Kareem Esmail

الحمد لله أنا شغال في التعليم من ٢٠١٤
وخلال كل السنين دي واحد من أهم الدروس اللي اتعلمتها، إن بناء النفس وتأسيسها أهم بكتير من البحث عن tips سريعة لمشاكل محددة بعينها.

وللأسف السائد هو عكس ذلك، الإنسان بينتظر يخبط في الحيطة في موضوع وبعد كدا يبدأ يدور على حاجة تحل المشكلة بتاعت الموضوع ده.

التحدي الحقيقي إن كل الوسائل اللي ممكن يتعلمها محتاجة يكون عنده بناء نفسي متين عشان يقدر يطبق!

وأكيد ممكن تلاحظ ده من كم النصائح الجيدة اللي انت عارفها ومش قادر تطبقها.

ولذلك الحمد لله إحنا بدأنا رحلة لمدة سنة كاملة سميناها "منهج الطمأنينة"
رحلة لبناء النفس والفكر اللي يقدر هو يواجه بعد كدا صعوبات الحياة.

رحلة تفكيك وتحليل للواقع، وبناء عقلية تقدر هي تتصرف وتقيم اللي بتمر بيه وتغيره.

التغيير العميق اللي بيحصل في الفكر مش سهل حد يوصفه بس بيحس بيه اللي جربه.
بيحس إنه بدأ يشوف الحياة بنضارة جديدة
توجهاته بتتغير، أولوياته بتتغير، مشاعره بتنضج ونفسه بتهدى

منهج الطمأنينة رحلة مبنية بشكل يناسب ثقافتنا وعقيدتنا المتزنة
حالياً خلصنا أول وحدتين الحمد لله "البناء التأسيسي" ٤ محاضرات
و "الأثر النفسي للشيطان" ٣ محاضرات ويوم ٣٠ إن شاء الله هيكون عندنا الجلسة التفاعلية للأسئلة

وإن شاء الله في أغسطس هنبدأ رحلة جديدة داخل المنهج مع "سورة يوسف" وبناء المرونة النفسية والقوة من أحسن القصص.

نسأل الله التوفيق

الحقيقة انا مخضوض وحامد لله وممتن بشكل استثنائي!!

الحمد لله أولاً وشكرًا بجد لكل حد جيه من الساعة ٢ وانتظر المحاضرة
وكل حد جيه ووقف كتير، ولما قالولي في قاعات تانية بتتفتح وبقا في ٣ أماكن غير القاعة الكبرى بيتم بث المحاضرة فيها ولسه في ناس بره ماعرفتش تدخل

انا فعلاً مابقتش مستوعب ولا قادر اعمل اي حاجة غير إني أحمد الله
وأقولكم يا اهل اسكندرية (والمحافظات المجاورة) كتر ألف خيركم
وربنا يبارك فيكم ويسعدكم ويجبر بخاطركم

وشكرًا لكل حد نزل من بيته عشان يجي يسمعني
واتمنى ان المحاضرة تكون مفيدة ونافعة واشوفكم تاني على خير لو ربنا كتبلنا لقاء 🌱🤍🥹

وبجد كل الشكر للعاملين في مكتبة اسكندرية على كل الجهد العظيم اللي عاملينه عشان ينظموا المحاضرة
والجهد الكبير في السماح لأكبر عدد من الناس يحضر

وأخص بالشكر أستاذي واخي محمد غنيمة على الدعوة والاستضافة الطيبة

واخص بالشكر، الاساتذة الطيبين اللي كانوا بيترجموا المحاضرة لاخواتنا من الصم وضعاف السمع, وبجد كنت سعيد بوجودكم بشكل لا تتخيلوه🥹🥹

جزاكم الله خيرا
واعتذاري لاي حد ماعرفش يدخل
بس بجد والله ماحدش كان عنده حاجة يعملها وماحصلتش

نشوفكم على خير دايمًا 🙏🏻

الهواء هنا بيدخل على القلب 🥹🤍

الحاجة الوحيدة اللي أحلى من بحر وهواء اسكندرية هو أهلها وناسها، ربنا يديم علينا لقائكم🌱

متحمس اشوفكم بكرة ان شاء الله في مكتبة اسكندرية في القاعة الكبرى

الساعة ٥:٠٠ م
الدخول بدون حجز / بأولوية الحضور

نشوفكم على خير
ودعواتكم بالتوفيق

نداء عاجل لأهل الأسكندرية الكرام 📣

موعدنا السنوي (الله يديمه علينا نعمة) في فاعليات معرض الكتاب يوم الجمعة القادم ١٧ يوليو الساعة ٥:٠٠ م إن شاء الله

في مكتبة الأسكندرية، القاعة الكبرى

الدعوة عامة، والدخول باسبقية الحضور ووجودكم هو أكبر هدية لينا 🌱🤍

اللي حضروا السنتين اللي فاتوا عارفين قد ايه اللقاء ده غالي عليا
ونشوفكم دايمًا على خير يارب 🤲🏻