Barri Eco-tourism

ل رۆژا جیهانییا ژینگه‌هێ ، رێکخراوا بەڕی کارەکێ مرۆڤایەتی و ژینگەدۆستی ئەنجامدا

ئەڤرۆ ب هەلکەفتنا ( رۆژا جیهانییا ژینگەهێ ) ئەم وەک تێمەکا پێنج کەسی ژ (رێکخراوا بەڕی بۆ گەشتوگوزارا ژینگەهێ و چیاڤانی)ب سەرپەرشتیا سەرۆکێ رێکخراوێ، مە بڕیار دا ڤێ رۆژێ ب کردار و کارەکێ مروڤی و ژینگەهپارێزی برێ بکەین.
د ئێک ژ گەشتێن خوە دا بۆ چیایەکێ سەركەش یێ ( دەڤەرا زاخۆ ) مە قەستا کانیەکا ئاڤێ کر ، ئەوا کو بەری نوکە ژبەر تراش، دەهلو، بەرا و پاشمایان هاتیە گرتن و ژینگەهەکا خراب ل دۆر دروست ببوو، کو نە ئاژەلێن کێفی و بالندان و نە ژی چیاڤانان دکاربوو مفای ژێ وەربگرن.

تیمامە ب دلۆسۆزی و رابین بکارێ سەخبێریکردن و پاقژکرن ( کانی)ێ ژ هەموو ئاستەنگ و دار و بەرا ، نووژەنکرن و دروستکرنا رێڕەوا ئاڤێ ب شێوازەکێ سروشتی ، بەرفرەهکرنا کانیێ داکو ببیتە ژێدەرەکێ پاقژ و بەردەوام بۆ:
1. 🦅 بالندە و گیانەوەرێن کێفی یێن وێ دەڤەرێ.
2. 🥾 ئەو چیاڤان و کەسێن وەک گەشتیار سەرەدانا وی جهی دکەن.
پاراستنا ژینگه‌هێ نە بتنێ ئاخافتن و درووشمە، بەلکو کردار و بەرپرسیاریەتییە ، هەر پێنگاڤەکا بچووک، دشێت گۆهرینەکا مەزن د سرۆشتێ وەلاتی مە دا دروست بکەت.

#زاخۆ #چیاڤانی #کوردستان

چیایان نەکە قوربانییا "نمایشا بەژن و باڵا و لایک و ڤیویا

چیا جهێ بێدەنگیێ و خۆڕاگریێ بوون، بەلێ ئەڤرۆ یێن بووینە هۆلێن نیشاندانێ و سێرکێن مۆدێرن ، سروشتێ کو بەری نوکە جهێ تێڕامانێ و پاقژکرنا دەروونی بوو، نوکە یێ بوویە “ستۆدیۆیەکا بلاش" بۆ وان کەسێن کو بتنێ بۆ تژی کرنا ڤیدیۆیێن خوە و کۆمکرنا لایکا و ڤیویا قەستا چیا دکەن ، ئەڤە ڤەگەر نینە بۆ ناڤ سروشتی ، ئەڤە داگیرکارییەکا بێدەنگە.

بازرگانی و وێرانکاری:
نوکە چیا بچاڤێ "بازاڕی" دهێنە دیتن ، کۆمپانیا و گروپێن گەشتیاری، ب ناڤێ چالاکی و وەرزشێ، ژینگەها دەستنەدا و جهێن دیرۆکی تێکددەن ، ئەو جهێن کو دڤیا ب بێدەنگی
بمینن، نوکە یێن تژی بووینە ژ جەنجەری و دەنگەدەنگێ، پاشمایێن نایلۆنی، پلاستیکێ وان کو سیمایێ سروشتی دگوهۆڕن ، بازرگانیکرن ب سروشتی ڤە، واتا کوشتنا رۆحا سروشتی یە.

نیشاندان ل جهێ ئامادەبوونێ :
ئەو کەسێ ب مۆبایلا خۆ ڤە دچیتە سەرێ چیای و بتنێ خەما گۆشەیا وێنەیێ وی یە، چجار نەشێت بێهنا چیای هەلمێژیت. چالاکی ژ ناڤەرۆکێ هاتینە ڤالاکرن؛ گەشتێن چیا
بووینە کێبڕکێیەک بۆ نیشاندانا "ژیانەکا درەوین" بۆ جیهانا دەرڤە ، ئەڤە نەساخلەمترین جۆرێ پەیوەندیێ یە دگەل سروشتی ، چیا ڤیان و رێز دڤێت ، نەک هاشتاگا ، کێڤیبوون پێدڤی ب دلسۆزیێ یە، نەک نیشاندانێ ..!

