Rehab Mohamed

💡عارفين اي الفرق بين الأم الخارقة و الأم صانعة الأجيال ….

في زحمة يومنا بين إرهاق البيت، و صرخات الأولاد، و تأنيب الضمير المستمر، و إحساس إنننا مقصرين ….
غالبا بنحس إن الظروف اللي حوالينا أكبر من طاقتنا .

لكن لو بصينا للمشكلة بعين المهندس المربي اللي شايف ان اي مشكلة هي "معادلة محتاجين ندور لها على حل"
و إن السكينة و الرحمة هما أساس البيت الناجح ،

🪫 الإرهاق المستمر و الضغط و إنك تيجي على نفسك بزياده
مش هيكون له نتيجة إيجابية ولا ده معناه انك أم خارقه،
( الكوباية الفاضيه مبتسقيش حد ).

📋 افتكري دايما إن التربية و إدارة البيت مش أوراق مكتبية بنشوف نتيجتها في لحظتها ،

🪴دي عملية زراعة لبذرة بتكبر بصمت و محتاجه منك صبر.

🤗 على فكرة انتي مش لوحدك في الرحلة دي …….

و التاريخ الإسلامي كله نماذج تقولنا إن صناعة الأجيال عمرها ما كانت وليدة ظروف مثالية …….

🖋️ أم الإمام الشافعي ربت إمام الأمة و هي إمرأة فقيرة تعيش الغربة.

🖋️ أم الإمام مالك صنعت إمام دار الهجرة وسط ضيق الحال، وكانت توجهه لتعلم " الأدب قبل العلم ".

🖋️ أم سلمة اللي تحولت من قسوة الفقد و الغربة لمستشارة فقيهة بحكمتها و ذكائها .

و غيرهم كتيييير نماذج و قدوة لينا ……

✨ بيعرفونا إن سر الأمهات صانعات الأجيال بيكون في إنك تكوني

" أم حقيقية حاضرة بقلبها "✔️
" مش أم ممثلة مثالية طول الوقت مستنية الكل يسقف لها " ✖️

🏡 و ان البيت الهدي بيتبني بسكينة الأم ، مش بكمال أفعالها.
احتسبي تعبك لله،
و اعرفي ان التقدير الإلهي أعظم و أدوم من اي تقدير بشري .

🤍 دلوقتي دورك تقوليلي …..

ايه أكتر موقف بيستهلك طاقتك خلال اليوم و حابه نلاقي له حل عملي مع بعض ؟

#قيم

📍ليه بنزعل من رفض بعض الأماكن من دخول المحجبات !!!

📍و ليه يكون في إصرار على إني لازم أكون جزء من مجتمع فيه شكل من أشكال التمييز اللي بيستهدف هويتي !!!

لو جردنا الموضوع من فكرة " البرستيچ " و سألنا نفسنا بصراحة
ايه النفع اللي هيعود عليا من التواجد في مكان يرفض وجودي الأصلي ؟؟؟

📍هل متعة السباحة او اني اكل في مكان معين تستحق التنازل عن إحترامي لذاتي ؟؟؟

📍هل فكرة إني استثمر أو أعيش في مكان فيه عنصرية بيضيف لقيمتي الإنسانية و لا بيقلل منها ؟؟؟؟

🔍 إنتي عارفه تواجدك في اماكن ترفض هويتك ممكن يأثر عليكي نفسيا ازاي …..

- تقبلك لذاتك و سعادتك الحقيقية لان سعادتك الحقيقة هتلاقيها اما تكوني عايشه وفقًا لقيمك الداخلية مش وفقًا لشروط اللي حواليكي ،
ووجودك في مكان بيجبرك على التخلي عن جزء من هويتك بيخلق حاله من التنافر و الصراع النفسي جواكي .

- في فرق كبير بين (الانتماء) احساسك ان الناس متقبلاكي زي ما انتي،
و (الملاءمة) إنك تغيري من نفسك بس عشان اللي حواليكي يتقبلوكي،
و المكان اللي يرفض حجابك هو مكان بيطلب منك
" الملاءمة " المناسبة ليهم و تفتقر مفهوم قبول الاخر .

