BLUE PRIDE 1944

كترجع بطولة كأس إبن بطوطة فنسخة جديدة ، نسخة ثالثة و معاها تطورات جديدة …

البطولة غتبدى نهار الثلاثاء و المقابلة الأولى غتكون ضد نهضة زمامرة و الجديد فهاد النسخة هو لي كنا طالبنا بيه فالنسخة السابقة و هو ان البطولة تكون على أرض ملعب القرية الرياضية باش نقدرو نتابعو المباريات دهاد البطولة الودية/التحضيرية و لي غيكونو فيها كيف ما شفنا فالإعلان : النادي المكناسي - نهضة زمامرة - الكوكب المراكشي …

حاجة اخرى و كيف ما شفنا شكل الكأس المميز لي غيرجع الشكل النهائي دهاد طروفيو ، و لي غيريد يسوق نهاد الكأس و للفريق مباشرة ، خاصة انه فأي متحف غيكون باين و مميز بين باقي الكؤوس و البطولات … و هنايا نقدرو نطلبو مشاركة أندية أجنبية فالنسخ المقبلة خاصة مع نجاح النسخة الثانية و الثالثة علاش لا ، و هاكدا نكونو فكل نسخة كنطورو و كنزيدو نالقدام…

النسخة الثالثة غتكون هاد المرة فشرف رجل عظيم فتاريخ الفريق و فتاريخ المدينة و هو نفسه مؤسس هاد البطولة ؛ المرحوم "محمد العربي بوراس" لي كان رئيس النادي فالفترة 2006-2004 و لي شحال ما هدرنا عليه و قلنا عليه مغنوفيواهشي حقو ، و هاد الرجل بالذات خصو يكون قدوة نأي إنسان طنجاوي و ماشي غير نأي رئيس ولا مسير للكورة فالمدينة …

كيف ما تعلن الطيكيس دهاد طروفيو خرجو و الحظور ديال الجمهور و المتابعين و المحبين د الكيبو لي مكيسخاوشي بيه و لي باغين يعاينو عن قرب اللاعبين و التعاقدات الجديدة لي عمل كيبو … 30 درهم ثمن مناسب تقدر تدي العائلة ديالك ولادك ولا خوتك ولا صحابك و تدوزو وقت مزيون بلا صداع بلا هاراج (نالناس لي مكيعجبومشي كامبو فالأيامات العادية) 🤝🏻💙

هذا غيكون آخر بوسط على الموضوع د هاد اللعاب و الهدرة موجهة نالجمهور لي كل مرة كيعاود نفس الخطأ…

كاملين كنعقلو على سي علي الحراق ، لي طبعاً بحال أيها لعاب جا و تاواحد ما كيعرفو ودوز معانا واحد الموسم ونص بلا حتى مساهمة (مقدرشي حتى يفرض راسو اساسي) و فالموسم لي كانت عندنا التركيبة البشرية على قدا قدر يدي الفرصة و خرج احسن ما فيه و قدر يماركي 7 غوان و أسيست …

باش يحس براسو رونالدو و مبغاشي يجدد و مشى نالفتح لي صحابلوم طاحو على أقصبي د زمانه و "تقاولبو بيه" و خرج العام بـ غون واحد .

حتى نواحد الوقت كانت واحد الفأة د المشوشين كيعملو بيه البلبالة و علاش منجددولوشي باش ما بغى و ضيعنا علينا رونالدو و الكيبو بلا بيه مغيعمل والو …

باش دوز ليام و يبان انه التيحاد مواقفا على حتى واحد كيف ما بغى يكون ، التيحاد واقفا نراصا و بينا كاملين ملي كنعملو اليد فاليد ولي مبغاناشي و مرضاشي يكون منا ، باي باي بسلامة بلا متجينا 👋🏻

واحد طار …

كما شفنا فالبوسط د البارح البهجة جاوبنا و قالنا أنا مع غانا ، و حط بوسط كيودع فيه الجمهور و ستوري "كيتخنصص" فيه…

كان يقدر يخرج بسهولة و نتمناولو الخير فالمستقبل ديالو … ولاكن عقلية اللاعب المغربي مكتخليهشي قادر يخدم عقلو و يخليها حلوة ، ضروري خصو يخورلا عينا …

ندوزو نالسطوري و لي كانت غي "تخويرة" قالك السيد :




و مبغاوشي يتفهمولي هاد سطورة صراحة!

