Milan Club Malta 1979

Kronaka Milanista minn Frans Deguara...

Milan-Venezia 2-0... imma x’kuntrast
bejn l-omaġġ għall-CAPITANO u t-tluq ta’ Leao

Fl-ewwel logħba tas-Serie A f’San Siro, mingħajr il-Capitano, il-Ġimgħa, 28 t’Awwissu, ġie mogħti omaġġ enormi u mistħoqq lil Franco Baresi - Il Capitano dei Capitani! Tpoġġa banner kbir bil-flokk bin-numru 6 f’nofs il-piċċ, bil-plejers iduru miegħu waqt il-minuta silenzju bi Franco fuq l-iskrin il-kbir. Kommoventi ħafna kienet il-Curva Sud meta esponew strixxun bil-kliem “Franco Baresi - Leggenda immortale, inimitabile bandiera, che non smetterà mai di sventolare. Ciao Capitano” waqt li kantaw “You’ll Never Walk Alone” (bil-kortesija tas-sapporters tal-Liverpool), u fis-6 minuta tal-partita xejjru l-bandiera kbira ad unuru u kantaw is-solita “C’è solo un Capitano”... bil-pubbliku kollu (aktar minn 75,000) jingħaqad magħhom!!
Imma l-kommozzjoni kienet akbar meta ibnu, Gianandrea poġġa l-flokk numru 6 fil-post fejn kien joqgħod missieru Franco - Fila 7, Posto 20, fit-Tribuna d’Onore! U qabżilna d-dmugħ bħal Daniele Massaro, il-ħabib fratern tiegħu, li qasmu flimkien karriera sħiħa bħala plejers u diriġenti. U propju dakinhar kellu jattendi għat-tlugħ tal-poloz tat-Tazza UEFA f’Montecarlo, għall-ewwel darba waħdu! Anke bħalissa qed jaqbiżli d-dmugħ... x’kariżma kellu dan il-leġġenda ta’ ftit kliem imma ta’ konkretezza fenomenali! Grazie, Capitano!!
KRONAKA. Bil-ħaqq il-partita, kont insejt! Il-Milan bdew tajjeb, ħolqu diversi ċansijiet kbar, partikularment b’Ramos - fit-12’ waħdu quddiem Stankovic ħalla lill-iben l-eks Interista Dejan iwettaq l-ewwel miraklu (bir-raġun ikollu wirja eċċezzjonali!), fit-22’ u fit-33’... forsi anke bl-emozzjoni tal-ewwel darba f’San Siro! Fl-34’ korner ċarissimu għall-Milan, għal Manganiello goalkick, u l-VAR ma daħlitx (ara kieku kien bil-kontra...). Fl-44’ ċans ieħor mitluf minn Chukwueze.
Wara l-intervall l-andament baqa’ l-istess. Fil-55’, wara taħwida fil-kaxxa, Musah ixxuttja fuq il-mimduda (kien aktar faċli jiskorja!). Fid-59’ daħlu Rabiot u Saelemaekers flok Cisse u Loftus-Cheek, u l-attakki saru aktar effettivi. Wara li Ramos tilef ċans ieħor fis-60’ (bir-ras), sa fl-aħħar fetaħ l-iskor. Kontrattakk fid-69’ mibdi minnu stess, twaqqa’, qam u akkumpanja lil Saelemaekers, li reġa’ ta lil Gonzalo RAMOS, li b’xutt dijagonali bix-xellug għeleb lil Stankovic – skorja l-aktar ċans diffiċli!! Fl-74’ daħal Jashari flok Modric, li ma kellux partita tajba, (imma San Siro xorta applawdih). Fis-87’ wara żball banali ta’ Rabiot, kontrattakk tal-Venezia... iżda Maignan ħareġ u ddribilja żewġ plejers!! Inkredibbli Mike! Minuta wara kien se jiddebutta Moreira, imma fit-88’ Gila kellu joħroġ, floku daħal Gabbia, u Estupinian ħa post Bartesaghi. Minuta wara, f’azzjoni sabiħa veloċi, Saelemaekers ġab lil Ardon Jashari waħdu. Il-Belġjan żbalja x-xutt, Stankovic salva, imma tefa’ l-ballun fuq Halhal ġej bil-ġirja, u daħal f’xibka vojta. Gowl fortunat għall-Milan veru, imma meritat.
L-istatistika turi: xuttijiet: 16-9 (fil-lasta 5-2); fawls 8-11; korners 2-3; pussess ballun 57.8%-42.2%... li tikkonferma l-andament tal-logħba. L-aħjar kienu Saelemaekers u Rabiot, li bidlu t-tim, u magħhom Chukwueze u Gila.
Il-Milan lagħbu hekk (3-4-2-1): Maignan; Gila (87’ Gabbia), De Winter, Pavlovic; Chukwueze, Modric (74’ Jashari), Musah, Bartesaghi (87’ Estupinan); Loftus-Cheek (59’ Rabiot), Cisse (59’ Saelemaekers); Ramos. Riservi: P. Terracciano, Torriani, Pulisic, Diawara, Moreira, Comotto, F. Terracciano u Camarda.

