Lahzetqorb-لحظه قرب

01/09/2026

أيوه… درست تربية جنسية للأطفال.

وعارفة إن الجملة لوحدها كفاية تفتح 100 سؤال.

يعني إيه تربية جنسية لطفل؟
نبدأ من سن كام؟
نقول إيه وما نقولش إيه؟
ولو سأل سؤال محرج؟
ولو شاف حاجة على الإنترنت؟
والبلوغ نتكلم عنه قبل ما يحصل ولا بعده؟

وعشان بصراحة المجال ده فيه كلام كتير متداول، وفيه خوف وكسوف ومعلومات مش دايمًا دقيقة…

كان مهم بالنسبة لي أدرسه.

وأفهم إيه اللي العلم بيقوله فعلًا.

الفترة الجاية هفتح الملف ده

مش كلام نظري.

هناخد مواقف بتحصل في بيوتنا فعلًا، ونشوف نتصرف فيها إزاي وليه.

وأنا عندي قائمة طويلة جدًا نبدأ بيها.

بس عايزة أول سؤال ييجي منكم.

لو مفيش كسوف ولا إحراج…

إيه السؤال اللي نفسك تسأليه عن التربية الجنسية لأولادك؟ #

30/08/2026

29/08/2026

أنا مخنوقة.

الكوتش اللي جواها "وإيه اللي محتاجاه دلوقتي؟"

أنا "بطاطس."

انتهت الجلسة بنجاح.

23/08/2026

لما تفكروا تخرجوا مع عيالكوا .....ودماغكوا شغاله
الكوتشينج كان ماشي حلو… لحد ما سألنا عيالنا

سنين دراسة وكورسات… والرد: مفيش يا ماما

22/08/2026

أوقات أكتر حاجة بتوجعنا مش إن حد زعل مننا...

لكن إنه حكم علينا من غير ما يسمعنا.

فسّر تصرف.
بنى عليه حكاية كاملة.
وبعدين عاملنا على أساس الحكاية دي كأنها حقيقة.

مع إن سؤال واحد كان ممكن يغيّر حاجات كتير.

"أنا فهمت منك كذا... ده فعلًا اللي كنتِ تقصديه؟"

في العلاقات، إحنا مش بنقرأ أفكار بعض.

وعشان كده الوضوح مهم.

لو زعلت، اتكلم.
لو حاجة وجعتك، عبّر عنها.
لو مش فاهم تصرف، اسأل قبل ما تفسّره.

وفي الناحية التانية...
مش كل حد فهمك غلط لازم تفضلي طول الوقت تحاولي تثبتي له نيتك.

إنتِ مسؤولة عن وضوحك.
مش مسؤولة عن كل تفسير يختاره غيرك.

حصل معاك قبل كده إن علاقة اتغيرت بسبب سوء فهم كان ممكن يتحل بكلمتين؟



#العلاقات

19/08/2026

ساعات المشكلة مش إن واحد فيكم "بيزن" والتاني "بيهرب".

المشكلة إنكم دخلتوا في دايرة بتكرر نفسها كل مرة.

هي بتحاول تتكلم أكتر عشان تطمن إن المشكلة هتتحل وإن العلاقة بخير.

هو يحس بضغط أكبر، فينسحب ويسكت.

كل ما هو يبعد، قلقها يزيد.

وكل ما قلقها يزيد، تحاول تقرب وتتكلم أكتر.

فيبعد أكتر.

لحد ما الاتنين يخرجوا من الخلاف وكل واحد مقتنع إن التاني هو المشكلة.

في أبحاث العلاقات النمط ده معروف باسم Demand–Withdraw Pattern.

وعشان نبدأ نغيره، مش كفاية نسأل

"مين فينا غلطان؟"

محتاجين نسأل

"إيه اللي بيحصل بينا كل مرة؟"

"أنا بعمل إيه لما هو يعمل كده؟"

"وهو بيرد على تصرفي بإيه؟"

"وإيه الاحتياج اللي بحاول أوصله بالطريقة دي؟"

أوقات أول خطوة في تغيير مشكلة متكررة في العلاقة إنك تشوفي الدايرة نفسها بدل ما تفضلي مركزة على مين بدأها.

