إبراهيم جاد - Ibrahim Gad

سورلوث هو بديل فلاهوفيتش في يوفنتوس.. مقارنة سريعة بين الإتنين في فيديو هتلاقيه في أول كومنت 👇

فرصة أخيرة ممكنة لـ دوجلاس لويز مع سباليتي في يوفنتوس!

نادي أستون فيلا قرر إنه مش هيتعاقد مع دوجلاس لويز بشكل نهائي بعد نهاية إعارته من يوفنتوس، وبالتالي اللاعب هيرجع يوفنتوس الموسم القادم.

من شهور بسيطة كان دوجلاس لويز على رأس القائمة اللي كدا كدا ماشية من يوفنتوس، لكن بعد عدم التأهل لدوري أبطال أوروبا واللي طبعًا ألقى بظلاله على اختيارات يوفنتوس في السوق وقللها كتير فبدأ يكون فيه فرصة إنه يكمل مع يوفنتوس.

"ماتيو موريتو" أكد إن سباليتي طلب من إدارة يوفنتوس إنه يجرب دوجلاس لويز في المعسكر الإعدادي وإنه شايف إن اللاعب بيمتلك إمكانيات كويسة يقدر يشتغل عليها، وهيختبر مدى استجابته للتطوير واللي ممكن يقدمه في الوديات والمعسكر الإعدادي، ويقرر وقتها هل يكمل ولا يمشي خصوصًا إن خلاص فيه استقرار على رحيل كوبماينرز وآدزيتش وميريتي فهيخرج من عندك 3 في نص الملعب.

تسألني عن رأيي أنا.. دوجلاس لويز كان أكتر صفقة أنا تحمست ليها وقت التعاقد معاه من جنتولي لأن اللعيب كان بيقدم مستويات استثنائية مع أستون فيلا خليته محط اهتمام أندية كبيرة بما فيهم جوارديولا وإنزو ماريسكا مع تشيلسي وغيرهم.

فنيًا عندي ثقة كبيرة إن سباليتي يقدر يفوق دوجلاس لويز ويستفيد منه فنيًا لأنه لعيب عنده إمكانيات كبيرة جدًا، لكن مشكلتي الكبيرة معاه هو عقليته واللي بصراحة خوفتني جدًا في فترته الأولى مع يوفنتوس واللي مخلياني مش قادر أراهن عليه.

لكن عمومًا لو هتجيبه كخيارات بديلة مكان الثلاثي اللي نستنى رحيله إن شاء الله فهو معتقدش هيبقى اسوء منهم، وطالما مش هتقدر تجيب صفقات كبيرة وكويسة فهو يستاهل تراهن عليه وتديله فرصة أخيرة طالما مش هيجيبلك بيعة كويسة.

جماهير يوفنتوس رأيها إيه؟

كوت ديفوار تثير الرعب في فرنسا "ديشامب" قبل كأس العالم 2026!

منتخب كوت ديفوار قدر يحقق فوز مهم جدًا على حساب منتخب فرنسا في المباراة الودية استعدادًا لكأس العالم 2026 بهدفين مقابل هدف وحيد، لكنها نتيجة حرفيًا عملت قلق كبير جدًا عند الديوك.

الفكرة إن منتخب فرنسا شارك بالتشكيل الأساسي في المباراة أمام كوت ديفوار، طبعًا تم استبدالهم على مدار الشوط التاني تدريجيًا، بالتالي فالفريق الأساسي اللي على الأغلب هيتم الاعتماد عليه في البطولة.

ظهر مشكلة دفاعية كبيرة في منتخب فرنسا بعد ما قدر منتخب كوت ديفوار يخلق 3 فرص محققة للتسجيل سجل منهم هدفين، في المقابل منتخب فرنسا مخلقش أي فرصة كبيرة محققة للتسجيل خلال المباراة.

الصحف الفرنسية بعد نهاية المباراة شنت هجوم عنيف على ديديه ديشامب وبدأوا زي ما بنقول يقلبوا في الدفاتر بقا ويتكلموا عن الخيارات اللي واخدها واللعيبة اللي سايبها، وكمان على منظومة اللعب والأفكار اللي بتطبق.

للأمانة، بتمنى إن منتخب فرنسا يخرج من بدري في كأس العالم دا لأن ديشامب واخد سمعة كبيرة بسبب اللي بيحققه مع المنتخب دا رقميًا رغم إنك لما تبص على قايمة المنتخب دا هتتأكد إن يطلع أكتر من كدا فنيًا ورقميًا وكل حاجة 10 مرات والله.

رحيل توروب إنهاء جزء من الأزمة لكن لسة الأهلي مصلحش أي حاجة!

زيي زي ناس كتير فرحان جدا برحيل ييس توروب لأنه كان عقبة كبيرة جدا في طريق أي خطوة إصلاح، وأزعم إنه أصعب مدرب الأهلي تعامل معاه ماديا في فترة شغلي ومتابعتي للتفاصيل دي.

