28/08/2026
ليش طفلك بكرر نفس التصرف مع إنو بيعرف إنو ممنوع؟
بتوقفيه وبتشرحي له، وبيبين إنو فهم عليك
بس بعد شوي بيرجع بيعمل نفس الشي
وقتها طبيعي تسألي:
«طيب ما هو بيعرف إنو ممنوع، ليش عم يكرره؟»
في عدة أسباب ممكن تخلي الطفل يكرر التصرف، وواحد منها هو:
شو بيعتقد إنو هالتصرف عم يحققله؟
مثلا ممكن يكون معتقد:
«لما بعمل هالشي، ماما بتنتبهلي»
فمع إنو بيعرف إنو التصرف ممنوع، بيضل يكرره لأنو بنظره عم يساعده يحصل على انتباهك
مش لأنو قاعد عم يخطط كيف يزعجك أو يستفزك
بس لأنو مع الوقت تعلّم إنو هيدا التصرف بالذات بخليكي توقفي كل شي، تطلعي فيه وتحكي معه
وممكن طفل تاني يكون معتقد:
«لما برفض التعاون، يعني أنا اللي باخد القرار»
فبيكرر الرفض لأنو بهاللحظة بيحس إنو إله تأثير بالموقف، خصوصا إذا كان عم يتلقى أوامر وقرارات طول النهار وما عم يلاقي مساحة يختار فيها
هيدي المعتقدات مش أفكار واعية بيقعد الطفل وبيقولها بينه وبين حاله
هي استنتاجات داخلية بتتكون من خلال تجاربه، وبتأثر على الطريقة اللي بيتصرف فيها
يعني هو ممكن يعرف إنو هالتصرف بالذات ممنوع
وبنفس الوقت يكون معتقد إنو هيدا هو الطريق اللي بيساعده يحصل على شي داخلي بحاجة إله، متل الانتباه أو الشعور إنو إله تأثير وقرار
لهيك تكرار التصرف مش دايما يعني إنو ما عم يفهم عليكي
ومش بالضرورة يعني إنو الشرح ما وصل
ممكن يكون بعده ما لقى طريقة تانية أنسب يحصل فيها على هالحاجة
وهيدا أكيد ما يعني إنو نقبل التصرف أو نلغي الحد
إذا كان عم يضرب، منوقف الضرب
وإذا كان عم يعمل شي مؤذ أو غير مقبول، منحافظ على الحد
بس إذا ركزنا بس على سؤال:
«كيف بدي وقفه؟»
من دون ما نفهم شو عم يحققله هالتصرف باعتقاده، ممكن يوقف هلّق ويرجع يكرره بعدين، لأنو الحاجة بعدها موجودة والطريقة البديلة بعدها مش موجودة
وهون بتشتغل منهجية غيّري العدسة
ما منطلع بس على التصرف اللي قدامنا
منغيّر العدسة لنسأل:
شو عم يحاول طفلي يحقق من خلال هالتصرف؟
هل عم يحاول يلفت انتباهي؟
هل عم يحاول يحس إنو إله تأثير أو مساحة يقرر؟
وبعد ما نفهم، منقدر نحافظ على الحد ونعلّمه طريقة أنسب يحصل فيها على حاجته
لأن الهدف مش بس إنو نوقف التصرف بهاللحظة
الهدف كمان إنو نساعد الطفل يبني طريقة جديدة يتعامل فيها مع حاجاته بالمواقف الجاية
شو التصرف اللي بكرر طفلك رغم إنو بيعرف إنو ممنوع؟
24/08/2026
تخيلي هالموقف:
طلبت الأم من طفلها يوقف تصرف معيّن
طلع فيها وكمّل كأنها ما قالت شي
أم ممكن تفكر:
«إذا شدّيت عليه يمكن يزعل مني ويبعد عني»
وأم تانية تفكر:
«ما بدي هالموقف يقلب معركة، بمرقها هالمرة»
وأم ثالثة تشوف إنو عم يتخطى الحد اللي حطته، وإنو لازم يوقف هلّق
بينما أم رابعة تبلش تسأل حالها:
«شو الطريقة الصح لأتعامل معه؟ يمكن أنا ما عم اتصرف صح»
السلوك واحد
بس كل أم شافته من زاوية مختلفة
وكل زاوية كانت عم تحاول تحمي شي مهم:
الأولى عم تحاول تحمي العلاقة
الثانية عم تحاول تحمي الهدوء
الثالثة عم تحاول تحمي النظام
والرابعة عم تحاول تحمي شعورها إنها عم تعمل الصح
