Amel Saleh-Self Development Trainer

#الحياةـالمتوازنة
بوست مهم جدا لأهمية الموضوع نفسه وهو موضوع التنمر
وردي في أول تعليق وبيتناول نقطتين
أخطاء الطفولة ومسألة الاتزان
يعني عدم الإفراط ولا التفريط

واحدة من أصعب الرسايل اللي اتبعتت لي في حياتي!! عرفت بعد ٣٠ سنة إني كنت شخص رذل وبايخ ومتنمر ثقيل.. باتريق على الناس وأضايقها من باب الاستظراف وخفة الدم اللزجة

الرسالة جات لي بعد ما حكيت قصة بنتي مارية مع التنمر وإزاي قدرت توقف المدرب المتنمر عند حده وهي طفلة عندها ٩ سنين

حسيت إني شخص بوق ومدعي الفضيلة وان ازاي في حاجات ممكن نكون عملناها زمان او بنعملها لغاية دلوقتي بتاذي الناس اللي حوالينا من غير ما ناخد بالنا

قعدت أفكر ايه اللي يخلي طفل زيي تخين وخدوده حمرا وشعره مجعد ونظره ضعيف ومسمينه تيخو واي حد قريب او بعيد بيقعد يفعص في خدوده وصدره وكرشه المدلدل يكون باي شكل من الأشكال متنمر بيستظرف على الناس لمجرد انه لعب رياضة وجسمه شد ومابقاش منطوي ومنسحب وعلى طول لوحده؟!!

افتكرت مقولة انجليزية بتقول hurt people hurt people الناس المجروح بتجرح الناس!! بدل ما نقف ونركز ونوزن كلامنا وأفعالنا قبل ما نعمل حاجة تعلم على الناس "اللي بنحبهم" للابد

دي عملية اسمها ال passed down او التمرير … تمرير مخاوفنا وتعاستنا ومشاكلنا وتجاربنا المريرة للآخرين اللي لينا سلطة عليهم.. بنشوف ان الحل الوحيد للنجاة والاستقواء أننا نكون زي العالم الظلمة الجهلة المفترية اللي كانوا حوالينا

الأم اللي بتكلم بنتها المتجوزة تكرهها في عيشتها هي غالباً زوجة كارها عيشتها…. مش مدية اي مساحة ان الناس مختلفة وتجاربها مختلفة… بتحمّلها فاتورة مش بتاعتها… مش ذنبها انك مكنش عندك الشجاعة الكافية انك تقفي وتوقفي النزيف اللي كان بيتمارس عليكي

المدير الحويط اللي خالق بيئة عمل سامة لا تسمح بالتطور والنمو والظهور هو غالباً شخص كان مظلوم ومش متشاف ومقهور

الأب اللي قرر بكامل ارادته يكبر دماغه ويكتفي بدور المعيل اللي بيوفر فلوس وساب الدنيا تضرب تقلب وكمل حياته وانجازاته وساب ناس تانية تتكلم عليه و تشتكيه وتشكك الناس اللي بتحبه فيه لمجرد ان أبوه كان كده وجده كان كدة!!

احنا بنطلع اجيال قاسية وخايفة ومهزومة... بنحرمهم من أنهم يعيشوا حياة افضل من اللي عايشناها مع ناس افضل من اللي عيشنا معاهم

قريت كتير عن الأسباب واستوقفني ال un processed grief او الحزن والألم الغير معالج… احنا مخدناش وقتنا عشان نزعل ونغضب ونرد على اللي أذونا… نعبر لهم عن احاسيسنا وقهرنا من افعالهم وأقوالهم بكل ود وادب واحترام وفي نفس الوقت من غير ما نسمح لهم بابتزازنا عاطفياً ولا تغير الموضوع ولو قفلوا السكة في وشنا نتصل تاني ونقولهم كل اللي عايزين نقوله… ونختم المكالمة بأننا بنحبهم ومسامحينهم لأنهم مكنش عندهم الوعي والاطلاع اللي من حسن حظنا كان عندنا

نصيحتي المجردة الاستعانة بالطب النفسي اللي للاسف عندنا موسوم ومربوط بالجنون والاضطراب مع انه طب زي اي طب بيعالج مرض زي اي مرض… ينفع يكون عندك برد وتمشي تكح وتتف وتعطس برابيرك في وشنا تقوم "تنقل" لنا أمراضك وتعدينا لمجرد ان حد متخلف قالك اوعى تروح لدكتور عيب وما يصحش ليقولوا عليك مجنون!!

