Azərbaycan Voleybol Federasiyası / Azerbaijan Volleyball Federation

Avropa Liqasında iştirak edəcək kişi voleybolçulardan ibarət Azərbaycan millisi hazırlıq proqramına uyğun olaraq mayın 31-də Türkiyəyə yola düşüb. Yığmamız təlim-məşq toplanışının son mərhələsini Ankara şəhərində keçirəcək. Bu mərhələ çərçivəsində komanda məşqlərlə yanaşı, Türkiyə millisi ilə bir neçə yoxlama oyunu da keçirəcək.
Boris Qrebennikovun rəhbərlik etdiyi millimiz Türkiyəyə Avropa Liqasında çıxış edəcək əsas heyətlə yollanıb. Hazırlıq prosesinin ardından yığmamız iyunun 5-də Ankaradan birbaşa İsveçə yola düşəcək.
Qeyd edək ki, Azərbaycan milli komandası Avropa Liqasının ilk tur oyunlarını 6–7 iyun tarixlərində İsveçdə keçirəcək. Yığmamızın rəqibləri ev sahibi İsveç və Yunanıstan milli komandaları olacaq.

FIVB-nin məşqçi-instruktoru, professor Cengiz Akarçeşme 14 yaşadək qız voleybolçulardan ibarət Azərbaycan milli komandasının qonağı olub.
Məşq prosesini izləyən Cengiz Akarçeşme voleybolçularla söhbət edib, onlara tövsiyələrini verib. Görüşün sonunda xatirə şəkli çəkdirilib.

Kişi voleybolçulardan ibarət Azərbaycan millisinin Avropa Liqası üçün yekun heyəti bəlli olub.

Hücumçular: Vüqar Bayramov, Andrey Melnikov, Cavid Əzimov, Zamiq Mayılov, Ruslan Əliyev, Həsən Tağızadə
Orta oyunçular: Mərdan Məmmədov, Yeqor Nikulenko, Əlihüseyn Məmmədov, Ramazan Ağabəyov
Toppaylayıcılar: Roman Qurskiy, Əmirmehdi Ablou
Liberolar: Asif Əliyev, Nihad Qasımov
Baş məşqçi: Boris Qrebennikov
Köməkçi məşqçilər: Akif Vəliyev, Eldar Əliyev

Avropa Liqasına hazırlaşan qadın voleybolçulardan ibarət Azərbaycan millisi ölkə xaricindəki təlim-məşq toplanışını başa vurub. 12-16 may tarixlərində Macarıstanda təlim-məşq toplanışında olan komandamız bu ölkənin yığma komandası ilə iki yoxlama oyunu keçirib və hər iki qarşılaşmada qələbə qazanıb (3:0, 3:1).
Daha sonra Sloveniyaya yollanan voleybolçularımız mayın 16-dan 29-dək Maribor şəhərində hazırlıq keçiblər. Faiq Qarayevin rəhbərlik etdiyi yığmamız burada baş tutan yoxlama oyunlarında Xorvatiya (3:1) və Avstriya (3:1, 3:1) millilərini, eləcə də ABŞ-nin “Colgate” klubunu (3:0) məğlub edib.
Qeyd edək ki, yığmamız Avropa Liqasındakı ilk oyunlarını Bakıda keçirəcək. İyunun 5-7-də baş tutacaq qarşılaşmalarda komandamızın rəqibləri İsveç və Estoniya milliləri olacaq.

Bakıda Azərbaycan Voleybol Federasiyasının (AVF) təşkilatçılığı ilə keçirilən Beynəlxalq Voleybol Federasiyasının (FIVB) Level-2 məşqçi seminarında birinci qrup üzrə təlimlər başa çatıb.
Mayın 25-dən 29-dək GİN-in Voleybol Mərkəzində baş tutan seminarın birinci qrupunda 27 nəfər iştirak edib. Seminara Bakı və bölgələrdən olan mütəxəssislərlə yanaşı, Türkiyə, Avstraliya, Kipr, İran, Hindistan, Ukrayna, İsrail və Belarusdan iştirakçılar da qatılıblar.
Nəzəri və praktiki məşğələlərdən ibarət olan seminara FIVB-nin məşqçi-instruktoru professor Cengiz Akarçeşme rəhbərlik edib.
Praktiki yoxlamada lazımi balı toplayanlar nəzəri imtahanda iştirak hüququ qazanıblar və burada yüksək nəticə göstərən 26 nəfərə FIVB-nin Level-2 beynəlxalq sertifikatı, bir nəfərə isə seminarın iştirakçı sertifikatı verilib.
Qeyd edək ki, ikinci qrup üzrə seminar 1-5 iyun tarixlərində keçiriləcək.

2026-cı ildə keçiriləcək Avropa çempionatının (EuroVolley-2026) rəsmi topları təqdim olunub.
Azərbaycanın da ev sahibliyi edəcəyi qadın voleybolçular arasında Avropa çempionatının rəsmi topları CEV və “Mikasa” tərəfindən hazırlanıb və müasir dizaynla klassik üslubun qarışığı şəklindədir. Toplar final mərhələsinə ev sahibliyi edəcək ölkələrin rənglərini əks etdirir. Qadınların yarışında final mərhələsi Türkiyədə, kişilərdə isə İtaliyada təşkil olunacaq.
Qeyd edək ki, ölkəmizdə bir qrupun oyunları keçiriləcək. Bakının ev sahibliyi edəcəyi C qrupunda Azərbaycan, Portuqaliya, Niderland, Belçika, Rumıniya və İspaniya komandaları mübarizə aparacaqlar. Digər qrupların oyunları isə Türkiyə (A qrupu), Çexiya (B qrupu) və İsveçdə (D qrupu) təşkil olunacaq. Bakıdakı qarşılaşmalar 21-28 avqust 2026-cı il tarixlərində Bakı Milli Gimnastika Arenasında baş tutacaq.

Kişi voleybolçulardan ibarət Azərbaycan millisi Belarusda təşkil olunan təlim-məşq toplanışını başa vuraraq Vətənə qayıdıb.
Avropa Liqasına hazırlıqlarını davam etdirən yığmamız 22-27 may tarixlərində Belarusda təşkil olunan təlim-məşq toplanışı çərçivəsində yerli “Minsk” klubu ilə iki yoxlama oyunu keçirib. Komandamız hər iki qarşılaşmada məğlub olub (0:4, 1:3).
Qeyd edək ki, millimiz Avropa Liqasının ilk turunun oyunlarını 6-7 iyun tarixlərində İsveçdə keçirəcək. Komandamızın rəqibləri ev sahibi İsveç və Yunanıstan yığmaları olacaq.

28 May- Müstəqillik Günü

#28 may 🇦🇿