😕 طيب عارفه انتي وقتها بتعلمي ولادك ايه ؟؟؟

- بتعلميهم ان قيمتهم و ثقافتهم و هويتهم أقل من الأماكن دي ،و ان الرقي محصور في تقليد الناس اللي حواليهم و التنازل عن هويتهم،
و بيكبروا و هما عندهم عقدة نقص جواهم .

على العكس تمامًا اما تخليهم يحسوا ان انتي اللي بترفضي بوعي و كرامة إنك تتواجدي في اماكن متحترمش ثقافتك و هويتك،
فيتعلموا الشجاعة و تقدير الذات و الاعتزاز بالنفس .

👈🏻 حل الموضوع كله بيبدأ من عندك :-

- اما ترفضي شغفك بالتواجد في الأماكن " الراقية " لمجرد التفاخر الإجتماعي .

- خلي عندك شخصية متزنه جواكي تستمدي قيمتك الحقيقيه منها،
وقتها مش هتحتاجي ختم قبول من مكان تستمدي منه قيمة وهمية .

- ⁠و أكتر حاجه هتثبتك على موقفك هو إنك تعرفي حقيقة الدنيا بكل ما فيها و انها متساويش جناح بعوضة ،
و إن قيمتك الحقيقية مش مرهونة بمقاييس بشرية ضيقة بيعلوا بيها على بعض .

- ⁠و افتكري ان الاستغناء عن كل مكان لا يستوعب ثقافتنا و هويتنا هو استثمار حقيقي في صحتنا النفسية و بناء نفسي قوي لاولادنا.

الرفض مش إنعكاس لقيمتك،
و نفسيتك أغلى من أن ترهق في أماكن لا تشبهك 🤍

#هويتك #قيم

يوم جديد ….. و ذاتي المطمئنة تبدأ رحلتها الآن

🪶 النهاردة سنة جديدة بتعدي من العمر ….

🎞️ سنة عشت تفاصيلها في بيتي، بين تفاصيل يومية صغيرة يمكن محدش بيشوفها، لكن ربنا سبحانه و تعالى مطلع عليها.

🪞و أنا ببص في المراية النهاردة ، مش هقيم نفسي
بعدد المهام اللي خلصتها،
ولا شكل البيت المثالي اللي مستحيل يفضل مثالي،

لكن ‼️

☘️ هقيم نفسي بقلبي اللي بيحاول كل يوم يزرع حب و أمان في النفوس اللي حواليا،

وبعد سنين
😕 كنت فاكرة إن الشغف كله
في الإنجاز و التخطيط والشغل،
🤩 اكتشفت ان أكبر إنجاز ممكن أحققه
و اللي بالنسبة لي أصدق أنواع الإنجاز هو

"الأثر الهادي"

🥰 أثر موجود في ضحكة ولادي،
🏡 في ركن دافي في البيت،
😌 في سكينة بحاول أصنعها حتى في أوقات عصبيتي و ضغطي…….
و اني بشر و من حقي أغلط و أتعلم و أسامح نفسي على تقصيري،

🤗 و أطمن قلبي إن السعي في بيتي و رعاية أسرتي هو محرابي الخاص و جزء من عبادتي اليومية،
كل لقمة، كل طبطبة، كل صبر على تعب هو خطوة بتقربني لربنا ،
"إن الله لا يضيع أجر من أحسن عملا"
وطالما بحسن النية و ببذل جهد عشان احاول اكون أحسن ده لوحدة كفاية و يستحق الاحتفال.

🎁 لو ههدي نفسي السنة دي هدية واحدة بس هتكون

" السلام "

▫️ هبطل أطالب نفسي بالكمال،
▫️ و هفكر نفسي دايماً ان
( الام السعيدة و المتصالحة مع نفسها )
( هي أعظم هدية ممكن أقدمها لأسرتي )
▫️و ان أنا مش مجرد مكينة بتلبي طلبات …..
▫️أنا روح محتاجة حب و تقدير و رعاية

النهاردة أنا ببدأ بنفسي

و بقول لها شكراً على كل خطوة،
و على كل صبر،
و كل سنة و أنا طيبة و حقيقية و مطمنة،
و بإذن الله أبدء رحلة جديدة بألطف و اهدى و انضج
نسخة وصلت لها لحد النهاردة
قررت أكون فيها السكن و الأمان لنفسي و للي حواليا

🤍 بتمنى لنفسي و لكل أم و ربة منزل بتقرأ الكلام ده توصل للسلام الداخلي اللي تستحقه

