山系易拎作戰記錄

⭐️ 柏林馬拉松Double Start ⭐️

回想2015年第一次參加柏林馬拉松(Inline Skating)後，覺得點都要試一次跑埋個Running馬拉松，不過一直未有興趣同勇氣去試。如是者，2016年又去玩多次Inline Skating馬拉松，之後就有幾年無再參加呢個賽事。2019年因為一班學生家長萌起要挑戰呢個賽事既念頭，所以我又抱住”齊娃娃“一齊報咗名先既心態報咗名，又諗住試下抽埋Running馬拉松都無壞啫，點知一抽就中咗！🫢 原本2020年就要接受呢個Double Start既挑戰，點知遇上Covid-19，賽事無正常進行。2021年賽事有如期進行，但因為疫情未見明朗，加上回港最少要隔離14天，大隊最後都係決定再延期一年再去⋯🙄

黎到2022年，大家都覺得今年一定要”解決“呢件事，可謂非去不可！🔥 我都開始計劃我既目標時間同訓練時間表。年頭完成山賽HK100半程賽事後，計劃要放多啲時間落去Inline Skating同路跑訓練，當時定了以Inline Skating 1h 30m 以及Running 3h 30m為目標，希望可以做個Sub 5既記錄。點知屬於山系既我始終都只掛住上山，仲用咗原先應該用黎訓練既檔期去挑戰100K！🤪 另一邊箱又因為Inline Skating器材方面一直都搞唔掂，直情停止咗練習一段時間。🥲 去到8月，因為覺得賽事臨近，跑上山會容易受傷，連山都少上，月結里數低至80K！有見及此，唯有調整目標時間，將Running馬拉松的目標時間降低至4h，我就帶住Sub 5.5既目標出發去柏林喇！👉🏼👈🏼

2022.09.24 Inline Skating Marathon

Double Start 首先由 Inline Skating 開始，起跑時間係3:30pm，所以比賽當日基本上都係食訓食訓跟住就去比賽。🤪 因為我有作賽記錄，可以比隊友們早一組上線。又因為Inline Skating馬拉松好靠上唔上到一班好既列車，所以我選擇孤軍上路來換取較快同穩定既車隊以保留體力跑第二隻馬拉松。賽前一直未能處理好鞋既問題，仲搞到隻腳神經線受損，其實我對比賽鞋已經係近期度造既第三對鞋，只係練習咗兩次就上戰場喇！再加上腳傷令我好易踩到腳痺，所以其實都有啲擔心⋯🙄

2:30pm大隊出門出發去起步點，點知… 落雨！😵‍💫 大家都選用較進取既硬轆，喺呢個時候真係跣到HIHI！老公問我駛唔駛換轆，平時勁怕死既我又唔知點解忽然好老定咁答佢唔駛！😎 好彩最後停得切雨咋！唔係我都唔知點捱42K返黎！🙈

一起步已經有車隊form咗，咁我就梗係唔客氣跟住啦！跟咗幾K，雖然前面個女仔開頭又少少唔穩陣又跟唔到腳，但覺得速度唔錯就決定跟落去。今年路面情況係長期多人，保守估計平均都有30人喺附近，有時路窄都拆開咗3條隊其實真係有啲迫，好幾次因為太多人睇唔到路面狀況轆過啲凹凸位都好彩無事。😮‍💨 只係最誇張有一下睇唔到路差咗一隻腳上行人路真係嚇一嚇！🫣 不過最嚇人當然都係有人喺你身邊抄車，今年都唔算好險，印象中只有兩次要避人，同埋一次有人喺我後面應該炒得好甘我唔敢擰轉頭睇。🫣 其實你當自己揸緊賽車，成日都要睇住唔好被人攝埋黎，又要睇住啲走位同搶位，42K好快就過，最後以1hr27m無穿無爛完成！第一日達標YEAH！！✌🏻

2022.09.25 Running Marathon x 我的初馬

曾經有朋友提醒我，初馬就玩連馬唔好咁進取要做時間。其實我都係咁諗，我又缺乏長課練習，由頭到尾只係在出發前一星期跑咗一課30K，對於大家成日講既32K後撞牆領域我從未接觸過。🙈 但自問係有啲好勝，當知道要做到Sub 4其實只係需要keep到5:35 pace就得既時候，又覺得好似唔太難喎！🤪 於是寫晒啲時間上手，就睇下跟唔跟住上。😎