لكن عشان نحط الأمور في نصابها، رحيل توروب هو حل جزء من الأزمة لكنه لسة ميعبرش عن أي حاجة في طريق تصحيح مسار الأهلي واللي انتهى بموسم كارثي.

بداية الإصلاح الحقيقية واللي اعتقد إنها محورية في مستقبل فريق الكورة والمسؤولين عنه هو اختيار مدير فني قوي بعناية يقدر ينجح مع الفريق ويحط بصمته، اختيار من ريحة فايلر وكولر كدا، ودا خطوة لا مفر منها لو عايز تصلح ولازم تكون دقيق جدا في اختيارك وفي نفس الوقت سريع.

القضية التانية اللي لازملها حل جذري في الأهلي هي أوضة اللبس، مينفعش تحط راسك في الرمل ولا تتغافل عن مشاكل اللعيبة اللي حصلت الموسم اللي فات واللي أنا لسة شايفها سبب دمار الموسم يمكن أكتر من المدرب، أوعى تعتمد إن النار هتاكل بعض وتخلص ولا إن مدرب قوي الشخصية ومدير كورة قوي هيحلوها، لازم ترسي العدل وتخلي النفوس صافية.

أنا مع خطة تعديل العقود قلبا وقالبا وربطها بالبطولات وإن السقف يرجع يتطبق على الكل تاني، بس المهم يكون (على الكل) مش لعيبة معينة ولا اللي بيجددوا بس، وهقولهالك مرة واتنين وتلاتة اللي مش عاجبه دا يمشي مهما كان اسمه، يجيب عرض ويمشي بس ارجع حط سيستمك تاني وطبق نظامك زي زمان على الكل.

النقطة الأخيرة هو تدعيم الفريق وتجديد الدماء بلعيبة عندها طموح تحقق حاجة لنفسها سواء بطولات أو شهرة أو غيره، الأهلي فريق عجوز محتاج عناصر أكتر شباب، وكمان عندك نواقص في مراكز كتير زي رأس الحربة اللي معندكش فيه ولا لعيب والوسط اللي ناقص كتير والباكات والدفاع، كل دا محتاج تدعيم.

وسط التدعيم أنت هيكون في إيدك التعاقد مع 2 محترفين أو 3 (فو بن رمضان مشي) ، لازم تجيب لعيبة تعملك الفارق لازم لأن هم دول فعلا اللي تراهن عليهم، عايزين صفقات بكواليتي معلول ووسام أبو علي وأجايي دا لازم يبقى الليفل بتاعك.

لسة المشوار طويل أوي يا أهلي، ونتمنى تبقى بداية الغيث قطرة.

نهاية رحلة ييس توروب مع الأهلي.. المدرب الأغرب في آخر 5 سنين!

الدنماركي ييس توروب وقع بالفعل على تسوية مع النادي الأهلي عشان يبقى بكدا بيرحل عن تدريب الفريق بشكل رسمي، والإعلان الرسمي هيكون بكرة إن شاء الله بعد اجتماع مجلس الإدارة.

الأهلي هيدفع لـ ييس توروب 5 شهور عشان يمشي "3 شهور شرط جزائي + راتب شهر يونيو (عشان النادي ميستناش لحد 30 يونيو زي ما العقد بيقول) + شهر تعويض" فقط لا غير، وأي فلوس إضافية الوكالة بتاعته هتاخدها أو ما شابه هتكون من برا خزينة النادي تمامًا.

ليه الأهلي قرر يدفعله الشهر التعويض دا بدل ما يستنى لحد 30/6؟ لأن الأهلي شايف إن الانتظار الشهر دا مش في صالحه في التعاقد مع مدرب جديد لأن فيه أسماء موجودة في السوق مش هتستناك لحد آخر الشهر، والأهلي متكتف مش عارف يتفاوض مع حد طول ما توروب موجود وآخره بيبعت وسطاء فدا مبيكونش فيه جدية بالنسبة للمدربين، فالأهلي كان عايز يسوي الموضوع بدري بدري.

ليه أنا بقول على ييس توروب المدرب الأغرب؟ لأن الحقيقة هو أكتر مدرب حصله تراجع سريع جدًا بشكل غير مبرر في آخر 10 سنين مثلًا، بمعنى إن كل مدرب كان بيجي كان بيكون باين هو كويس ولا مخيش من الأول ووحش زي سواريش وريبييرو مثلا، وفيه مدربين كانوا كويسين والكيرف نزل شوية بشوية على مدار مواسم زي موسيماني مثلا لكن اللي حصل مع توروب دا غريب.

توروب بدايته مع الأهلي كانت ممتازة كأداء وحقق السوبر على حساب الزمالك، وحتى في أفريقي 7 نقط في أول 3 جولات وبتعمل ماتش جامد جدا ضد الجيش الملكي "وصيف أفريقيا" في ملعبه ووسط جماهيره وأحداث صعبة وبترجع في الماتش وكنت قادر تكسب كمان وفريقك بيهيمن على كل الخصوم، وكل حاجة كانت مطمئنة جدا جدا للأهلي وجماهيره قبل كأس أمم أفريقيا.

