Football Analyst

其實好唔明白點解咁多人放大呢球黎講
係唔想英格蘭出線？係想睇Haaland入波？

Sorloth係一個水晶宮都踢唔掂嘅球員
質素能力本來就係得咁多
如果佢每下決定同處理都做到完美
一早去左大球會亦唔止呢個身價

捧得underdog就要預左佢地實力參差
踢出黎有瑕疵有失誤係正常不過
攞頂級球員嘅標準套用落佢地度係冇意思

前一日Lammens撲出不遠被補中成為焦點
Nyland一模一樣嘅犯錯就逃過指摘
係因為佢上場對巴西封左神唔批評得
所以風向一早判定Sorloth要做戰犯？

Tuchel：「我地令到自己踢得好辛苦。大意、戰術錯誤、唔夠快、唔夠重覆性，我地只係好彩。」對陣挪威嘅世界盃八強賽，英格蘭作出多個調整：(1) 用Rice踢6號Anderson踢8號；(2) 用中堅底嘅Konsa踢右閘釋放O'Reilly上前進攻；(3) 摒棄diamond press，用Bellingham看管Berge，讓Anderson緊盯墮後攞波嘅Odegaard，誘導對手透過左中堅出球。幾個改變on paper都令人期待，但踢出黎嘅效果卻強差人意。

挪威初段主動縮後，英格蘭掌控形勢，但兩翼嘅能力同表現用underwhelming黎形容已經客氣。不擅進攻嘅Konsa踢右閘，一方面令右邊無法形成三角形去進攻，Madueke單打獨鬥踢得吃力；另一方面後防中路嘅身體質素同對抗性進一步被削弱，Guehi同Stones無論喺制空還是同Haaland鬥力都處於下風。飲水時間後對手稍為壓前，已經為三獅軍團帶黎好大壓力，能夠喺半場前扳平全憑Bellingham嘅個人級數。

Rice嘅狀態未能踢足全場，半場換出係合理，用Eze看似係進取嘅換人，但事實證明係敗筆。儘管Bellingham有能力踢8號，然而此舉大大減低前線嘅威脅，Eze未能做到牽制嘅作用。飲水時間後Tuchel糾正錯誤，用James踢6號、Anderson踢8號、Eze踢左翼，但目標其實都係想比Bellingham回歸10號。球員頻頻調位飾演多角，球隊自然踢唔出流暢嘅pattern同combination play，只能依賴個別球員嘅個人質素。

雖然調動值得質疑，但Tuchel至少保持正面積極嘅心態，有嘗試去贏呢場比賽。尾段換出Konsa換入Rogers踢8號位係大膽嘅決定，而呢次換人終於喺加時得到收穫。英格蘭現時陣中太多fitness成疑嘅球員，Saka、Rice、James、Spence都唔能夠踢足全場賽事，大大限制可用嘅人選同調動靈活性。四強對手阿根廷踢法唔算多用高波，但幾輪淘汰賽都透過角球或頭槌入波，三獅軍團能鞏固後防中路嘅防守會係一大看點。

晉級世界盃四強嘅四支球隊，不約而同都係以平排4-4-2作為無球在腳時嘅陣式。呢個當然唔係巧合，4-4-2近年之所以重新流行，係因為佢嘅特點能夠喺各方面之間取得平衡，一套陣式符合球隊喺唔同phase、唔同game state嘅需要。對集訓時間少嘅國家隊而言，呢點尤為重要，因為球員唔需要理解太複雜嘅戰術、太頻密嘅陣式轉換，回歸基本步減少犯錯就係致勝之道。

以最常用嘅mid block為例，四人防線同四人中場線恰好覆蓋球場闊度，有效阻止對手向前推進。只要對手未全軍壓境形成3-1-6/3-2-5進攻，四人防線已經足以應付對手前線嘅威脅，過早退成五人防線只會令形勢太被動，令中前場唔夠人手向對手施壓，結果變成邀請對手進攻。四人中場線嘅運作都係同理，假若只得三人中場線的話，球員就需要覆蓋更多橫向範圍，橫移速度稍慢就會被撕破。瑞典喺分組賽被荷蘭血洗，同佢地所用嘅5-3-2有莫大關係。