🤎هديتي الحقيقية إننا نفتكر سوا إن ربة البيت هي قلب البيت الدافي

قوليلي ايه العادة الإيجابية اللي حابة تبدأيها مع نفسك ؟؟

و ابعتي كلمة “بداية” في الرسائل

و أنا هساعدك تحطي بداية جديدة متوازنة و مريحة ليكي و لأسرتك

هندسة من نوع خاص

بما إني مهندسة و بمناسبة اليوم العالمي للمهندسات 👷‍♀️🏗️

أنا بحتفل النهاردة بلقب مهندسة بس من زاوية تانية خالص 📐

بعد ما غيرت مساري المهني
لما إكتشفت إن أخطر و أهم مشروع هندسي
ممكن أديره في الوقت الحالي
هو بيتي و نفسي و تربية أولادي 🤍

حابه أقول لكل ربة بيت و كل أم و كل مهندسة قررت
تاخد أجازة من الموقع عشان تبني بيت ……
إنتي بتبني هندسة إجتماعية من الطراز الأول

إنتي اللي بتخططي، و إنتي اللي بتنفذي،
و إنتي اللي بتراجعي الجودة كل يوم
عشان تطلعي "منتج سوي و سليم"

الفرق بس
إن في الهندسة في لوحات و مواصفات و حسابات ،
لكن هندسة البيوت محتاجه كمان فطرة سليمة و رسالة واضحة و صبر و حسابات أعمق و أدق بكتير من كل الحسابات اللي درسناها ،
وقبل كل ده … توفيق من ربنا سبحانه وتعالى

البيوت مش بتتبني بالصدفة أو العشوائية
كل كلمة بتقوليها لاولادك هي طوبة 🧱
و كل موقف بيعدي عليكي في التربية هو " تعديل في التصميم"

لو حاسة إن دورك في البيت "عادي" أو "مش ملموس"
زي ما شغلك القديم كان ملموس
فكري تاني و إعرفي إنك إنتي …….

{ بتبني أجيال ، و ده أعظم مشروع ممكن مهندسة تشرف عليه }

مش كل الهندسة بتكون عبارة عن ورقة و قلم 📝
أحياناً بتكون صبر و حب و هندسة مشاعر و وعي
لكل مهندسة بتبني في بيتها و في نفسها……
إنتي بتعملي أعظم إنجاز 🌷

🤔 لو إعتبرنا البيت مشروع إيه أكتر حاجة بتواجهك فيها صعوبة في التنفيذ ؟

النجاة من "جُب اليأس "

في الوقت اللي بنسمع فيه
أخبار حزينة أو نمر بظروف صعبة
بنبقى محتاجين نقف وقفة مع نفسنا ،

أول سورة بتيجي في بالي هي
سورة سيدنا يوسف
" أحسن القصص "

بعتبرها روشتة نفسيه لما بحس
إن الدنيا قفلت في وشي
بلاقي فيا معنى
المرونة النفسية (Resilience)

اما بيجي عليا وقت يحس فيه إني
في نفق ضلمه مش شايفه في أخره نور …
فأفتكر
" و لا تيأسوا من روح الله "

و بعرف إن الأمل قرار مش مجرد شعور
و إن في يسر كتير هيجي بعد كل عسر

و إن بعد ما سيدنا يوسف
اتباع عبد و إتظلم و اتسجن
موقفش يفكر بعقلية الضحية

لكن كان دايماً " من المحسنين "

و انه يكون نافع في المكان اللي هو فيه
و ازاي يكون عندي ( post- traumatic Growth )
و اقدر اقف من تاني بعد كل وقعة

و ان النجاة مش مجرد رجوع عادي
لكن رجوع انا فيه أقوى

و إن مهم جداً اعرف
اي المعنى من حياتي و ليه عايشه

زي ما دكتور فيكتور فرانكل بيقول إن

اللي عنده ( لماذا ) يقدر يعيش علشانها
و يتحمل أي( كيف )

سيدنا يوسف كان عنده
رسالة و يقين بالله

فإتعلمت إن الربط بالله بيساعدني
الاقي المعنى من الابتلاء فأقدر أكمل

و اتعلمت إن كل شر ظاهر
وراه خير كبير خفي

و إن حالة اليأس اللي بتجيلنا بتيجي بسبب
رؤيتنا الضيقة للحظة الحالية بس

عشان كده مهم أوي إننا دايما
نحمد ربنا على أدق التفاصيل في يومنا
اللي حقيقي بتسندنا في المواقف دي