ولا وحدة منهن عم تختار هالتفسير بوعي كامل
غالبا بيطلع بسرعة تحت الضغط، وبيأثر على ردّها قبل ما تنتبه شو صار جواتها
فالأم اللي خايفة على العلاقة ممكن تتراجع عن الحد
واللي بدها الهدوء ممكن تتجنب المواجهة
واللي بدها النظام ممكن تشد أكتر
واللي بدها تعمل الصح ممكن تشك بكل قرار وتفكر زيادة قبل ما تتحرك
لهيك أوقات السؤال مش بس:
«كيف لازم رد على هالسلوك؟»
السؤال اللي بيسبق الرد هو:
«أنا كيف عم شوف هالموقف؟ وشو عم حاول أحمي بهاللحظة؟»
لأنو لما تنتبهي للعدسة اللي عم تشوفي الموقف من خلالها، بيصير عندك مساحة أكبر تختاري ردك بدل ما يطلع تلقائي
إنت شو أكتر شي بتحاولي تحمي وقت الموقف يتصعّد؟
1 العلاقة
2 الهدوء
3 النظام
4 شعورك إنك عم تعملي الصح
اكتبي الرقم بالتعليقات
#أمهات
20/08/2026
الوحدة بالأمومة مش دايما بتكون غياب الناس
أوقات بيكون الكل حواليك
بس ما حدا شايف قديش عم تتعبي
شو عم تفكري
وشو بعدك حاملة لحالك
مش ناقصك حدا يقلك «نحنا حدك»
قد ما ناقصك حدا ينتبه ويسأل:
شو فيني شيل عنك اليوم؟
حسيتي بهالنوع من الوحدة من قبل؟
11/08/2026
إمتى آخر مرة حدا سألك شو بتحبي أنت؟
يمكن صفنتي شوي
أو حاولت تتذكري شو كنت تحبي تعملي قبل ما يصير نهارك كله طلبات ومواعيد ومسؤوليات
الغريب إنك بتعرفي تجاوبي بسرعة لما السؤال يكون عن ولادك
شو أكلتهم المفضلة
شو ما بيحبوا
شو بيزعجهم
شو بيهديهم
مين عنده موعد
وشو ناقص كل واحد منهم
حتى التفاصيل الصغيرة بتتذكريها
لون القنينة اللي بحبها
الأكلة اللي ما بدها بصل
القميص اللي بيرتاح فيه
والكلمة اللي بتهديه وقت يزعل
بس لما السؤال يصير عنك أنت
شو بتحبي؟
شو بيريحك؟
شو بتحبي تعملي بوقت فراغك؟
يمكن ما تلاقي جواب حاضر
بين الطلبات والمواعيد والمسؤوليات
صرت طول الوقت عم تفكري بشو لازم ينعمل
وشو بعد ناقص
ومين بعده بحاجة منك
أما الأشياء اللي بتحبيها أنت
ضلت تنطر عجنب
وبعدها عجنب أكتر
لحد ما صار السؤال نفسه غريب عليك
الرجوع لإلك ما بده قرار كبير
ولا رحلة
ولا تغيير حياتك كلها
يمكن يبدأ بربع ساعة ما إلها هدف
بأغنية كنت تحبيها
بكتاب تركتيه
بمشي لحالك
أو حتى بفنجان قهوة تشربيه قبل ما يبرد
خبريني
شو أكتر شي مشتاقتله من حالك؟
يمكن لما تكتبيه
تتذكري من وين فيك تبلشي تعملي مساحة صغيرة إلك 🤍
#الأمومة
07/08/2026
طلبت من طفلك بهدوء مرة
ومرتين
وخمس مرات
بس ما تحرك إلا لما علي صوتك
وبعدها بتقعدي تلومي حالك
وبتقولي المرة الجاية رح ضل هادية وما رح صرخ
بس لما الصريخ يصير الطريقة الوحيدة اللي عم تعطي نتيجة
عقلك بيتعلم يرجعله أسرع كل مرة
لأنك عصبية أو لأنك ما عم تحاولي كفاية؟
ولا وحدة منن!
لأنك صرت متوقعة إن الهدوء ما رح ينفع
وإنك إذا ما عليت صوتك ما حدا رح يسمعك ولا رح يردّ
التغيير مش إنك تضغطي على حالك أكتر حتى تكوني هادية
التغيير بيبدأ لما نفهم كيف وصل الصريخ ليصير الأداة الوحيدة اللي عم تشتغل
وشو عم بيصير قبل ما توصليله
خبريني بصراحة
بتحسي إن أولادك ما بيسمعوك إلا لما تصرخي؟
وشو أكتر موقف بيتكرر معك؟ 💗
11/08/2026
07/08/2026