ياك جيتي من سوالم و راس مالك جوج كراطي صوفر (0 غول - 0 أسيست) و فاخر التجارب لي دوزتي (5 غوان و 4 د اسيستات) فالفترة اللولة ديالك مع السوالم ، و دوزتي (اسفي- الوداد- الرجا- الفتح) بلى ما تعمل حتى مساهمة ، و كاريير ديالك كاملا ماشا بـ 15 غول و 14 اسيست فـ107 دبارديدوس …

يعني خصك 7 دبارديدوس باش تماركي واحد !

وحتى فالفترة ديالك معانا عمرك حضرتي على شحاجة ، الصالير فوقتو ، دايماً مع الفريق و تاواحد ما قصاك ، عمرو شواحد مجلسك فبانكيو و قالك جدد عاد تلعب… و دابا مخرج رونالدو مدرح لي فيك باش تدي شحاجة د الشفقة!

فاللخر كنقولو و بكل وضوح السفينة ماشا لي قال على راسو عوام يسرطي يعوم (غيغرق فحال خوتو لي سبقوه) .

معانا ولا مع غانا؟

مور نهاية الموسم مباشرة بدينا كنفكرو فالميركاتو شكون يبقى و شون غيمشي و شكون غنجيبو؟ و فوسط هادشي نشرنا عدد كبير د بوسطات و لي عطينا فيه القرائة ديالنا نالواقع د الفرقة …

البوسط اللول كنا عطينا الرئي فاللعابة لي تسالاتلوم كونطرا و بغيناهوم يبقاو و بين هاد اللعابة كان هاد الثنائي "هيثم البهجة" و "بدر غادارين" …

هاد الثنائي كنا قلنا انه من اللعابة لي باقي عندوم ميدار و يمكن نزيدو نستافدو منوم و طبعا حتى هوما كيستافدو من الفريق ، و هنايا كانت القرائة ديالنا انه :

- هيثم البهجة لي كمل الموسم بـ8 دغوان (جوج من ضربات جزاء) و أسيست و سالا كهداف الفريق فهاد الموسم، زيادة على البروفيل ديالو كجناح مهاري و لي فتاقدناها من مدة و طيكنيك لي رجع عندو فضربات الجزاء… ولاكن دازت الأسابيع بلا منسمعو حتى حاجة ، لا إعلان تجديد لا مغادرة صريحة ، حتى كنسمعو فواحد النهار فالراديو من نائب الرئيس ان اللاعب كان كيتفاوض و تافق مع الفريق على عقد ولاكن باقي موقع و داز مدة و هو غائب لا يجيب (السيد باغي يعيش الصيف) .

- بدر غادارين لي سالا الموسم بجوج اسيستات و كنا هدرنا على la polyvalence ديالو فالمراكز و الروح القيادية… ولي جدد العقد مع الفريق فعلا ولي سمعنا فنفس الباساج انه طلب عطلة استثنائية (يمكن عندو شي مشكل شخصي) ، ولاكن الأيام تتوالى و باقي مكاين حتى خبار عليه .

هاد جوج د اللاعبين و بناء على هادشي لي شفنا فهاد الأسابيع الأخيرة "مبقاوشي صالحين نالفرقة" ، مستحيل التحضير نالموسم بدا هادي مدة و اللعابة كاملين مركزين و كيضربو تمارة باش يوجدو الفيزيكا دالعام بينما اخرين مبحرين و مصيفين حتى ناللخر د الميركاتو ولا يقرب كاس العرش عاد يرجعو ، مصالحاشي و ديك ساعة مكتسنالوم والو من غير شي إصابة تخليهوم جالسين فسبيطار و الصالير دايز !