Kurżitajiet.
LEAO. Preżenti f’San Siro kien hemm ukoll Rafa Leao, naturalment fit-tribuna. Il-Portugiż xtaq isellem lil Franco Baresi, lill-Milan, u lil sħabu, wara 7 snin ta’ mumenti eċċellenti mħallta b’uħud medjokri. Kellu żewġ offerti: l-Aston Villa tellgħu l-offerta għal self ta’ €8 + €42 b’obbligu li jakkwistawh, u b’salarju ta’ €8. B’Jorge Mendes jippressa lill-klabb ta’ Birmingham għax Leao dejjem qal li jixtieq jilgħab fil-Premier League. Iżda b’sorpriża Rafa ddeċieda li jmur fit-Turkija mal-Galatasaray, li permezz ta’ George Gardi, offrew €45 miljun + €2 miljuni bonus + €20% mis-somma li jinbiegħ aktar ’il quddiem, u b’salarju ta’ €12-il miljun! Li għall-Milan kienet ftit aktar vantaġġjuża. Id-differenza għamluha l-pressing tad-diriġenti Torok, il-kuntatt dirett ta’ Viktor Osimhen (l-eks Napoli), u l-proġett ta’ Galatasaray... fejn sab folla enormi tistennieh!
SKUDETTO/TALENT PUR. Wara l-partita Rafa kien emozzjonat ħafna (ammetta li beka, u ħafna) u xtaq isellem anke lit-tifosi imma ma kellux ikun... għax wara kollox, 7 snin huma ħafna għaż-żminijiet tal-lum. Kien ġabu mal-Milan P. Maldini fl-2019 għal kważi €40 miljun, u skont kliemu stess: “ġejt bħala tifel u tlaqt bħala raġel, grazzi għall-Milan, li jibqgħu dejjem f’qalbi”! Il-quċċata tiegħu kienet ovvjament l-iskudetto 2021/22, mirbuħ b’Rafa protagonista assolut u l-MVP tas-Serie A, segwit bis-semi finali taċ-Champions League. Is-snin ta’ wara kienu mimlija tlugħ u nżul, kritika (anke ħarxa), injuries, cooling break u problemi tattiċi. Iżda ħa mmur kontra l-kurrent, għax in-numri jirrakkontaw storja oħra. Infatti nsibu li skorja 80 gowl, kellu 55 assist, 372 okkażjoni ta’ ċansijiet maħluqa, u 577 dribbling kompletati!! Għalhekk Leao ħalla lill-Milan bejn id-dispjaċir ta’ talent pur forsi mhux muri kompletament, u memorji indelibbli. Veru li ma kienx dejjem kontinwu (u kien jaqla’ kritika esaġerata li mhux dejjem kienet mistħoqqha), imma għal snin sħaħ irregala lil San Siro ħaġa rari: l-imprevedibbiltà! Grazie di cuore, Rafa, e buona fortuna!
CISSE u DIAWARA. Fis-27 t’Awwissu, Alphadjo Cisse (mingħajr l-aċċent) u Sankhoun Diawara kienu ppreżentati fil-Milan Flagship Store f’Via Dante, fejn kellhom akkoljenza sabiħa ħafna min-numru kbir ta’ tifosi. Cisse kien għadu kif skorja l-1 gowl tal-kampjonat ftit jiem qabel (u vvutat l-MVP tal-partita!). A propożitu, l-aħħar plejer Milanista li skorja fid-debutt tiegħu kien Daniel Maldini, fi Spezia-Milan (1-2) fil-25 ta’ Settembru, 2021.