萬一被對手攻到心臟地帶需要切換成low block，4-4-2嘅靈活性亦可以有效應對。假若對手將左閘壓至最前線，4-4-2中嘅右翼就可以track back回防，形成短暫嘅五人防線 (situational back 5) 應對，令後防唔會處於人數劣勢。二人前線一方面負責中路遮線阻止對手嘅central progression，另一方面亦係球隊反擊嘅outlet，令對手有所顧忌最少要留兩至三人作rest defence。

雖然近一兩年整體逼搶強度減低，但4-4-2喺high press同樣好用。喺執行man-to-man press嘅時候，一對前鋒對位對手一對中堅，一對翼鋒對位對手一對閘位，一對閘位對位對手一對翼鋒，對位清晰分工易明。雙中場可以按對手決定逼搶強度，較保守可以只將8號位跳前形成diamond press，較進取可以同時將6號位跳前逼使對手大腳。由mid block推前至high block，或者調番轉由high block縮番做mid block，球員嘅位置都唔會有太大變化。

除非足球場嘅闊度喺未來有重大嘅改變，或者足球出現重大嘅paradigm shift，否則喺可見嘅將來4-4-2相信仍然會係主流嘅無球在腳陣式，特別係對於頂尖強隊而言。由英超嘅阿仙奴同曼城，去到而家嘅世界盃四強，咁多球隊同時採用一樣嘅結構，喺近代球壇實屬少見。球壇不時會冒起新嘅戰術潮流，而4-4-2可塑性高、框架清晰易於掌握，難怪呢個經典陣式經歷多年仍然屹立不倒。

經歷上場三十二強對DR剛果陷入苦戰，今場十六強對墨西哥Tuchel隨即作出回應。上回講到Rice踢「左8」喺左邊half space踢得唔自然，今仗佢同Anderson左右對調，將Quansah推至五人前線，比呢位英格蘭副隊長逗住右閘位踢，接近上仗尾段嘅角色。三獅軍團今場有球在腳嘅時間唔多，但先開紀錄一球正正源自佢喺右路由後場帶到前場嘅推進，而佢11.17km嘅跑動距離亦係全隊最高。

全隊跑得第二多嘅，係梅開二度、跑左11.14km嘅Bellingham。作為具天賦嘅攻擊球員，好多好多10號位都寧願保留體力進攻、疏於回防、喺防守端switch off，但呢啲標籤並唔能夠應用喺佢身上。佢除左願意防守，仲有唔錯嘅防守能力，出腳準繩又有意識出現喺適當位置，好似對加納單防Semenyo、今場門前及時阻止對手起腳都體現到。加上佢進攻端box crashing、護球推進嘅能力，好難唔係現今最全能嘅中場之一。

至於翼鋒人選，一如所料面對較強對手Gordon先係首選。佢無球時嘅跑動實在比Rashford積極得多，呢點喺實力接近嘅比賽非常重要：進攻可以放長傳比佢自己哨，好似上半場嘅埋門；防守進取可以高壓逼搶，保守可以track back。點解十人應戰下打5-3-1佢仍然能夠踢足全場，正正因為佢有不惜氣力嘅跑動，既能上前反擊搏得十二碼，又能回防double team減低對手傳中質素。冇錯，佢就係全隊跑得第三多嘅球員，有10.59km。

雖然英格蘭贏波晉級，不過整體發揮稱唔上好，就算紅牌前都係。佢地人腳較墨西哥強，但由一開賽就未能控制比賽，進攻只係不斷大腳，防守亦未能壓迫對手，表現未有說服力。就算用穩守突擊嘅角度，佢地嘅box defending都頗差，一對中堅缺乏制空力同身體質素，經常頂輸第一點導致險象環生，Pickford兩次神救、兩球失波都係例子，直到換入Burn先有所改善。唯一值得讚嘅，係佢地反擊嘅效率同完成能力。