لما سيدنا يعقوب قال
" إنما أشكو بثي و حزني إلى الله "

إتعلمت إن اللجوء بيكون للقوي " الله "

ثم المتخصصين اللي يقدروا يساعدوني مش للناس

و إن دايماً ربنا هيرسلي " السَيَّارَة "
اللي يساعدوني في محنتي
و يساعدوني انجو من الجُب

بس أنا استمر في السعي

" إن ربي لطيف لما يشاء "

اللطف أحياناً يكون على شكل تأخير ،
إبتلاء يقوي شخصيتك و يخليك أحسن ،

بلاش تيأس في نص الطريق
قبل ما توصل
لل " تمكين "

#الأمل

🧭 بوصلة الثبات

في وسط الاحداث الكثيره اللي ورا بعضها
احياناً بنفقد قدرتنا على التميز بين
"ما يجب فعله " و " ما يستهلكنا بلا فائدة "
النجاة الحقيقية في الاوقات دي بتتطلب شجاعه كبيرة
لمواجهة نفسك قبل مواجهة الأخبار
انتي محتاجة تعرفي …..

١- وعيك الذاتي و مدى صدقك مع نفسك مهم جدا
و هو أول خطوة لإتزانك النفسي ،
تحديد أولوياتك و قيمك و ترتيب أدوارك مهم جدا .

٢- فقه الأولويات ( Focus on what matters )

وقت الفتن هو وقت الإستثمار في المضمون
علم النفس الإيجابي بيساعدك تختاري ايه اللي محتاجه تركزي عليه
"مفهوم السيطرة"و هو إنك تركزي كل طاقتك في دايرة تحكمك و اللي ليكي فيها تأثير حقيقي .
و إن أولويتك تكون ثباتك النفسي ، صلاتك ، آمان أسرتك و إتقانك لدورك اللي بتقومي بيه اي كان هو ايه .
فلو مش هتكوني جزء من الحل متكونيش جزء من الدوشه.

٣- فلسفة "لا تستخبر و لا تخبر "

الفلترة الذهنية مهمة جدا لإن الدماغ ليها سعة إستعابية ،
لو ملتيها بالأخبار المضلله و الأراء المتضاربه و المعلومات الغير مؤكدة مش هيكون في مساحة للسكينة و مش هتعرفي تقومي بأدوارك الأساسية .

٤- "مِن حُسنِ إسلامِ المرءِ تركُه ما لا يَعْنيه"

إتعلمي الصمت الإيجابي و إعرفي إن أحياناً الصمت بيكون هو قمة الإيجابية ،
و إن الإنسحاب الذكي هو الحل الأمثل للحوارات اللي مبتنتهيش و مفيش منها فايدة ،
ووقفي scrolling و متابعة الناس
اللي واخدين التلاعب بمشاعر الناس و عقولهم مصدر دخل و مصدر لإشباع نفسياتهم المريضة.

٥- حولي ضبابية القلق لغيمة سلام

إتعلمي تصنعي النور الخاص بيكي وسط كل عتمة
و تحولي طاقة قلقك و خوفك
لطاقة عمل و عبادة ،
و إفتكري حديث الرسول ﷺ: "العبادة في الهرج كهجرة إلي"

دمتم في رحاب الله

🤔🤔 عارفه إمتى تحسي إنك مقصرة مع أولادك !!!

❌ مش لما الغسيل يتراكم و دولاب اللبس يتبهدل،
❌ ولا إن الشقه مكركبة،
❌ و لا لما الأكل يتأخر شويه،
❌ ولا لما مياكلوش أكل صحي النهاردة،
❌ ولا لما يفوتكم التمرين،
❌ ولا لما يجيبوا درجات مش حلوة في الإمتحان،
❌ ولا لما يحرجوكي قدام الناس.

😞 طول اليوم بنجري …

بين اكل، تنظيف، مذاكرة، تدريبات، تمارين……
و في اخر اليوم نحس بتأنيب ضمير و إحساس التقصير
و الحقيقة إن اي تقصير دنيوي ممكن يهون

📍عارفه اي التقصير اللي يوجع بجد …..