因為係初馬，無參考時間，我被安排到較後既組別起跑。一直都擔心會嚴重塞車結果又無喎！第1K已經可以開開心心開隻5:23，之後都繼續平穩地做住5:2x既步速。😜 去到7K位見唔到打氣團有少少失落 (及後先知原來係俾人補捉到的🙈)，過咗10K位有幾K跑快咗覺得要收收。去到15K位， 終於見到打氣團，首先係見到隊友Kason支大魚杆，跟住見到老公跟跑問我飲唔飲水，但我答咗一句”唔駛喇！急尿添呀！”⋯ 🙈 因為我好怕琴日打咗底今日啲肌肉會唔夠力，所以比平時啪多咗gel同水。18K開始腳重，琴日帶落黎既疲態開始浮現，不過步速依然跟得上，嗱嗱聲啪包抽筋水打打底先！😬 半程時間依然是理想的，但開始懷疑自己keep唔keep到下半程。就係呢個時候，我追上咗4小時既pacer，原本諗住跟返10K 8K先，但跑咗一陣覺得唔對路，都係自己走好了~ 走到27K，真心攰了，有少少跌過5:30，不過仲係目標速度內，唯有繼續放鬆跟實，咬住個pace，心諗唔抽筋我就可以捱落去架喇！😬 30K位，糾結咗15K，計咗一輪數，都係決定衝入廁所⋯⋯ 😮‍💨 最後12K，不停催眠自己好快到，不停同路邊既途人拍手分散注意力，途中唔知拍咗幾多個”Power Up“既紙牌。🍄 35K，好似就快到，但其實數數手指都仲有7K，路上越黎越多人做步兵，呢段路最慢跌過落5:43，唯有望下條逆走汗巾，叫自己都繼續頂住呀！💪🏼 38K入返市中心，氣氛又開始熱鬧，個人醒返啲！🤩 40K轉入最後路段，計過條數仲有20分鐘，只要唔係抽筋到行都行唔到就無問題架喇！見水站有可樂飲都整返半杯先，飲完開始加少少速，準備進入最後直路。🏃🏻‍♀️💨 真真正正黎到最後直線，好多途人打氣，亦都見到隊友打氣團，真係有撳掣向住布蘭登堡門衝埋佢，後來check返錶最快只衝到上4:35 pace，散了！最終以3h 52m 完成我的 Double start x 初馬。第二日達標 YEAH！！🥳

完成兩日賽事，究竟我可唔可以冠上香港首名女子柏林 Double finisher呢個名銜，還需要FC一下，但終於圓滿完成一個歷時兩年多既Project！🥳 感恩去年決定唔落場，又進行咗一年長途訓練，否則無可能以呢個時間完成。🙏🏻 跟住落黎都係會將focus放返落山賽先，但係都唔排除下年會再玩，繼續實行隨心而行，到時想點玩就點玩！💕

#滾軸溜冰
#跑步 #跑步女生 #跑步沒有奇蹟只有累積 #馬拉松 #柏林馬拉松

港島徑我又黎喇 - 4TUL Sec 2 (2021-12-23)

之前因為逆女，加上交通便利，經常喺港島操山，去到一個境界大家都以為我係住港島區，又問我係咪好鐘意港島徑！🙈 其實港島徑真係走到有啲悶，但今次因為4TUL Sec 2，我又黎喇！😎

比賽路線：太古 > 中環
距離：33.21km
爬升：1,326m
(資料由Garmin Forerunner 945提供🤪)

今次揀閒日玩，都有兩位街坊陪走真係幸福~ 🥰 由半主場太古起步，隨衛徑上小馬山至陽明山莊，呢段路可謂我走得最多次既路線之一。✌️ 因為一早知道油站裝修無得買補給，就順路去一去黃泥涌峽補一補先再進入港島徑路段。布力徑開始跟港島徑路線一直去到山頂，路上可謂再無補給點，唯有用Filter飲山水~ 同行幾次想撤，但被迫繼續，真係辛苦晒喇！🤗

上到山頂之後既路段可以話係最特別架喇！經舊山頂道落山真係斜到一個點...🙄 明明諗住慢慢行落去點知到最後都係變咗jog~🤭 落到中環市區係最好玩既，喺閙市人羣之中穿插，又跑馬路又跑天橋，直衝去碼頭終點作結！超爽！🤪

#越野跑 #跑山 #比賽 #虛擬賽 #山系 #山系女孩

Bello Bello Bello - Minions Run (2021-12-19)
久違了的路跑賽事！😃 打從一開始收到邀請，就好期待呢個賽事。近來都專注跑山，少練速度課，諗住短短4K嘉年華式賽事，食老本都應該唔失禮既，點知真係跑到斷氣咁制！🥵

比賽地點：西九文化區

距離：3.94km
爬升：10m (咁都要寫！🤪 山系係要睇爬升架嘛~🤓)
(資料由Garmin Forerunner 945提供🤪)

虛擬賽有虛擬賽好玩既地方，但實體賽始終都係嬴氣氛！一早去到會場，見到大家都一身Minions服飾好醒神呀，仲有好多Minions既打卡位添！😻 除咗玩比賽，仲可以見到一眾Runpic攝影師，又可以同一班跑步女生大使聚舊，真係凍到飛起都抵呀！👏🏼

起步前已經同朋友仔講明，大家一齊慢跑玩下算啦，身都唔熱就上線。🙄 估唔到啲朋友仔咁快，一起步就5分pace，對弱弱的我黎講真係有啲快，唯有死跟！😬 過咗1K，開始唔想講野，一來戴住口罩，二來朋友越跑越快，跟住開始跟唔到，放棄唔跟keep住自己pacing跑，最後avg都唔駛5分pace完成！真係無諗過身都無熱要跑呢個速度！辛苦死！😵‍💫

跑完之後就去攤位玩同逛逛，高高興興玩咗一個上午仲有半日可以用。同操一日山比較，又有另一種好處，期待下次再玩過啦！🤗

❤❤❤ 特別鳴謝各位攝影師美拍！

#比賽 #實體賽 #路跑 #山系 #山系女孩 #跑步女生 #西九文化區

傻的嗎？🤪 連啪30登 - 迷你十登 🖐🖐 (2021-12-14)