世界盃開鑼前都有講過，右閘係英格蘭最不確定嘅位置。James健康的話固然會係正選，但版主從來唔覺得佢能夠踢足所有比賽。儘管Tuchel唔滿意Spence嘅進攻決定，然而防守端佢已經係最值得信任嘅選擇，特別係Stones狀態欠佳需要Konsa鎮守中路。下輪八強對挪威，版主期待三獅軍團會嘗試採取更多主動，否則呢條後防能否守得住Haaland會係好大疑問。

佛得角面對阿根廷，有啲格食格嘅味道。阿根廷有球在腳嘅戰術比較特別，用一對閘位拉邊，一對名義上嘅翼鋒都會收入中路。呢個部署目的係要overload中路，利用一啲快速、極短距離嘅一腳傳送去猜散對手 (圖1)。但呢種踢法無法拉開球場闊度，只要對手決心屯兵中路、唔貿然上前壓迫、喺關鍵位置破壞到攻勢，就好難被撕破，而呢幾點正正係佛得角嘅特點。

阿根廷一直對破密集冇太大頭緒，直至Messi再一次為球隊挺身而出。佢本身看似懶懶閒地處於越位位置，令對手對佢放下戒心。到Martinez持球後，佢就用一個curved run回到非越位位置，順勢加速擺脫對方守衞。精準嘅過頭波、聰明嘅走位、細膩嘅一控一射，呢啲就係級數嘅表現。領先下阿根廷更加唔願意take risk，由入波嘅29分鐘到被扳平嘅59分鐘，球隊只有一次射門。

對比阿根廷，佛得角嘅球員能力絕對唔高，處理最後一腳尤其粗糙，但佢地勝在有勇氣去用波，願意控多一兩腳去尋找進攻機會，唔會因為怕失而慌忙大腳。Vozinha門前cup過對手、Jovane Cabral假身擺脫，除左有娛樂性之外，亦實在地幫助球隊保住皮球。佢地控球時間唔多，但有球在腳時會打開4-3-3陣式嘗試stretch開對手，對於主張防反嘅球隊而言算係非常大膽 (圖2)。

被扳平後阿根廷終於加快比賽節奏，但中場喺密集嘅人堆下難以發揮，進攻好依賴一對中堅嘅直傳派波，好似Messi嘅單刀、Pico差啲擺烏龍都係分別黎自Romero同L. Martinez嘅派牌。缺乏兩翼爆破、又未有明確嘅制空點，令佢地唔能夠好似其他球隊咁利用高空轟炸破密集。飲水時間後佛得角甚至嘗試上前壓迫，一度令L. Martinez處境相當尷尬。

加時階段只係將法定時間嘅劇本再演一次，阿根廷領先後再次選擇保守、再次被扳平。S. Lopes Cabral嘅世界波固然精彩，但更值得留意嘅係佛得角如何大膽地透過短傳破解對手嘅逼搶。攻勢由門將Vozinha發動，經歷8個球員、12腳冇斷纜嘅傳送，由右閘位猜到左翼位去製造呢腳射門。雖然佢地喺加時下半場再次喺角球失守，但佢地今場展現嘅勇氣，已經值得大家嘅掌聲。

英格蘭喺三十二強贏得驚險，好大程度係因為冇預料到對手踢得咁進取。同其他面對強隊就放棄控球嘅球隊唔同，DR剛果堅持喺後場組織，非常大膽地將閘位壓到最前，殺三獅軍團一個措手不及，令Madueke需要頻頻track back (圖1)。開賽初段Rice未有跳前去進行diamond press，代表英格蘭未有打算進行高強度嘅逼搶，讓DR剛果得以喺毫無壓力下將皮球運到前場 (圖2)。

