01/10/2026
Qusar rayonunda “Zəfərə gedən yol” adlı şəhid ailələri və qazilərlə gənclərin görüşü keçirilib.
01 oktyabr 2026-cı il tarixində Quba-Xaçmaz Regional Gənclər və İdman İdarəsinin Qusar rayonu üzrə gənclər və idman sektorunun təşkilatçılığı ilə sektorun inzibati binasında “Zəfərə gedən yol” adlı şəhid ailələri və qazilərlə gənclərin görüşü keçirilmişdir. Görüşdə Yeni Azərbaycan Partiyası Qusar rayon təşkilatının sədr müavini Neva Abdurəhmanova, Milli Qəhrəman Çingiz Qurbanovun atası Salman Qurbanov, Vətən müharibəsi qazisi İlkin Abuyev, Qusar rayonu üzrə gənclər və idman sektorunun baş məsləhətçisi Ramin Məcidov, fəal gənclər Rasim Dəmirov və Şənay Rüstəm iştirak edərək çıxış ediblər.
Tədbirdə əvvəlcə şəhidlərin xatirəsi 1 dəqiqəlik sükutla yad edilmiş, daha sonra “44 günlük tarix” adlı sənədli filmin nümayiş edilmişdir.
Tədbirdə yuxarıda qeyd edilənlərlə yanaşı şəhid Cəfərov Ruslan Mövlan oğlunun anası Əzizə Cəfərova, şəhid İsmayılov Orxan Qədim oğlunun həyat yoldaşı Möhlüzar İsmayılova, rayon gənclər və idman sektorunun, müəssisə və təşkilatların əməkdaşları, tələbələr və məktəblilər iştirak etmişlər.
Tədbirin keçirilməsində məqsəd şəhidlərimizin əziz xatirəsinin yad edilməsi, onların gənclər üçün bir həyat və mübarizə örnəyi olaraq tanıdılması, 44 günlük Vətən müharibəsində qazanılan şanlı qələbənin, döyüş yolunun və göstərilən qəhrəmanlıqların, birinci mənbədən, yəni canlı şahidlərin dili ilə gənclərə çatdırılması, gənclərin şəhid ailələrinə və qazilərə qarşı cəmiyyətdə hər zaman yüksək diqqət, qayğı və hörmətlə yanaşmasının təşviq edilməsi, gənc nəslin vətənpərvərlik ruhunda tərbiyə olunması, onlarda milli qürur, dövlətçilik hisslərinin gücləndirilməsi, xalqa, vətənə və dövlətə sədaqət hissinin aşılanması, öz ölkəsinin layiqli vətəndaşı kimi formalaşmasından ibarət olmuşdur.