相信跑得山賽既跑手都一定聽過針山十登，自問就未有心理挑戰喇，今次有幸得 Blue Mountain Paul Sir 邀請參與迷你十登賽事，可以說是小試牛刀。比賽分3個路段，跑手可以自由選擇報玩幾多段，每段路各有特色，梗係建議大家玩晒啦！由於路程唔長，我就決定挑戰一日內玩晒佢喇！！！😎✌️

第一站 - 格仔山

比賽路線：聯合道與富安街交界閘口 > 樂富配水庫休憩花園 > 嘉諾撒聖家書院後門 (來回5次)

距離：6.44km
爬升：389m
(資料由Garmin Forerunner 945提供🤪)

格仔山路線雖然係整個系列最長既一條，但其實單程連上落都只有大概700米。最唔鐘意跑石屎斜路既我，都希望堅持跑晒佢💪 (但樓梯就真係無能為力喇！🙈 畢竟都仲要留力跑埋另外兩條線~)。咪睇佢路程短短走🖐個來回好似無乜野，原來都玩咗個成粒鐘，跑到肚餓，完成之後要嗱嗱聲去食飯，再去下一場。😋

第二站 - 京士柏

距離：3.88km
爬升：439m
(資料由Garmin Forerunner 945提供🤪)

比賽路線：油麻地救護站旁樓梯盡頭 > 油麻地配水庫休憩花園入口 > 京士柏咸水泵站外 (來回5次)

京士柏成日聽，但就真係第一次去！呢站第一個挑戰就係要放低架車，都搞咗一個鐘呀！如果唔係諗住一日走晒三場，真係應該搭公共交通工具黎~ 好啦！幾經辛苦終於可以開波！嘩！嗰條樓梯真係上極都唔完！ 上到去之後，仲要因為一次過睇咗三站既資訊，有少少混淆咗搞到行錯路~🙈 行返正路之後繼續剩下的4.5轉，結論係：路程係比第一站格仔山短一半，但仲爬升得多同辛苦！🥵

第三站 - 筲箕灣

距離：2.45km
爬升：238m
(資料由Garmin Forerunner 945提供🤪)

比賽路線：筲箕灣配水庫遊樂場旁邊樓梯 > 閘口 > 大潭郊野公園(鰂魚涌擴建部分)指示牌

終於黎到第三站，呢站係最短爬升最少，算係最易的一站~ 不過因為快要天黑，所以要嗱嗱聲走完佢。去到大潭郊野公園(鰂魚涌擴建部分)指示牌位置，感覺好新奇，好想繼續向前行睇下前面山路有啲咩，不過都係要下次先喇！👋

總結：

總距離：12.77km
爬升：1,066m
難易度 (由易到難)：筲箕灣 > 格仔山 > 京士柏

就係咁，我就一日玩咗"30登"！雖然係山界黎講，呢個里數加爬升係好小兒科，但我覺得玩山就係要有一種傻勁~ 回想自己呢一日所做的事，我都覺得自己"short short"地~🤣🤣

❤❤❤ 特別鳴謝老公做車手同攝影師！

#越野跑 #路跑 #跑山 #跑步 #比賽 #虛擬賽 #山系女孩 #迷你十登 #格仔山十登 #京士柏十登 #筲箕灣十登 #傻的嗎

🏅大考達標 Sub 8！- HK100 The Half Flex (2022-01-11)

早前一口氣報咗一堆比賽，HK100 The Half Flex 按計劃係最後一場，亦都係我既第一隻50K，所以一直視之為大考。借之前比賽作訓練，帳面上里數是充足的，亦作了一課後半段計時，最終決定以8小時為基本目標，再按當日狀態調節。最後因得到兩位神級隊友的星級Support支持，順利以7小時46分走畢我的第一隻 HK100 The Half~ 超級高興呀！😍🥳

比賽路線：北潭涌 > 西灣山 > 北潭凹 > 海下村 > 深涌 > 榕樹澳 > 北潭涌

距離：54.85km
爬升：2,320m
(資料由Garmin Forerunner 945提供🤪)

一早入到北潭涌，嘩好鬼凍呀！🥶 慢手慢腳執野，仲要過 "gear check", 俾人ban咗好多野🙊，但點都要袋返支防曬先🤣 作為長途賽初哥，真係唔知點做Planning，諗住就咁就落場跑架喇！好彩有師兄一手包辦分段計時同補給，總之記住做到分段目標就OK，唔需要迫得自己咁緊，唔好因為開段有力就走快咗，要學識留返啲力喺後段...🤯 唔理喇！真係好鬼凍！0810 開波！💪🏼

一開波係威係勢梗係跑啦！🏃🏻‍♀️💨 一口氣就跑到去東壩，壩上好大風，有時會被吹到跑唔到直線添！😓 途中亦遇到其他參賽者，淺談幾句已經夠氣氛，宜家反而唔慣多人~ 去到我地既第一個分段東壩，比預期快咗6分鐘，可以去個廁所先再繼續。✌🏼

