07/07/2026
جهل غريب جدا لدي الناشطين المريخاب،، في موضوع عودة بعض اللاعبين الوطنيين السابقين!!!
جميعهم يرفضون هذه الفكرة،، لمجرد أسباب عاطفيه لا علاقة لها بمصلحة الفريق ( باعنا و خلانا و مشي مننا و كلام عجيب و غريب )
المريخ يا سادة يا كرام ، يحتاج لأي لاعب خبره سابق ، كان من ضمن قوام و تشكيلة المريخ قبل التشليع الذي قام به النمير و من سبقوه في الفريق و تسبب في إفراغ التشكيله من العناصر التي خبرت اللعب في البطولة الافريقية، و قادته للمجموعات لثلاثة مواسم علي التوالي
خلونا بالله من الاوهام الفي دماغكم دي
ناس بانغورا ديل لسه ما بقدرو يصنعو ليك فارق
أو يضيفو ليك حاجه ،، ما تخدعو روحكم ساي
النطيط ده براهو ما ح يفيدك قدام اي فريق
يالناس المندهشين بالمراوغات ساي بلا فهم
ما عندك حاليا زول افضل من بخيت خميس كظهير او مدافع ايسر،، ولا عندك لاعب ممكن يفيدك اكتر من التش كجناح ،، و لا عندك لاعب ممكن ينفعك اكتر من سيف تيري كجناح او راس حربه،، دي خبرات وطنيه ممكن تساعد المواهب الصغيره الموجودين عندك ديل في انهم يقدرو يطورو مستواهم و يقدمو افضل ما عندهم في وجود لاعبين كبار يعرفوهم انو المريخ فريق ليهو مكانتو و هيبتو و ما مقبول عند جماهيرو الهزايم و التعادلات الكتيره دي ،، بعد ما فهمو انو المريخ فريق يبحث عن التعادلات فقط مع اي فريق ضعيف او قوي،، حسب عقلية المستر داركو المتواضعه
