Grow with Naglaa

يمكن طول عمرك فاكر إن الغِنى رقم لازم توصله، رقم في البنك، بيت أكبر، عربية أحسن، دخل أعلى.

بس جرّب تسأل نفسك: أنا عايز كل ده ليه؟

ممكن تكتشف إنك مش بتجري ورا الرقم نفسه، إنت بتجري ورا الإحساس اللي فاكر إن الرقم ده هيخليك تحسه.

الأمان، الحرية، الراحة، إن يبقى عندك اختيار، إنك ما تفضلش شايل هم بكرة.

وساعتها السؤال مش هيبقى:
«محتاج كام علشان أبقى غني؟»

هيبقى:
«يعني إيه غني بالنسبالي أنا؟»

لأن ممكن حد يبقى عنده كتير جدًا، وبرضه حاسس إنه محتاج أكتر، وحد تاني عارف إيه اللي يكفيه، وعنده حرية يختار ويعيش بالشكل اللي هو عايزه.

الغِنى مش معناه واحد عند كل الناس.

يمكن الأهم إنك ما تفضلش طول عمرك بتجري ورا رقم، من غير ما تعرف إنت أصلًا مستني تحس بإيه لما توصله.

ممكن تكون عامل حاجات كتير كويسة، وبرضه تحس إنك لسه مش كفاية.

مش لأنك فعلًا مش كفاية، لكن لأن كل ما توصل لحاجة، ترفع السقف أكتر.

نجحت؟ كان ممكن تنجح أكتر.
عملت حاجة كويسة؟ كان ممكن تعملها أحسن.
حد قدّرك؟ لسه محتاج تثبت أكتر.

فتفضل طول الوقت بتجري ورا نسخة منك مش بتوصل لها أبدًا.

وهنا السؤال مش بس: أنا شايف نفسي إزاي؟

السؤال كمان: المعايير اللي بحاسب نفسي عليها عادلة أصلًا؟

لأن ساعات اللي محتاج يتغيّر مش إنت، اللي محتاج يتغيّر هو المقياس اللي بتحكم بيه على نفسك.

ساعات المشكلة مش إنك مش عارف تعمل إيه.

إنت غالبًا عارف, عارف إنك محتاج تبطل تأجيل, وعارف إنك محتاج تقول «لأ», وعارف كمان إنك مش لازم توافق على كل حاجة علشان محدش يزعل منك.

بس مع كده بتلاقي نفسك بترجع تعمل نفس الحاجة تاني, ليه؟ لأننا ساعات بنحاول نغيّر اللي بنعمله بسرعة، من غير ما نفهم إحنا بنعمله ليه من الأساس.

التسويف مثلًا ممكن يكون بيبعدك شوية عن خوفك إنك تحاول وما تنجحش.

وإنك تقول «آه» لكل حاجة ممكن يكون أسهل من إنك تستحمل إن حد يزعل منك.

فعادي جدًا إنك تقول لنفسك:
«خلاص، مش هعمل كده تاني.»

وبعد شوية، تلاقي نفسك عملته تاني لأنك حاولت توقف اللي بتعمله، بس السبب اللي مخليك تعمله لسه موجود.

علشان كده، المرة الجاية لما تلاقي نفسك بتكرر حاجة إنت عارف إنها مش مريحاك، بدل ما تسأل:
«أنا ليه بعمل كده تاني؟»

اسأل نفسك:
«أنا باخد إيه من اللي بعمله ده؟»

يمكن لما تفهم الإجابة، تعرف تبدأ تغيّر من المكان الصح.

ساعات الفرق بين إنك تقول “أنا فشلت”، وإنك تقول “أنا لسه موصلتش”، بيبقى محاولة واحدة بس.

مش كل مرة هتجرب فيها هتنجح، ومش كل حاجة هتمشي زي ما إنت عايز.

بس كل مرة بتحاول، بتعرف أكتر: إيه اللي مظبطش؟ إيه اللي محتاج يتغير؟ وإيه اللي ممكن تعمله بطريقة مختلفة المرة الجاية؟

الخسارة مش معناها إنك تقف، ساعات معناها إنك تتعلم وتحاول تاني.

يمكن المحاولة الجاية هي اللي تفرق.

ممكن تكون ناجح، بتعرف تتكلم كويس، تاخد قرارات، والناس حواليك شايفينك شخص قوي وواثق.

ومع كل ده، غلطة صغيرة تخليك تشك في نفسك.