跟住就朝住西灣山出發！對上一次順走麥徑上西灣山都唔記得係幾時lu~ 上山呢段路真係唔係好記得。為咗留力，呢段路開始揸Pole~ 篤下篤下又過咗西灣山，喺觀景台打張卡就衝落鹹田灣喇！😌 經過幾個灘既時候真係超大風！🌬 啲沙吹起晒好似沙漠咁！塊面都癡晒沙！頂帽又喺咁吹走，好狼狽但又覺得好好玩~ 🙈 落到鹹田比預算慢咗3分鐘，要加緊腳程同埋 Call 1 Call “MicPanda"先~📞🍚

行完沙灘睇完風景如畫既山水景之後，著咗個郊遊mode，接住落黎呢段上斜全程 Power Walk，仲有薑茶飲添！可唔可以唔跑喇？🤣 下一個灣到大灣，呢段路原來唔跟麥徑，穿少少草林，避一避風，從未黎過又覺得好新奇！🤪 之後接返出麥徑行啲超斜斜路，梗係繼續做步兵啦！落到赤徑就有外賣到喇！😋MicPanda送上椰子水，葡萄適同粟米瘦肉粥！一路向北潭坳行一路倒咗碗粥入口，覺得自己有啲型！🤣 好叻咁食得晒成碗粥，中途仲有兩隻狗狗帶路~😍 高高興興食完碗粥仲有幾步路先到馬路，jog埋佢啦！呢段快咗1分鐘，上半場完場比預期快咗2分鐘！一方面驚嘆師兄預時間準得有啲恐怖，另一方面開始擔心下半場會唔會跌速...🧐

下半場一開波就即上牛耳石山。因為啱啱食完野，都係預慢慢上。原來攞住支Pole篤下篤下20分鐘都唔駛就輕鬆到頂，跟住就可以跑喇！呢段路係我認為全程最好跑既一段！🤩 經過嶂上分差路口轉右向海下路方向繼續跑，一路落到海下路。呢段雖然係跑得好順，但畢竟走咗30K，都唔可以嬉皮笑臉咁講好似無跑過，完咗呢段都係食包BCAA先！呢段路又賺返6分鐘。✌🏼

轉入大灘郊遊徑，試路時都預想呢段路最難搞！石多又跑唔得快，又怕腳攰稍一失閃會抽筋或者扭親。😨 前半段還好的，後半段就難跑啲，索性又郊遊mode，補下防曬先！🤣 就係咁，行多過跑既一段路，竟然都賺咗2分鐘！不過去到海下去個廁所都唔見咗lu~🤷🏻‍♀️

臨入海下跑的一段石屎路，令腳攰得好快！過咗海下都係一大石屎路，平路 Jog 上斜 Power Walk 解決～ 好彩上完石屎路又有啲山路refresh返對腳，衝到落深涌，我終於捨得除風褸喇！🤣 哈哈！玩咗6個半鐘，我終於除外套喇！(其實當日真係好凍囉🥶) 呢段叻呀！賺咗11分鐘，可以慢慢打卡。😌

繼續上路就慘喇，石屎路去榕樹澳！😭 呢段路係我全程跑得最辛苦既一段，跑得慢仲要開始有啲喘氣，真係好討厭石屎路...囉！🙄 去到榕樹澳食多包BCAA就上最後一段斜喇！因為攰咗呢段上有少少上極都唔完既感覺，終於都係頂唔順，擔心最後路段跑唔郁，啪多包化學品，點知都未食完就上完喇！😓 嘩一見到落山就醒神喇，落鯽魚湖呢段又係落得勁爽！之前試路無預到原來鯽魚湖仲有一條上斜，今次記足全程，一早已經講明嗰條我無力跑架喇！點知用支Pole幫一幫又好快搞掂咗！落返大馬路，好快就到終點喇！🥳

其實因為我今次熄咗個Auto Lap，全程順住去無乜睇錶，只係聽下師兄報時知道下有無跟到時間表做野。(熟我既人就知我數口有幾差🙈，咁長途就算一路上睇錶，其實都計唔掂條數架喇！索性唔睇啦！🤪) 去到出返馬路一刻先認真望下：7小時40幾分，估唔到真係做到 Sub 8 呀 YEAH！！！大考合格！！！🥳👏🏼💪🏼

今次大考真係一個豪華團！😍 一定要多謝幕前幕後大功神Victor師兄👏🏼👏🏼👏🏼，仲有上星期操山先臨時俾我地拉落水既"MicPanda"創辦人Mic仔👏🏼👏🏼👏🏼，無你地護航我真係9粒鐘都搞唔掂！🙈 除咗做到好成績高興之餘，最重要係過程中學咗好多野，賽前安排、比賽策略、心態，連點做Support都學埋！😎 歡迎大家搵我做Support呀！🤗 (如果唔介意有人成日喺到講無謂野同傻笑~🤪)

#越野跑 #跑山 #比賽 #虛擬賽 #山系 #山系女孩

高速郊遊遇發哥 - 4TUL Sec 1 (2021-12-05)

4TUL - 4 Trails Ultra Loop 都係俾人導玩既！🙈 了解咗個比賽玩法，又真心覺得幾得意既！比賽全場189K，但用腳跑既係164K，差距就係搭車搭船既路程。玩完成個賽事，你就會喺香港地圖上畫咗一個大圈圈~ 真正癲癲地既，會一次過玩 One Go，我呢啲入世未深既，梗係分4次玩 4 in a row 啦！😌

