رأي زملكاوي

سيراميكا كليوباترا يعرض علي الاهلي استعارة زيزو لمدة موسم مع تحمل ثلث راتبه فقط، واللاعب يرفض ويتمسك بالبقاء في الاهلي

اى نادي في العالم بيمر بازمة مالية، الأزمة ممكن تاخد موسم او اتنين وتتحل ويرجع النادي لوضعه الطبيعي، برشلونة بما يحمله من تاريخ وقوة مالية كبيرة اضطر يبيع أفضل لاعب في التاريخ عشان يقدر يظبط اموره المالية، نادي واحد بس هو اللي دايما معندوش اى ازمات مالية، ممكن يمشي ٣ او ٤ لاعبين ويفضل يديهم مرتباتهم، ممكن يقيل مدير فني ويفضل يسدد مستحقاته ويجيب مدير فني تاني براتب اكبر ويقرر يمشيه ويديله شرط جزائي كبير وبعدها يروح يتعاقد مع لاعب جزائرى، ب٢.٥ مليون دولار غير ٥٠٠ الف بونص، ويدي لاعب تاني راتب ١٦٠ مليون في السنة وعاوز يجدد للتالت ب٧٠ ولا ٨٠ مليون، مفيش ازمات عندهم خالص رغم انه نادي في قارة فقيرة بيشارك في بطولات عوائده مش مليارات او عشرات ملايين الدولارات، لما تيجي تتكلم تبقي عايش نظرية المؤامرة

جون إدوارد كلف طارق حامد بتولي ملف سيف الدين الجزيري لانهاء الامور معه بشكل ودي، الزمالك قام بتحويل جميع مستحقات اللاعب لحسابه حتي لا يستطيع فسخ تعاقده من طرف واحد ويدخل الزمالك في قضية جديدة، الزمالك يريد التخلص من راتب الجزيري المرتفع ( حوالي ٦٠٠ الف دولار سنويا) طارق حامد يحاول انهاء التعاقد بشكل ودي ومنح اللاعب حرية تحديد وجهته بدون حصول الزمالك علي اى أموال مقابل الرحيل بدون شكاوي او ازمات، حامد يحاول اقناع اللاعب بضرورة الرحيل بدون الدخول في ازمة مع النادي حفاظا علي تاريخه وعلاقته بجماهير الزمالك

المدرب المغربي عبد السلام وادو يؤكد ان الزمالك تواصل معه بالفعل وعرض عليه مشروع النادي ولكن لم يتم توقيع اى عقود حتي الان.

عبد السلام وادو خيار مطروح علي طاولة الزمالك ولكنه ليس الوحيد، الزمالك تواصل مع اكثر من مرشح، اسم المدرب سيتم إعلانه خلال الايام القليلة المقبلة ليتواجد في معسكر الفريق في فترة الاعداد

احنا لما دعمنا فكرة التعاقد مع مدير فني اجنبي بدلا من الكابتن معتمد جمال طالبنا ان المدرب يكون صاحب خبرات، سي في قوي عنده من الخبرات ما تسمح له بقيادة الزمالك خاصة في الموسم المقبل اللي هنكون داخلين فيه بدون اى صفقات بسبب ايقاف القيد، لو صحت انباء تفضيل جون إدوارد وإدارة الزمالك التعاقد مع عبد السلام وادو يبقي احنا كده بنكرر تجربة يانيك فيريرا تاني، وادو بدأ مسيرته التدريبية عام ٢٠٢٠ يعني من ٦ سنين فقط مع فريق مولودية وجدة الجزائري وبعدها تولي تدريب اورلاندو بايرتس الجنوب افريقي، حقق معاهم دوري، ولكن خبراته لا تمسح له بقيادة فريق بحجم الزمالك، مدرب لم يسبق له تدريب فريق كبير من قبل، مدرب اجنبي يعني سي في قوي، يقدر يشتغل تحت ضغوط، يقدر ينافس علي كل البطولات، يقدر انه يطور لاعبين عشان ايقاف القيد، في حاجة متوفرة في المغربي عبج السلام صاحب ال٦ سنوات خبرة تدريبية؟

كابتن معتمد جمال مرشح لتدريب المنتخب الأوليمبي بعد استقرار الزمالك علي التعاقد مع مدير فني اجنبي، بالتوفيق ليك يا كابتن

عمرو نبيل: الزمالك زووم ميتنج مع المدرب المغربي عبد السلام وادو ويعتبر هو المرشح الاول لتدريب الزمالك اذا وافق ناديه اورلاندو بايرتس علي تركه سيكون هو المدير الفني القادم للزمالك

احمد شوبير بيقول ان في اجتماع بين إدارة الاهلي وزيزو ووالده لبحث تخفيض عقده، مع ان الكابتن شوبير قال قبل كده ان ظهور زيزو في اكثر من إعلان ولقاء تلفزيوني غطي قيمة عقده، يعني الاهلي مش دافع حاجة خالص، سيد عبد الحفيظ هو من يقود الجبهة دى وشايف ان عقد زيزو وتريزيجيه هو اللي كان عامل مشاكل كبيرة في اوضة اللبس وهو سبب النتائج السيئة وزعل امام عاشور، والد زيزو امبارح أكد ان ابنه مش هيمشي من الأهلي وطبعا انتوا عارفين الراجل ده عفريته الفلوس فمش هيخفض جنيه واحد من عقد اللاعب خصوصا انه سابه تاريخه مع الزمالك عشان الفلوس، في حد واقف بعيد كده بيتفرج علي سيد عبد الحفيظ ومبسوط بالتخبيط اللي بيحصل حاليا يا تري مين هو

القضية خلاص اتحفظت ولجنة شئون اللاعبين قالت انه مالوش فلوس عند الزمالك، زيزو كان هو وشيكابالا بياخدوا فلوسهم قبل كل اللاعبين واحيانا كانوا بياخدوا فلوسهم وباقي الفريق ممكن يتأخروا شوية، زيزو واخد فلوسه وممكن يكون له مستحقات فعلا بس اكيد رقم قليل وتم خصمه بسبب انقطاعه عن التدريبات لمدة شهر او اكتر لما تأكد توقيعه للاهلي، فليه تنكر وتروح تشتكي وتقول ان لك ٨٠ مليون عند النادي، الغريب والعجيب ان لجان ج.ج قعدت فترة كبيرة شغالة علي نغمة ان الحكم خلاص صدر بس اجلوا اعلان القرار خوفا علي الزمالك، كنت نجم جيلك وكنت هتبقي رمز من رموز النادي نسيت كل ده وجريت علي الفلوس فدوسنا عليك وهنبطلك كورة قريب، اشرب

الزمالك يعلن تلقيه خطاب من لجنة شئون اللاعبين بحفظ شكوي زيزو ضد الزمالك