmintondagsins í góðu samstarfi við starfsfólk UMFÍ og öflugan hóp sjálfboðaliða, en margir þeirra höfðu aldrei tekið þátt í badmintonmóti áður. Öllum þátttakendum, foreldrum, samstarfsfólki og sjálfboðaliðum eru færðar innilegar þakkir fyrir daginn. Við hlökkum til að sjá ykkur öll aftur á næsta Unglingalandsmóti