2個月前先戰戰兢兢咁跑咗我第一隻45K山，今次呢場比賽心情已經變得好輕鬆，最主要係因為諗住Fun Run唔追時間，純綷黎玩畫圈圈 。😛 因為最近賽程緊密，定好日子諗住無人陪都會自己郊遊mode搞掂，結果都夾到4位師兄分段陪跑。😍😍

比賽路線：大帽山蓮姐 > 藍田

距離：45.8km
爬升：2,111m
(資料由Garmin Forerunner 945提供🤪)

頭段有音樂才子同攀石高手陪走，講明上斜唔跑輕輕鬆鬆由蓮姐行到上白波，跟著就開始jog喇！去到四方山，記住唔好唔好唔好再PK，俾兩位出口術大師大拋離，咁我梗係唔理佢地啦，佢地始終都要等埋我既~😏 追返佢地無幾耐我地就見到發哥喇！！！嗰下直情有技能解鎖既感覺！心諗我終於叫做上得山多喇！可惜遇見發哥既位置不便停低影相，打聲招呼之後就繼續上路喇 (事後先知原來發哥同行朋友粒粒都係⭐😳

落到鉛礦坳轉入衛徑，再黎一個環湖，雖然跑咗咁多次，但都仲係有一種跑極都唔完既感覺，不過都算輕鬆。過埋城門主壩去到燒烤場大抖，主要係因為要酙水，喺城門酙水係要俾少少耐性的。💦🤣 去到大埔道竟然有一位師兄撤退😔，接下落黎既路，除咗上斜，都係慢慢jog的，我知道師兄唔太情願的！哈！多謝你最終都陪我jog咗~😄

去到獅子亭，師兄話幫我買埋飲品，點知佢出黎既時候仲拎埋個盤，仲多咗一條蕉同一碗燒賣，嗰下真係覺得有啲搞笑，因為其實本身我係無諗住要停低食野的。🤣 Anyway, 補給好之後就上我認為係全程最悶既一段石屎上斜路。大約行咗25分鐘，臨轉上東洋山之前，師兄都撤了，自己繼續上東洋山。🤪

最近好多人上東洋山睇芒草，好彩當日都唔算多，唔駛塞車就上到頂，但落真係好漫長！😭 唔知幾時開始條路爛咗咁多，同一條路，感覺落仲耐過上。🤦🏻‍♀️ 同時因為我開住Live Track，知道幾位師兄喺度食緊花生，真係想答一句：做咩唔上黎一齊跑?！🤣 幾經辛苦落完東洋山，平路覆下msg發洩下當抖之後就繼續向井欄樹出發，搵另外兩位師兄繼續陪跑。

多謝兩位街坊師兄喺井欄樹等我，仲幫我買定補給，不過我去到既時候，有一位師兄唔見咗，原來係去咗廁所，因為佢係神級，我地直接無視走咗等佢後追！🤣 Join返之後講下笑下好快就走晒我地既後山，其實都開始有啲攰。落山仲要由油塘路跑到藍田，唔知點解一落石屎路就攰得好快，連平路都唔想跑，最後上斜反正唔追時間索性做步兵。7:41 完~ 🤣

其實唔push自己，得閒仲可以影吓相既，我就當郊遊，所以我啲郊遊老實說係預咗要跑的。🤣 為咗分別唔跑既真郊遊同要跑少少既郊遊，我鐘意師兄define的一種"高速郊遊"！😆🤩

#越野跑 #跑山 #比賽 #虛擬賽 #山系 #山系女孩

食🍌吖嗱 - 迷你四徑 衛奕信徑 (2021-11-21)

第3次挑戰呢條隊友稱之為地獄路段的賽線。👹 稱之為‘地獄’係因為正常黎講，應該係喺炎炎夏日舉行的。而礙於地理位置，補給站只能設於鶴藪水塘，但其實真正的大佬在其後，再加埋八仙嶺呢段山脊路，想當年我第1次參賽就有好多跑手缺水，要義工從終點搬水上山支援。而我幸得師兄提點，從CP打足2L水上路，再加上沿路提供凍飲，只求完賽不求成績先剛剛好捱到終點。😎✌ 事隔2年，玩法唔同了，今次我的目標是3小時內完成。💪💪

比賽路線：九龍坑山 > 鶴藪水塘 > 屏風山 > 黃嶺 > 八仙嶺 > 新娘潭路

距離：16.96km
爬升：1,269m
(資料由Garmin Forerunner 945提供🤪)

比賽當日有老公車去起點，本來是一件美事，可惜我當日係完全無胃口食早餐，好勉強塞咗半杯代餐落肚之後，買咗個包想啃埋佢都搞唔掂，食一啖已經想反胃，唯有放棄，做少少熱身，就等上線...😔😔

第3槍起步，一開始直跑去上九龍坑山樓梯入口，竟然中途已經兩度要諗一諗走邊度，明明上星期先行完，真係未瞓醒。😴 上九龍坑山路段都係靚靚樓梯級，總之就係俾啲耐性慢慢上，不過一黎就咁上，HR好快已經上Z4，其實心態上應該係要叫自己放慢啲，不過比賽就係見自己未死得就會繼續去，仲要都未到頂就已經俾後起步既師姐追到，結果大約一個鐘到達鶴藪水塘CP。🤪

