蒲宵曼聯

睇Dorgu踢波，頭痛⋯
咁樣被絕平，心痛⋯⋯

【即場討論區】21:00 愛華頓 vs 曼聯

正選陣容已出，陣容不變，Mount 復出暫列後備。

GGMU!

Image credit: Manchester United

【賽前短打】21:00 愛華頓 vs 曼聯

想先講講自己對曼聯今個轉會窗嘅感覺。

要讚嘅係今夏轉會隱蔽性做得好，一有消息傳出嚟嗰陣已經接近 done deal，而且繼續堅持唔玩競價戰，總共用接近 1.5億英鎊簽入三個中場加個第二門將，以上四人全部有英超經驗，補充陣容上絕對係合格以上，但最後買唔到新左閘始終令人失望。

有消息指曼聯喺轉會窗最後階段有接觸過曼城借用左閘 Aït-Nouri，但曼城方面要求加入強制買斷條款，但曼聯只想純借，因此最終未能成事。

至於請咗好耐會走但最後留低嘅 Amass 喺我心目中係未夠班，加上呢個年紀嘅佢需要實戰經驗成長，但最後放唔走都冇辦法。

唯有求神拜佛 Shaw 健健康康之外，都想睇睇教練團能否喺球隊體系上幫到 Shaw，減輕佢單對單防守壓力。

球隊今晚將會作客愛華頓。

愛華頓係轉會窗死線日其中一位主角，喺放走兩名攻擊手比圖及伊利民安戴耶後只借入咗加利殊，本身傾到九九十十嘅美國前鋒巴路根臨尾脫腳撻Q，有消息指愛華頓因為體檢搵到問題而向球員壓價，惹怒球員及其團隊，因此拒絕加盟，仲搞到球員本身效力嘅摩納哥出現財政問題，如果件事係真嘅話，愛華頓負責傾轉會嘅團隊實在難辭其咎。

愛華頓喺收購巴路根失敗後，陣中只剩返巴利一名純中鋒，即管睇吓莫耶斯會否需要搵新兵賓倫莊遜、車路士借將佐治甚至迪斯貝利荷爾客串中鋒位。

至於曼聯方面，成長不似預期嘅 obi 終於被外借，目的地係荷甲嘅威廉二世，希望佢能夠好好把握今次外借機會，盡力汲取經驗。

傷病名單：Ugarte、de Ligt、Darlow、Heaton、Baleba

上陣成疑：Amad、Mount

停賽名單：/

#蒲宵曼聯
#賽前短打

【賽後短評】曼聯 5:2 葉士域治

曼聯今日有馬天尼斯復任正選，由佢後面用個波明顯好好多，亦算都幾有耐性，前場反搶做得唔錯，但最後一腳始終爭啲，反而葉士域治簡簡單單搵三個快嘅左中右包括安斯素、法達胡、前田大然輪流走曼聯身後已經製造到足夠威脅，最後係Shaw嗰邊出事先，守唔住快馬法達胡出個靚波畀尾柱冇人看管嘅左閘列夫戴維斯射個眉底搞掂。

落後嘅曼聯越踢越心急，開始多傳送失誤，相信大家都為曼聯而擔心，好在對面中場紐尼斯喺成隊波谷晒上去之際中場「謝拉特式」跣腳送大禮，Cunha偷到波後簡單餵個斜線畀Bruno推一步左腳狂抽追返球，令我哋不致半場落後。