أنا عن نفسي اشتغلت على نفسي و استعنت بأطباء متخصصين عرفوني مشاكلي وبدأت في حلها عشان أكون إنسان افضل وامنع شروري واذيتي عن العالم والناس اللي بحبها

تحية لكل أم وقفت النزيف وقررت عدم تمرير التجارب الأليمة والقهر والابتزاز لاولادها… تحية لكل أب قرر انه يكون مختلف وحط مصلحته ومصلحة ولاده فوق كلام الناس اللي كدة كدة مش هتبطل تتكلم

أنا اسف يا مروة على التنمر والضيق والزعل اللي سببتهولك واحنا في ثانوي وأسف لأي حد اذيته او بأذيه وانا مش واخد بالي

سامحوني

#التخطيطـحياة
تجربتي النهارده مع التخطيط
خروجة عائلية اتفقنا على كل تفاصيلها وأنا بنفسي كنت مسئولة عن التواصل مع المكان اللي عايزين نروحه وسألتهم عن كل حاجة وعن المواعيد والأسعار وكانوا ممتازين وبيردوا بكل اهتمام
الصبح رحنا لقينا مفاجأة: الباب مقفول!
معانا أولاد صغيرين ومحضرينهم عشان الفسحة وهم طبعا كانوا متشوقين جدا للتجربة
اطرحت مسألة الرجوع للبيت لكن أنا صعبان علي الأولاد والصحيان البدري والكل كان محتاج خروجة حلوة ... ازاي نرجع البيت من غير ما نعملها؟!!
البديل كان البحث عن مكان آخر والحمد لله لقينا مكان فاتح وبيرحب بينا والناس هناك في منتهى الذوق وكلنا فطرنا واتصورنا وانبسطنا بتفاصيل المكان: الساقية والحيوانات والخضرة والجسر الخشبي
وفي وسط ده كله جالي اتصال من المكان اللي كان مفروض نروحه ردا على مكالمة ورسالة بعتها لهم في محاولة مني للتواصل مع حد عشان يفتحوا الباب.
كانوا ذوق وحكيت لهم اللي حصل وقالوا إنهم حيحاسبوا المقصر اللي ساب الباب مقفول واتفقنا نعدي عليهم قبل ما نرجع البيت ونقضي شوية وقت هناك.
وده فعلا حصل
فيه كذا معنى جم في بالي بعد انتهاء رحلتنا الصباحية
أولا معنى ما منعك إلا ليعطيك
المكان اللي اخترناه في البداية لقيناه اتغير وبقى غير مناسب للأولاد ولا حتى لنا في حين إن المكان الجديد حقق كل اللي كان نفسهم فيه وأكثر
اتناقشت معاهم من باب النصيحة خصوصا إن كان لي تجربة حلوة قوي عندهم وافتقدتها المرة ده وقلت لهم إنهم فقدوا أهم ميزة كانت في المكان ...تفهموا كلامي لكن قالوا لي إن الديكور الجديد أنسب لأهدافهم وده طبعا من حقهم.
باب مقفول منعنا ندخل المكان اللي كنا مهيئين نفسنا ننبسط فيه وربنا عوضنا بمكان فيه كل اللي بسطنا
المعنى التاني هو الرزق
المكان الجديد غالبا ما كانش متوقع تماما أي حد يدخل قبل الساعة ١٠ أو ١١ وفعلا الناس بدأوا ييجوا في التوقيت ده لكن احنا دخلنا قبل الساعة ٩ وطلبنا وكان عددنا كويس وبدون مجهود منهم معانا في التحضير المبدئي لخروجتنا رزقهم جه لغاية عندهم
المعنى الثالث هو إن التجربة الناجحة بتعمل أحسن تسويق
المكان الجديد دخلناه بناء على ترشيح من أختي اللي راحت أكثر من مرة وشكرت فيه عشان كده رحنا له بدون تردد لما اختيارنا الأول بقى غير متاح.
آخر معنى وده دائما بأكد عليه في بوستاتي هنا على الصفحة أو في كورساتي إننا احيانا بعد التخطيط الجيد والاستعداد والتحضير بنضطر نغير خططنا فلازم يكون عندنا مرونة في التفكير
وكلمة أخيرة
الحقوا اخرجوا كل ما تتاح لكم فرصة لأن الأجازة الصيفية قربت تخلص والأهالي زيهم زي الأولاد محتاجين يستمتعوا قبل ما يبدأ الماراثون الدراسي
الصورة المرفقة من تصويري النهارده الصبح