真心講黎到CP已經有啲攰，想抖又想追時間，就喺義工幫手酙水既時候，心諗今朝無食早餐，食返條🍌都好，結果就好奢侈咁企咗喺CP食咗條🍌，仲邊食邊同義工們吹水， 跟住就準備打屏風山喇！🙄

再上呢段開始越上越慢，有時都要停一停抖下氣，一路上都追唔到前面既師姐們，心諗頭3應該都無乜可能，但Sub 3仍是要追的。上到黃嶺時，聽到有人喺後面跟住，擰轉頭一望係一位高高手既師姐，真心嚇親即刻讓路😱，跟住一路睇住佢輕輕鬆鬆的背影越黎越遠，真係好讚嘆點解可以咁勁！如果唔係疫情分槍跑，我應該都好難有咁樣既體驗，真係會激發到自己想要再練強啲💪💪！好啦，之後八仙嶺雖然上上落落，但都唔難處理既，畢竟幅度都唔多。上埋最後一個峰準備落之際，我仲有25分鐘，心諗真係50/50波，因為落埋八仙嶺其實都仲有一段路，都唔知跑唔跑得郁。🙈🐢

跟住落八仙嶺既時候跣咗一下，好彩又俾我救得返，雖然嗰下無抽，但要黎既始終都係要黎，落到平路跑兩步就真係想抽筋喇！係呢個時候，久違了既撒隆巴斯又要出場喇！✌ 搞咗幾分鐘，jog得返就可以加返速，我記得最後望錶係2:58，又想睇又要衝落山又驚PK，最後衝到去終點一睇：3:00:23 任務失敗！😭

❤❤❤ 特別鳴謝各位攝影師美拍！

#越野跑 #跑山 #比賽 #實體賽 #山系 #山系女孩 #迷你四徑 #衛奕信徑

損手爛腳45K初體驗 - 逆の女

打從2年前完成了幾次約20K的山賽，隊友就叫我試50K，未有信心做個靚時間，所以一直Say NO！🙅‍♀️ 疫情停晒所以賽事，決定轉一轉訓練模式，學習心率訓練，以身體而非時間為本，漸漸學識唔好亂衝，變相有利我去玩長途賽事，終於以最簡單而又唔足稱的港島徑作為我的第一個"50K"賽事。🥸

比賽路線：大浪灣 > 山頂 (柯士甸山遊樂場)

距離：45.67km
爬升：1,863m
(資料由Garmin Forerunner 945提供🤪)

今次比賽雖然只係虛擬賽，但由於我之前從未走過40K山或路，真心想試一試自己完全沒有概念的長途能力，所以都有認真去分段試咗幾次路，同時亦認真地次次行錯唔同既路段！🤪👏

作為長途新手 (其實係山界45K都好似唔算好長)，點都要搵啲Support幫吓手。因為唔想週末人多既時候玩，勞煩咗兩位師兄請假陪我閒日玩，8am未到就已經由大浪灣出發喇！(辛苦住大西北的師兄要搭頭班車了~) 🙏

一起步慢慢上，一路有師兄幫手提住keep心率，輕鬆上到龍脊。是日天陰陰又無雨，好舒服！😌 龍脊落土地灣之後，就開始人見人喊悶既引水道，可能因為天氣夠涼，比之前試路輕鬆好多就完成咗！👏 引水道之後就開始入大潭範圍，開始我認為係最甘的一段！由大潭上大風坳再上畢拿山，對我黎講已經唔陌生，為咗慳力基本上全程都係行。黎到呢度，比師兄預計我既速度快咗大概45分鐘！😁 (哈哈！有人睇小我喎~😏) 過咗小馬山個分叉位，又多一位師兄加入。因為錯誤預算時間，落渣甸山唔見咗個攝影師，落到黃泥涌峽又唔見CP！🤣🤣 於是唯有走落少少油站嗰度等啦CP黎啦！(其實on the way仲唔見咗個師兄，sorry為咗追時間...🙇‍♀️)

CP到咗之後大約逗留咗10分鐘，補給好之後就繼續上路喇~ 因為後段無補給，辛苦師兄們幫我孭水。😘 我唯有努力啲跑，快啲飲咁啲水啦！🤣 布力徑上斜俾人焗跑咗，好彩唔係好長啫！過埋中峽去到香港仔上水塘附近一個位走錯路！事後睇返係走錯咗向班納山方向，來回大約走多咗800m！又要投訴一下，明明有人話我可以唔駛認路，結果原來大家都唔熟路！😤 呢次仲要係我發現走錯，自問都算叻！🙈 (事關我係一個走針草帽都可以走錯路既人~) 走返啱路之後入咗一段感覺好長既林路，因為無乜試路既記憶，唔知佢幾時完，跑到覺得有啲攰，忍唔住行咗一段再啪咗包BCAA粉先再跑，應該係大概30K位置。跟住一路走，上埋薄扶林水塘道條斜路，再入最後一段林路就出事喇！⚠️⚠️⚠️