من جهة اخرى إذا كان شواحد فيهوم سنا و ندم و باغي يمشي نشي بلاصة اخرى الباب كبير و سقسي خوتك لي سبقوك (فاين كيلعبو - كيفاش كيلعبو - إذا كانو أصلا كيلعبو) ، و حنايا فإتحاد طنجة مخصناشي ملاعبي كسدة ديالو معانا و عقلو مع غانا 👋🏻

الجودة …

ما كان يعاب على سكواد دالإتحاد من نهار جا هاد المكتب هو الجودة و لي كانت ناقصة فالفريق ولي جات بعد ما جمعنا ملاعبيا بدراع باش نلعبو الجولة الأولى لي كانت فأكادير ، زيادة على المنع لي كان و لي ترفع فالشتا و قدرنا نعملو اول ميركاتو فعهد هاد المكتب ولي كان "على قدو" رغم انه كان كبير ، حيت فالشتا مكتكونشي الجودة للأسف و بين ملاعبية لي جلسو و لي دابزو مع فراقي ديالوم + المبلغ لي تحط فرفع المنع كان هاد الميركاتو ضعيف من ناحية الجودة و فيه تقامر بزاف…

من بعد الميركاتو د العام الثاني و لي سيقنا فيه بزاف دلعابة و فالانتدابات شفنا محاولة باش تكالا السكواد ، و فهاد الوقت كنا هدرنا على النظرية د مورينيو "إرث كرة القدم"…

و فهاد الميركاتو و لي شفنا فيه خروج عدد كبير د اللاعبين و التعاقد مع عدد كبير كذالك كنجيو نطرحو تساؤل كبير ، واش ملاعبية لي جاو حسن من لي مشاو ؟

فالجواب فالصور ، كل لاعب مشا تحت منو المعوض ديالو و بعد نضرة عامة كنشوفو ان الأفراد لي جاو ماشي نهائيا قل من لي مشاو …

- أبعير كيف ما كان مستحيل يكون بحال الوغد (زيادة صغير عليه و طويل عليه) .
- ياروفيتش مجرب و مطحن على الغروش ، فالهوا حسن منو طبعا .
- أحناش techniquement حسن من فوزي بزااااااااااف.
- غابي كلعاب دولي حتى هو حسن من سانوغو لي دوز عام مريح و العام الثاني بداه بدرايم.
- الصديقي كيف ما كان حسن من البقالي لي بقى مريح فالطبيب.
- باوليتا كذالك ماشي هو كبولو لي تعطاتو الفرصة شحال من مرة و مستغلاشي.
- أشرف كظهير كيبقى update على غدارين (لي باقي غنهدرو عليه).
- أيت الخرصة كتجربة مدوز على العز و كنتمناو حتى فالقتالية على الله تكون عندو على الاقل نفس القتالية د العز .
- البهجة (كذالك غنهدرو عليه من بعد) ، ولاكن منساوشي ملي جا كان بحال النجاري .
- سار كذالك المنطق كيقول انه غيعطي حسن من الشنتوف لي طيحاتلو الإصابة المستوى ديالو .

حنايا ماشي كنتنبئو بالغيب ولا شي لعبة ولاكن غير كنقراو المعطيات لي منزلة قدامنا بطريقة منطقية ، و كيبقى الفصل فهاد الهدرة هو الانسجام و الإصابات و بزاف د العوامل لي تاواحد معندو تحكم فيهم …

التعاقدات 2 …

مور الجزء الاول من هاد البوسط لي هدرنا فيه على اول 6 تعاقدات و بعد راحة صيفية قصيرة تزادو 5 لاعبين اخرين و بداو التداريب لي غنتطرقولوم من بعد …

نبداو بالدفاع ، و مع خروج و الفسخ مع أسامة العز (الله يسهل عليه و لي كنتمناولو يجبر طريق اخرا) جا التعاقد مع أيت الخرصة ، لعاب لي دوز مواسم فالبطولة و آخر واحد لاعب فيه 16 مباراة و نيفو يخليه بديل مزيان (خاصة مع المشكل د كادارين) …

