Valur Körfubolti

Hún er komin aftur!

Við erum virkilega spennt að fá Reshawna Stone aftur til liðsins fyrir sitt annað tímabil með Val. Reshawna var án efa einn besti bakvörður deildarinnar á síðasta tímabili. Hún skilaði að meðaltali 23,1 stigi, 4,8 stoðsendingum og 5,3 fráköstum í leik, auk þess að hitta úr 41% þriggja stiga skota sinna.

Fyrir utan frammistöðuna inni á vellinum var hún frábær liðsfélagi og sterkur leiðtogi sem hafði jákvæð áhrif á liðið.

Reshawna segir:
„Ég er virkilega spennt að vera komin aftur til Vals. Félagið og stuðningsmennirnir létu mér líða eins og ég væri heima. Ég er tilbúin að leggja hart að mér með þjálfurunum og liðsfélögunum mínum. Ég hlakka til að berjast um titla og skapa eftirminnilegar stundir!“

Jamil segir:
„Það var algjör ánægja að þjálfa Reshawna og hún er enn betri manneskja. Hæfileikar hennar tala sínu máli. Ég er mjög ánægður með að fá hana aftur í hópinn okkar og ég er sannfærður um að hún muni leiða okkur nær markmiðum okkar á þessu tímabili.“

Áfram hærra! 🦅

Við erum afar ánægð með að bjóða Dwayne Lautier-Ogunleye velkominn til Vals.

Dwayne þarf vart að kynna fyrir körfuboltaunnendum, enda hefur hann spilað á Íslandi í nokkur ár og fest sig í sessi sem einn besti stigaskorari deildarinnar. Hann mun styrkja liðið á margvíslegan hátt á komandi tímabili og við hlökkum mikið til að sjá hann á vellinum í Valstreyjunni.

Dwayne segir:
„Ég er virkilega spenntur fyrir því að ganga til liðs við Val. Félagið á sér ríka sögu sem ég hlakka til að verða hluti af, og ég get ekki beðið eftir að hjálpa liðinu að færa Íslandsmeistaratitilinn aftur að Hlíðarenda”

Áfram hærra 🦅

Berta María Þorkelsdóttir og Fatima Rós Joof framlengja næstu tvö tímabil!

Berta og Fatima hafa tekið stöðugum framförum á hverju tímabili og hafa verið lykilleikmenn í 12. flokki. Fyrir utan það sem þær leggja til inni á vellinum hafa þær einnig verið afar hjálpsamar innan félagsins og það fer ekki fram hjá neinum.

Berta hefur verið í lykilleikmaður í sínum flokki upp alla yngri flokka Vals. Hennar einkenni inn á vellinum eru fráköst á báðum endum vallarins og dugnaður sem sést ekki á tölfræði blaðinu. Hún hefur líka verið að þjálfa yngstu krakkana í félaginu með Pálmari og hennar iðkendur eru mjög ánægðir að hafa hana sem þjálfara.
Berta hefur verið í yngri landsliðum og er nú úti sem fyrirliði u18 liðsins á Norðurlandamóti í Svíþjóð.

Fatima er einnig lykilleikmaður í sínum flokki og hefur verið í kringum æfingahópa yngri landsliða og tekið miklum framförum eftir að hún kom til okkar. Fatima er þekkt fyrir sinn frábæra varnarleik, enda náskyld Söru Líf sem allir þekkja vel í Val. Fatima fékk Bergsbikarinn í vor þar sem hún hefur verið afskaplega mikilvæg í sjálfboðaliðastörfum innan félagsins og einnig orðinn mikill Valsari sem er alltaf mætt þegar beðið er um aðstoð.

Með áframhaldandi þróun, dugnaði og persónulegum framförum eiga þær eftir að verða gríðarlega mikilvægir hlekkir í velgengni kvennaliðsins, bæði innan sem utan vallar.