其實一入呢段林路我已經提唔起勁跑，都係全靠師兄一句跟住佢跑我先勉強跑下。是日Highlight黎喇！大約去到H012位置，跑緊一個轉彎位既時候，懷疑係踩斷咗一條組樹枝失平衡跌咗落左邊一級位置。第一下個感覺係右邊大脾有啲痺痛，諗住一定成腳花晒仲要唔知有無骨傷，望一望發覺大脾外側得3條靚靚貓爪痕個心即刻定一定。😹 雖然覺得隻腳係痛但都幾肯定唔係骨傷 (因為諗住大脾夠厚肉)~ 之後慢慢半爬半俾師兄"的"返上黎，再細心望一望傷口應該無咩大礙，仲諗住即走繼續衝7小時內完成 (當時係6小時8分鐘其實都有少少趕)。不過一跑啲血就流，被迫停低處理傷口，再跟住發現手指先係流得最多血同埋個位置好難貼膠布止血，結果要keep住個👌手跑！包好傷口之後跛住咁行咗一陣，之後基本上都可以正常返，心裡面仲計緊有無可能趕得切6字但其實都無咩信心，因為仲要上柯士甸山遊樂場。😩 唉算啦！反正唔係實體賽，都係想試下實力啫，都大約知架喇！

上到盧吉道，一方面覺得應該要跑，否則呢段石屎路都有排行，但另一方面又真係好唔想跑！😖 結果講掂數上嗰段唔跑，落嗰段先跑。最後竟然係覺得呢段路先係最危險，所以都係急急腳快啲跑埋佢喇！😨 盧吉道尾見到"攝影師"！臨尾都有張靚相影吓~✌️ 完成盧吉道仲要跑上去柯士甸山遊樂場，真心想講粗口！🤬 行咗頭段又死死地氣跑埋上去，終於7小時5分鐘完成！唯有下次再挑戰6字啦！🤪

❤❤❤ 特別鳴謝各位陪跑師兄！
日後有用得著小女子Support的時候，
一定會還返個人情俾大家~😘😘

#越野跑 #跑山 #比賽 #虛擬賽 #山系女孩 #逆の女 #港島徑

與雷神競賽敗走 - Lantau 2 Peaks ⛰⛰ (2021-10-03)

事源有師兄邀請夾玩Mix，一諗到昂坪救援徑加鳳凰再加大東，真係頭暈腳震。😵 但自認貪玩，輕輕諗咗一下都係去馬報名。為咗練爬升，操咗一次孖崗咁大把 (都係第一次去咋，仲要去第三次先上到)，其實我知係唔夠，不過賽前最擔心都唔係呢樣，而係無啦啦右腳腳掌痛，如果腳痛仲要落鳳凰大東真係... 😥 另外，由於上次交樽仔太驚險，今次俾足面落重本俾咗 $240 去做檢測。🤑

比賽路線：東涌 > 東澳古道 > 昂坪棧道 > 彌勒山郊遊徑 > 心經簡林 > 鳳凰山 > 長屻山 > 南大嶼郊遊徑 > 伯公坳...

距離：15.8km
爬升：1,196m
(資料由Garmin Forerunner 945提供🤪)

豪華級比賽體驗，6am 有專車接送，仲有埋早餐提供，咁梳乎去大嶼山比賽都係第一次！😍 (反而之前試過比賽唔知醒，甩頭甩髻咁趕出門口，再趕車趕船...)🙈 去到東涌起步點，真係久違了的比賽氣氛！ 🤩 掛住感受比賽人多的氣氛，都無認真熱身，望下望下 Wave 1 就起步喇！仲落咗一下大雨，好熱血呀！🌧 講下講下就到我地 Wave 5 起步，真係好耐無試過咁多人一齊起步喇！💪

一起步要跑大約 2K 去昂坪救援徑入口，途中見到彩虹呀！🌈 真係要停低影返張相先~ 去到救援徑，開始上山喇！嘩！塞車塞到呢... 師兄不停俾手勢叫我過人，一路過一路擔心陣間仲有無力上兩座大山架！🙉 因為無幾耐之前落咗雨，棧道好滑，好彩係上啫！上完棧道可以抖一抖，跑返一段平坦既彌勒山郊遊徑去到昂坪既 CP1~

過咗 CP 行一陣就開始打一個大佬鳳凰山，第一次由心經簡林嗰邊上，落就走過幾次，都記得係好大級，終於都有今日喇，今次到上！😵 俾師兄迫住唔可以停 (但其實隔唔中都有停10秒抖一抖既)~ 一路嘈住辛苦咁上山，發覺周邊真係無人講野，同時又過咗唔少大隻佬！🤣 其實上鳳凰山呢段林真係有啲悶所以覺得特別攰，但之後上到斬柴坳，景觀開始開揚，又成個人醒返晒！🤩 跟著好快就上到鳳凰山！師兄話我地大概用咗45分鐘~

上到鳳凰山坐咗一陣就開始趕落山，同時聽到雷聲越黎越響！臨落到伯公坳 CP2 仲要兜一兜長屻山再加南大嶼郊遊徑，嗰時入林黑到心諗無頭燈添！🙊 呢段路因為無試路又無睇地圖既關係，唔知道原來咁鬼長！仲諗住就黎到 CP2 再上大東所以無跑，事後就發覺蝕呀！！！😫 話時話，今次持住有人帶，連比賽路線圖都無睇過就跑，真係大膽！🤫 半行半 jog 咗一輪，終於到達伯公坳 CP2, 跟住收到比賽因雷暴要腰斬既消息，兩個人都唔知點反應，又中又英問咗好幾次先肯停錶。跟住望一望時間，先係10點幾，唯有轉去郊遊再返東涌啦！🤪

