جماهير شباب بلوزداد

منشور هام يخص كل ما هو بلوزدادي من انصار ، لاعبين ادارة (حتى الخلاطين )

🔴 راح نهدرو بالعامية باش الرسالة تكون واضحة و مفهومة و البداية براس مال الفريق لي هوما الانصار ، من اصغر مناصر للشيخ العجوز متخلوش بروبڨندا الصحافة الظالة تخلق البلبلة و دير طريق لصحاب المصالح بيكم نتوما بمجرد قراءة منشور او سماع خبر في الحي نبداو ناكلو في لحم بعضنا البعض ، السياربي رام موراها رجال و بإذن الله العودة لسكت التتويجات راح تكون من بداية الموسم المقبل و هذا ما يكونش غير بتوحيد صفوف الانصار و الوقوف وقفت رجل واحد قبل ، خلال و بعد كل مبارة من انطلاق البطولة

🔴 ثاني نقطة جد مهمة في الفترة الحالية هي وضعية اللاعبين الحاليين ، المسرحين ، و الاستقدمات نحكو بالون و سياربي بعيدا عن التعصب و العاطفة مراح نسمي حتى لاعب ولا نخص بالذكر مشكل او جهة معينة ، كاين ادارة لكل الانصار راهم واقفين معاهم و مادينلهم ثقتهم ( الثيقة هادي ما تساومش و ماشي سلعة تعرض في المزاد ، القوص هذا عندو معنى للمعنيين) لا نقبل اي متخاذل داخل الفريق ، لا نقبل كل لاعب تهاون و هو يلعب بقميص شباب بلوزداد ، و خاصة لا نقبل اي لاعب معندوش مستوى اهداف و طموح الانصار في العام المقبل . لي يستاهل و يفيد المجموعة و يخلي جو تاع عائلة مرحبا بيه ، لي عندو في رجليه و خصو شكون يزيرو اتكلو على الله ، غير ذلك معندوش بلاصة في السياربي
نقطة جد مهمة في نفس السياق لي هي المدرب ، اسطورة الرئسيات مشكور انو لبى النداء في مرحلة جد حساسة و واحد فينا ما عندو شك في حبو للفريق لكن في الواقع كان يخدم مع ناس خبزيست تخرج غسيل الفريق و تقدم اعتذارات للاعبين ، اضافة الى جملة من التقنيين و اصحاب حاشية دكت البدلاء مكاش لي داه نيف على السياربي ، نورمالمون واحد فيهم ما يزيد يحط على لحمو حاجة تحمل الوان الفريق و عليه المطلب واحد و ضروري ، لازم مدرب كبير من النخبة لي عندو خبرة في ادغال افريقيا خاصة انو راح نلعبو على 3 جبهات. المهمة ماراحش تكون ساهلة و لازم في اقرب وقت باش يبدى التحضير في احسن الضروف و بتعداد كامل باش ما نديروش الخطأ تاع العام الماضي نحضر بنص تعداد مسرح و نص غايب و ....

🔴 الادارة ، و بعد جملة من التعيينات مؤخرا سمعنا بعض الاسماء لي كانت في وقت البيڨ تش و عندها سوابق مخزية مع البيت البلوزدادي ، كاين لي صرح بهم في الصفحة الرسمية و كاين لي لالا خاصة في ضل لعبت الكواليس و لي ماناجير (الخريف) و جماعتو , حبينا نبهو المدير الرياضي انهم كانو سبب باش فرغو تعداد الفريق من الركائز و يشوفو شباب بلوزداد كبنك عكسنا تماما و عليه النقطة هادي جد مهمة ايضا

🔴 مرتزقة القلبوز و جماعتو ، بكل اصنافكم و اعماركم و الله ما عندكم ڨرام تاع قيمة همكم الوحيد نسبت مشاهدات ولا تفاعل (الغاملين تاع تيك توك) ، اما صحاب خالف تعرف نقدرو نقولو بلي مخلفات البراز تاع واحد الجيهة على شكل عيباد و ابرز صيفة فيهم هي تقلقيل في الاحياء . احشمو

منشور صح مطول لكن يختصر الوضع الحالي على العموم و إن شاء الله الرسالة تكون لحقت لكامل الفئات ، نزيد نأكد على ضرورة الوعي لي لازم يتحلى بيه المناصر البلوزدادي

شبيبة الساورة متفوفة بهدفين لصفر في لقائهم ضد شباب قسنطينة وبذلك تضمن بشكل رسمي المركز الثاني المؤهل لدوري الأبطال.

للأسف المجازر التحكيمية، الغيابات وتخاذل اللاعبين يضيعان علينا المشاركة في رابطة الأبطال.

عودة المرتزقة بقوة و اليكم هذا الكلام بلا لف و دوران

صحاب المصطلحلات الحاصلة كيما هوما و الفكاهة تاع عام الفيل بلا ما ننساو عجايز الحمام تاع تيك توك و المؤثرين تاع الفين فراك علاش هذا التكلاب الكبير في الفترة الأخيرة بدا بنعمون و و مزالو في جابر نعمون المشكل الاسم متبدلش و les arguments بقاو هوما هوما مارڨة شوية لالا !

