Unleash your power with Fatima El Zahraa

Forgiveness… 💔

أوقات كتير بنتصرف كأننا بنلعب دور الإله…
بنحكم، وبنصدر أحكام نهائية على اللي حوالينا،
وننسى إننا في الآخر بشر… بنغلط وبنضعف.

الغلط بيوجع… جدًا.
خصوصًا لو كان خيانة…
الوجع ده بيكسر جزء جوانا، إحساس صعب يتوصف، وكأن الثقة انهارت مرة واحدة.

بس…
لو اللي قدامك ندم بصدق، ورجع يحاول يصلّح،
افتكري إننا كلنا بنغلط،
وإن الزمن اللي إحنا فيه صعب على الكل.

قال تعالى: إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا {فاطر:6}، وبينت السنة الصحيحة حرصه على التفريق بين الأحبة، ولا سيما الزوجان، فعن جابر -رضي الله عنه- قال: قال رسول الله -صلى الله عليه وسلم-:« إن إبليس يضع عرشه على الماء، ثم يبعث سراياه، فأدناهم منه منزلة أعظمهم فتنة. يجيء أحدهم فيقول: فعلت كذا وكذا. فيقول: ما صنعت شيئا. قال: ثم يجيء أحدهم فيقول: ما تركته حتى فرقت بينه وبين امرأته. - قال: - فيدنيه منه، ويقول: نعم أنت » رواه مسلم.

ما تمسحيش سنين كاملة، وذكريات حلوة،
عشان لحظة ضعف…
لأن أوقات كتير بنسيب مشاعرنا تقودنا، ونهدم بيت بإيدينا.

الخيانة في الأول خيانة للنفس ولربنا، قبل أي حد.

خدي نفس… واهدي…
وفكّري بعقل وقلب مع بعض، مش بقلب مجروح بس.

آه، في حالات بيكون الطلاق هو الحل…
لو مفيش ندم، أو مفيش تغيير حقيقي.
لكن لو في رجوع صادق، ومحاولة حقيقية للإصلاح…

استعيني بالله،
وادعي إن ربنا يسترها ويصلّح الحال

التعلّق… 💭

أكتر حاجة بتوجّع مش الفقد…
لكن التعلّق الزايد.

لما بتعلّي سقف توقعاتك في حد،
بتحط نفسك في مكان خطر…
ولو خذلك، بتقع على رقبتك من وجع الخذلان.

الحقيقة البسيطة اللي بننساها:
إن كلنا بشر…
بنغلط، بنقصّر، وبنخيب ظن بعض أوقات.

علشان كده، خفّف تعلّقك بالناس،
ومتربطش سعادتك بوجود حد أو تصرفه.

اتعلّق بالله…
هو الحي الذي لا يموت،
الثابت الوحيد في حياة متغيّرة.

قربك من ربنا هو الأمان الحقيقي،
وهو اللي هيخليك واقف حتى لو كل حاجة حواليك مش معاك

وعن أبي هريرة عن النبي صلى الله عليه وسلم قال: إذا أحب الله العبد نادى جبريل أن الله يحب فلانا فأحبه فيحبه جبريل فينادي جبريل في أهل السماء إن الله يحب فلانا فأحبوه فيحبه أهل السماء ثم يوضع له القبول في أهل الأرض. رواه البخاري.

بابا الغالي 💔،
من يوم ما مشيت من الدنيا وأنا حاسة إنك أخدت معاك جزء مني. في حاجة جوة قلبي اتكسرت ومش لاقية لها علاج. وجع غريب، وجع بيكبر معايا كل يوم وما بيخفش. حسّيت إني كبرت فجأة يوم موتك، وكأني اتحرمت من حضن كان شايلني وأمان كنت متطمنة فيه.

كل لحظة بتمر عليّ بترجعني لذكرياتنا… ضحكتك، كلامك، نظرتك، حتى عتابك. حاجات صغيرة كانت عادية، بقت دلوقتي عندي غالية أوي. ساعات بفتكر مواقف حصلت من زمان وألاقي نفسي بضحك وبعيط في نفس اللحظة. بحس إنك لسه موجود في كل تفصيلة من حياتي، وإن ريحتك لسه ماليه البيت والروح.

بابا… فراقك وجع مش بيتوصف، بس كمان علمّني قد إيه وجودك كان نعمة كبيرة. يمكن موتك خلاني أشوف الدنيا بشكل تاني، وأفهم قيمة الحاجات اللي كنا بناخدها عادي. أنا عايشة بدعواتك اللي كنت دايمًا ترفعها ليا، وبالإيمان إنك في مكان أحسن وأجمل عند ربنا، وإنك مرتاح.

