ESG Troll

وهااا اني حاكم راسي و ماشي فلڨوايل !!!!!

جيت نقول اتخطاو قضية الإعلام حتى شفت الهبلة هذي !!!!!!!

الصفحة الرسمية حطت پيب بلي الپريپاراسيون راح تبدا اليوم حتى علق مناصر بنيتو قالهم كفاه راح ديرو الپريپاراسيون بلا ليجوار بحكم ما علنوا على حتى لاعب !

عقلك يقلك بلي الصفحة راح ترد برد منطقي : مثلا سيتم اليوم الإعلان على جميع اللاعبين كيما دارو ميلة ! او مثلا سيتم الإعلان عن اللاعبين في الملعب ولا أي تبلعيطة

وش ڨالو !!!!!!!

ڨالو ام كاين انصار علابالهم بكلش بلاما ندخلوت في التفاصيل و بلي كاين فئة راهي دير في الفتنة 😭😭😭😭😭😭 و بلغة الشارع في عوض انو يستعمل اللغة العربية الرسمية !

بصح مفهمتش وش يقصد بأنصار علابالهم ؟ 😭😭 هذوك الفكارجية لي يجيو ينشنشو على ليكيپ و يدخلو *** في النادي هذوك لي لازم يلمونا في كاش قهوة و يديرو اعلان للاعبين ؟

Espérance Sportive Guelmoise
مصرين باه تذلو النادي؟ مصرييين باش تقزموه و تشوهو الصورة تاعو ؟ و كي نهدرو نتسماو نديرو في فتنة ؟

أجواء حنينة معمرة بالضمير أنا و نحن و هات يقدرولها ولا لا!

ما علينا..
الإعلام، الخلية الإعلامية، التغطية الإعلامية و ما اكثرهم مصطلحات في المجال و لي يصبو فيً حكاية واحدة ام دي باز في سياسة النادي الرياضي و مهمش كماليات يعني شغل بلاما نديرو التعريف الحاجة الأساسية و نخسرو عليها اكثر من سطر في الصفحة الرسمية و تولي موضوع ..!

صحا الفايدة في الكيفية ، خاطر الإعلام هو وسيلة باش توصل بيها لبزاف أمور و أهمها انو مناصر النادي يعرف واقع و حال ناديه ، كيف يسير النادي ، من يسير النادي ، ماهي طموحات النادي و ما هو مشروع النادي ..

كي تخرج للواقع و تطرح السؤال للپيبيلك وش خصكم الأغلبية حتقلك ما مصير النادي في المستقبل القريب و البعيد ..

يعني بالدارجة النية تعكم بالسكوت ( سكوت لا معنى له صراحة ) وشيهي ؟ و كفاه لازم يفهمها الپيبليك باش ميعرقلش ما وراء السكوت ؟

بالدارجة تا الدارجة، وشمن غنية راح نغنيو ؟ غنية مشروع اللعب على ورقة الصعود ؟ أو غنية اللعب على ورقة البقاء المبكر و تقليص ديون النادي الضخمة بعد الخذلان الكبير و الفشل الذريع الذي ألحقه المسييرين بالنادي اخر سنتين و العمل على مشروع طويل الأمد ؟ أو أغنية اللعب على الورقة المعتادة " نجربو و اذا صلحت حنا ابطال و اذا مصلحتش الله غالب مشيً بيدنا "..

يلحق ✍️

حال الترجي ليس بخير .. !

السلام عليكم،

كمواطن تنتمي الى مجتمع ما و مساهمتك في افادته و مشاركتك في حمايته، تطويره، الانسجام معه و فعل كل ماهو في صالحه …كل هذا يجعلك في حالتك الطبيعية لا أكثر من ذلك !

ترك هذا الدور هو الوضع الغير طبيعي و السيء !

بالدارجة :
ربي ابتلانا، و شعلت الناري في أراضي الولاية من شرقها الى غربها ، ال role تاعك في الحكاية انك تعاون في مقاومة الكارثة و القضاء عليها حسب قدرتك! تصلي و تدعي، عندك صفحة ولا حساب باين تنسق بيه، تخرج للواقع و تساهم جسديا ولا ماديا ، مشهور تسخر الشهرة تاعك للكارثة و تساهم بيها، مسؤول في منصب تقوم بمهامك، عندك نفوذ و كلمة و اسم تسخرهم … الخ
و هذا المقصود بدورك الطبيعي اتجاه المجتمع يعني مهوش پليزير و زيادة ديرها باه تعيش دور البطل و تستغل الموقف لما يفيدك مستقبلا ..

غير ذلك ، اتباع مصطلح " تخطي راسي " اي مهيش جيهتي هذا يعكس المنطق و الغاية لي تخلقتي على جالها و لي راك حاصرها في مصالحك الشخصية 100% و عدم اكتراثك للمجتمع لي تبانلك مكشً تستفاد منو و راكً مسير امورك كامل وحدك و هذا هو الوضع الغير الطبيعي ( السيء) لي تقدر تكون فيه

و الوضع الأسوء من ذلك هو انك مساهم في الكارثة ولا اي مشكل يأثر على المجتمع كامل وًهذا ميحتاجش نقاش

هو شغل يحب يقول لشعب البلاد بصفة عامة و لأهل " ولاية قالمة " بصفة خاصة توقفوا عن صناعة الهالة و توهيم الأشخاص البسطاء بوضع " البطل " و التمجيد و المبالغة في تقدير أفعاللهم الطبيعية أو مهامهم المحبورين على فلعها! خاطر في اللخر الشي هذا راح يبدر القلبً و النية و المبتغى و تعبيد طريق الشهرة ..

وحاب نكتب بزاف بصح تطواط الهدرة يروي ..

اللهم احفظ بلادنا 🌹

خاوتنا ، ڨولولنا ! اليوم كان افضل من الأيام السابقة على ما أظن

شفت حريق بمدينة هيليوبوليس جديد طريڨ بوڨرڨار

ناس بومهرة و بني مزلين خاصة طفات ولا مزال ؟

هوارة الڨلعة الركنية

طمنونا

اللهم بردا و سلاما على قالمة، سكيكدة، عنابة، بجاية،جيجل و باقي الولايات المتضررة

تعتيم و سكوت اعلامي تام غريب !

حسبي الله و نعم الوكيل ولا حول ولا قوة الا بالله

ناس جبالة ، بني مزلين ، بومهرة ، ماونة ، قلعة بوصبع ، تمالوس ، سرايدي ...الخ

خبرونا لي عندو معلومة صحيحة على الحالة

لا حول ولا قوة الا بالله حريق بجبل قريب السكان بمدينة قلعة بوصبع

النيران متفرقة !!!!

التعتيم الإعلامي الذي يحدث حول الحرائق غريب !

على كل حال حريق كبير مشا في عنابة ضرك حاليا و ولايات اقصى الشرق اكثرهم تضراا

اللهم الطف بنا 😔

الولاية تستغيث، حرائق عديدة : النشماية، بومهرة احمد، سلاوة ..
ما علينا الا بالدعاء و من يستطيع مد يد العون ب الماء و اي وسيلة فليتقدم ..

اللهم إنا نسألك اللطف والنجاة، اللهم اجعلها برداً وسلاماً كما جعلتها برداً وسلاماً على إبراهيم

اللهم إنا نسألك السلامة والعافية، اللهم احفظنا واحفظ أهلنا و ارضنا من النار، وأطفئ هذا الحريق بقدرتك، واكفنا شره، ولا حول ولا قوة إلا بك 🤍🌹