الظهير : ولي شوفنا تعاقد عجبنا و لاعب مجرب فالسيغوندا د برجيكا بأرقام محترمة و من شراكة اتحاد طنجة مع أولمبيك ليون و إيغل غروب ، و هادشي لي كان فالموسم لي فات بالجوهرة العروش كنتمناو يكون أشرف صفقة ناجحة بحالو ويكون تطوير نبوسط لي شحال ما شفنا فيه شي ملاعبي طوب…

خط الوسط ولي جا فيه ملاعبي كاليطي و لي شفناه فالسنوات الأخيرة فالبطولة ، الوداد - تواركة - يعقوب المنصور و لي عمل ضدنا شوط كبير فبطوطة قبل ما يخرج بالتصفيق د الجمهور و الإشادة بيه ، و هادشي لي خلاه يجي ويكون upgrade على الوسط لي عندنا …

الجناح :
يونس النجاري ولي هو بديل مباشر للبهجة (لي باين انه مغيرجعشي) ، اما بالنسبة البروفيل كيبقى محترم و مجرب فالبطولة واخا الارقام غير مطمئنة …

المهاجم :
مور سند غيكون "باوليتا" هو البديل ، الملاعبي لي جبناه من الدوري السنغالي و بين انه يقدر يكون مفاجأة مزيانة فالمباريات التدريبية و لي كنتسناو منو يدي الوقت ديالو فكامبو و يبين لي عندو باش نستافدو منو كثر …

مور هاد الانتدابات لي شفنا اننا بدلنا فيه كولشي تقريباً فأمل اننا نزيدو الجودة فالفرقة ، فمقابل كنبينو انه مكاينشي شحاجة اسما ركيزة فالفرقة ✍🏼

الإتحاد الرياضي لطنجة يستقبل برشلونة …

كيما شفنا كيبوس آخرين عندوم هاد بارديدو حلم حنايا فطنجة عندنا واقع و تاريخ ، و الإستضافة د الأندية الإسبانية تاريخيا فطنجة كان عادي …

هنايا لعبات ريال مدريد 3 بارديدوس (فمرشان) ، برشلونة هذا هو البارديدو الثالث ديالا فطنجة و فبطوطة ، بعد السوبر و بارديدو لي تسرق منا و تعطى نواحد كيبو جبر راسو لاعب فكامب نو و هز 8 …

كنعرفو بلي الجمهور د المدينة عندوم مع الكرة الإسبانية و جزء كبير كيشجع بارسلونة ولاكن قدام الفرقة لي كتمثل المدينة ديالي و الهوية ديالي نهار 15 مكنعرف تاحاجة أخرى … كما أن هاد بارديدو غيجيب متابعة كبيرة من العالم (يمكن اكثر بارديدو متابعة نالإتحاد) و هنايا فاين خصنا نستافدو من هادشي …

هاد الفرصة مكتعوضشي و المستشهرين لي يقدرو يجيو من بعد هاد بارديدو بالضبط يقدرو يدفعو الكيبو نالقدام بسهولة كبيرة و عليه كامبو كامل خصو يكون زرق (عارفين ديجا انه غيكون sold out) ولاكن الفكرة د أنك طنجاوي و تحضر بتشاكيطة د البارسلونة مصالحاشي مارا

الخروج …

الميركاتو كيتكون من جوج حاجات فيتشاخيص لي غيجيو و لي غيخرجو من الكيبو ، كنت هدرنا مزيان على المتطلبات د الفريق فعدة بوسطات ، و هدرنا حتى على بعض الصفقات لي جات نالفريق و لي غنزيدو نهدرو عليهوم نالقدام، كون الميركاتو ديالنا هو اكثر ميركاتو محرك فالبطولة…

9 د المغادرين رقم كيبان كبير صراحة ولاكن فالتفاصيل كيبان السبب …

جواد الغبرة ، ملاعبي عطى لي عندو ولاكن ساهل تشوف ان ديكشي لي عندو مغيفيدشي الفريق نهائيا فالتطور ديالو و الخروج ديالو بنهاية العقد و نهاية الخدمة !