وحشني يا بابا، وحيفضل وحشني طول العمر. هفضل شايلة اسمك وفخور بيك، وهفضل بدعيلك في كل صلاة. يمكن الزمن يسرق مني أيام، بس عمري ما هنساك ولا هنسى إني بنتك

كلنا بنسمع عن الموت وقلوبنا بتتوجع،
لكن اللي عاش لحظة فراق قريب بيعرف إن الوجع مختلف.
وجع الذكريات، وجع الصوت اللي بييجي فجأة جواك من غير ما تفهم ليه…
وقت الفراق بتنسى كل خلاف أو وجع، وبتفتكر بس الضحكة، والصوت اللي لسه بيرن في قلبك.

أبويا كان دايمًا يقولي: “إنتي راجل”،
وطلعت يا حبيبي راجل وبنت أبويا،
وعملت كل اللي ربنا قدرني عليه.

ربنا يرحمك ويغفرلك يا أغلى الناس،
هتفضل جوانا طول ما إحنا عايشين،
وربنا يقدرنا نكون لك ولد صالح وصدقة جارية. �

في فراغ جوا البني آدم ميتشافش، بس بيوجع.
لما تحب حد بكل نقاءك، وهو يطفيك… يطفي نورك، صوتك، احتياجك…
وتضطر تكمّل معاه كأنك حي، بس انت ميت جواه.
كل يوم تشوفه، تسمعه، وكل يوم قلبك بيصرخ:
“إزاي حبيت قسوة كده؟!”

حد ما فهمكش، ولا حتى حاول.
سكت صوتك، وكسرك وأنت بتحاول تفضل واقف.
وبعد كل ده، سابك خايف…
خايف من أي قرب، من أي كلمة، من نفسك.
سكون مرعب، ووحدة ما لهاش صوت، بس بتنهش فيك.

تهرب من نفسك، من المواجهة، من الكلام.
تعيش يومك وخلاص، كأنك ضيف ف حياتك.
بس جواك دعوة واحدة طالعة من القلب:
“يا رب، أنت العالم بحالي…
استرها معايا، وعدّيها، أنا تعبت.”

…بس وسط كل ده،
لسه في حاجة جواك بتقول: “لسه في بكرة، ولسه في أمل.”
ربنا موجود… شايف، سامع، وعارف كل اللي في قلبك.
والحياة بتستمر، حتى لو كانت تقيلة.
إحنا اللي بنصنع لحظاتنا، بنخلق من الوجع قوة،
ومن الكسرة بداية جديدة.

بكرة أحلى، لأن ربنا ما بينساش حد.
وكل يوم جديد… فرصة جديدة لروحك تتنفس من جديد
#يارب

الست لما بتتْقهر، مش بس بتبكي.. بتبقى محفورة في جدران السما قضية.

اللي استحلّ فلوسها، كرامتها، سنين عمرها.. ياما نام بليل فاكر إن الدنيا سايبة،
بس **في دفتر السما إسمه مكتوب، وفي يوم هيتقرأ عليه كل سطر ظلمه..**

يا ريت اللي بياخد اللي مش من حقه يفهم:
إن **الست مهما كانت هادئة، ضحيتها، أو حتى انكسَرت..
ربنا بيكتب كل دمعة بتنزل من عينها، وكل ليلة سهرتها، وكل حاجة اتداست عليها..**
والأيام بتعدي، بس الحساب لسه جاي..

**لأن في ديننا: مفيش حاجة بتنضيع..**
ولا كلمة ظلم، ولا حق ضاع، ولا دمعة انسكبت..
كلها هتتسأل يوم القيامة..
والله اللي قال **"ولا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ"** مش هيغفل عنكِ..

ف لو حد فاكر نفسه 'ربح' لأنه أذاقكِ الهوان..
**يستنّي.. لسه جاية أيام بتفرّق بين اللي بيعطي واللي بيسرق..**
والست اللي اتداست عليها الدنيا..
ربنا بيرفعها قدام الكل، ويُعيد لها كل حقها..
**ويا من ظلمتي.. اطمئني.. العدل جاي.. بس انتظري."**


` `

حقيقة كلمة “تعافي” مش معناها إننا هننسى كل الوجع أو إننا هنرجع زي ما كنا قبل الكسر. الحقيقة إن التعافي رحلة، مش نقطة نهاية.

كلنا مرينا بلحظات وجع، كسر، أو فقد، وكتير منا حاول ينسى، يدفن مشاعره، أو يكمل وكأن مفيش حاجة حصلت. بس الواقع إن الوجع بيعيش جوانا. ممكن ذكرى صغيرة، مكان معين، أو حتى كلمة تفكرنا بكل اللي عدّى وتدمّع عينينا من غير ما نحس.

التعافي الحقيقي مش إننا ننسى، لكن إننا نتعلم نعيش مع الألم، نفهمه، ونحوله لقوة تدفعنا لقدام. بنبني ذكريات جديدة، نحاول نفرح، نخلق حياة تكون على مقاسنا إحنا، مش على مقاس الجروح اللي عدينا بيها.

والوعي هنا إننا ندرك إن الماضي جزء مننا، لكنه مش كلنا. بكره جاي بإذن الله، وكل نفس جديد هو فرصة جديدة. مش لازم نكون كاملين أو مش موجوعين، لكن الأهم إننا نقرر نكمل ونصنع ذكريات جميلة رغم كل حاجة.