Jamil segir: ,,Undanfarin tvö tímabil hef ég verið einstaklega ánægður með þær báðar. Þær eru frábærir liðsfélagar, leggja gríðarlega hart að sér og hafa mikinn metnað til að bæta sig og halda áfram að vaxa sem leikmenn. Það er nákvæmlega það sem þjálfari óskar sér. Þær verða lykilleikmenn á þessu tímabili og munu hjálpa okkur að ná markmiðum okkar. Ég er virkilega ánægður með að þær verði áfram með okkur á komandi tímabili.“

Áfram hærra 🦅

Sara Líf Boama framlengir! 👏

Sara er uppalin í Val og hefur verið lykilleikmaður liðsins sl. ár og hefur tekið stöðugum framförum á hverju einasta tímabili. Hún er þekkt fyrir mikla orku, sterkan frákastaleik og frábæra vörn, og við hlökkum til að sjá hana aftur á parketinu.

Jamil segir: ,,Gildi Söru fyrir liðið verður vart metið til fulls. Hún sér um öll litlu en mikilvægu atriðin sem skila sér ekki alltaf á tölfræðiblaðið. Það hefur verið algjör ánægja að þjálfa hana og hún hefur verið einn af lykilleikmönnum liðsins síðustu tvö tímabil. Ég hlakka til að vinna með henni aftur á þessu tímabili.“

Áfram hærra! 🦅

Aníta Kristín Jónsdóttir í Val.

Aníta er enginn nýgræðingur í Val, en hún lék handbolta með félaginu á yngri árum.

Eftir nokkur ár hjá ÍR og eftir að hafa skipt yfir í körfubolta hefur hún tekið miklum framförum og er einn af efnilegum leikmönnum landsins.

Hjá ÍR var hún valin besti ungi leikmaðurinn og einnig sú sem bætti sig mest á síðasta tímabili.

Aníta segir: ,,Ég er virkilega spennt að hefja þennan nýja kafla og vera hluti af sterku liði. Ég hlakka til að vinna með Jamil, halda áfram að þróast sem leikmaður og leggja mitt af mörkum til að liðið nái góðum árangri á tímabilinu.“

Jamil segir: ,,Ég hafði þann heiður að kynnast Anítu í gegnum einstaklingsæfingar og varð strax mjög hrifinn af vinnusemi hennar og miklum metnaði til að bæta sig. Ég hlakka til að fylgjast með áframhaldandi þróun hennar, bæði innan vallar sem utan, á komandi tímabili. Hún mun falla afar vel inn í okkar lið.“

Velkomin aftur í Val!
Áfram hærra 🦅

Dzana Crnac og Bergdís Anna Magnúsdóttir í Valsfjölskylduna!

Dzana Crnac er 20 ára bakvörður, hún lék með Ármanni á síðasta tímabili. Dzana hefur spilað í yngri landsliðum Íslands og er hæfileikaríkur bakvörður sem kemur með mikla orku í bakvarðasveitina okkar og mun hjálpa liðinu á báðum endum vallarins.
Dzana segir: ,,Ég er mjög spennt fyrir komandi tímabili, er sannfærð um að ég geti bætt mig mikið í þessu umhverfi og Jamil er alveg búinn að selja mér þetta. Stefnan er að fá titilinn á Hlíðarenda enn einu sinni."

Bergdís Anna er 21 árs bakvörður sem kemur frá Hamar/Þór, Bergdís er efnilegur leikmaður sem kemur með mikinn leikskilning. Hún getur teygt á vörn andstæðingsins, eitthvað sem okkur hefur vantað í hópinn.
Bergdís segir: ,,Ég er sjúklega spennt fyrir að koma yfir í Val, kynnast umhverfinu hér og tel þetta vera rétt næsta skref fyrir mig. Ég er líka mjög spennt að spila fyrir Jamil og veit að hann mun hjálpa mér að bæta mig á þeim sviðum sem mig langar að bæta."

Jamil þjálfari liðsins segir: ,,Ég er gríðarlega spenntur fyrir þessum tveimur leikmönnum í hópinn okkar. Fyrir utan hæfileikana og það sem þær færa liðinu innan vallar eru þær báðar einstaklega duglegar og frábærir liðsfélagar. Þær hafa mikinn metnað til að bæta sig og vilja vera í góðu liði. Ég hlakka til að sjá þær í rauðu og hvítu litunum og hjálpa okkur að ná í titla á þessu tímabili"

Velkomnar í Val!
Áfram hærra 🦅

Styrktarþjálfun í sumar!