P.S. Il-Milan waslu fi ftehim ma’ Nottingham Forest għat-trasferiment ta’ Omari Hutchinson, plejer ta’ nofs il-grawnd, b’self. Aktar dettalji u dwar il-kampanja akkwisti fil-kronaka li jmiss.

Il-partita li jmiss: Juventus-Milan, tas-Serie A, nhar il-Ħadd, 6 ta’ Settembru, fid-20:45.

Ritratti (fuq): l-omaġġ lil Capitan Baresi; Gianandrea jpoġġi l-flokk numru 6 fil-post fejn kien joqgħod missieru Franco; u jidher emozzjonat ħafna; (nofs): bħalma kienu Massaro u l-eks Stroppa, illum kowċ tal-Venezia; l-istrixxun tal-Curva Sud; u Ramos juri l-istemma “6 per sempre” fuq il-flokk wara li skorja; (taħt): il-gowl ta’ Ramos fid-69’; u Jashari, kompliċi fl-awtogowl ta’ Halhal fid-89’; u Cisse u Diawara jieħdu stessu mal-folla sabiħa quddiem il-Milan Flagship Store fis-27 t’Awwissu.

Kwalunkwe opinjoni espressa minni mhux bilfors hi l-istess tal-Milan Club Malta 1979.

Bongu lil kulħadd,

Bħalma tafu, riesaq ix-xahar ta’ Settembru u, bħal kull sena, se ssir il-Laqgħa Ġenerali Annwali tal-Milan Club Malta 1979.

Għal dawk kollha li jixtiequ jikkontestaw għall-Kumitat għas-sena 2026/27, jistgħu jagħmlu kuntatt mal-President tal-Club, Emmanuel Nappa, u jiġbru u jimlew l-applikazzjoni mill-Uffiċċju tal-Kumitat, sa mhux aktar t**d mill-20 ta’ Settembru.

Infakkrukom li huma eliġibbli biex japplikaw għall-Kumitat dawk il-membri li jkunu membri tal-Club mill-inqas mill-aħħar staġun.

Il-Laqgħa Ġenerali se tkun imqassma hekk 👇🏻

Hatra ta Chairman
Qari tal-minuti
Rapport Aministrattiv
Rapport Internazzjonali
Rapport Finanzjarju
Mozzjonijiet
Hatra ta L-Awdituri
Diskors tal-President
Punti ohra
Hatra kummisjoni Elettorali
Xoljiment tal-kumitat
Elezzjoni.

FT.

HT

Kick off ⚽️ Dai ragaaaa 💪🏻💪🏻

Illejla nerġgħu niltaqgħu bħas-soltu għal dawk li jixtiequ jsiru membri tal-klabb. Jistgħu jagħmlu dan sa siegħa qabel il-logħba. ❤️🖤

Dawk li diġà ħallsu u jixtiequ jiġbru l-materjal tagħhom, jistgħu jagħmlu dan ukoll. Se jkun hemm membri tal-Kumitat preżenti biex iservu lill-membri tagħna.

Narawkom aktar t**d għal-logħba kontra Venezia! ⚽️

⏰ Kick-off: 20:45

Forza Milan! ❤️🖤

Antifire Safety & Security 🔥
Enchanted Music & Entertainment 🎵🎶

Kronaka Milanista minn Frans Deguara...