🖋️ هو لما ننسى نزرع جوه قلوبهم إن الدنيا دي محطة و مزرعة بنزرع
فيها اللي عايزين نحصده في الآخرة .

🖋️ لما نعلمهم إزاي ينجحوا في المدرسة ،و ننسى نعلمهم إزاي ينجحوا
في الوقوف بين إيد ربنا.

🖋️ لما نبني لهم بيوت في الدنيا ، و ننسى نعلمهم إزاي يكونوا من أهل
الجنة.

🖋️ لما نهتم نبني مستقبلهم الوظيفي ، وننسى نبني مستقبلهم الأبدي.

🖋️ لما نهتم بصحة جسمهم ،و ننسى نغذي روحهم.

🖋️ التقصير لما يومنا يخلص من غير ما نربط قلوبهم بربنا.

🖋️ لما نحصر إدراكهم في " متعة لحظية " أو " إنجاز مادي "
من غير ما نربطهم بشئ أكبر من الذات،
فيعيشوا حياتهم مفتقدين المعنى الحقيقي من وجودهم،
"غياب الآخرة كهدف أسمى "
بيأثر على ولادنا في الدنيا قبل الآخرة
و يخلي عندهم قلق و خوف لما يتعرضوا لاي فشل دنيوي .

🖋️ التقصير في ربط قلوبهم بالآخرة.. هو تقصير
في أمانة "رعاية الرعية" اللي ربنا هيسألنا عنها.

🖋️ خسارتنا لأولادنا مش بس فراق،
لكن إننا نسيبهم للاذى،
من غير ما نعلمهم إزاي ينجو في الدنيا و الآخرة.

🤩 عارفه اي الإيجابي في إنك تحسي بالشعور ده !!!!

💡الشعور ده هيكون البوصلة اللي هتغير مسار حياتك.

💡شعور تقصيرك تجاة " آخرة أولادك " هتكون علامة
حياة جديدة في قلبك.

💡 هيخليكي تبصي للمستقبل ،
و تطلعي من الغفلة و قصر النظر الادراكي.

💡هتبني عندهم هدوء داخلي ونظام صمود نفسي قوي
يحميهم لإنك ربطتيهم بغاية كبيرة تتجاوز حدود الدنيا.

💡 إدراكهم لمعنى العدل المطلق لله و وجود الجنه،
هيساعدهم يمتلكوا صحة نفسية قوية
تخليهم يقدروا يواجهوا أي ظلم أو حرمان في الدنيا.

🔦 خلي شعورك بالتقصير هو ✨النور✨
اللي يخليكي تبدأي النهاردة بداية جديدة مع نفسك و مع أولادك
بخطوات بسيطة و مستمرة :-

1️⃣ " قاعدة الله يحبك و يراك "
مهم نزرع جواهم الحب لربنا
و نخليه هو الدافع اللي بيحركهم
بدل اسلوب التخويف و الترهيب،
مثلا تقولي
( سبحان الله بص ربنا كريم ازاي و رزقنا أكل حلو ،
إدعي ربنا هو سامعك و قريب منك،
ربنا بيحبك اوي عشان ساعدت أخوك، ……)
خلي ذكر ربنا في مواقف مرتبطه بالإمتنان و الجمال و الرحمة ….

2️⃣ " حكاية قبل النوم "
إحكي لهم حكايات بطريقه بسيطه تعرفهم عن الجنه،
و خليهم يتخيلوا اللي نفسهم فيه،
خلي قلوبهم تشتاق للمكان اللي اتخلقنا علشانه .

3️⃣ " ادعي معاهم بصوت مسموع و بطريقة سهلة "
( يارب يبارك لي فيكم و يجمعني بيكم في الفردوس الأعلى ) ،
لما يلاقوكي بتذكري الآخرة في دعاكي هيفهموا بشكل تلقائي
ايه هو (الشيء الاغلى في نظرك ).

🤝 حابه أفكر نفسي و أفكركم إن ….

✨أولادنا زي ما احنا عايشين مش زي ما احنا حابين ✨

و إننا غير مطالبين بالمثالية ولا الكمالية،
لكن مطالبين بالسعي و تحديد النية و الوجهه.

