23/08/2026
بوست لو فهمته هيغير حياتك واتمنى تفهمه
تحويل الخبره لمنتج يتباع بفلوس “ Part 2 “
-انا مش جاي احكيلك عن قصة خياليه علشان اديك شويه امل تعيش بيهم كام يوم ..؟
انا زي زيك مأمور بالسعي , الاستمرار , الصبر
واستغلال كل الامكانيات علشان توصل باللي حضرتك شاطر فيه
للناس اللي محتاجاه ..!
ف صدقني مفيش وصفة سحريه للنجاح
الموضوع يكمن في انك تعمل اللي عليك باخلاص , يقين بالله
وتستمر وتصبر
كل دا وانت بتطور من نفسك وقادر تتعامل مع السلبيات .!!
“لان زي م قولتلك محدش يملك اكتر من انه يعمل اللي عليه فقط “
-من كام سنه لما بدأت في تسعير الاستشارات
وتقديمها كخدمة مدفوعه مع باقي الخدمات زي التدريب , التغذيه , الكورسات الاونلاين و الاوفلاين .!
كان عندي خلفيه كبيره عن موجة الانتقاد اللي ممكن اتعرض ليها
لاني شغال من 2014 في مجال التدريب الاونلاين
ومن اوائل الناس اللي اخدت اول اراء سلبيه من الناس
اللي مكنتش فاهمه حاجة عن مجال ال online coaching
خد بقي كمية تَتفيه , تقليل , استهزاء بالخدمة وقتها ومع ذالك كملت ك freelance
حاليا المجال بقي واحد من اكبر , انجح المجالات اللي بيضخ فيها مليارات سنويا , بقي فيه شركات كبيره بتقدم الخدمة وبقي مصدر رزق لملايين المدربين , المدربات ….الخ
-المهم
اول م عملت الموقع في 2019 كانت خدمة الاستشارات متاحة عليه
لكن مكنتش مهتم بالتسويق ليها “كانت شغاله بس ضعيفه “
ودا يعلمك حاجة مهمه جدا
ان وجود المهاره مش هوا اللي هيبيع
التسويق الصح للمهارة هوا اصل الانتشار و الانتشار = بيع
بس عدم تسويقي للاستشارات وقتها
كان لاسباب اهم
•كنت بكمل تعليمي في كلية زراعه
•بفتح الفرع الثالث للجيم
• شغال اكتر علي التدريب , التغذية
• بأسس منظومة الكورسات , ورش العمل
“كل دا جنب شغلي الاساسي في الجيمات بتعتي”
-وهنا حابب اقولك نصيحة ثانية
لما تبدأ تطور نفسك في حاجة لازم تكملها وبعدين تبدأ في غيرها
دا هيديك مساحة انك تتعلم فعلا علشان تعرف تكسب اكتر
وبعدها تاخد خطوات تانية في اتجاه جديد
لكن تدخل تتعلم حاجة تقعد فيها شويه وتشوف غيرها
ومن حاجة لحاجة ..؟
صدقني هتضيع ايامك , تشتت نفسك و مش هتتعلم ولا حاجة .!
-المهم
فتحت الفرع , الامور استقرت , خلصت تعليم
وبقيت خريج كلية زراعه جامعة المنصوره , خلصت الكورسات والحمد لله ببيع بارقام محترمة , عملت ورش عمل
اللي متابع اكيد عارف
وكدا ابقي انجزت كل الحاجات اللي دخلت فيها بفضل الله
ومستعد افكر في غيرها ..♥️
-الجانب الاهم بقي في اختيار الاستشارة تحديد
من سنه ونص او اكتر تقريبا
اتكلمت مع شركة رئيس مجلس إدارتها صديقي وفي الحقيقه
قعدنا مع بعض وكان معاه التيم بتاعه
3 مهندسين بعقول جباره .
بقولهم انا هدفي اكسر الارقام اللي بعملها في التدريب و التغذيه
و اضيف خدمة اسرع , بمجهود ووقت اقل وربح اكبر .!