Torino-Milan 1-2... buona la prima

Fl-ewwel logħba tas-Serie A, il-Ħadd, 23 t’Awwissu, il-Milan marru Turin u rebħu lit-Torino 1-2... wara wirja tajba, apparti l-aħħar kwarta meta kellu joħroġ Gila. Amorim issorprenda bil-formazzjoni inizjali, imma kellu raġun għax it-tim ġa deher li ħa l-idea ta’ futbol li jrid jilgħab biha. Naturalment għad hemm ħafna x’jirranġa u jibdel, imma d-direzzjoni tidher tajba. Infatti anke l-istatistika turi: xuttijiet: 8-19 (fil-lasta 1-4); fawls 10-9; korners 2-4; pussess ballun 41.4%-58.6%... li tikkonferma l-andament tal-logħba.
Il-kowċ Portugiż ħalla barra lil Tomori, Fofana, Odogu u Nkunku (li mhumiex fil-proġett Milanista), kif ukoll l-imweġġgħin P. Terracciano, Leao, Pulisic u Gimenez, b’Gabbia u Rabiot jidħlu fit-2 taqsima. Iżda beda b’Maignan... u bħala capitano, minkejja l-kritika kbira li qala’ dan l-aħħar ġimgħat minħabba l-atteġġjament tiegħu u ta’ sieħbu Rabiot li talbu 4 ijiem vaganzi aktar! Lil tal-aħħar malajr ħfirnielu għax kien protagonista assolut malli daħal fis-57’!!
Kommoventi kienet is-6 minuta tal-partita meta l-Curva Sud xejjru l-bandiera kbira ad unur Il Capitano, u kantaw “Franco Baresi” u “C’è solo un Capitano”... bil-pubbliku kollu jingħaqad magħhom!!
KRONAKA. Il-Milan bdew tajjeb, u l-1 taqsima kienet fil-kontroll assolut bi pressing aggressiv u kuraġġjuż, u ħolqu diversi ċansijiet, imma dejjem kien żbaljat l-aħħar pass. Chukwueze kien l-aħjar ma’ Cissè fid-debutt tiegħu tal-ħolm. Imma fis-56’ Amorim daħħal lil Rabiot u Modric flok Jashari u Loftus-Cheek, u t-tim beda jilgħab aħjar. Fis-60’, minn kross ta’ Cissè, Vlasic mess il-ballun b’idu... penalty ċar, imma Zufferli ma saffar xejn. Biex tagħqad lanqas għall-VAR ma kien! U Alla jbierek lanqas għad-disinjatur il-ġdid Orsato!! Kuntrarjament għall-eks referis Marelli u Cesari, li għalihom huwa dejjem penalty! Għandna mmorru, u għadna fl-1 partita... imnalla waslu l-gowls u r-rebħa!
Infatti fl-64’ Rabiot qassam lejn Alphadjo CISSÈ, li kkontrolla fil-kaxxa u b’xutt sabiħ għeleb lil Mascardi. Appena 2’, daħlu Bartesaghi u Saelemaekers flok Estupinan u Cissé. U ftit sekondi wara, minn kross ieħor perfett ta’ Chukwueze, sab lil Adrien RABIOT jitfa’ ġewwa minn żewġ passi bogħod (b’Ramos eżatt warajh). Fis-74’ Njie ħarab lil Gila (li waqaf ħabba bugħawwieġ) u laqat il-lasta. Bit-Torino jippressaw wasal il-gowl tal-bandiera fit-93’, meta minn frikik, Chè ADAMS dawwar il-ballun għar-rokna wara Maignan... gowl bellezza, fortunat u inkredibbli!
L-aħjar kien Rabiot, u miegħu Chukwueze, Gila, Modric u ż-żewġ sorpriżi Cissè u Musah. Il-Milan lagħbu hekk (3-4-2-1): Maignan; Gila (76’ Gabbia), De Winter, Pavlovic; Chukwueze, Musah, Jashari (57’ Modric), Estupinan (66’ Bartesaghi); Loftus-Cheek (57’ Rabiot), Cissè (64’ Saelemaekers); Ramos. Riservi: Bouyer, Torriani, Diawara, F. Terracciano, Comotto, Moreira, Pulisic, Ricci, Camarda.

