Jelda Menfoukha

NHAR L'MATCH 🇲🇦🇨🇦

ماتش كايبان ساهل ولكن فكأس العالم كلشي صعيب، نتمنّاو إن شاء الله نربحو ولما لا ف90 دقيقة مانمشيوش للأشواط الإضافية، اللهم يسّر 🤲🏻.

HAMDOULILAAAAAAAAAAAAH 😍😍😍!
🔥🔥🔥🔥🔥🔥🔥🔥🔥🔥🔥🔥🔥🔥
❤️❤️❤️❤️❤️❤️❤️❤️❤️❤️❤️❤️❤️❤️

Pape Thiaw Thella a m3alem 👋🏻!

واش صافي البوشكاش هاد العام حسمها جبلي 🟡؟

فماتش زوين "كما كان متوقّع" البايرن ربحو الريال فالبرنابيو، ضغطو وسيطرو على الماتش وكانو يقدرو يماركيو أكثر لولا ضياع الفرص، كان الماتش يخرج على الأقل بثلاثة.

فالمقابل الريال ماجاوش حتى دارو ردة فعل فثلث ساعة اللخرة فاش عياو البايرن، قدرو يماركيو ولكن ضيعو حتا هوما بزّاف خصوصاً فرص محقّقة ديال البيت من ڤيني ومبابي اللي سالاو الماتش وخرجو على فرقتهم.

الآلي داز زوين في انتظار الإياب 🔥

بعد صدمة الأتليتيكو فالكاس، البارسا كاتلقّى ثانية صدمة اليوم بعد الخسارة ضد جيرونا فديربي كاتالونيا، وبالتالي خسارة الصدارة لصالح الريال ❌.

أزمة كبيرة كاتعيشها البارسا حاليا، أزمة نتائج مع الغيابات ونزول مستوى يامال، المستفيد الأكبر من هاد الروينة هو الريال اللي بعد الرباح ضد سوسيداد كايرجعو من جديد للصدارة 🥇.

عبارة "لاليغا مزال طويلة" ماجاتش عن عبث، حيت ما زال غادي نشوفو مفاجآت وطلوع ونزول بيناتهم يقدر الكلاسيكو يختم هاد الصداع ايلا طول.

ها حنا غادي نشوفو اش كاين من هنا لقدام.

فضيحة طرات اليوم فالواندا ميتروبوليتانو، الأتليتيكو كرمو البارسا برباعية نظيفة اللي قدرو يديروها ف45 دقيقة اللولة فقط 😳! كان بالإمكان تكون الحصيلة أكبر لولا تضييع الفرص وسوء القرار الأخير عند شي لعّابة.

هادا غير الآلي باقي الروتور فالكامب نو اللي غايكون فرصة أخيرة للبارسا باش يرجعو وايلا بغاو يدوزو خاص يماركيو 5 البيوت ⚽️⚽️⚽️⚽️⚽️، على الورق المهمة أقرب للمستحيل والأتليتيكو حطو الرجل اللولة فالنهائي، ولكن حتا حاجة ما مستحيلة فالكورة.

تعازينا الحارة لكل بارساوي على هاد الكارثة اللي طاحت عليهم 🤷🏻‍♂️.

#البارسا #برشلونة #اتليتيكو #كورة

رأيي الشخصي وماكانلزم بيه حتا واحد، واللي بغا يناقش الفكرة يأكتيڤي العقل 🧠 ويطفي العاطفة 🫀.

براهيم دياز شخصياً ماغانسامحوش على داك البيلانتي اللي ضرب وغانبقى ديما واخد عليه ديك الفكرة ديال أنه ضيّع علينا كاس بين يدينا وبين جمهورنا طال انتظاره لمدة 50 عام، وباش مايتفهمش رأيي غلط كاندوي على براهيم دياز "اللاعب" أما "الشخص" ما عندي بيه حتا شي علاقة ولا صلة.

داك البينالتي بداك l'geste هو تجسيد للاستهتار والرغبة باش يحط راسو كنجم الرواية يختم بيها الأداء الكبير ديالو فالمسابقة وكلشي فالعالم يدوي عليه.
دياز كون كان مغربي ديال بصّح غادي يعرف أن ديك الكاس كاتعني الشيء الكثير للشعب المغربي اللي استعصات عليه بگاع الوسائل وذاق مرارة الإقصاء بجميع السيناريوهات الكائنة والممكنة وآخرها هادا اللي أخيب متشائم مايقدرش يكتب بحالو.

المسؤولية كانحمّل جزء منها أيضاً للطاقم التقني اللي مادواوش مع دياز على طريقة التنفيذ (يخشي فيها رجلو) وأيضاً على طريقة الحارس إدوارد ميندي فالتصدي للبينالتيات (دور le visionnage اللي ماكانش) معروف أنه كايبقى الوسط وكايمشي لشي جهة معطّل.

بانينكا فداك الوقت العصيب وفداك الماتش الحاسم اللي ماجيناش فيه وجاتنا فرصة من ألماس نخطفو بيها الرباح واخا مالعبناش مزيان، ضيّعها علينا دياز بداك البانينكا الكارثي اللي واخا كون مشى ميندي لشي جهة كان غايرجع وغايجبدها حيت مامضروبش مزيان.

خلاصة القول، هاد الشمتة بالنسبة ليا صعيب ننساها، حيت درنا كلشي باش ناخدو هاد الكاس ولكن حنا اللي ضيّعناه بيدينا ... وهاد الواقعة ماشي غير دياز اللي مسؤول فيها ولكن الحصة الأكبر غاتمشي للرگراگي اللي وصّلنا أننا نعولو على بينالتي باش نربحو بسبب قرارات الحُب والعاطفة اللي مابغاش يتعلّم منها وتقصينا بسبابها للمرة الثالثة على التوالي بدون تحقيق ولا لقب الكان وميدالية فكأس العالم.

المغرب كامل كايهمو كأس إفريقيا وضاع منّا، أما شي إنجاز فكاس العالم ماعندو مايدير بيه، حيت التاريخ كايذكر البطل فقط.

الحمد لله كاندشنو البداية الرسمية والحاسمة ديال la CAN 🔥!

تأهل واعر بعد ماتش كبير شفنا فيه قتالية وضغط وانضباط ورغبة كبيرة ديال اللعّابة من الدقيقة اللولة حتال ال90، هاد اللعب اللي جاب الثمار ديالو بتأهل مستحق 100٪؜ لنصف النهائي ✅.

الحمد لله قدرنا نحلّو جوج عُقد : عُقدة رُبع النهائي فعُقدة الفوز على الكاميرون اللي ماجاوش صراحة فهاد الماتش، قدرنا نحجموهم ديال بصّح ونربحوهم فles duels فالسما والأرض ⚔️.

شخصياً : أحسن ماتش شفت ديال المغرب من شحال هادي، حيت شفت فيه رغبة كبيرة حسّينا بيها من السونطر د الماتش، براڤو عليكم 👏🏻!

خلاصة القول باقي يلاه قلنا بسم الله باقي ما درنا والو، غايتبعنا ماتش صعيب ديال بصّح ضد واحد ف نيجيريا/الجزائر، خاص نحطّو رجلينا للأرض ونركزو مزيان فالهدف الواحد والأوحد إن شاء الله : 🏆.