郊遊完返東涌"終點"，大會人員仲有喺度等參賽者，仲有得扮衝線影相，做戲做全套，掛返嗰號碼布"衝線"先~

總結一下個比賽：
新組合...
有彩虹...
被腰斬...
轉郊遊...
扮衝線...
都算係一個特別的體驗！🤣🤣🤣

有無覺得完成唔到好可惜？🤨
當日黎講係無！因為本身都係諗住 Fun Race, 又無好努力操練，又無試路，隻腳捱得過去已經滿足！但賽後啲報導一出，見到各位高手趕得切通過 CP, 又好想自己係其中一個，唯有繼續努力操練啦！💪💪

❤❤❤ 特別鳴謝各位攝影師美拍！

#越野跑 #跑山 #比賽 #實體賽 #山系女孩 #鳳凰徑

疫情後第一個實體賽 - 迷你四徑 港島徑 (2021-09-12)

其實今次已經係第三次報名玩呢個比賽。第一次是2019年，可說是我的正式"出道"賽。當年玩完7.5km港島徑賽事，辛苦得要命！心諗餘下三場更長，點算？點知玩下玩下，又捱得過去。試過一次之後，覺得自己有能力做得更好，2020年再報，結果因為疫情關係，虛擬版賽事延遲到今年2月至3月才完成。半年後，終於有實體版玩喇！🤗

比賽路線：大潭水塘南門 > 大風坳 > 畢拿山 > 渣甸山 > 大潭水塘道休憩處

距離：7.9km
爬升：485m
(資料由Garmin Forerunner 945提供🤪)

其實上年曾經好好地準備過呢一場賽事，反而今年就無，所以對自己的表現都半信半疑。加上最近操山覺得自己跑上斜比以前更弱，諗起一起步就要花大約半小時上大風坳再上畢拿山，都已經唔想跑。🙈

今次比賽事前仲要準備多一件事，就係要去交樽仔！宜家參加實體賽，除咗要打齊兩針，仲要有48小時內的陰性檢測報告。星期五早上交樽，星期六晚9點先收到短訊，都咪話唔驚！😨

好啦講返比賽當日，一早坐私家車去起步點，休休閒閒咁等開賽，熱身做下教練教既協調動作，想令自己陣間跑既腳步輕啲。然後陸續見到其他參賽者到，但無乜熟悉既面孔 (原本有但有人遲到囉😕)。疫情關係參賽者要分組起步，分散咗唔駛塞車其實都幾好，不過就唔太確定自己排名，變相要搏足全程。🤨

0905 第二組起步，一起步要跑一段石屎平路，完全唔識控制 pace, 跟人跑咗 1K 開 5:20 HR 開始掂到 Zone 3 (弱到呢~😫)！心知不妙立即減速上斜，結果都未上到水壩已經做步兵。🤦‍♀️ 由做步兵的一刻開始，已經唔想睇錶，因為覺得一定追唔返之前既時間。跑過水壩後的一段都係繼續半行半跑上斜，望住前面師姐身影漸遠都有啲著急，但又真心唔想跑，點知上到大風坳水站見返面！😶 原本唔諗住埋水站，但都係想當抖一抖，搵工作人員幫手酙水，之後就上畢拿山喇！💪

上到山頂終於見到熟悉既面孔，但因為天氣太熱，個人真係有啲攰，見到攝影師們都無乜心機打招呼就路過呀 sorry~🙇‍♀️ 呢度亦有隊友加入陪走，第一次陪我比賽希望無俾我嘈親！🤣 因為我比賽或操山走得辛苦既時候，係會成日鬼晒咁嘈！但同我操開山既就知，當我唔出聲既時候，反而係開始唔正常~😑 Anyway, 上完個畢拿山落一少段隻腳都實實地，跟住見到老公影相又係無暇做“表情管理”就走過。跟住就開始走出樹蔭，同烈陽玩遊戲喇！🥵

上渣甸山曬住個背脊好熱爆爆地，好彩有隊友同其他參賽者一齊行，心諗捱到上頂就搞掂！落山既時候追返第一組既參賽者，即係話我追返嗰5分鐘，心裡暗喜之餘又驚俾下一組既人追到，於是都係 keep 住跑。出咗山徑轉入大潭水塘道落山繼續加速，事後睇返 record 最快衝到 3:18 pace！衝線一刻望一望錶，雖然做唔到理想時間，但都俾 2 月時 PB 咗 1 分鐘~ 都算收貨架喇！🥳

究竟點解可以大熱天時，上斜做埋步兵，又停埋水站都仲快過之前，係我衝終點後滿腦子的一個謎~ 🤔 究竟我喺邊度追返啲時間架呢？下回分解！🤪

❤❤❤ 特別鳴謝各位攝影師美拍！

#越野跑 #跑山 #比賽 #實體賽 #山系女孩 #迷你四徑 #港島徑

事隔1年零8個月，終於有翻啲山系實體賽事喇！😭 係時候restart個Page，記錄一下我的作戰過程！😆 First log Coming Soon~ 😎

📸 DY 隨手影

最近有新想法，想暫停一下競賽mode，輕輕鬆鬆四圍跑郊遊mode 😌

Relive '寶琳南路 茅湖仔' View my run: 寶琳南路 茅湖仔