29/09/2026
郭賢霽 .y.chai 喺今早（29日）嘅男子反曲弓個人淘汰賽先勝蒙古選手Dorjsuren殺入 16強，喺領先4-0嘅局分下遭不丹對手Dorji Lam連追三局以6-4反勝，無緣8強。賽後佢感觸分享：「16強我應該可以贏，對手喺資格賽嘅成績低分過我，但一直以來我都係自己練，對自己無信心，唔信自己可以贏......」
淘汰賽嘅賽制係兩位選手一對一對抗，每局每人各射 3支箭，單局3箭分數加總較高者可得2分局點；平手則各得1分；落敗得0分。最先先獲得6分局點者即勝出。
喺32強阿霽三局分別射出27分、29分、29分，先得6分晉級；而喺緊隨嘅16強，阿霽開局表現出色，首兩局各射出28分，取得4-0領先。之後對手逐漸發力，第三局以28比25追回一局；第四局郭賢霽只射出23分，以兩分之差失局，比數變成4-4。決勝局郭賢霽射出10、9、9共28分，但Dorji Lam射出10、10、9共29分，阿霽以1分之差錯失哩局，止步16強。
阿霽早前喺26日嘅資格賽超水準發揮，射出678分，唔單止刷新個人最佳成績，排名第10進入淘汰賽可獲對賽優勢，而且哩個分數亦破咗香港紀錄。反曲弓賽事嘅滿分係720分，能夠突破670分大關，意味著平均每支箭必須射出9.3分以上（極高嘅10分率及極少失誤），咁係國際頂尖箭手嘅水平，但佢坦言賽前無預料到：「破自己紀錄冇咩特別好提，本來目標係今年11月嘅亞洲賽，無特別諗亞運嘅成績，但哩兩日嘅狀態係接近最好，亦令到我貪心咗，想繼續晉級。頭先嗰局我係應該贏，就係輸自己嘅心理質素唔夠好。」
以往港隊喺亞洲嘅列強中國、中華台北、印度和日本、韓國之間要喺淘汰賽躋身16強絕不容易，過去三次破港績都係佢自己不斷推進升級破自己紀錄，「而家大部份時間都係我自己練，會試唔同方法，例如自費去韓國、內地交流訓練，另外之前識咗個丹麥嘅複合弓世界冠軍，知道佢有用運動手環輔助訓練，我暫時試咗三個月都幾有效，真係幫到我調整到最佳狀態！」不過喺比賽時好睇心理狀態，佢無奈落淚：「我咁多年比賽都係輸，唔信自己贏到......我一直都係輸心理質素......」喺訓練上佢要獨自升級，但係運動員哩條路上佢並不孤單：「好多謝有好多教練、心理教練、物理治療師願意無償咁幫助我！返去我會再調整下，睇下點樣喺亞洲盃再表現好啲。」
📸SF&OC
#運動版圖 #熱話 #亞運 #名古屋亞運