اتكلمنا عن كل الخدمات اللي بقدمها واللى من ضمنها الاستشارات
و الكورسات , ورش العمل .؟
كلامهم كله كان عن ورش العمل او كورسات مباشره .!!
اللي ممكن تتعمل لمجموعة كبيره في وقت واحد
يعني سعر مضروب في عدد كبير + وقت محدد للكل = رقم كبير
-بس في المقابل كان في هَوَالِك كتير
زي سفر , تحضيرات قاعات , تجهيزات كبيره , عدد ساعات كبير جدا
مجهود اكبر , مخاطره كبيره
ومع ذالك الرفض الاساسي كان بسبب ان دا مناسب ليا ولطبيعه شغلي , حياتي ..!
-وهنا هديك نصيحة ثالثة
لما تفكر تطور من نفسك في مجال جديد فكر في المجال اللي يتماشى مع طبيعة يومك وشغلك وحياتك علشان تعرف تستمر فيه وتنجح
أي محاولة للدخول في مجال جديد مبنية على 3 حاجات أساسية
1- المهارات الشخصية
إيه اللي تقدر تقدمه للناس فعلًا؟
2- القدرة على التطوير
هل عندك قابلية تتعلم وتطور نفسك فيه باستمرار؟
3- مناسب لطبيعة شغلك وحياتك
هل تقدر تستمر فيه بدون ما يتعارض مع حياتك وشغلك الأساسي؟
لو واحدة من التلاتة مش موجودة غالبًا مش هتعرف تكمل للنهاية
لان مش كل مجال مربح مناسب ليك
ومش كل حاجة تقدر تتعلمها لازم بالضروره تشتغل بيها
اختار المجال اللي تقدر تقدم فيه قيمة وتتطور فيه وتستمر عليه
-المهم
عملنا 4 مقابلات اقل ميتنج فيهم كان من 4 ل 5 ساعات
وفي النهاية طلعنا بولا حاجة وخلاص مبقاش في اي مقابلات بينا
-المهم انا كان عندي رأي تاني خالص
هي تقديم الاسشارات بس تتفعل كخدمة حقيقيه
وتسويقها يبقي حقيقي من تجارب الناس
مش بس كدا
انا هعمل اصعب حاجة يعملها واحد بيقدم استشاره لايف
انك تاخد رأي عميل في الاستشارة كانوع من انواع ترسيخ
الثقه , المصداقيه , بناء portfolio قوي يخدم بشكل كبير
بناء الثقه , ايجاد حلول حقيقيه
علشان يتقال علي الخدمة في يوم من الايام تستحق الرقم دا .!
وتبقي قدرت تحقق معدلة فيد = استفيد
-بالفعل
ركزت كدا في ورقتي بدأت اقدم الخدمة
بدون النظر لمين بيقدم نفس الخدمة
حاطت عيني في ورقتي واشتغلت .؟
معتمد علي خبرتي لاكتر من 18 سنه في مجال كل المجالات اللي دخلتها وكمان اخدت قرار اني اخد ماجستير ادارة اعمال MBA
واقرأ , اتعلم علشان ميبقاش الموضوع خبره بس
تبقي مهنه اكاديميه , ممزوجة بخبرة , تجربة , نجاح …♥️
لان اهم قاعده في مدرسة البيزنس
“لا يمكن صناعة مدير داخل قاعة مدرسة”
المهم
بدأت اتكلم عن الخدمة , انشر , اسجل اراء
,اتكلم عن تجارب قدرت تحقق نتائج بعد م اخدو استشارات معايا
ورجعو كلموني بعدها بشهور تاني .
