Sau'ai Cricket Club Auckland

E muamua ona matou faatulou i le tapuaiga mamalu a si o matou nuu o Falealupo, i le tapuaiga ia Auvaa ma 'aiga, le Ma'upu a Nafanua ma le Matua ia Lamositele, aemaise le To'afa ma le fetalaiga ia Silialaei, e lēai foi se mamali i le tapuaiga mamalu a le aufaigaluega totofi a le Atua, o e o loo faanōnō manū auā se manuia mo Falealupo, le tapuaiga mau i tinā matutua ma tamā matutua, o ē o loo fai le faiva o le taputapua'i ma ula le mulilā, ao alo faiva au tama fanau i soo se valaauina, e lē faagaloina foi le tapuaiga a soo se Falealupo o loo fa'aaunū'ua i tafa e fia o le lalolagi ona o sailiga manuia auā aiga, ma nuu aemaise le finagalo o le Atua.

Manatu o le a le oo so matou leo i outou paia, auā o paia e lē popo ma ou pa e lē solo, e lē gafa taulimaina e so matou faatauvaa.

Ae ua lagā so matou leo vaivai, e fofogaina ai lo outou pa'ia maualuga, e faailoa atu ai, o lea ua toe lalaga le tatou 'au kirikiti i Aukilani nei, le 'AI. O le agaga faafetai ona o se tofa ua a'e i ni isi o uso ua iloga i lenei faaagā tama, ua mafai ona toe lalalga le tatou 'au, e lē gata e faailoa atu ai si o tatou afioaga i totonu o Niu Sila nei i tulaga i taamilosaga kirikiti, ae o se avanoa lelei e mafuta ai, ma maua ai e tupulaga o Falealupo se mafutaga faauso i totonu o lenei atunuu.

O lo'o tatala le avanoa mo soo se Falealupo, o fea lava o Niusila nei poo Àukilani nei o lo'o e alala ai, afio mai, tatou te opogi faatasi le tatou 'au, ma tauave le igoa o le tatou afioaga i fa'alāgā maea o lo'o iai i totonu o Aotearoa nei.

Faamanuia le Atua i lau tapuaiga si ou nuu pele, Falealupo, faamanuia foi le Atua i au tama fanau o loo fai ma ave fu'a e tauave le igoa o si tatou afioaga i tulaga o taamilosaga kirikiti i Aotearoa nei. Ia fusia i tatou uma i le alofa faa le Atua, ma ia avea i tatou o le 'aiga e tasi, ia maua e i tatou le nofo fealofani auā o le finagalo lea o Iesu mo i tatou.

FAAFETAI.