الدوري وقف واللعيبة راحت أمم أفريقيا، تحس إن توروب اتبدل، خروج مهين من الكاس وبعد ما اللعيبة رجعت كل حاجة كانت كويسة قبل أمم أفريقيا اختفت تمامًا، مش اللي هو تراجع واحدة واحدة لأ دا انهيار كامل ومالوش سبب مبرر خالص.

عمومًا، الحمدلله إنه مشي والقصة انتهت بدون مشاكل، ومعاه نقدر نقول تبدأ حقبة ياسين منصور وسيد عبد الحفيظ والجاي كله بتاعهم وهم اللي هيتحاسبوا عليه بالإيجاب أو بالسلب لأن دايمًا كانت إيديهم متكتفة بوجود توروب.

اختيار مدرب قوي ويقدر ينجح هيكون مصيري في علاقة الثنائي مع الجماهير، ونصيحة لوجه الله بلاش كاردوزو عشان أنا متأكد إن الخيار دا رايح جاي وممكن تشوفوه خيار "آمن" لمدرب وصل نهائي دوري الأبطال 3 مرات ورا بعض بس والله العظيم مدرب عادي وأقل من العادي كمان.

الجزائر يحقق انتصار تاريخي على هولندا قبل كأس العالم 2026!

منتخب الجزائر بيحقق انتصار تاريخي بكل ما تحمله الكلمة من معنى على حساب منتخب هولندا بهدف نظيف قبل أيام من انطلاق بطولة كأس العالم 2026.

طيب ليه أنا بقول عليه انتصار تاريخي رغم إنه ودي؟ لأن دي أول مرة منتخب هولندا يخسر على ملعبه في المباراة الختامية قبل السفر لكأس العالم في التاريخ كله، محصلتش قبل كدا في كل مشاركاته السابقة.

فنيًا منتخب الجزائر ظهر بشكل مبشر في تجاربه الودية خصوصًا إنه واجه منتخبين أقوياء، بعد ما تعادل سلبيًا مع أوروجواي وفاز على منتخب هولندا، وتحديدًا على المستوى الدفاعي إدى مؤشر إيجابي جدًا ودا حاجة مهمة في بطولة زي كأس العالم.

لوكا زيدان كان نجم المباراة الأول أمام هولندا، 6 تصديات منهم 3 من جوا منطقة الجزاء، كمان ضد أوروجواي عمل ماتش كبير وكان من أسباب الكلين شيت في الماتشين.

أنيس حاج موسى بيثبت إمكانياته الكبيرة وإنه موهبة صاعدة بسرعة الصاروخ مع الجزاير، بيسجل هدف الفوز على هولندا بطريقة رائعة، وفي كل مرة بينزل للملعب بيدي حيوية كبيرة في الأداء، فهل ممكن يتم التفكير في الدفع بيه أساسي على حساب محرز اللي بدنيًا مبقاش زي زمان؟

تحضير مبشر للمنتخب الجزائري، وإن شاء الله يقدم بطولة كبيرة هو وكل المنتخبات العربية.

مانشستر يونايتد حسم التعاقد مع تدعيم وسط ملعبه بصفقة ممتازة!

بحسب (فابريزيو رومانو) مانشستر يونايتد توصل لاتفاق نهائي مع أتالانتا للتعاقد مع لاعب الوسط البرازيلي إيدرسون مقابل 45 مليون يورو شاملة الإضافات.

صاحب الـ26 سنة هيوقع على عقود انضمامه لنادي مانشستر يونايتد لمدة 4 مواسم قادمة، ويستعد لإجراء الكشف الطبي في الساعات القادمة.

مانشستر يونايتد كسم لعيب Box to Box هايل هيقدر يعمل ثنائية متوازنة جدا مع برونو فيرنانديز كثنائية للعيبة رقم 8 ولو تم التعاقد مع لعيب رقم 6 محترم هيبقى وسط ملعب متكامل.

إيدرسون لعيب قوي جدا في الضغط وبيفتك الكرة بمعدلات ممتازة وعنده work rate عالي بيخليه يغطي مساحات الملعب خصوصا على طرف الملعب اللي بيشارك فيه كلعيب داعم للطرف.

بالكورة، إيدرسون لعيب مميز في حمل الكرة والتقدم بيها مسافات طويلة من غير ما تتقطع منه (Ball Carrying) وبيرسل تمريرات تقدمية مباشرة كويسة برضو وقت الخروج بالكرة لكنه في التلت الأخير مش هيديك معدلات صناعة وتسجيل كتير لكن دا هيعوضه فيه برونو فيرنانديز.

صفقة ممتازة لمانشستر يونايتد في رأيي، مرهونة بس بتأقلمه على رتم الدوري الإنجليزي لو حصل فهيكون من أهم لاعبي موسم يونايتد.