والحمد لله والشكر لله
قدمت استشارات طلعت من مصر للعالم كله ✋
اتكلمت مع ناس مكنتش اتخيل اني في يوم اقابلهم
رجال اعمال عندهم مصانع , شركات كبيره وليهم فيديوهات فيديوهات لارائهم في الاستشارات وكانت مبهره بالنسبه ليهم
وكذالك لاكبر رواد اعمال , مشاهير في مجال زي e-commerce
مهندسين في كل المجالات , تجار , منهم اكبر استشاره لاكبر تاجر فاكهه في الوطن العربي .؟ اللي كان الفيديو بتاعه خسران مليار جنيه
وتطوير operation ل عيادات , شركات , جيمات , مشاريع من مختلف الفئات …الخ
واقتراح مشاريع , تنظيم هيكل اداري …الخ
حتي الاراء الشخصية واعتماد الناس علي رأيي في خطوه هياخدوها
كانت نتائج وشهادة الناس فيها مبهره .
ودخلت في تفاصيل الـ Business نفسها..
من دراسة الفكرة وتقييم المشروع وتحديد نموذج العمل
لحد التشغيل والإدارة وتوزيع الأدوار ومتابعة الـ Performance
أسست مع شركاء بنود شركات، واشتغلنا على الـ Structure والـ Operation، وحلينا مشاكل موجودة بالفعل بدل ما نحط حلول نظرية على الورق.
وكمان كانت فيه استشارات لقرارات مصيرية
قرار توسع قرار استثمار قرار شراكة قرار تشغيل أو حتى قرار إن المشروع مينفعش يكمل بالشكل الحالي او مش هينفع تبدأ مشروع معين ..!
وخلال اخر 4 شهور كان عدد الاستشارات وصل لرقم مرعب
اللي واضح في اسكرين الموقع دا اخر 4 شهور فقط
من 1-4-2026 حتي اليوم
ومن شهرين كدا في اسبوع فضلنا قافلين كل الحجوزات بسبب الضغط
وبقينا نرحل الاستشارات لشهور قدام لحد م طورنا منظومة الحجز من خلال الموقع ..!
ومع ذالك الضغط ماشاء الله كان فوق الطبيعي لان
عندي 3 مصادر اساسيه للحجز
•الحجز ع الموقع
•العدد الاكبر من خلال رسايل البيدج
•الترشيحات
وبمناسبه الترشيحات
احب اشكر كل الناس اللي بتعملي منشن في اي مكان او جروب خاص بالاستشارات ..♥️
وبفضل لله عملت اللي كان نفسي اعمله
خدمة محترمة , سريعه , افاده قويه , انتشار , ربح اللهم بارك
بمصاريف اقل , مناسبه لطبيعه يومي شغلي ليها عدد ساعات محدد
بشتغله في اليوم وانا مكاني …!
طبعا قبلت سلبيات كتير جدا
بسبب ان ثقافه مجتمعنا اللى صعب تتقبل فكره
ان خبرتك , تجربتك , رأيك , علمك يبقي بفلوس ..!
وسهل عليهم طبعا يهجموك , يكذبوك حتى لو كانت النتائج فيديو , دا غير تشكيك , اتهامات , تقليل ….الخ
في مصر تحديد الانتقاد , تعمد الهجوم
جزء من اي رحلة
فمجرد فهمك لان دا العادي وبيحصل لاي حد في اي مجال بيريحك
ومع الوقت بيموت كل م بتنجح .
اللي انا عملته دي جانب مهم من جوانب التغير , التطوير
واستغلال المهارات لتقديمها كخدمة سوقها قائم علي
“العرض , الطلب “
بس لازم تبقي شاطر في العرض علشان يكون في طلب ..!
علشان كدا
شغلك علي نفسك دا مردوده ليك ولحياتك ولاهلك
مينفعش يتحكم فيه اراء , سلبيات الناس حواليك
طالما مؤهل وشايف نفسك تقدر تقدم خدمه طور نفسك وكمل
اللي ناقصك , اشتغل بما يرضي الله
يحكمك في اللي بتقدمة الحلال و الحرام و الصح و الغلط بس ..!
ولعلمك محدش هيبطل عنك كلام
ف كلام الناس عليك وانت ناجح وربنا موسعها عليك
احسن مليون مره من كلامهم عنك وانت واقف مكانك مش قادر تنفع نفسك او اهلك .!
#استشارات #استشارة #نصيحة #تطوير #تعليم
23/08/2026
20/08/2026
18/08/2026