Grow with Naglaa

⁨ أوقات كتير بنقضي وقت طويل بندور على حل … قبل ما نسأل نفسنا السؤال الصح.

لما يبقى كل تركيزك على اللي مش عايزه … بتفضل بتجري بعيد عنه.

لكن لما تعرف إنت عايز توصل لإيه … قراراتك تبدأ تبقى أوضح وخطواتك يبقى ليها معنى.

يمكن الفرق كله … مش في المجهود.
يمكن الفرق في الاتجاه.

⁩

⁨ إحنا ساعات بنفتكر إن أي هدف جديد معناه إننا عارفين إحنا رايحين فين بس الحقيقة مش دايمًا كده.

ممكن تبقى بتجري عشان تثبت نفسك، أو عشان تهرب من خوف، أو عشان تسكت إحساس مش مريح.

وساعتها … حتى لو وصلت للهدف … ممكن تكتشف إنك لسه مش مرتاح، علشان المشكلة ما كانتش في المكان اللي كنت عايز توصله، كانت في السبب اللي خلاك تبدأ الرحلة من الأساس.

قبل ما تحط هدف جديد … اسأل نفسك:
أنا رايح للحاجة دي … لأنها فعلًا مهمة بالنسبالي؟ ولا عشان أبعد عن حاجة مش عايز أواجهها؟

الإجابة على السؤال ده … ممكن تغيّر الطريق كله.

⁩

⁨ إحنا ساعات بنحكم على نفسنا من تصرف واحد … وننسى إن نفسنا دي ممكن تتصرف بشكل مختلف جدًا من علاقة للتانية.

ممكن مع شخص تحس إنك مرتاح، تلقائي، وبتقول اللي جواك من غير ما تفكر.

ومع شخص تاني … تلاقي نفسك بتراجع كل كلمة، أو بتسكت، أو بتتوتر، أو حتى بتبقى شخص مش شبهك.

وده مش معناه إنك “منافق” أو “شخصيتك ضعيفة”. في أوقات كتير … معناه إن العلاقة نفسها بتطلع منك نسخة مختلفة.

علشان كده … قبل ما تحط على نفسك أي صفة … اسأل نفسك: أنا بتصرف كده مع كل الناس؟ ولا مع ناس معينة بس؟

السؤال ده لوحده … ممكن يغير الطريقة اللي بتفهم بيها نفسك … والطريقة اللي بتختار بيها علاقاتك.

إيه أكتر علاقة بتحس فيها إنك على طبيعتك؟

‏ ⁩

⁨ فيه فرق كبير بين إنك تسمع رأي … وبين إنك تبني صورتك عن نفسك عليه.

كلنا بنتعرض لتعليقات طول الوقت، فيه اللي يشوفك قوي، وفيه اللي يشوفك ضعيف، وفيه اللي يشوفك طموح، وفيه اللي يشوفك أناني.

كل واحد بيحكم من زاويته … ومن تجاربه … ومن اللي هو شايفه.

المشكلة مش إن الناس ليها آراء، المشكلة لما ننسى إن رأيهم مش هو الحقيقة.

وإن أخطر حاجة ممكن تحصل … إننا نكرر كلام اتقال عننا … لحد ما نفتكره صوتنا إحنا.

يمكن النهارده يكون سؤال واحد كفاية: فيه فكرة عن نفسك إنت متأكد إنها جاية من تجربتك؟ ولا فضلت معاك لأنها اتقالت كتير؟

⁩

⁨ إحنا بنراجع موبايلاتنا، وبنراجع حساباتنا، وبنراجع شغلنا، بس قليل أوي لما نقف ونبص على الطريقة اللي عايشين بيها.

ومع الوقت حاجة عملناها في وقت معين بتبقى هي طريقتنا في كل حاجة.

وحاجة كانت مناسبة وقتها تكمل معانا سنين حتى لو بطلت تنفع.

عشان كده، قبل ما تفكر هتغيّر إيه اسأل نفسك:
الطريقة اللي ماشي بيها لحد دلوقتي … لسه مناسبة ليك؟ ولا إنت مكمل فيها بس لأنك اتعودت عليها؟

سؤال صغير … بس ممكن يغيّر نظرتك لحاجات كتير.

⁩

⁨ كتير مننا بيفتكر إن التغيير معناه إننا نبطل نغلط لكن الحقيقة مختلفة شوية.

التغيير الحقيقي مش إنك تنجح مرة ولا إنك تفتكر تعمل الصح كل يوم.

التغيير الحقيقي إنك تلاقي نفسك بتتصرف بشكل مختلف … من غير ما تقعد تقنع نفسك كل مرة.

في الأول، أي حاجة جديدة بتحتاج مجهود وده طبيعي.

لكن لو بعد فترة طويلة لسه كل موقف محتاج نفس الصراع الداخلي، ونفس الإقناع، ونفس القرار … يمكن المشكلة مش إنك ضعيف, يمكن التغيير لسه ما بقاش جزء منك.

وده بياخد وقت وتكرار وممارسة.

عشان كده، ما تقيسش تقدمك بعدد المرات اللي نجحت فيها.

اسأل نفسك سؤال أبسط:
إيه الحاجة اللي زمان كنت بتجاهد نفسك عشان تعملها … وبقت دلوقتي بتطلع منك بشكل طبيعي؟

دي غالبًا علامة إن التغيير بدأ يثبت.

لو البوست حرك حاجة جواك، احفظه وارجع له بعد كام شهر … وشوف إيه اللي بقى طبيعي عندك من غير ما تاخد بالك.





⁩

⁨ إحنا كلنا عندنا تصرفات بقينا بنعملها من غير ما نفكر مش لأنها صح أو غلط لكن لأنها في وقت من الأوقات جابت نتيجة فبقينا نكررها.

بس المشكلة إن الحياة بتتغير … وإحنا كمان بنتغير واللي كان بينفع في مرحلة … مش لازم يفضل بينفع بعد كده.

عشان كده، كل فترة محتاجين نقف مع نفسنا ونسأل: هو اللي بعمله ده … لسه مناسب لحياتي؟ ولا أنا بكرره بس لأني متعود عليه؟

قولولي … إيه أكتر تصرف اكتشفتوا إنه كان بينفعكم زمان، وبقى بيتعبكم دلوقتي؟

⁩

⁨ إحنا غالبًا بنتوقع إن التغيير يبقى واضح ومفاجئ، نصحى يوم ونحس إننا بقينا شخص مختلف.

بس الحقيقة غير كده.

التغيير الحقيقي بيحصل في الحاجات الصغيرة اللي بتتكرر كل يوم، في رد فعل هدي شوية، في قرار أخدته بطريقة مختلفة، في موقف زمان كان بيكسرك … ودلوقتي عديته بهدوء.

ولأن التغيير بيحصل بالتدريج، ساعات وإنت في نص الرحلة بتحس إن مافيش حاجة اتغيرت.

بس أول ما تبص وراك … هتكتشف إن طريقة تفكيرك اختلفت، وإن اختياراتك بقت مختلفة، وإن حاجات كانت بتستنزفك زمان … مبقتش ليها نفس التأثير.

علشان كده، ماتقيسش نموك كل يوم. بص كل فترة ورا … وساعتها غالبًا هتشوف قد إيه إنت مشيت أكتر مما كنت متخيل

⁩