پەیامەک بۆ پاشەڕۆژێ :
سروشت پێدڤی ب "چاڤدێر و زێرەڤانییە" نەک "بەکارهێنەری" ، ئەگەر تو بتنێ بۆ وێنەگرتنێ دچیە چیا، ئانکو تو مێهڤانەکێ نەخواستیێ ، ژینگەها دیرۆکی و سروشتێ مە ، مێژوویا مللەتەکێ یە، نەکو کالایەکــا بازرگانی ، بلا چیا ب پاقژی بمینن بۆ وان کەسێن
کو ب راستی دزانن چەوا دگەل ئاخێ و دارا و ئاڤا کانیا و بالندا و گیانەوەرا باخڤن، نەک بۆ وان کەسێن دڤێت بتنێ دناڤ شاشەیان دا خۆ نیشان بدەن.

سروشت جهێ دیتنا خۆیە، نەک نیشاندانا خۆ.

بێوار عمر /
سەرۆکێ رێکخراوا بەڕی یا گەشتوگوزاراژینگەهێ و چیاڤانی /

ئەڤرۆ گرووپێ بەڕی یێ چیاڤانی دگەل دیرۆک و سروشت د باوەشا کەلها ئەرمشتێ دا

ئەڤرۆ رێککەفتی ( ٨ێ گۆلانا ٢٠٢٦ ) ، ئەم وەک گرووپێ بەڕی (ڕێکخراوا بەڕی یا گەشتوگوزارا ژینگەهێ و چیاڤانیێ)، پێنگاڤێن خوە بەرەڤ لوتکە و دیرۆکێ هاڤێتن و گەشتەکا جودا و ناوازە بەرەڤ بلنداهیێن کەلها ئەرمشتێ ئەنجام دا.

د ڤێ گەشتێ دا، نە تنێ مە کەیف ب دیمەنێن جوان و دلکێشێن سروشتی هات ، بەلکو ئەرکێ مەیێ سەرەکی کو پاراستنا ژینگەهێ ژ بیر نەکربوو ، د ناڤا خوەزایەکا پاقژ و بێگەرد دا، مە هەناسەیەکا تژی ئۆکسجین کێشا و ئەم تێکەلی جوانیێن سروشتێ دەڤەرێ بووین .

گرنگترین خالێن گەشتا مە:
ئاوێتەبوون دگەل دیرۆکێ: گەهشتن ب بلنداهیێن کەلها ئەرمشتێ کو سیمبۆلا خوەراگری و جوانیێ یە.

ژینگەهەکا ساخلەم: گەڕیان د ناڤا سروشتەکێ پاقژ و پاراستی دا کو ئارامیێ ددەتە (ڕۆحی).

کارێ ب گرووپ : هەماهەنگی و تەباییا ئەندامێن گرووپێ بەڕی بۆ سەرکەفتن ب سەر ئاستەنگان و گەهشتن گوپیتکێ .

رێکخراوا بەڕی یا گەشتوگوزارا ژینگەهێ و چیاڤانی
٨ێ گۆلانا ٢٠٢٦ی

دناڤ دلێ سروشتی دا ، د چوارچووڤێ چالاکیێن خۆ یێن بەردەوام دا، ڕێکخراوا بەڕی یا گەشتوگوزارا ژینگەهێ و چیاڤانی ب هەماهەنگی دگەل قوتابخانا ئامادەی (سەرەڕم ) یا تێکەل ، سمینارەکا تایبەت و ب مفا ل ژێر سیبەرا سروشتێ جوانێ قەزا باتیفا هاتە برێڤەبرن ، ئەڤ سمینارە ب ئامادەبوونا بەرێز (هاریکارێ پەروەردا گشتی یا زاخۆ) و ژمارەکا ماموستا و قوتابیێن خوشتڤی هاتە ل دارخستن.
مژارا سەرەکی یا سمینارێ دەربارەی "گرنگیا گەشتوگوزارا ژینگەهێ" بوو ل هەرێما کوردستانێ ب گشتی، و ب تایبەتی ل سنوورێ ئیدارا سەربەخۆ یا زاخۆ کو خودان سروشتەکێ دەولەمەند و دلڕەڤێنە.