قوليلي بقى...

إيه الـ pattern اللي بتحسي إنه بيتكرر في خناقاتكم كل مرة؟

وممكن يكون هو الحالة اللي نفككها سوا المرة الجاية.

17/08/2026

في لحظات بتعدي… وفي لحظات بتحسي إنها بتقفل فصل كامل من حياتك.
وأنا في اليوم ده مكنتش بحتفل بشهادة بس.
كنت بحتفل بكل مرة بدأت فيها من جديد. بكل مرة قلت لنفسي كملي حتى لو مش عارفة الطريق هيوصلك لفين. وبكل مرة حاولت أتعلم وأطور من نفسي وسط مسؤوليات وحياة مش بتقف.
يمكن أكتر حاجة لمستني وأنا بتفرج على الفيديو إني افتكرت آلاء من كام سنة… قد إيه كان عندها أسئلة كتير ومش عارفة هي رايحة فين بالظبط.
بس كملت.
جربت. اتعلمت. غيرت طريق. وقعت وقامت. وفي حاجات بدأت فيها ومكملتش، وحاجات تانية اكتشفت إنها شبهي فعلًا.
وعارفة كمان إن دي مش نهاية الطريق.

دي آلاء وهي بتبدأ فصل جديد.

الحمد لله على كل خطوة فاتت…
وعلى كل خطوة لسه جاية.
Rana Hany | Parenting Consultant شكرا على اليوم اللي مش هنساه دا 😍
Arab Family & Child Safety Summit

16/08/2026

اللهم لك الحمد
Certified Child & Adolescent Sexual Education Trainer

مدرب معتمد في التوعية الجنسية للأطفال والمراهقين.
التخرج ضمن Arab Family & Child Safety Summit 2026، واللي كان يوم مليان معرفة ونقاشات مهمة حوالين أمان أطفالنا وأسرتنا
شكرا يا دكتور رنا Rana Hany | Parenting Consultant علي اليوم العظيم دا

مبسوطه اوى اني شفتك Rasha | Educator & Coach وال panel كانت حلوه اوي
مبسوطه اوى اني حضرت للعظيم ومعلمي كوتش حسام الغرورى
وكل ال talks الخطيره ف اليوم

خطوة في طريق أنا اخترته من فترة إني أفهم الطفل أكتر، وأساعد الأهل يبنوا مع أولادهم مساحة فيها وعي وأمان وثقة.
لأن التوعية مش تخويف للطفل.
التوعية إن الطفل يفهم جسمه وحدوده، يعرف يحمي نفسه، يعرف يقول "لأ"، ويفرق بين المواقف الآمنة وغير الآمنة، والأهم يعرف إنه يقدر يرجع لأهله ويحكي من غير خوف.
فخورة بالخطوة دي.
ومتحمسة جدًا للي جاي، ولإني أبدأ أحوّل اللي اتعلمته لحاجة حقيقية تفيد الأهل والأطفال.
خطوة جديدة في رحلتي ومسؤولية جديدة أنا سعيدة بيها.

09/08/2026

ليه ثقتك بنفسك بتختفي قدام ناس معينة؟

لأن أوقات المشكلة مش في ثقتك بنفسك…
المشكلة في إنتِ بتشوفي نفسك إزاي وإنتِ معاهم.

ممكن يكون شخص بيخليكي تحسي إنك لازم تثبتي نفسك،
أو شخص بتخافي من حكمه عليكي،
أو علاقة اتعودتي فيها إن رأيه أهم من رأيك.

وفجأة تلاقي نفسك بتفكري:
“هو شايفني إزاي؟”
“قلت حاجة غلط؟”
“يا ترى أنا كفاية؟”

الحقيقة؟
ثقتك بنفسك مش المفروض تعتمد على مين واقف قدامك.

جربي تسألي نفسك المرة الجاية:
“أنا فعلًا مش واثقة في نفسي… ولا أنا بس مش حاسة بالأمان وأنا مع الشخص ده؟”

الفرق بينهم كبير. 🤍

احفظي البوست وارجعيله لما تلاقي ثقتك بنفسك بتتغير حسب الشخص اللي قدامك.