Skautafélag Reykjavíkur Íshokkí

Ragnhildur Kjartansdóttir var kona leiksins úr liði SR gegn SA á Akureyri í gær

Það var á brattann að sækja hjá okkar konum á Akureyri í gær og niðurstaðan var 0–2 tap gegn gestgjöfunum. SR barðist kröftuglega og varðist vel en Julianna var firnaöflug í markinu og varði rúmlega 95% af skotum andstæðinganna.

Liðið fær nú góðan tíma til að stilla betur saman strengi þar sem næsti Toppdeildarleikur þeirra er ekki fyrr en 10. október, og verður hann aftur gegn SA. Vert er þó að nefna að fjögurra liða kvennamót á vegum ÍHÍ, þar sem írska landsliðið, SR, SA og Fjölnir etja kappi, verður haldið í Laugardalnum 25.–27. september.

Tveir ungir leikmenn fengu sínar fyrstu mínútur með liðinu, þær Mackenzie Rae Lassen (14 ára) og Tinna Valdís Viktorsdóttir (13 ára) – og við óskum þeim til hamingju með áfangann.

Tímabilið byrjaði snemma í ár og voru það U16 lið SR sem spiluðu fyrstu leikina. Leikirnir fóru fram um liðna helgi, í enda ágústmánaðar og spilað var gegn U16 liðum Akureyringa. Liðin byrjuðu tímabilið af krafti og sigruðu bæði A og B liðin gestina að norðan í miklum markaleikjum og settu tóninn fyrir SR á tímabilinu hér í Laugardalnum.

Það er komið að þessu, fyrsti leikur Toppdeildar kvenna á þessu tímabili!

Titilvörn kvennaliðs SR hefst á Akureyri í ár, næstkomandi laugardag 5. september kl. 16.45

Ekki missa af þessari rimmu annaðhvort í eigin persónu í Skautahöllinni á Akureyri eða á streymisrás ÍHÍ - IcehockeyIceland.tv

Núverandi Íslandsmeistarar frumsýna nýjar útitreyjur félagsins við þetta tækfifæri.

Áfram SR!

Við þökkum styrktaraðilum okkar kærlega fyrir stuðninginn á síðustu leiktíð sem var svo sannarlega söguleg 💙

Við erum að taka á móti bókunum á battaauglýsingum og öðru styrktarsamstarfi fyrir komandi tímabil, þar sem bæði karla- og kvennalið okkar ætla að verja Íslandsmeistaratitla sína. 🏆🏆

Viltu vera með okkur í vetur?
Nánari upplýsingar um auglýsingar og styrktarsamstarf má finna hér: https://skautafelag.is/augl/

Hluti borgarstjórnar Reykjavíkur, Sjálfstæðisflokkur, Viðreisn og Framsókn, kíktu í heimsókn til okkar á dögunum og spreyttu sig í íshokkííþróttinni undir leiðsögn þjálfara og leikmanna okkar. 🏒

Það sáust góðir taktar og greinilegt að keppnisskapið leyndist víða! Það var hart barist á svellinu, en fyrst og fremst var mikið hlegið og skemmt sér.

Við þökkum kærlega fyrir heimsóknina og vonum að gestirnir hafi farið heim með góðar minningar – og kannski smá harðsperrur!

SR-ingar ætla að taka þátt í Reykjavíkurmaraþoni Íslandsbanka á morgun fyrir Patta - til styrktar Arnarsins - minningar og styrktarsjóðs. Við hvetjum til þátttöku og stuðnings, margt smátt gerir eitt stórt. 💙

https://www.rmi.is/hlaupastyrkur/hlaupahopar/21139-fyrir-patta

Ísland sendi U14 Selects lið stúlkna á sterkt mót í Svíþjóð nýverið, nánar tiltekið í Solna rétt norðan við höfuðborgina Stokkhólm. Þar keppti liðið við önnur Selects lið frá New York, Finnlandi, Svíþjóð (tvö lið), Noregi og Tékklandi. Liðið endaði í 6. sæti en stóð sig vel í frumraun sinni á erlendri grundu. Unnu tvo leiki í undanriðli og en töpuð svo naumlega leik gegn Tékklandi í leik um 5. sætið. SR átti tvo flotta fulltrúa þær Tinnu Viktorsdóttur og Gabríellu Jóhannsdóttur.