Í sumar mun Páll Arnar Kandeh, Íþróttafræðingur og styrktarþjálfari, í samvinnu við körfu- og handknattleiksdeild Vals bjóða uppá styrktarþjálfunar námskeið fyrir 14-18 ára ungmenni (fædd 2013-2008).

Æfingarnar verð mánudaga, miðvikudaga og fimmtudaga klukkan 14-15, yngri hópar, og klukkan 17:00-18:00, eldri hópur.

Yngri hópur: 2011-2013

Eldri hópur: 2010 og eldri

Yfir tímabilið verður farið í helstu lyftingaræfingar, þolþjálfun og snerpuþjálfun ásamt bætingu á samhæfingu og liðleika.

Æfingarnar taka mið af aldri og getustigi hvers og eins. Áhersla á styrktar-, snerpu- og kraftþjálfun.

Æfingarnar fara fram lyftingarsalnum í N1 höllinni en geta þó verið færðar út þegar veður leyfir.

Námskeið hefst mánudaginn 15.júní.

https://www.abler.io/shop/valur/styrkur/product/Q2x1YlNlcnZpY2U6NTk0ODg=?

Þá er frábæru tímabili lokið hjá Minnibolta 6-7 ára hópunum okkar!

Í vetur voru 69 drengir skráðir til leiks og 38 stúlkur sem æfðu tvisvar í viku í sitt hvorum hópnum.

Þau fóru á fimm mót í vetur og tóku miklum framförum á hverju einasta móti.

Við enduðum tímabilið með pomp og prakt á glæsilegri uppskeruhátíð í Valsheimili þar sem öll börnin fengu sérsniðið viðurkenningarskjal, við horfðum saman á myndband með viðtölum við börnin og dönsuðum við Valslagið.

Í vetur lögðum við mestar áherslur á grunnatriðin í körfubolta:
- Skot
- Drippl
- Sendingar
- Varnarstaða
- Gabbhreyfingar
- Stjörnuskref
- Fráköst
- Layup
- og margt fleira....

En stærsta áherslan var að kveikja áhugann á körfubolta og íþróttum og kveikja áhugann fyrir því að æfa sig sjálf og fara út að leika sér í körfubolta. Einnig lögðum við mikla áherslu á leikgleðina og að börnin legðu sig fram við að vera góðir liðsfélagar.

Takk fyrir frábæran vetur og sjáumst aftur næsta haust!

ÁFRAM HÆRRA VALUR 🦅

Valur sigrar sterkt mót í Svíþjóð

Valur var með fimm lið skráð á Lampe mótið í Stokkhólmi sem haldið var í 20 sinn um helgina.

Mótið er sett upp í tveimur styrkleika flokkum í öllum aldurshópum Open og Elite. Valur var með tvö lið í open og þrjú lið í Elite. Alls voru 159 lið sem tóku þátt í mótinu sem spilað er á þremur dögum. Valur hefur sent lið síðustu fjögur á mótið.

Strákarnir í 8.flokki (2012) sigraði 🥇🏆 u14 ára Elite deildinni. Þar sem Dominik K. Ágústsson var valinn besti leikmaður mótsins (Tournament MVP) og Ísak Alvar Agnarsson leikmaður úrslitaleiksins. Valur hvítir sigruðu síðasta leikinn sinn og enduðu í 7. Sæti í open deild.

Strákarnir í 9.flokki (2011) sigruðu þrjá af fjórum leikjum og fengu silfur 🥈í u15 ára Open deild. Benedikt Tumi Aronsson var valinn leikmaður úrslitaleiksins.

Stelpurnar í 9.flokki (2011) enduðu 5.sæti í u15 ára Elite deild þar sem þær unnu tvo af fjórum leikjum.

Stelpurnar í 8.flokki (2012) ný krýndir Íslandsmeistara enduðu 6.sæti í u14 ára Elite deild, þar sem þær unnu einn af fjórum leikjum. Allir leikir hjá liðinu voru gríðarlega jafnir.

Allar frekar upplýstar um Lampe mótið má finna á heimasíðu mótshaldara.

https://lampechallenge.cupmanager.net/2026,en/result/clubs/75923676