ليفتي كبولو، ملاعبي لي استثمرنا فيه ولاكن معطيناهشي Stabilité و ارضية باش يعطينا و النهاية كان خصا تكون ضرورية باش حتى هو يقدر يعطي فبلاصة اخرى …

بابا ماغاي، هو اكثر واحد فالمغادرين كنت و باقي تايق انه عندو المستوى و يقدر يعطي كثر ولاكن بشروط و شروط كبيرة منا الإنضباط و الخدمة حيت عندو صراحة ما يعطي …

البقالي ، خروج منطقي نملاعبي عطى اللخر د الكاريير ديالو و لعب فالكيبو د الأصل ديالو و المدينة ديالو من بعد كاريير كانت تقدر تكون احسن فأوروبا …

فوزي ، اقدم ملاعبي فالفريق ايضاً جا الوقت ديالو باش يتوكل على الله ، ملاعبي كمل العقد ديالو و حتى المردودية ديالو كملات مع بعض الأخطاء مخصاشي تكون عند ملاعبي د الوسط و بهذا خروج مزيان …

الشنتوف، ولد الفرقة لي كان خص الكاريير ديالو تكون حسن من هايدا لولا الإصابات ، حتى هو كيكمل العقد ديالو و المهمة ديالو …

سيريكي سانوغو ، ملاعبي لي محسيناشي بيه فنيفو واحد ، العام الاول الإصابة و الثاني بداه بفورما و لعب بحال شي عجل ، عوط المستوى ديالو ولاكن معطاشي شي مستوى لي يخليه فالفريق …

يوسف الغزال ، بورطيرو لي تعطاتو الفرصة و كيف ما قلنا قبل خصو يخرج يقلب على راسو برا و ينقذ كاريير ديالو …

الوعد، و لي مع المجيء د بنشيخة عطا شي بارديدوس مزيونين ولاكن أشريف ملاعبي لي كيعطي بالگانة معندنا منزيدو نعملو بيه و معندناشي الذاكرة د البوري باش ننساو درايم لي عمل قبل …

النقطة لي مهمة و لي خصنا نطوروها و نبدلوها فالفريق و هي "فسخ العقد بالتراضي" و لي كانت كتفرحنا قبل على أساس ملاعبي مغيجرناشي نليتيج أما من الفوقي ملاعبي لي خصنا نتهناو منو و باقي عندو فالكونطرا خصنا ندخلو منو الفلوس (و هادشي من دابا نفوق) ، باش نكونو فعلا قويين فالميركاتو لا فالبيع لا فالإعارة لا فالشرا 🤝🏻

حمادي الهرطالي… واحد منا !

كاملين شفنا البوسط التضامني مع الرئيس السابق لفرع كرة السلة ، حمادي الهرطالي واحد منا و واحد من ولاد هاد الكيان لي غارو عليه و خدموه و جابو العز…

اليوما الراجل كيحتاجلنا و كيحتاج خوتو و ولاد الكيان بقطرة د الدم ممكن تنقد حياتو ، و هادشي ماشي غريب على طنجاوا لي رجع عندوم التضامن عبر التبرع بالدم من العادات من مدة ماشي قصيرة …

و عليه اي واحد بغى يتضامن بالتبرع يقصد مركز تحقن الدم "نقطة الحليب" (حدا الولاية) ، و يكون واكل و مفيهشي فقر الدم ولا عمل الحجامة ولا دول الضرسة فشهراين اللخرة و يتبرع ، و لي مقدرشي و الأعذار كثيرة (الله يكون فالعوان)، بارطاج غتعاون بزاف 🤝🏻

التعاقدات …

فآخر 10 أيام كان نشاط كبير للفريق ديالنا فالميركاتو و الإعلان لي جا على 6 د الصفقات لحد الأن ، هاد الصفقات كانو الغالبية ديالوم فالمراكز لي فعلا عندنا فيهوم خصاص كبير و هادشي لي ناقشناه فسلسلة الميركاتو ولاكن واش فعلاً الإختيارات مزيانين ولا غي انتدابات عادية ؟