تعليق واحد يفضل في دماغك طول اليوم، وحاجة ما نجحتش فيها تخليك تنسى حاجات كتير نجحت فيها قبل كده.

لأن فيه فرق بين إنك تكون واثق إنك تقدر تعمل الحاجة، وإنك تكون من جواك شايف نفسك كويس.

ممكن تبقى عارف إنك شاطر في شغلك، بس أول ما تغلط تحس إنك مش كفاية.

ممكن تعرف تتصرف في أصعب المواقف، بس تفضل محتاج تسمع من اللي حواليك إنك عملت الصح.

وممكن تحقق نجاح ورا نجاح وبرضه كل مرة تحتاج نجاح جديد علشان تحس إنك كويس.

وساعتها، يمكن المشكلة مش إنك محتاج تبقى أنجح أو أقوى أو أوثق في نفسك.

يمكن السؤال الأهم:

أنا شايف نفسي إزاي لما الدنيا ما تمشيش زي ما أنا عايز؟

لأن إحساسك الحقيقي بنفسك مش بيبان بس وإنت ناجح، بيبان أكتر لما تغلط، أو حاجة ما تظبطش، أو ما تسمعش من الناس الكلام اللي كنت مستنيه.

ممكن تكون واثق جدًا في كلامك وقراراتك، بس ده مش معناه إنك من جواك حاسس بنفس القوة بقيمتك.

لأننا ساعات بنحط الثقة بالنفس، الاعتماد على النفس، وإحساسنا بقيمتنا كلهم تحت جملة واحدة:
“أنا واثق في نفسي.” بس كل واحدة فيهم معناها حاجة مختلفة.

ممكن تعرف تتكلم قدام ناس، تاخد قرارات، وتبان واثق، بس إحساسك بقيمتك يهتز أول ما تغلط أو حد ينتقدك.

وممكن تعرف تعتمد على نفسك وتتصرف وقت المشاكل، بس تفضل محتاج تحقق حاجة جديدة علشان تحس إنك كفاية.

وعشان كده، بدل ما تسأل:
“أنا واثق في نفسي ولا لأ؟”

اسأل نفسك: أنا واثق في إيه بالظبط؟ وإيه اللي بيتهز جوايا لما الدنيا تتغير؟

لما تعرف الفرق، هتعرف إيه اللي محتاج تشتغل عليه فعلًا.

طلب المساعدة مش معناه إنك سيبت مسؤولية التغيير لحد تاني.

ممكن حد يساعدك تشوف حاجة إنت مش واخد بالك منها، يسألك سؤال عمرك ما فكرت تسأله لنفسك، أو يساعدك ترتب أفكارك وتعرف تبدأ منين.

بس في الآخر محدش يقدر ياخد الخطوة مكانك.

ودي من أهم الحاجات في أي تغيير:

إنك ما تدورش على حد يحلّك حياتك، لكن على حد يساعدك تفهم نفسك أكتر، وتشوف قدامك أوضح، وبعدها إنت اللي تختار وإنت اللي تتحرك.

لأن المساعدة الصح مش بتخليك محتاج الشخص اللي بيساعدك أكتر.

بالعكس مع الوقت بتخليك تعرف تعتمد على نفسك أكتر.

فلو إنت فعلًا عايز حاجة تتغير، ما تسألش بس:
مين ممكن يساعدني؟

اسأل كمان:
وأنا مستعد أعمل إيه علشان الحاجة دي تتغير؟

ساعات بنكرر نفس التصرف سنين لحد ما ننسى إنه كان مجرد تصرف، ونبدأ نقول:
«أنا كده.»

أنا ما بعرفش أقول لأ، أنا عصبي، أنا لازم أعمل كل حاجة بنفسي، أنا ما بعرفش أطلب مساعدة، أنا مش اجتماعي.

ومع الوقت، الكلام ده ما بيبقاش بس حاجة بنعملها، بنبدأ نحس إن دي شخصيتنا وإن إحنا عمرنا ما هنتغير.

بس مش كل حاجة عملتها كتير تبقى شخصيتك، فيه حاجات اتعلمتها علشان تحمي نفسك، وحاجات اتعودت تعملها بسبب حاجات حصلت معاك، وحاجات فضلت تعملها لمجرد إن دي بقت أسهل طريقة بالنسبالك.

وعلشان كده، بدل ما تقول:
«أنا كده.»

جرب تسأل نفسك:
أنا فعلًا كده؟ ولا أنا بس اتعودت أتصرف كده؟

سؤال بسيط، بس ممكن يخليك تشوف نفسك بطريقة مختلفة تمامًا.