✨ ليه مصممه تخلي بيتك نسخة من بيوت مش شبهك ؟؟

مع صور البيوت المثالية سهل جدا نحس إن لازم بيتنا يبقى بصورة معينة نفس النظام ، الهدوء ، الاطفال المثاليين ،
جربتي تسألي نفسك :

🔘 إنتي فعلا بتصنعي ذكريات …. ولا بتتنافسي مع بيوت تانيه ؟

🔘 إنتي بتجري ورا صورة مثالية…. ولا ورا أمان حقيقي في بيتك ؟

🔘 إنتي عايزه بيت مريح …. ولا بيت يطلع حلو في الصور بس ؟

🔘 ليه بنقيس نفسنا بميزان مش بتاعنا ؟

❌ أخطر حاجه ممكن تعمليها إنك تحاولي تخلي بيتك نسخة من بيوت تانيه …… لان بيتك بصمتك إنتي .

🖋️ لما بتضغطي على نفسك بصورة مش شبهك :-

▪️ بتزودي توترك و إحساسك بعدم الرضا لما بتلاقي النتيجه غير الصورة المثالية اللي رسمتيها .

▪️ بيقلل إحساس الإنتماء و الأمان في البيت .

▪️ بتوصلي لأولادك بطريقة غير مباشرة إن المقارنة هي المعيار .

▪️ بتقللي عند أولادك فكرة تقبل الإختلاف .

🖋️ محتاجين ندخل رمضان السنة دي بروح مختلفة و نوايا جديدة ،

🖋️ و نخلق بيئة صحية تدعمنا و تدعم أولادنا .

🖋️ و بيوتنا تكون بيوت مبنية على المرونة و التجارب اللي بنشكلها حسب
القيم و الأهداف المختلفة المبنية حسب طبيعة كل أسرة .

🖋️ خلي بيتك بيت واعي مش كامل و لا مثالي في الشكل ، متأسس على القيم و نقاط كل واحد فيكم جوة البيت .

🖋️ إصنعي في بيتك ذكريات خاصة بيكي و بأولادك تعيش مع أولادك طول العمر ،
و حابه أفكرك ولادك مش هيفتكروا الاشياء لكن هيكملوا حياتهم بالمشاعر و القيم اللي اتزرعت جواهم .

🖋️ عززي شعور الامان و الإنتماء جوه بيتك مع أسرتك بعادات عائلية مميزه تدعم أفكارك و قيمك .

🖋️ خلي بيتك يشبه قلبك …. و كل ما تلاقي نفسك بتقارني قولي لنفسك "بيتي مختلف و ليه طبيعة خاصة"

الخطة عبارة عن خطوات و أسئلة مرتبة تقدري تطبقيها فورًا تساعدك في تحديد الهوية المناسبة لبيتك 🤍

📍علقي ب " بيتي بصمتي " أو تواصلي من خلال الرسائل و هتتبعتلك الخطة ،
🎁 و هتكون مجانية لكل أم حابة تبدأ بوعي جديد .

✨ 🌙كل عام و أنتم بخير ✨

مش كل ظاهر بيعبر عن باطن :-

🌙قبل دخول رمضان …..
حابّة أفكر نفسي وأفكركم بحاجة مهمة في علم النفس اسمها…..

📍“التحيّز للانطباع الأول”

و هي إننا أحيانًا بنحكم بسرعة… من الشكل بس.
لكن النضج الحقيقي إننا نفصل بين الصورة والمضمون،
ونقيّم الفكرة بذاتها،
ونرجع الاختصاص لأهله.

مش كل التزام ظاهر معناه علم،
ومش كل علم لازم يبان في الشكل،
و مش معنى إن حد شكله ملتزم يبقى مؤهل يتكلم في الدين،
ومش كل عابد يبقى فقيه،

الدين مسؤولية، والكلام فيه أمانة.
و الفتوى مكانها عند أهلها،
و قبل ما نصحح لغيرنا،
و قبل ما نحكم على نوايا الناس،
وقبل ما نشارك فتوى أو نختلف في حكم…
نسأل نفسنا:
هل أنا مؤهل أتكلم؟
ولا الأولى أرجع لأهل العلم و الفتوى؟

لما نقلل الأحكام السريعة،
ونركز على القيم والمعنى،
بنخلق مساحة أهدى و أنضج .
خلّينا نهدّي الأحكام،ونركّز أكتر في قلوبنا و عقولنا.

دمتم في رحاب الله



-discovery

نية مش مثاليه