26/08/2026
بعد سنين في مهنة التدريب .. فهمت حاجة مؤلمة...
بدأت أقتنع إن العلاقة بين اللاعب والمدرب و ولي الأمر لازم يكون فيها حدود واضحة جدًا.
لأن في النهاية...
Business is business.
أنت بتقدم خدمة، واللعب أو ولي الأمر بيدفع مقابلها.
لكن المشكلة إننا أحيانًا بنحط مشاعرنا وإنسانيتنا زيادة عن اللزوم في العلاقة دي.
اللاعب طول ما هو معاك، وولي الأمر طول ما ابنه عندك، تلاقي الود كبير جدًا...
تعمل طلبات زيادة،وتتنازل،وتيجي على نفسك،
وتقول:
"معلش... أنا مدرب ومربي ومينفعش أزعل حد."
وتسمع كلام من نوع:
"أنت أحسن كابتن.""مفيش منك اتنين.""إحنا مش هنسيبك أبدًا."
وبمجرد ما اللاعب يقرر يسيبك...
كأن الـسنين اللي فاتوا اتمسحوا بضغطة زر.
وممكن تقابل اللاعب أو ولي الأمر في الشارع...
ولا كأنكم تعرفوا بعض أصلًا.
وده يمكن يكون أكتر جزء مؤلم في الموضوع.
مش لأن اللاعب لازم يفضل معاك للأبد...
لا طبعًا، من حقه يختار المدرب والمكان اللي يناسبه.
لكن لأننا أحيانًا بنكتشف إن العلاقة اللي كنا فاكرينها إنسانية جدًا، كانت في الحقيقة مرتبطة بالخدمة اللي بنقدمها.
وعشان كده...
متزعلش لو حد مشي.ومتتعلقش بحد.
ومتعملش فوق طاقتك علشان ترضي حد.
قدم أفضل ما عندك،اتقن شغلك،احترم لاعيبتك وأولياء الأمور،وساعدهم على قد استطاعتك...
📢لكن حط حدود.
لأن المدرب مش ماكينة خدمات،
ومش مطلوب منه يشتري رضا الناس على حساب راحته وكرامته.
وفي النهاية:🖐️
اللي يقدّر تعبك... قدّره.
واللي يختار طريق تاني... سيبه يمشي باحترام.
ومتخليش خروج شخص من حياتك يخليك تشك في قيمة اللي قدمته.
اشتغل بضمير...لكن متشتغلش بقلبك لدرجة إن كل واحد يمشي ياخد جزء منك معاه...
تحياتى
#مصطفى طه
29/07/2026