有人直觀地將DR剛果嘅入球歸咎於對位嘅Spence身上，呢個解釋未免過於懶惰。一般嘅防線至少會有同對手鋒線相同嘅人數，部分球隊甚至會額外有多個球員 (+1) 去保護防線，但皮球過頭一刻英格蘭嘅防線係以寡敵眾 (4 vs 5) (圖3)。原因在於Sadiki走盲眼位插前到右閘同中堅之間嘅空隙，而6號位嘅Anderson未有為意亦未有回追，令Spence需要一個守兩個 (圖3)。

落後下英格蘭提升逼搶強度，Rice開始跳前去進行diamond press就係一個指標 (圖4)。DR剛果面對壓迫改踢長波，形勢漸漸傾向三獅軍團一面。接下來就係如何進攻嘅問題，Tuchel嘅game model好重視翼鋒、閘位、中場喺左 (圖5) 右 (圖6) 兩邊做三角配合，透過翼鋒喺邊線或者中場閘位underlap出波。老實講效果唔差製造左好幾個機會，被救出同護空門都好難話係戰術問題。

易邊攻完一輪後攻勢放緩，Tuchel首先換入一對翼鋒作為fresh legs，繼而以Eze入替Spence。呢兩次調動令右邊嘅小三角改由三位阿仙奴球員組成，Rice喺右邊順腳出波冇踢「左8」時咁唔自然，呢個組合隨即創造扳平嘅一球 (圖7)。另外將Bellingham放喺左邊half space位置，佢進攻端較有靈氣能扭擅射，可以切入又可以落底，第二球入波都係源於佢嘅突破射門。

有人將Rice同Anderson嘅共存類比為「雙特」問題，個人唔太認同，至少佢地兩個都係偏防守型嘅球員。較進取嘅做法當然可以收起其中一個，用Bellingham踢8號位，出多個Rogers/Eze踢10號位，又或者用Mainoo，不過喺大賽教練一般傾向保守行先。如何用好Rice係更值得諗嘅問題，喺韋斯咸佢級數比其他隊友高，當埋半隻左翼咁踢所以慣踢左路，但而家有進攻能力更強嘅隊友，踢右路出波做較簡單嘅工作似乎更適合。

至於翼鋒問題，Saka固然係陣中級數最高嘅一位，無奈傷患同狀態一直限制住佢嘅出場時間。餘下嘅Rashford、Gordon、Madueke一定稱唔上係頂級，決定同處理最後一腳嘅能力都好飄忽，但至少佢地有速度有突破嘅本錢，係英格蘭好需要嘅武器。Rashford防守端略嫌唔夠積極（如Wissa中柱一球），但相信對強隊Gordon先係首選。有人借今場質疑唔選Foden同Palmer嘅決定，實在係無稽之談。

上一代嘅荷蘭教練，對於三中堅往往有種難以言喻嘅傾向。2017年Koeman喺愛華頓豪花金錢破球會轉會費紀錄買人，結果戰績欠佳十月就被辭退。對上一個月同鄉de Boer更誇張，只係執教左水晶宮四場就喺一球不入嘅情況下被辭退。再對上一年，仲有van Gaal被曼聯辭退呢個例子。三中堅本來唔係問題，但呢啲教練喺人腳、環境都唔適合嘅情況下堅持呢套，效果自然未如理想。

荷蘭近兩年一直以4-3-3為基礎，表現穩定甚至喺分組賽取得10個入球成為入球最多嘅球隊之一。今場對摩洛哥突然改踢3-4-3，Koeman賽後解釋係要壓縮空間，堅持比佢再揀都會咁踢，但喺好多人眼中呢個完全係敗筆。五人防線用上四個中堅，左翼衞用上中堅底嘅van de Ven喺左路拉邊，整個陣容根本唔夠攻擊球員，進攻往往只靠前線三子加半個Dumfries，連反擊都踢唔起。