Kurżitajiet.
CISSÈ. Skont l-istatistika Opta, Alphadjo hu l-plejer l-aktar żagħżugħ tal-Milan li skorja fis-Serie A (19-il sena, 305 jum) wara Patrick Cutrone (19-il sena, 236 jum) fis-27 t’Awwissu, 2017, vs Cagliari.
MAIGNAN u RABIOT. Inkomplu ftit ieħor dwarhom. Skont Franco Ordine, l-atteġġjament ta’ Maignan u Rabiot, li riedu aktar vaganzi (li ċċensurahom) huwa konsegwenza ta’ żewġ xenarji: il-capitano mhux kuntent bil-preparatur il-ġdid tal-gowlers … (meta tqis ukoll li tal-istaġun l-ieħor Claudio Filippi ma marx m’Allegri iżda mal-Fiorentina!) filwaqt li dwar Adrien jidher li ommu talbet lid-diriġenti xi żieda fis-salarju ta’ binha jekk jikkwalifikaw għaċ-Champions League. S’issa lagħbu t-tnejn, issa naraw.
STAFF TEKNIKU. A propożitu ta’ staff, Amorim ġab 5 tekniċi ġodda. Carlos FERNANDES (1994), hu l-Viċi Kowċ tiegħu mill-2019, u meqjus “il-Mourinho l-ġdid” għax jispikka ħafna fit-tattika, l-aktar fil-fażi offensiva. Emanuel FERRO (1979), l-id il-leminija tiegħu u kien qablu ma’ Sporting Lisbona. Kien jirrappreżentah uffiċjalment (anke fil-konferenzi stampa qabel u wara l-partiti) sakemm Ruben ġab il-liċenzja tal-UEFA Pro. Adèlio CANDIDO (1996), meqjus is-saħħar tat-taħriġ, xogħol li beda ta’ 23 sena, fejn juża taħriġ modern, dettaljat u fokalizzat prinċipalment fuq l-iżvilupp tattiku. Paulo BARREIRA, responsabbli mill-preparazzjoni atletika. Jorge VITAL (1961), hu l-preparatur tal-gowlers u ilu miegħu mill-2019. Wara karriera diskreta ta’ gowler, beda dax-xogħol fl-2001, u għalkemm ta’ struttura daqsxejn goffa, ħadem ma’ gowlers tal-kalibru ta’ Rui Patricio, Andrè Onana u Senne Lammens.
MOREIRA u RAMOS. Fid-19 t’Awwissu, Diego iffirma kuntratt mal-Milan sat-30 ta’ Ġunju, 2031, taħt għajnejn is-super aġent Jorge Mendes... għat-tieni l-akbar somma ta’ das-sajf u anke fl-istoria tal-Milan! għal €45 miljun + xi €20 oħra bonus!! Wara Gonçalo Ramos (dejjem ta’ Mendes) għal €74 miljun + bonus! Fl-istess jum wara nofsinhar, Ramos ġie ppreżentat lill-istampa u t-tifosi fil-Milan Flagship Store, f’Via Dante, fejn kien hemm mal-400 tifoso jilqugħ!!
REIJNDERS. Fl-istess jum ukoll, Tijjani telaq il-Manchester City u ngħaqad ma’ Al Qadsiah (tal-Arabja Sawdita) għal €61 miljun. Il-Milan se jmorru tajjeb ukoll għax wara li biegħuh għal €54,9 miljun + €14-il miljun bonus, minnhom se jmisshom €14 miljun! Imma peress li biegħuh qabel l-2030, il-Milan se jkollhom jistennew sa Ottubru 2027 biex jieħdu dak l-ammont. Imma dejjem somma tajba!
BRAND MILAN. Dak tal-Milan huwa l-brand l-aktar li kiber fl-aħħar 5 snin. Infatti fl-1 post insibu Real Madrid bi €2,4 miljardi; warajhom Barcellona b’€2 miljardi; Arsenal, Bayern Munich, Paris SG, Manchester City u Liverpool b’1.5; fit-8 post Manchester United b’€1.4; Chelsea b’€955 miljun u fl-10 post Borussia Dortmund b’€664 miljun. It-Taljani? Fit-12-il post l-Inter b’€585 miljun; fl-14-il post il-MILAN b’€514-il miljun; 16. Juventus b’€419-il miljun; 20. Napoli b’€249 miljun u 24. Roma b’€215-il miljun. Għall-ewwel darba, il-Milan qabżu s-somma ta’ €500 miljun – rekord taħt il-gwida ta’ RedBird. Huwa wkoll il-brand li kiber l-aktar bejn is-snin 2021-2026, b’żieda ta’ +236%, qabel Aston Villa, Porto, Bayer Leverkusen u Arsenal.

Il-partita li jmiss: Milan-Venezia, tas-Serie A, nhar il-Ġimgħa, 28 t’Awwissu, fid-20:45.

Ritratti (fuq): il-gowl ta’ Cissè fl-64’; u ta’ Rabiot fis-66; (nofs): il-gowl ta’ Adams għall-Granata; u Vlasic imiss il-ballun b’idu, iżda għar-referì mhux penalty!; (taħt): il-Curva tagħti omaġġ lil Capitan Franco Baresi fis-6’; u Ramos fil-Milan Flagship Store, u jiffirma lit-tifosi.

Kwalunkwe opinjoni espressa minni mhux bilfors hi l-istess tal-Milan Club Malta 1979.