08/07/2026
✍️لو حد سألني: إيه اللي اتعلمتيه من الكشافة؟ فممكن أفضل أتكلم ساعات... لأن الكشافة عمرها ما كانت مجرد نشاط بالنسبة لي، كانت مدرسة علمتني دروس هتفضل معايا طول العمر.
اتعلمت إن الخير ليه ألف طريق، وإن مش لازم يكون بالفلوس، ممكن يكون بكلمة حلوة، أو وقت، أو مجهود، أو ابتسامة تفرق مع حد.
اتعلمت إن وأنا بعلم الأطفال، أنا في الحقيقة بتعلم منهم كل يوم. اتعلمت إن الحكمة ملهاش سن، وإن ممكن طفل صغير يعلمني درس كبير في البراءة أو الصبر أو الإصرار.💫
اتعلمت إن التفاصيل الصغيرة هي اللي بتصنع أجمل الذكريات، وإن أجمل إحساس هو إنك تكون سبب في فرحة حد، أو توثق لحظة هيفضل فاكرها طول عمره.👍
اتعلمت إزاي أكون جزء من فريق، وإزاي أشجع اللي حواليا حتى لو أنا تعبانة، لأن التشجيع الصادق ممكن يغيّر يوم كامل، وممكن يكون السبب إن حد يكمل وميستسلمش.👋
اتعلمت إن الصداقة ملهاش عمر، وإن ممكن يبقى عندك أصحاب أكبر منك تتعلم منهم،👨👩👦👦 وأصحاب أصغر منك👦 يعلموك حاجات عمر ما كنت تتخيلها.
اتعلمت معنى المسؤولية، وإن ممكن نشتغل بكل حب وإخلاص، حتى لو بنجهز أكل لخمسين شخص، أو بنرتب نشاط، أو بنساعد في أي مهمة. المهم إن كل حاجة تتعمل من القلب.🌺
اتعلمت إن مفيش حاجة اسمها "مش هعرف"، وإن أي حاجة مهما كانت صعبة، بالمحاولة والإصرار هتيجي.
واتعلمت إن اختلاف الناس مش حاجة تبعدنا عن بعض، بالعكس... هو اللي بيخلينا نكمل بعض، ونحب بعض، ونتعامل باحترام.
واتعلمت إن كل نهاية هي بداية جديدة، وإن كل تجربة بنعيشها بتسيب جوانا أثر جميل.
وكل الدروس دي... كان ليها فضل كبير بعد ربنا في وجود (القائد محمد ماهر)، اللي علمنا إن الكشافة مش مجرد أنشطة أو رحلات، لكنها أخلاق، ومسؤولية، وانتماء، وخدمة للناس، وحب من غير مقابل.
وده بالضبط اللي بنحاول نوصله لكل طفل بينضم لينا. مش هدفنا إنهم يتعلموا مهارة وبس... هدفنا يطلعوا واثقين في نفسهم، متعاونين، مسؤولين، بيحبوا الخير، يحترموا اختلاف غيرهم، ويعرفوا إن كل واحد فيهم يقدر يسيب أثر جميل في أي مكان يروحه.✨️
وده هو هدفنا الحقيقي... إننا نربي جيل يكون قائد في أخلاقه قبل أي حاجة، ويكون سبب في نشر الخير والمحبة في كل مكان.
وفعلًا... أنا فخور جدًا إني كنت وما زلت جزءًا من الكشافة. 💚⚜️
مع تحيات قائد عام مجموعات الفرسان الكشفية والإرشادية
ق/ محمد ماهر