摩洛哥確實係不容忽視嘅對手，不過荷蘭自身嘅質素都唔係咁差，冇必要因為怕輸而踢咁消極嘅足球。礙於3-4-3中場人數不足，荷蘭順理成章避開中場組織，出球好依賴兩位邊中堅特別係van Hecke呢一邊直接長傳比前面嘅Brobbey (圖1)，但加埋10次長傳只有1次成功。球隊唔願意投入人員上前進攻之下，呢位新特蘭前鋒孤立無援 (圖2)，同分組賽時候嘅優異表現形成強烈對比。

de Jong同Gravenberch係當今球壇ball carrying能力最強嗰批中場，但喺呢個3-4-3配置下佢地根本無用武之地。前者上陣110分鐘得57次觸球，後者上陣86分鐘只有36次觸球，無法參與比賽。就算攞到波往往都被outnumbered (圖3)，唔失去控球已經係超額完成。佢地亦唔係以覆蓋範圍同跑動能力見稱，無球在腳時嘅拍波對位都略嫌稍慢 (圖4)，喺呢個二人中場踢得頗為吃力。

論人腳其實摩洛哥稍遜於對手，但佢地幾位中場願意大膽壓前，Hakimi甚至頻頻出現喺前線，加上荷蘭完全零壓迫，令佢地喺下半場控制近八成控球完全掌控大局。飲水時間後Koeman換入Weghorst作為奇兵，佢偏好頭槌二傳而非停球嘅踢法改變進攻節奏，對手一時唔適應下為賽事掀起反高潮。落後之下摩洛哥踢得更大膽直接，而自發後上嘅Diop就成為佢地嘅奇兵。

版主從來唔係反對穩守突擊，好似日本對巴西採取防反係好合理嘅舉措，但荷蘭擁有較好人腳就應該採取主動，至少嘗試利用中場優勢去主導比賽。就算去到加時佢地都冇打算去贏出比賽，用Koopmeiners踢左中堅都要堅持3-4-3陣式，兩節錄得零射門，踢左120分鐘xG只得可憐嘅0.33。係對互射十二碼好有信心？球迷唯一能夠得到安慰嘅，可能係Koeman願意負責任下台嘅消息。

賽後de Jong直言：「我地踢得好差。中場人數處於劣勢，踢二人中場真係好困難。我好失望但呢個係教練嘅戰術，我地盡左力去執行。對手有太多控球權。」名宿van der Vaart亦有相同睇法：「對摩洛哥踢二人中場？de Jong係一個有球在腳先發揮得好嘅球員，但係我地今日完全攞唔到個波。」所以話，陣式上嘅數字重唔重要？

要客觀分析呢場比賽，必須要先理性務實地看待藍武士同歐洲南美勁旅嘅實力差距。近年有人見日本有唔少球員外流歐洲，就認為佢地已經係一支世界級強隊，甚至有力問鼎世界盃，呢個諗法未免過於樂觀。外流歐洲只係代表同主流聯賽水平拉近，但心水清就知道佢地大多數只係效力二三線聯賽，少數喺五大聯賽嘅表現最多都係中規中矩。過份高估外流球員嘅能力，導致對代表隊期望不合理地過高，呢點同港隊嘅現象好相似。

森保一近年致力鑽研3-4-3，目的就係利用呢套陣式有利防反嘅特點，以low block穩守突擊配合紀律性執行力極高嘅球員，務求收窄同歐洲南美勁旅嘅實力差距。上屆世界盃以不足三成控球擊敗德國、以不足兩成控球擊敗西班牙、以至喺熱身賽先後擊敗巴西同英格蘭，都係經典嘅成功例子。但喺現今講求控制嘅比賽入面，呢種被動嘅踢法令球隊失去主導權，能否取得成績除左睇日本踢得有幾好，更大程度在於對手踢得有幾差。

