11/07/2025
ملخص 20 سنة شغل ..
1- وقت الصلاه بنسيب الشغل .
2- و فى السماء رزقكم و ما توعدون .
3- ملكش دعوه بحد .
4- ملكش دعوه بنجاح غيرك .
5- ركز مع نفسك و مع نقط قوتك و ضعفك .
6- الدنيا مبتديش عايز خليك قنوع .
7- " و أن ليس للإنسان إلا ما سعى "
8-متجمعش الصلوات مع بعض .
9- مدخلش عيالك مدارس ب 100 الف جنيه و دخلك ميستحملش ده ..
متجيش على رفاهيتهم و استقرارهم النفسى..
الفسح / الخروج/ السفر/ نتغدى برا يوم دى مش " رفاهيات"
دى حاجه مهمه .
10- كلنا بنحتاج لبعض .. متخسرش الناس .
11- خليك سيره طيبه الدنيا مش مستاهله .
12- الشغل علاقات كون علاقات قويه جداً و أتعلم منها .
13- أسمع اكتر ما تتكلم .
14- " كتر خيرك / ربنا يوسع عليك / تسلم إيدك /
محدش بيخلص الحاجات دى زيك ".. كلام بسيط بس مهم جداً .
15- حط نفسك مكان مديرك / مكان الأقل منك و الأعلى منك .
16- متشتمش الناس و المكان و العيشه و إلا عايشنها ..
و تنشر طاقه سلبيه مش عايز " امشى" .
17- الفلوس مش كل حاجه و الله العظيم .
18- مش هتقبض 20الف جنيه أول ما تتخرج .
19- اعرف السوق عايزه ايه و أعرف أنت فين و بتعمل ايه بظبط .
20- متصليش المغرب مع العشا عشان المغرب بتأذن و أنت على دائرى ..
رتب مواعيدك على مواعيد الصلاه " ده طوق النجاه الوحيد " .
21- حط نفسك مكان الناس قدرهم / أحتويهم / حس بيهم / أعذرهم .
22- الكورسات / الدبلومات/ شهاده التخرج / الماجستير
مش هم الخبره .. ده يدوبك أول الطريق .
23- مفيش علم بيقل من صاحبه أتعلم و فرهد نفسك علم .
24- متيأسش .. رزق ربنا واسع الدنيا كبيره ❤
25- كل مكان أشتغلت فى خلي بينك و بينه خيط ..
يسمحلك تعدى عليه و تسلم على ناسه من وقت لتانى .
26- صاحبك لا تناسبه و لا تشاركه .. بس لو قررت تشتغل معاه ..
خليكم جدعان كدا و مدخلوش مشاكل الشغل بينكم .
27-متخسرش صاحب جدع و ابن أصول عشان أى حاجه فى دنيا .
28- ارضى عن نفسك و راضيها متجلدش نفسك كل يوم بليل
"كن حنون على نفسك " .
29- أصحى كل يوم الصبح عندك استعداد تنتج و احمد ربنا على رزقه و كرسى إلا مستنيك و مكتبك و ادعى ربنا يديمها عليك نعمه .
30- خليك بسيط متتكبرش على ناس و تتعالى عليهم .. كلنا زى بعض ..
هى بس اختلاف ظروف الحياه و اقدار الله .
31- خطط صح و بص لهدف أبعد .. اترزع مليون مره فى حيطه
و لا إنك تبطل تجتهد و تسعى .
32- الدعاء ب " سعه الرزق و الصبر و الرضا " .
33- الوقت عمره ما أتأخر عشان تبقى حاجه .. براحه على نفسك .
34- كلنا مسئولين .. دخلك ميخصكش لوحدك ..
ركز كويس و اعرف إنك لازم تتصدق منه و تزكى منه .
35- إن لبدنك عليك حق .
36 - أهلك و عيلتك و أصحابك فى المقام الأول .
37- متستخسرش فى نفسك خروجه غاليه و لا شويه لبس ..
اتبسط و عيش حياتك .
38- متخسرش نفسك / أخلاقك /مباددئك / أحلامك عشان تعجب حد .
39- الشغل مجرد وسيله لنعيش حياه أفضل مش أكتر و لا أقل .
40 -إستخير ربنا قبل كل شيء ....وإستعين بالله قبل كل شيء
وقبل كل دا......توكل على الله في كل شيء وكفي بالله وكيلا
Cpd منقول
22/05/2025
08/05/2025
06/05/2025
06/02/2025
16/01/2025