نحاولو نفكرو مع بعطنا و نجاوبو على هاد السؤال بمنطقية :

- خط الوسط و كيف ما هدرنا على الخصاص لي عندنا فيه ، جاو فيه جوج تعاقدات و لي هوما (باباكار سار🇸🇳/غابي موتسيوا 🇧🇼)، و لي هوما جوج ملاعبيا كيعرفوم بنشيخة ، اللول كان معاه فسيمبا و داه معاه نشبيبة القبائل و الثاني لاعب دولي (لعب اساسي فكأس افريقيا فطنجة) و شافو و لعب ضدو فمولودية وهران … بمعنى وسط الميدان خط مكتمل (إلا ادا كان شي تعاقد نالاحتياط و العمق د التشكيلة) …

- الهجوم لي غنهدرو عليه هاد المرة كامل ، شفنا جوج تعاقدات و جوج د اللعابة لي جاو من دوريات اوروبية "ضعيفة" على النيفو د البطولة ديالنا (كنقولوها بوجه حمر) , و نبداو مع البوسني جاروفيتش ولي هو بروفيل مزيان نالديبونطا بـ195 سم و كيلعب بجوج دالرجلين و كيحمق على شحاجة إسما العاب الهواء (الكورة فالسما مكيخليهاشي توصل نالأرض حتى كتكون فالشبكة) ، هاد البروفيل ديال الطارگيط مان معروف بزاف فالدول دالبلقان و خاصة الدول لي كانو كيشكلو يوغوسلافيا سابقاً ، و كنعرفو بزاف د ديبونطات من ديك الجهة يمكن أكثر واحد متكامل هو إيدين زيكو لي كنتمناو جارو يكون نسخة صغيرة منو على الأقل…

ندوزو نأسامة الصديقي لي هو فورماسيون د سبانيا بحال الحراق و لي غيعاون المنضومة وماشي ديك اللعاب لي غيهز الفرقة على كتافو و يماركي بزاف ، 28 عام فالبطولة كتعني انه فأحسن مستوى ديالو و يعطيك واحد عاماين حتى نـ3 ولاكن منقدروشي نحكمو عليه فعلا حتى نشوفوه فالكامبو …

الظهير رضا الملياني ولي كيبالنا انه لاعب عندو هامش التطور كبير و النجاح ديالو غيفيد الفرقة على المدى البعيد (21 سنة) ، يعني حتى إذا مكانشي اساسي دابا ، شويش شويش مع المنافسة يقدر يشبر بلاصة ديالو و يقدر يتباع بشي ثمن كبير من بعد ما نستفدو منو رياضاً …

الحارس بدر الدين أبعير ، كيبان حارس ضعيف بالأرقام ديالو ولاكن كبروفيل و مقارنة مع الوعد كيبان انه غيكون زايد عليه (ولو غي شويش) ، هاد المركز مهم بزاف ومفيهشي خيارات كثيرة من غير إذا مشيتي نلاعب أجنبي (من غير ابعير كاين المطيع د آسفي) ، اما الحراس د البطولة كاملين تقريباً نفس الأداء و كيبقى الفرق فالتطور ديالوم و الأجواء لي تقدر تخلي اي حارس بغى يخدم على راسو يتألق فطنجة (التاغناوتي و المجهد كمثال) …

فالأخير كنقولو ان هاد التعاقدات التقييم ديالوم على أرضية الملعب و بعد نهاية الموسم ماشي العكس ، و حنايا كإتحاد طنجة العام لي ماجي معندناشي مشاركة إفريقية و باقي مكنعمروشي كامبو الجديد كامل باش نجيبو لاعبين بعقود كبيرة يقدرو يرزيو الفريق فليتيج و يخليونا نخرجو نغوتو من بعد على التعاقد معاهوم … البناء شويش بشويش و ان شاء الله الميركاتو باقي طويل …