#الحياةـالمتوازنة
الجو حر نار والأسعار كمان
ممكن بقى واحنا في الصيف يعني موسم الفاكهة نرجع تاني نعمل العصائر أشكال وألوان في البيت؟
ترجع نحضرها عشان تتحط في الثلاجة ونشربها ونعوض فاقد المياه بسبب الحر الشديد بدل المياه الغازية والعصائر الجاهزة المليانة سكر ومواد حافظة
ممكن نحضرها لما ننتظر ضيوف وعارفين ميعاد وصولهم؟
صدقوني كنا بنحس بالاهتمام عشان حاجة اتعملت مخصوص بايد حد من البيت
حنسترجع صحتنا ونوفر فلوس كتيرة سواء لشراء الجاهز أو للعلاج بعد كده من آثاره
مش كده ولا إيه؟
الله يرحم فناننا فؤاد المهندس اللي عرفنا معاه حاجات كتير صح واتعلمنا منه نتجنب الحاجات الغلط

#الحياةـالمتوازنة
النهارده كان عطلة رسمية في مصر وبالتالي بعض الناس أصبح بالنسبة لهم النهارده وبكره وبعده أجازة
جميل؟
جميل طبعا
لكن
قضينا النهارده راحة في البيت وصحيان متأخر وآخر دلع
حنان الوقت دلوقت نبتدي نفكر ازاي نحسن استغلال اليومين الجايبن
فاكرين الدعاء اللي قلت لكم اني اتعلمته من أختي؟
لما ما يكونش عندها تخطيط لليوم بتاعها لأي سبب بتدعي ربنا وتقول
اللهم أعني على حسن استغلال يومي وإنفاقه فيما يفيد
ادعوا بالدعاء الجميل ده وبرضه خططوا لليومين الجايبن
افتكروا نصائح مهمة اتعلمناها في المدرسة وفي حصص اللغة العربية والدين وممكن تفيدنا لدنيانا وٱخرتنا
فاكرين الله في عون العبد ما دام العبد في عون أخيه؟
ركزوا مين ممكن يكون محتاج مساعدتكم ورتبوا ازاي تساعدوه
جار أو قريب أو صديق أو حتى شخص من اللي بتتعاملوا معاهم زي عامل في محل وعارفين ظروفهم واحتياجاتهم وخصوصا وقت لتقديم المساعدة ده
الدنيا بتبقى حلوة لما تقدر نساعد ونشوف نتيجة المساعدة تنعكس بصورة إيجابية على الشخص اللي ساعدناه وأحيانا على عائلته كلها ويمكن على حياه كلها كمان
ربنا يرشدنا للصح ويعيننا عليه ويجعل عملنا مقبولا

بما أن اليوم هو اليوم الأخير لي في عمر ال ٥٩ فكرت أنه من المناسب أن أعيد نشر هذا البوست
اللهم ارشدنا لصالح الأعمال وأعنا عليها وتقبلها منا

#الحياةـالمتوازنة
الركنـالرياضي
ولسه مكملين مع الركن الرياضي ونضيف عليه الركن الترفيهي
النهارده الثلاثاء يوم مميز جدا
٧- ٧ - ٧
سبعة سبعة الساعة سبعة
كلنا اللي ظروفنا تسمح حنتجمع عشان نشوف ماتش مصر والأرجنتين
لأول مرة مرة تتأهل إلى دور ال ١٦
لأول مرة حنلاعب الأرجنتين في كأس العالم
وايه كمان؟
لغاية دلوقت الحمد لله ما خسرناش ولا ماتش
اللعيبة حتلعب بكل قوتها وتركيزها واحنا كجمهور حنستمتع بكل لحظة
علينا السعي بكل اجتهاد
وربنا عنده النتيجة اللي فيها الخير لنا
وحندعي من قلبنا
يارب نفوز

#الحياةـالمتوازنة
الحمد لله ومبروووووووووك الفوز المستحق الليلة ده لمصر على استراليا
كنت بتمنى نفوز وعارفة الفريق اللي قصادنا ضعيف
لكن برضه عارفة إن أجسامهم غير أجسام اللعيبة عندنا
وشفت استعدادات الناس في الشوارع طول اليوم وحماسهم والأعلام في كل مكان والفرحة والأمل على الوشوس وكل ما أسأل حد ألاقيه بيقول بثقة وعشم حنكسب
خفت الناس تحبط ودعيت ربنا يفرحنا
ودعيت بحاجة كمان
الحمد لله رب العالمين
يارب حققت النص الأول من دعائي حقق النص التاني
آمين