مە ب فەر زانی دناڤ دلێ سروشتی دا و ل بن ئەسمانێ ساهی، دناڤ گۆلێن بهارێ دگەل قوتابیان بەحسێ ڤان تەوەران بکەین:
✅ چەوانیا پاراستنا ژینگەهێ .
✅ پێشخستنا کەلتوورێ گەشتوگوزارا ژینگەهێ (Ecotourism).
✅ رۆلێ قوتابیان دڤەگوهاستنا دیمەنێن جوانێ سروشتی بشێوەیەکێ ساخلەم بۆ جیهانا ژ دەرڤە برێکا تورێن چڤاکی .

سروشت ماموستایێ مە یێ ئێکێ یە، و ئەرکێ مە هەمیایە ئەڤێ جوانیێ بۆ نەوەیێن پاشەرۆژێ بپارێزین ، لدووماهیێ سۆپاسیەک تایبەت بۆ رێڤەبەرێ قوتابخانێ ماموستا ( سەهمی ئەکرەم ) بۆ ڤێ دەست پێشخەریێ .

رێکخراوا بەڕی یا گەشتوگوزارا ژینگەهێ و چیاڤانی
٥ێ گۆلانا ٢٠٢٦ی

گەشتەک بۆ مێرگا گۆلێن بهارێ ل
چیایێ بخێری هاتە ئەنجامدان

ئەڤرۆ ٢٤ێ نیسانا ٢٠٢٦ مە وەک گرووپێ بەڕی یێ چیاڤانی سەر بــ( رێکخراوا بەڕی یا گەشتوگوزارا ژینگەهێ و چیاڤانی ) گەشتەک برە دناڤ مێرگێن گۆڵا ل چیایێن بێخێری ل رۆژهەلاتێ باژێرێ زاخــۆ .

ئەڤ مێرگە پربی ژڤان گۆلا وەکو ( گۆل بەیبین و گۆلا بیکێ و ئاسمین و پیڤۆک و پیرپیزۆک و قالیشک و چەتر و بەرزەلینک و لیلۆز ) د کەش و هەوایەکێ فێنک و پاقژدا د کیراتیا سرووشتی گەشتا مە هاتەدەربازکرن .

ئەڤ گەشتە ژ جورێن چیاڤانی ( climing ) رێکەک گەلەک سەخت و ئاسێ و پری ئاستەنگ مە دەربازکر ، سۆپاس بۆ خودێ گەشتامە بسلامەتی هاتە دەربازکرن .

~ راگەهاندنـــا
~ رێکخراوا بەڕی یا گەشتوگوزارا ژینگەهێ و چیاڤانی
~ ٢٤ێ نیســــانا ٢٠٢٦

گەشتەک بۆ گەلییێ قەپانێ هات ئەنجامدان

ئەڤرۆ مە وەک گرووپێ بەڕی سەر ب ( رێکخراوا بەڕی یا گەشتوگوزارا ژینگەهــێ و چیاڤانی )، ئێکەم گەشتا بهارا ئەڤ سالە مە برە دناڤ سروشتێ دلگیرێ گەلیێ قەپانێ ، گەشتامە ل رێککەفتی ١٥نیسانێ ٢٠٢٦ جورێ چیاڤانی ( هایکینک ) هاتە ئەنجامدان .

هەڤدەمدا ئەڤ گەشتە دناڤا خوەزایا ژینگەهـەکا جوان و پاک و خاوێنا گەلیێ قەپانێ ل زنجیرەیا چیایێ سپی و تابڵۆیەک پری کەڤر و ستینێن ئاسێ و بلند و دارستانەک ژ خەمڵا دارێن بەڕی و مازی و قاچا و کولیلکێن بهارێ خودایێ مەزن ئافراندە .

گەشتامە سپێدێ تا ئێڤارییا درەنگ بدووماهیک هات ، رێژەیا ئەندامێن بەشدار ( ٣١ ) ئەندامبوون .
سۆپاس بۆ خودێ گەشتامە بسەرکەفتیانە بدووماهیک هات .

~ رێکخراوا بەڕی یا گەشتوگوزارا ژینگەهێ و چیاڤانی
~ ١٥ێ نیسانا ٢٠٢٦