下半場出返嚟個局面又唔同晒，曼聯不斷叩門，先有 Mbeumo 近門中楣，及後56分鐘靠 Maguire 帶有幸運成份嘅射門造就對手「擺烏龍」為我哋反超前。

之後 12分鐘內 Bruno 再憑十二碼及近門推射大演帽子戲法，原來今次只係Bruno加盟曼聯之後第二次英超帽子戲法，恭喜隊長！

呢個時候葉士域治班波基本上已經散晒，雨亦越落越大，最後10多分鐘雙方再各入一球，最終曼聯以 5:2 奪得今季英超首勝。

特別講吓福哥，雖然進攻仍需努力，但防守做得唔錯，有積極做反搶，下半場更加返到後場做個靚剷截，贏盡主場觀眾掌聲，希望佢繼續努力！

最後一定要提吓 Mainoo，今日完全係頂級中場嘅表現，身體對抗亦明顯有提升，好開心見到佢嘅進步，只要保持到今晚表現，佢絕對會係曼聯中場不可或缺嘅大將。

下個禮拜我哋會作客「老朋友」莫耶斯帶領愛華頓，希望球隊可以繼續保持今日下半場所呈現出嚟嘅氣勢！

Photo credit: Manchester United

【即場討論區】23:30 曼聯 vs 葉士域治

正選陣容已出，後防 Lisandro 及 Dalot 取代 Heaven 及 Mazraoui ，中場 Mainoo 代替 Santos，前線 Rashford 取代 Dorgu，Sesko 繼續板凳待命。

福，機會就俾咗你，係福頭定福哥就睇你態度同表現！

GGMU!

Image credit: Manchester United

【賽前短打】23:30 曼聯 vs 葉士域治

曼聯上仗作客以 0:2 不敵升班馬侯城，除咗賽果之餘，曼聯喺比賽過程都頗令人失望，加上部份球員例如 Cunha 等狀態都明顯尚待提升，相信都令唔少曼聯球迷幾擔心。

之不過講到尾今場波都只係季初首戰，我哋仲有餘下37週去證明自己，希望班球員能夠盡快提升狀態同磨合好！

球隊今晚將會返到主場迎戰另一支升班馬葉士域治。

葉士域治前季降班後用咗一季時間就升返上嚟英超，但球隊升班功臣之一嘅主教練、前曼聯助教麥堅拿季前決定請辭，球隊隨即喺法甲斯特拉斯堡搵嚟曾經執教般尼茅夫及狼隊嘅加利奧尼爾領軍，加上佢哋今夏喺轉會市場十分活躍，搵來唔少具英超經驗及實力嘅球員，包括曾效力白禮頓嘅巴拉圭攻擊手安斯素、富咸嘅中場盧傑、中堅伊沙迪奧普、般尼嘅葡萄牙中場科倫天奴，與及加上利華古遜嘅阿根廷中場柏拉斯奧斯、些路迪嘅日本國腳前田大然、圖盧茲巴西中鋒艾馬臣等，全部都係啲實而不華嘅戰將。

今季英超首戰以 2:1 擊敗上季黑馬新特蘭就顯示出佢哋具備英超競爭嘅實力，值得一提，佢哋兩個入波都係透過反擊同前場逼搶而製造出嚟，曼聯今晚特別要留意佢哋班前線快馬，特別係安斯索及法達胡。

至於曼聯方面，22歲中場 Toby Collyer 以 3M 英鎊基礎轉會費、另加 odd-ons，最高總值可達 7.6 M 嘅轉會費正式轉會英冠西布朗，曼聯擁有 40% 二次轉會分成比例，都算係個唔錯嘅 deal。

