01/09/2026
Tattalin arzikin Najeriya na ƙara bunƙasa inda ya nufi dala tiriliyan ɗaya
Tattalin arzikin Najeriya ya ci gaba da samun bunƙasa a zango na biyu na shekarar 2026, inda GDP ɗin ƙasar ya ƙaru da kashi 4.43 cikin 100, idan aka kwatanta da kashi 4.23 a makamancin wannan lokaci na shekarar 2025 da kuma kashi 3.89 a zangon farko na 2026, a cewar Ma’aikatar Kuɗin Tarayya.
Ma’aikatar ta ce wannan ci gaban ya ɗaga matsakaicin bunƙasar tattalin arzikin ƙasar a farkon rabin shekarar 2026 zuwa kashi 4.16 cikin 100, daga kashi 3.68 da aka samu a makamancin wannan lokacin shekarar 2025. Ta ce kuma ci gaban ya fara yaɗuwa zuwa sassa daban-daban, inda sassa 27 na tattalin arzikin ƙasar s**a samu bunƙasar sama da kashi uku a zangon na biyu, idan aka kwatanta da 23 a bara.
A fannin samar da kayayyaki, masana’antu sun samu bunƙasa da kashi 3.24 cikin 100, daga kashi 1.60 a zangon makamancin wannan na shekarar 2025, yayin da noma ya ƙaru da kashi 4.39 daga kashi 2.82. Haka kuma, ɓangaren ayyuka, wanda shi ne mafi girma wajen tallafa wa tattalin arzikin ƙasar, ya bunƙasa da kashi 4.60 daga kashi 3.94.
Ma’aikatar ta kuma ce ƙarin darajar naira da daidaito a kasuwar canjin kuɗi sun taimaka wajen ƙara darajar tattalin arzikin Najeriya idan aka auna shi da dalar Amurka. A cewarta, naira ta samu ƙarin daraja da sama da kashi 12 cikin 100 tsakanin farkon rabin shekarar 2025 da na 2026, lamarin da ya taimaka wajen ƙara darajar tattalin arzikin ƙasar da kusan kashi 17 cikin 100 a ma’aunin dalar Amurka.
Ma’aikatar Kuɗin ta ce wannan ci gaba na nuna cewa Najeriya na kan hanyar cimma burin Gwamnatin Tarayya na mayar da tattalin arzikin ƙasar ya kai dala tiriliyan ɗaya nan da shekarar 2030. Ta ce Asusun Ba da Lamuni na Duniya (IMF) ya sanya Najeriya cikin ƙasashe 10 da ake sa ran za su fi bayar da gudunmawa ga bunƙasar tattalin arzikin duniya a 2026, yayin da gwamnati ta jaddada buƙatar ci gaba da sauye-sauyen tattalin arziki domin tabbatar da cewa ci gaban ya koma ga talakawa da sauran ‘yan ƙasa.
A gefe guda kuma
Shugaba Tinubu ya taya Shettima murnar cika shekaru 60
Shugaban Ƙasa Bola Ahmed Tinubu ya taya Mataimakin Shugaban Ƙasa, Kashim Shettima, murnar cika shekaru 60 a ranar 2 ga Satumba, inda ya bayyana shi a matsayin amintaccen abokin aiki da ya sadaukar da rayuwarsa wajen yi wa Borno da Najeriya hidima.
A cikin saƙon taya murnar, Shugaba Tinubu ya taya matar Shettima, Nana, da ’ya’yansa, iyalansa da abokan siyasa murnar wannan gagarumin matsayi. Ya bayyana Shettima a matsayin ɗan kishin ƙasa mai jajircewa, haƙuri da sadaukarwa, tare da yabawa irin rawar da ya taka a harkar banki da kuma lokacin da yake Gwamnan Jihar Borno.
Tinubu ya ce Shettima ya nuna jajircewa, ƙwazo da tausayi wajen inganta rayuwar al’umma a matsayinsa na Gwamnan Borno, sannan daga bisani a matsayin Mataimakin Shugaban Ƙasar Najeriya. Ya kuma yaba masa bisa biyayyarsa ga jam’iyyar APC da kuma goyon bayan da yake bai wa gwamnatin tarayya wajen aiwatar da ajandar Renewed Hope.
Shugaban ya bayyana cewa a matsayinsa na Shugaban Majalisar Tattalin Arziki ta Ƙasa (NEC), Shettima ya taka muhimmiyar rawa wajen daidaita manufofin tattalin arziki da ƙarfafa haɗin gwiwa tsakanin Gwamnatin Tarayya da gwamnatocin jihohi. Ya ce mutunta kundin tsarin mulki, cibiyoyin dimokuraɗiyya, tattaunawa da tuntuba da Shettima ke yi sun taimaka wajen ƙarfafa shugabanci nagari.
Tinubu ya gode wa Mataimakin Shugaban Ƙasar bisa amincinsa da goyon bayansa, yana mai cewa zai ci gaba da aiki tare da shi wajen cika alkawuran Renewed Hope ga ’yan Najeriya. Ya kuma yi masa addu’ar Allah Ya ba shi lafiya, hikima da tsawon rai, tare da ci gaba da shiryar da shi da kuma ba shi ikon yi wa Najeriya hidima cikin nasara.