التعافي قرار بوعي… إننا رغم الوجع هنعيش ونكمل.

#توعيه
#رحمه

رحمة الله وسعت كل شيء، هي الأمان الذي يحيط قلوبنا مهما ضاقت بنا الدنيا، هي النور الذي ينير لنا الطريق وسط العتمة، وهي الأمل الذي لا يخيب. قال الله تعالى:

“وَرَحْمَتِي وَسِعَتْ كُلَّ شَيْءٍ ۚ فَسَأَكْتُبُهَا لِلَّذِينَ يَتَّقُونَ وَيُؤْتُونَ الزَّكَاةَ وَالَّذِينَ هُم بِآيَاتِنَا يُؤْمِنُونَ”
(سورة الأعراف: 156)

كم من مرة أخطأنا، فسترنا، وكم من مرة أذنبنا، فغفر لنا. يقول الله عز وجل:

“قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ”
(سورة الزمر: 53)

اللهم اجعلنا من عبادك الذين ينالون رحمتك في الدنيا والآخرة، ولا تحرمنا أبدًا من سعة حلمك وكرمك. يا أرحم الراحمين، اجعل رحمتك تسبق غضبك في حياتنا وتكون ملاذًا لنا يوم نلقاك.

#رحمه

اليُتم شيء قاسي جدًا، لكنه مش دايمًا معناه فقد الأب أو الأم. فيه أيتام عايشين وسط أهلهم، لكنهم أُتيّموا بسبب إهمالهم أو قسوتهم، وللأسف مفيش حد يطبطب عليهم لأن أهلهم موجودين نظريًا.

أصعب إحساس هو الوحدة، لما تبقى لوحدك رغم وجود أقرب الناس ليك حواليك. المشاكل النفسية اللي بيواجهها الآباء بتكون عائق كبير في التربية، وبتنتج عنها أجيال مليانة مشاكل نفسية. والدايرة دي تفضل مقفولة لحد ما حد ياخد قرار إنه يواجه نفسه ويتعالج. لكن مهما حاولنا نتعايش أو نتعالج، بيبقى جوانا فراغ عمره ما يمتلئ غير بحضن أب أو أم فاهمين، حاسين، ومقدرين من غير كلام.

والوجع ده بيتغير مع التوعية، لكنه ما بيروحش.
اليُتم كمان ممكن يكون من أخ أو أخت قرروا يبعدوا بمزاجهم، مش بسبب قهري زي الموت أو الغربة، لكن بسبب كره أو غيرة أو حتى شعور بالنقص. يقطعوا رحمهم بإيدهم. إحساس اللي اتساب بالشكل ده ما بيتنسيش، الخذلان، الضعف، الخوف، وفقدان الثقة يفضلوا محفورين جواه. كل مرة يشوف أخوات مع بعض، الوجع بيتجدد.

بلاش نُيتم ولادنا وأخواتنا بقراراتنا أو قسوتنا. بلاش نسيبهم يعانوا من وهن نفسي يخليهم فريسة لأي مريض أو متلاعب. ما تسلمش نفسك لشياطينك وأمراضك، وتبني بيت فاضي من غير أساس.

قال الله تعالى:
وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ.
كل فعل بتعمله مع أقرب ناس ليك، ليه رد فعل. خليك هين ولين، عشان ربنا يقر عينك بحبايبك.

#توعيه
#رحمه

الحقيقة دايمًا مرعبة، مهما كانت، وكلنا بنخاف نبُصّ عليها

مسلسل (لام شمسية) حسسني إن التحرش مش مجرد حدث، ده واقع موجود حوالينا، بنحاول نلبس نظارة سودا علشان ما نشوفوش.

التحرش بيحصل، مع الانفتاح وعصر الإنترنت اللي بقى في إيد الأطفال، ومع غياب التوعية، بقى سهل جدًا أي طفل يقع فريسة لأي شخص مريض. الأخطر مش مجرد المريض الواضح، لكن المتلاعب النفسي اللي بيحاوط الطفل بأسلوب يخليه يحس بالأمان المزيف، ولما يبعد يحس بالذنب إنه غلطان.
أو المريض اللي بيخوف ويرعب الطفل إنه يتكلم.
ده كله بيحصل أكتر لما الطفل يعيش في بيت ما فيهوش حب أو كلام مفتوح.

الخوف دايماً بيعمل مصايب.
والأطفال اللي كبروا في بيئة ما بتسمعش، بيكتشفوا لما يكبروا إنهم اتلعب بيهم، وإنه حاجات كتير في حياتهم اتأثرت بسبب ده.

أساس كل المشاكل دي هو غياب البيئة الآمنة في البيوت.

الكل تايه ومسحوب في الدنيا، ومحدش فاضي يشوف أو يسمع.

التوعية والاحتواء مش رفاهية… دي حاجة حياتية


#توعيه

يارب