الفضاء الافتراضي هذا سمح لبزاف حثالة نشر الفكر الغامل تاعهم تحت اسم حب شباب بلوزداد لي فيهم عيباد بداو سطاد كبار و فيهم من يدعي الانتساب للمعقل و هو يسكن في زرداب و فيهم و فيهم ... ما جيناش نكلاشيو العباد حبينا فقط نحطو النقاط على الحروف مع الناس لي راي تتخبا خلف الصفحات و البث المباشر و ما غير ذلك و الادهى و الامر لوكان غير يجيب + للسياربي معليش ، فيهم لي عمرهم متلاقاو بالعلامة هاذي و هوايتهم ÷ بلا نيغاس

من وقت مدوار و السياربي في السيبلة الى يومنا هذا الرابطة الفدرالية لجنت الحكام الشكوبي من كل جيهة يجو درابي تزيدو تاني تفتحو حمام في كل دورة !

مانا نزكيو في حتى اسم و لي يخدم السياربي مرحبا بيه صحاب جواجم القدم في الفريق راح نسميوهم بالواحد و الباقي يجي في terrain اما الصفحات و المواقع ما راح تبدل والو بالعكس تزيد تقسم الحالة كثر و كثر

جابر نعمون المدير الرياضي دار تصريح و فتح حرب على احدى الاسباب الرئيسية تاع ضياع اهداف الفريق هذا الموسم و خرج دار تصريح و هو ادرى ما معنى انو ما يكونش قد كلمتو مع الانصار تاعنا لي يعرفهم خير المعرفة دوك السؤال يبقى مطروح السيد راه يلعب باوراق مكشوفة مع الجمهور نروحو نكدبوه ؟ هل من صالح شباب بلوزداد اننا نقسمو الجمهور و في هذا الوقت بالذات ؟

فيقو لعماركم العديان رام دايرينكم طوط بين لحيوط و منا لفوق السفود يهدر يا نخدمو ڨاع للسياربي يا تروح ترقد داي مارة في التران ، شدو زبلكم و بركاو ما نبيح كثر من الكلاب و خاصة جماعة التيك توك لي في دارهم و ماشي معروفين

رابحي جا دخلنا في غيابات الجب طعاي ما كان يترايش كيما دوكا ، ملا احشمو ، البداية كانت بالصفحات و الاخبار المغلوطة ، زيدلها الحكام لي ياكلو دراهم الحرام ، مزال طريق طويلة و البڨرة وكالة (لي جي قيسو هداك هو)

نهاية اللقاء⏱️ : شباب بلوزداد 3-1 نجم بن عكنون

ثلاثية من القائد يوسف لعوافي تعيد الشباب الى سكة الانتصارات وتضعه امام حتمية مواصلة الفوز لضمان المشاركة في رابطة الأبطال.

تشكيلة الشباب قدمت مباراة جماعية رائعة وبصمت على نتيجة ايجابية تضعنا في المرتبة الثالثة منفردين بـ51 نقطة.

كل الشكر و الإحترام للأوفياء الذين حضروا وساندوا الفريق رغم تأخره وطبقوا فعلا مقولة العائلة "الربحة نجيبوها مالتريبين"

عاش الشباب الكبير و عاشت العائلة دوما خلف الفريق🇮🇩

شباب الأرقام القياسية !

الدقيقة 26 آسيست بن عيادة 🎯 هدف لعوافي ⚽
الدقيقة 35 آسيست بن عيادة 🎯 هدف لعوافي ⚽
الدقيقة 41 آسيست بن عيادة 🎯 هدف لعوافي ⚽

أسرع هاتريك آسيست في تاريخ الدوري الجزائري ✅
أسرع هاتريك أهداف في الدوري الجزائري هذا الموسم ✅

بن عيادة ولعوافي مدافعان بإحصائيات خرافية لكن ليس هذا هو الغريب فقط بل الغريب في كلّ هذا أنهما يلعبان في محور الدفاع حاليا !

نهاية الشوط الأوّل⏱️ : شباب بلوزداد 3-1 نجم بن عكنون

ثلاثية من القائد يوسف لعوافي تعيد الشباب الى التفوق بعد تأخره في البداية بعد خطأ فادح من قلب الدفاع تسبب في تقدم الضيوف.

تشكيلة الشباب قدمت شوط جماعيا رائعا بقيادة المايسترو الصاعد "عبد المالك قلالش" والذي مرّت كل الكرات على اقدامه حيث تواجد في كلّ مكان ونشّط اللعب الهجومي بشكل رائع بنظرته الواسعة في الميدان وتمريراته المباشرة نحو الأمام.

نتيجة ايجابية تقرّبنا من ضمان المشاركة في رابطة الأبطال والتي يلزمها التأكيد فيما تبقى من مباريات ستكون حاسمة جدا للفريق.

دوبلي لعوافييييي يقلب النتيجة 🔥🇮🇩

الشوط الأوّل 37⏱️ : شباب بلوزداد 2-1 نجم بن عكنون

الشوط الأوّل 25⏱️ : شباب بلوزداد 1-1 نجم بن عكنون

تعديل النتيجة من طرف يوسف لعوافي 🇮🇩

أخر مباراة في الموسم في ملعب نيلسون مانديلا ولادها باينين و لي فيدال باينين و السياربي أمانة حنا نصفوها و حنا نرفدوها و تعود لمنصة التتويجات بإذن الله ❤️🤍

كلنا خلف الفريق 🇮🇩