琴晚呢場比賽，日本一如所料貫徹上述風格，有六成時間處於low block狀態 (圖1)。巴西以3-2-5進攻 (圖2)，上半場面對五人防線顯得束手無策，主要原因有幾：(1) 將Vinicius放喺左邊half space位置，被Tomiyasu對位貼身盯防；(2) 右邊half space位置嘅Bruno G.唔係純攻擊型球員，創造能力有限；(3) Cunha偏好回徹，無法喺最前線牽制對手。前面攞住近七成控球卻久攻不下，後面一次失誤就被藍武士把握先開紀錄。

日本領先一球更加有理由縮後，巴西易邊後終於感受到狂攻嘅逼切性，一方面將前線改頭換面，另一方面進行針對性嘅高空轟炸。喺46-56短短十分鐘之間，森巴兵團作出多達九次高波傳中，令藍武士門前風聲鶴唳。Endrick嘅入替讓Vinicius得以回到邊路發揮，同Rayan雙翼齊飛不斷突破傳中。除左五人前線外，雙中場亦輪流後上提供額外接應點，Bruno G. 51分鐘嘅頭槌經已為對手響起警號，而Casemiro則喺幾分鐘後頭槌扳平。

巴西追和後放緩攻勢，但仍主導比賽形勢。日本唔係冇嘗試反撲，不過經歷換人同體能消耗後，雙方嘅實力差距愈黎愈明顯，尤其喺速率同身體質素方面。好幾次藍武士打算殺出重圍反擊，都被對手三扒兩撥輕易回追截停。球員缺乏對抗性保護皮球，令佢地急於一兩腳內就要將皮球傳走，冇隊友及時支援就會斷球。有人怪責田中碧尾段甩波導致被絕殺，事實上類似情況喺整場比賽、整隊日本隊都不斷發生。

日本可能係亞洲入面最有競爭力嘅一支國家隊，不過一山還有一山高，必須承認嘅係佢地同歐洲南美勁旅仲有好大嘅實力差距。採取被動嘅low block踢法確實能夠收窄差距，喺一兩場比賽中偷雞，但要以underdog姿態由分組賽贏到決賽，難度係十分之高。長遠要挑戰世界盃，藍武士需要培育更多更高水平嘅人才，至少喺歐洲嘅大球會搶得正選。有能力主導比賽，再克服身體質素上嘅不足，先有條件真真正正成為黑馬。

從戰術角度，今屆嘅世界盃係比過往嘅國際大賽好睇得多。以往好多國家隊只係搵番國內名宿執教，做法往往只係將每個位置最好嘅人選放晒落場，予人拉雜成軍嘅感覺。今年決賽週48支參賽隊伍入面有12位主教練都有英超經驗，當中唔少都係近年先由球會層面轉戰國際賽，豐富嘅實戰經驗讓佢地喺球員訓練、戰術運用、臨場調動都展現更高水平，大大提升賽事嘅可觀性。

好似兩個主辦國美國同加拿大，雖然唔係傳統足球強國，但分別喺Pochettino同Marsch帶領下建立現代化嘅踢法，踢出具說服力嘅表現。Tuchel對克羅地亞嘅半場調整，讓英格蘭喺下半場重新主導形勢。有球在腳時嘅positional play，無球在腳由zonal轉為man-to-man嘅壓迫，呢啲現代足球嘅潮流都唔難喺今屆賽事搵到。

對於窒步射十二碼，Kane表示呢個係研究對手後所作嘅決定：「翻睇片段我發現對方龍門習慣好早就移動，如果我窒步嘅話就有機會令佢雙腳離開白線，就算撲到都會有重射機會。呢個正正係點解我賽前會做功課。」

其實幾個月前拜仁對阿特蘭大嘅歐聯比賽，佢已經用過同樣策略獲得重射機會，賽後亦作出同樣解釋。當時佢仲補充：「重射嘅時候係一個mind game。對方龍門會猶豫我仲會唔會窒步，而我今次就會選擇直接射向死角。」