走/酒佬英國大小事

唔知呢間舖貼呢兩位名叔出嚟，係咪暗示今晚英格蘭會繼續傳承58年來，無攞過國際大賽冠軍嘅歷史？

利申： 我撐西班牙嘅
Apoyo a España

今日英國大選投票日，一朝早就見朋友喺票站嘅打咭相，我都貼下我嘅「投票站」先

英國除咗親身去票站投票，仲可以預先登記用郵寄投票。所以我早喺兩星期前已經收到選票，填好選票就將佢放入兩層封密回郵信封寄回（外層係郵遞用，內層係畀點票人員核對選民身份，最內部選票本身無任何辨識身份資料）

郵寄投票嘅制度非常方便，但核實選民身份嘅方式就比較簡單，只需要出生日期同簽名。

如果郵寄投票用喺香港，有咁多劏房又有居住問題，會唔會有好多一屋幾十人嘅情況？係咪好多人以非住宅地址做「居所」？會唔會有老人院「協助」院友投票？

好彩，有驚無險，未使收旗

2019年6月9日，第一次過百萬人遊行，揭開反送中的序幕。

想不到，5年過去，抗爭仍在繼續。有些人的抗爭場地轉換了；也有些人只能將抗爭埋藏在心裡。

我相信抗爭的火仍在，某一天定必再次燃燒。

#反送中
#毋忘初心

六月有好多敏感日子，今日係D Day諾曼第登陸嘅80週年

對於生於太平盛世嘅我，要記住和平同自由其實都得來不易

上個星期去咗南部海邊城鎮Worthing跑步，Worthing離Brighton唔遠，同樣以海灘聞名，雖然不及後者咁出名咁熱鬧，但都有唔少特別景色，值得順道去參觀。

Worthing又有Sunny Worthing之稱，因為佢係英國最多晴天嘅地方，可惜當日天氣唔太好，無緣陽光加鮮豔嘅色彩。海邊嘅碼頭同其他建築保留19世紀古典風格，附近亦有藝術氣息嘅街道同店舖。

講返跑步，今次去跑半馬又係做pacer，賽道大部分沿又直又長嘅海灘跑，非常平坦。雖然比賽規模較細（10k同半馬都係千幾人），但氣氛都幾好，而佢最吸引嘅係完賽衫同獎牌都好靚好有當地特色，我都好想之後再去跑。

今日又係一年一度倫敦馬拉松，今朝一早我就出去觀戰。

坐火車去Greenwich嘅時候，已經見到全車都逼滿跑手同支持者，10點正就喺起跑區隔住個大電視睇精英選手起步，然後穿過公園落去Greenwich大街，但因為Cutty Sark早已多人到水洩不通，唯有沿住賽道繼續行向Deptford。

停低睇咗一陣，食個輕便午餐，下晝就去到London Bridge近尾段位置繼續觀賞，臨走前再途經白金漢宮嘅終點位置，都算係有始有終咁走勻全程。

今日行足全日，我心理上已經備戰好出年嘅倫馬，餘下落嚟就要睇運氣，因為倫馬應該係六大馬裡面中籤率最低嘅一個。如果想直接入圍，一係就要籌款£2000起，一係就要再跑快十幾分鐘，但兩樣對於我都唔太可能。

希望出年我可以喺賽道上面，感受呢個城市嘅熾熱氣氛。

坐火車遇到delay經已習以為常，而且delay原因層出不窮，鑊鑊新鮮。

今日我咁啱要由倫敦去伯明翰，回程時因為伯明翰機場有航班發現可疑物品而要封閉，連帶火車站都要封閉，火車都需要改路。

上車時，車長只係簡單咁話班車需要改道Route B (The train will be on a diversion to Route B)，當我好疑惑咩係Route B嘅時候，睇下車箱顯示先明白，原來佢係話架火車將會不停站直去Rugby🤣

等咗15分鐘左右，火車出發，經過幾段慢行然後停低，坐咗一個鐘後終於停站，但又唔開門。我再望下地圖，竟然發現架火車去咗西北面，距離倫敦仲遠咗40公里🙈

坐咗接近兩個鐘，架車終於停站開門，然後車長又宣佈，因為有人闖入軌道，班車又再延遲🥲

最後，呢程火車用咗3個鐘頭，終於返到倫敦。

新年行大運，年初一去咗Guildford 嘅香港人新年市集，最驚喜係見到架開去赤柱嘅城巴，仲有位著制服嘅車長。

年初二新春長跑，2'02'40 跑咗二四.易發，希望今年順順利利🙏

年三十，無得提早收爐，不過今年新年都有得放返兩日假，然後初三啟市

幾年前，喺維園年宵買到阿塗嘅手寫揮春，估唔到嚟到英國，一樣有年宵，一樣有阿塗手寫揮春

祝大家新年快樂，好人一生平安！

今日打開FB，成版都係渣馬嘅消息（其實尋晚未瞓已經見到全馬頭三成績）。

然後FB又提我，原來六年前係我第一次挑戰渣馬全馬，當時都無諗過有咩練跑目標，都係諗住keep住跑下唔同地方嘅比賽，享受下大賽氣氛。

估唔到幾年後，生活環境轉變，跑步成為我日常生活一部分，成績進步咗，亦令我透過跑步連結到唔同香港人。

前前後後跑咗超過十屆嘅渣馬，見到近年香港越來越多人重視跑步，參賽人數越來越多，但渣馬安排無進步過，甚至倒退緊。

賽道同場地根本容納唔到更多嘅人數，人數不斷增加但活動時間無加長，跑手分流亦係我參加過嘅比賽中最差，跑完後維園逼滿人，唔好話沖涼，連去下廁所換件衫都有困難。

我相信就算我仍然喺香港，都寧願自己舒服咁跑下步，唔會參加連衣著都要政治審查，毫不重視跑手體驗嘅渣馬。

Ps. 當年嘅完賽牌靚過而家，當年螢光黃跑衫應該都唔會再見到

2023回顧

1. 全年跑咗接近3500km，跑量再創新高，全馬PB快咗35分鐘，成功跑入sub-3

2. 最長一次跑咗60km，一次過走訪倫敦7支英超球隊嘅球場

3. 又係跑步有關，今年買咗6對跑鞋，獎勵自己繼續跑

4. 嚟咗英國兩年，終於買車，仲係適應階段，只有週末同假期先揸短途練下車

5. 買完車就開始搵屋，睇咗十幾間屋，暫時仲未決定到長遠想住邊一區

6. 响英國嘅生活反而比香港更香港，以前响香港都無睇咁多演唱會、港產片、話劇，仲有去香港人集會同市集

7. 年初跌壞咗電話，因為無backup，唔見哂前一年幾嘅相

8. 今年少咗同朋友見面，不過都見到一啲來英國旅遊/移民，好耐無見過嘅朋友

展望2024年，繼續唔會有全年目標，因為計劃往往追不上變化，只係希望安穩過生活。

無論香港、英國定其他地方嘅朋友，祝大家在亂流下平安。