Toby仔近呢兩季都飽受傷患困擾，對年輕球員來講都係幾大嘅打擊，希望佢去到西布朗後能一切順利。

至於球員方面，新兵 Baleba 仲要時間休息，Amad 及 Mount 已復操，但唔肯定今晚夠唔夠狀態上陣。

Cunha 上仗冇乜狀態，Dorgu 表現又麻麻地，睇吓同 Shaw 夾慣夾熟嘅福哥有冇機會正選。

中堅 Heaven 仍然係比較多甩漏，喺卡域克唔太信任 Yoro 踢中間嘅情況下，希望 Lisandro 夠狀態踢正選。

傷病名單：Ugarte、de Ligt、Heaton、Baleba

上陣成疑：Amad、Mount

停賽名單：/

#蒲宵曼聯
#賽前短打

【盃賽消息】本季盃賽抽籤結果公佈

曼聯今屆歐聯分組賽及聯賽盃第三圈對手結咗出爐。

先講歐聯，我哋分組賽對手係（以下排列非對賽順序）：

拜仁慕尼黑，德國（主）
馬德里體育會，西班牙（客）
羅馬，意大利（主）
士砵亭，葡萄牙（客）
RB 萊比錫，德國（主）
維拉利爾，西班牙（客）
沙巴，阿塞拜疆（主）
高莫，意大利（客）

睇牌面曼聯絕對唔踢，除咗要對人腳好強嘅拜仁慕尼黑外，近年我哋對親西班牙球隊都冇咩好結果，今次要對兩隊硬嘢馬體會及黃潛，最慘係噝正常易食指數最高嘅 port 4 我哋抽到實力最強嘅意大利新貴高莫，望住呢班對手都咪話唔擔心（請原諒我心臟唔夠強大）。

好在我哋幾場作客都係圍繞喺德國、意大利同葡萄牙呢三個西歐國家，唔需要飛幾個鐘去東歐或者去瑞士踢人造草場，算係值得可幸。

首週歐聯分組賽將於9月8-10日期間進行，最後一週比賽日則定喺27年1月27日。

至於聯賽盃方面，由於曼聯上季入到歐戰區，因此可以嚟到第三圈先亮相，我哋將會喺英國時間 99月16號主場迎戰白禮頓。

相信唔少板友仍然記得上賽季我哋喺第二圈被低組別嘅甘士比淘汰嘅傷痛，適逢上季足總盃第三圈淘汰我哋嘅又係白禮頓，希望曼聯今次能順利復仇！

Image credit: Manchester United

【官宣】Baleba 加盟曼聯

曼聯正式宣佈從白禮頓簽入 22歲喀麥隆國腳中場 Carlos Baleba，雙方簽約五年至 2031年夏天，球會擁有一年延長合約條款。

Baleba 嚟到後相信能夠為球隊中場帶嚟現時比較缺乏嘅防守硬度，但最令我期待嘅係佢有一定擺脫對手嘅能力，可以憑一己之力引球喺後場爆上前場再選擇自己攻門或者分波，有佢喺度我哋中間多咗一個引球推進嘅點，打反擊唔需要再吓吓靠 Cunha 或者 Mbeumo推一大段路用晒啲體力去擺脫對手，對球隊進攻點都係好事。

期待 Baleba 盡快傷癒，着起20號波衫為球隊打江山！

Photo credit: Manchester United

【落筆打三更】侯城 2:0 曼聯

今場波真係大把嘢可以鬧，最慘係好多都係老問題，死球輸點、唔識踢陣地戰、明知前面冇高點都要死斬波入去，最嬲咪踢咗大半場都不斷有唔同程度嘅誤會同低級失誤，大家好似都仲喺熱身賽狀態咁，真係搞唔掂⋯⋯

比較欣慰嘅係回歸嘅福哥下半場入替後冇揸流攤，雖然表現講唔上好出彩，但至少睇到佢已經唔再係耷低頭死推死去，佢同 Shaw 亦夾得唔錯。

而家鋒線上冇埋 Amad，Cunha 同 Sesko 又未夠狀態，除咗 Mbeumo 外需要有人能挺身而出， 論個人能力福哥絕對喺 Dorgu 之上，希望佢可以好好把握呢個機會證明自己係值得留低。

我仍然對卡域克抱有寄望，希望今場輸波可以令教練團認清我哋問題喺邊，盡快幫隊波止血。

呢幾年曼迷冇咩風浪未見過，避唔到我哋一齊捱，見攰亦不妨唞唞，唔需要迫自己太 into。

GGMU！

Image credit: Manchester United